કેન્દ્રીય પર્યાવરણ, વન અને આબોહવા પરિવર્તન મંત્રી શ્રી ભૂપેન્દર યાદવે આજે નવી દિલ્હી ખાતે મુખ્ય અતિથિ તરીકે ‘ઇલેક્ટ્રિક મોબિલિટી: વિકસિત ભારત માટે ભારતને ઇલેક્ટ્રિક મોબિલિટી હબ બનાવવું’ વિષય પરની રાષ્ટ્રીય પરિષદની અધ્યક્ષતા કરી હતી. આ પરિષદ એસોસિએટેડ ચેમ્બર્સ ઓફ કોમર્સ એન્ડ ઇન્ડસ્ટ્રી ઓફ ઇન્ડિયા (ASSOCHAM) દ્વારા આયોજિત કરવામાં આવી હતી, જેમાં ભારતના ઇલેક્ટ્રિક મોબિલિટી સંક્રમણને વેગ આપવા અને વૈશ્વિક ઇવી (EV) મેન્યુફેક્ચરિંગ હબ તરીકે દેશની સ્થિતિને મજબૂત કરવાના રોડમેપ પર વિચાર-વિમર્શ કરવા માટે વરિષ્ઠ નીતિ નિર્માતાઓ, ઉદ્યોગ જગતના અગ્રણીઓ, ઓટોમોટિવ ઉત્પાદકો, ટેકનોલોજી પ્રદાતાઓ અને અન્ય હિસ્સેદારો એકસાથે આવ્યા હતા.

આ વિચાર-વિમર્શ દરમિયાન વિકસિત ભારત 2047 ના વિઝન હેઠળ ઇવી (EV) અપનાવવાની પ્રક્રિયાને વેગ આપવા અને ભારતને વૈશ્વિક ઇલેક્ટ્રિક મોબિલિટી હબ તરીકે સ્થાપિત કરવા માટે નીતિગત સાતત્ય, મજબૂત ચાર્જિંગ ઇન્ફ્રાસ્ટ્રક્ચર, ઉત્પાદનનું સ્થાનિકીકરણ, સ્થિતિસ્થાપક બેટરી સપ્લાય ચેઈન, ધિરાણ સહાય અને તકનીકી નવીનતાની જરૂરિયાત પર ભાર મૂકવામાં આવ્યો હતો.

પરિષદના ઉદ્ઘાટન સત્રને સંબોધતાં શ્રી યાદવે જણાવ્યું હતું કે ભારતનું ઇલેક્ટ્રિક મોબિલિટી તરફનું સંક્રમણ માત્ર એક ટેકનોલોજીના સ્થાને બીજી ટેકનોલોજી લાવવા પૂરતું મર્યાદિત નથી—તે એક ટકાઉ ઔદ્યોગિક ઇકોસિસ્ટમનું નિર્માણ કરવા વિશે છે જે ઉત્પાદનને મજબૂત કરે છે, ગ્રીન જોબ્સનું સર્જન કરે છે અને 2047 સુધીમાં પ્રધાનમંત્રીના વિકસિત ભારતના વિઝનને ટેકો આપે છે. તેમણે ઉમેર્યું કે, “જેમ આપણે આ સંક્રમણને વેગ આપીએ છીએ, તેમ આપણું ધ્યાન હરિત વિકાસ, સુદ્રઢ ઇન્ફ્રાસ્ટ્રક્ચર, પારદર્શક શાસન અને સર્ક્યુલર ઇકોનોમી પર કેન્દ્રિત રહેવું જોઈએ જે લાંબાગાળાની પર્યાવરણીય સ્થિરતા સુનિશ્ચિત કરે છે.”

મંત્રીશ્રીએ માહિતી આપી હતી કે સરકારે પર્યાવરણીય મંજૂરીઓને સરળ બનાવવા, PARIVESH પોર્ટલ દ્વારા મંજૂરી પ્રણાલીઓનું ડિજીટલાઇઝેશન કરવા, પાલનની જરૂરિયાતોને તર્કસંગત બનાવવા અને પર્યાવરણીય સુરક્ષા સાથે સમાધાન કર્યા વિના ઇઝ ઓફ ડુઇંગ બિઝનેસને પ્રોત્સાહન આપવા માટે શ્રેણીબદ્ધ સુધારાઓ હાથ ધર્યા છે. આ સુધારાઓ જવાબદાર વિકાસ સુનિશ્ચિત કરવાની સાથે ઝડપી રોકાણોને સક્ષમ બનાવી રહ્યા છે, તેમ તેમણે જણાવ્યું હતું.

શ્રી યાદવે નોંધ્યું હતું કે, “ભારતનું ભવિષ્ય રેખીય ‘ટેક-મેક-ડિસ્પોઝ’ મોડલમાંથી બહાર આવીને પુનઃઉપયોગ, રિસાયક્લિંગ અને ટકાઉ સંસાધન સંચાલન પર આધારિત સર્ક્યુલર ઇકોનોમી તરફ આગળ વધવામાં રહેલું છે.” તેમણે જણાવ્યું હતું કે ઇલેક્ટ્રિક મોબિલિટીને મજબૂત ચાર્જિંગ ઇન્ફ્રાસ્ટ્રક્ચર, અદ્યતન ઉત્પાદનનું સ્થાનિકીકરણ, સુરક્ષિત ક્રિટિકલ મિનરલ સપ્લાય ચેઈન, બેટરી રિસાયક્લિંગ અને સંસાધન કાર્યક્ષમતા દ્વારા ટેકો મળવો જોઈએ.

વધુમાં, મંત્રીશ્રીએ જણાવ્યું હતું કે ઉદ્યોગો, નીતિ નિર્માતાઓ અને સંસ્થાઓએ એકસાથે મળીને એક નવીનતા-પ્રેરિત ઇકોસિસ્ટમનું નિર્માણ કરવું જોઈએ જે ભારતને સ્વચ્છ ગતિશીલતા (ક્લીન મોબિલિટી) માટે વૈશ્વિક હબ તરીકે સ્થાપિત કરે. તેમણે અંતમાં જણાવ્યું હતું કે, “ઇકોલોજી અને ઇકોનોમી બંનેએ સાથે મળીને પ્રગતિ કરવી જોઈએ, અને સામૂહિક પ્રયાસો દ્વારા, ભારત ટકાઉ ઉત્પાદન, ગ્રીન મોબિલિટી અને આબોહવા પ્રત્યે સભાન વિકાસમાં વૈશ્વિક અગ્રણી તરીકે ઉભરી શકે છે.”

આ ઉદ્ઘાટન સત્રમાં એસોચેમના પ્રમુખ અને યુનો મિન્ડા (UNO Minda)ના ચેરમેન શ્રી નિર્મલ કે. મિન્ડા; ASSOCHAM નેશનલ કાઉન્સિલ ઓન ગ્રીન મોબિલિટીના ચેરમેન અને જેબીએમ (JBM) ગ્રુપના વાઇસ સીએમડી શ્રી નિશાંત આર્યા; અને ASSOCHAMના સેક્રેટરી જનરલ શ્રી સૌરભ સન્યાલ ઉપસ્થિત રહ્યા હતા.

SM/DK/JD