ಮೂಲಸೌಕರ್ಯ ಮತ್ತು ಇತರ ರಾಷ್ಟ್ರೀಯ ಪ್ರಾಮುಖ್ಯತೆಯ ವಲಯಗಳಿಗಾಗಿ ಭಾರತದ ಹೂಡಿಕಾ ಬದ್ಧತೆಯನ್ನು ಹೆಚ್ಚಿಸುವ ನಿಟ್ಟಿನಲ್ಲಿ ಒಂದು ಪ್ರಮುಖ ಹೆಜ್ಜೆಯಾಗಿ, ಪ್ರಧಾನಮಂತ್ರಿ ಶ್ರೀ ನರೇಂದ್ರ ಮೋದಿ ಅವರ ನಾಯಕತ್ವದಲ್ಲಿ ಕಳೆದ ವಾರ ನಡೆದ ಕೇಂದ್ರ ಸಚಿವ ಸಂಪುಟ ಸಭೆಯು, ರಾಷ್ಟ್ರೀಯ ಹೂಡಿಕೆ ಮತ್ತು ಮೂಲಸೌಕರ್ಯ ನಿಧಿಯ (NIIF) ಹೊಸ ಮತ್ತು ಮುಂಬರುವ ನಿಧಿಗಳಿಗಾಗಿ ಭಾರತ ಸರ್ಕಾರದಿಂದ ಹೆಚ್ಚುವರಿಯಾಗಿ 30,000 ಕೋಟಿ ರೂಪಾಯಿಗಳ ಹೂಡಿಕೆಗೆ ಅನುಮೋದನೆ ನೀಡಿದೆ. ಇದರೊಂದಿಗೆ NIIF ನಲ್ಲಿ ಭಾರತ ಸರ್ಕಾರದ ಒಟ್ಟು ಹೂಡಿಕೆಯ ಬದ್ಧತೆಯು 60,000 ಕೋಟಿ ರೂ.ಗೆ ಏರಿಕೆಯಾಗಿದೆ.

ರಾಷ್ಟ್ರೀಯ ಹೂಡಿಕೆ ಮತ್ತು ಮೂಲಸೌಕರ್ಯ ನಿಧಿ (NIIF) ಭಾರತದ ಸಾರ್ವಭೌಮ ಆಧಾರಿತ ನಿಧಿಯಾಗಿದ್ದು, ಇದನ್ನು 'ನ್ಯಾಷನಲ್ ಇನ್ವೆಸ್ಟ್‌ಮೆಂಟ್ ಅಂಡ್ ಇನ್ಫ್ರಾಸ್ಟ್ರಕ್ಚರ್ ಫಂಡ್ ಲಿಮಿಟೆಡ್' (NIIFL) ವೃತ್ತಿಪರವಾಗಿ ನಿರ್ವಹಿಸುತ್ತದೆ. NIIF ನಲ್ಲಿ ಭಾರತ ಸರ್ಕಾರವು 49% ಪಾಲುದಾರಿಕೆಯನ್ನು ಹೊಂದಿದ್ದು, ಪ್ರಸ್ತುತ ಇದು ತನ್ನ ವಿವಿಧ ನಿಧಿಗಳು ಮತ್ತು ಹೂಡಿಕಾ ತಂತ್ರಗಳ ಅಡಿಯಲ್ಲಿ ಸುಮಾರು 40,000 ಕೋಟಿ ರೂಪಾಯಿಗಳ ಬಂಡವಾಳ ಬದ್ಧತೆಯನ್ನು ನಿರ್ವಹಿಸುತ್ತಿದೆ. ಬೃಹತ್ ಪೋರ್ಟ್‌ಫೋಲಿಯೊ ನಿರ್ಗಮನಗಳ ಮೂಲಕ ಹೂಡಿಕೆದಾರರಿಗೆ ಸುಮಾರು 12,000 ಕೋಟಿ ರೂ.ಗಳನ್ನು ಹಿಂದಿರುಗಿಸುವ ಮೂಲಕ, NIIF ಬಂಡವಾಳ ಹೂಡಿಕೆ ಮತ್ತು ಗಳಿಕೆಯಲ್ಲಿ ಬಲವಾದ ದಾಖಲೆಯನ್ನು ಪ್ರದರ್ಶಿಸಿದೆ.

NIIF ಸಾರ್ವಭೌಮ ಸಂಪತ್ತಿನ ನಿಧಿಗಳು, ಪಿಂಚಣಿ ನಿಧಿಗಳು, ಬಹುಪಕ್ಷೀಯ ಅಭಿವೃದ್ಧಿ ಸಂಸ್ಥೆಗಳು ಮತ್ತು ಪ್ರಮುಖ ದೇಶೀಯ ಹಣಕಾಸು ಸಂಸ್ಥೆಗಳು ಸೇರಿದಂತೆ ಪ್ರತಿಷ್ಠಿತ ಸಾಂಸ್ಥಿಕ ಹೂಡಿಕೆದಾರರಿಂದ ಬಂಡವಾಳವನ್ನು ಸಂಗ್ರಹಿಸಿದೆ. ಇವುಗಳಲ್ಲಿ ಅಬುಧಾಬಿ ಇನ್ವೆಸ್ಟ್‌ಮೆಂಟ್ ಅಥಾರಿಟಿ, ಆಸ್ಟ್ರೇಲಿಯನ್ ಸೂಪರ್, ಸಿಪಿಪಿ ಇನ್ವೆಸ್ಟ್‌ಮೆಂಟ್ಸ್, ಒಂಟಾರಿಯೊ ಟೀಚರ್ಸ್ ಪೆನ್ಷನ್ ಪ್ಲ್ಯಾನ್, ಪಿಎಸ್‌ಪಿ ಇನ್ವೆಸ್ಟ್‌ಮೆಂಟ್ಸ್, ಟೆಮಾಸೆಕ್, ಏಷ್ಯನ್ ಇನ್ಫ್ರಾಸ್ಟ್ರಕ್ಚರ್ ಇನ್ವೆಸ್ಟ್‌ಮೆಂಟ್ ಬ್ಯಾಂಕ್, ನ್ಯೂ ಡೆವಲಪ್‌ಮೆಂಟ್ ಬ್ಯಾಂಕ್, ಏಷ್ಯನ್ ಡೆವಲಪ್‌ಮೆಂಟ್ ಬ್ಯಾಂಕ್, ಜಪಾನ್ ಬ್ಯಾಂಕ್ ಫಾರ್ ಇಂಟರ್ನ್ಯಾಷನಲ್ ಕೋಆಪರೇಷನ್, ಯು.ಎಸ್. ಇಂಟರ್ನ್ಯಾಷನಲ್ ಡೆವಲಪ್‌ಮೆಂಟ್ ಫೈನಾನ್ಸ್ ಕಾರ್ಪೊರೇಷನ್, ಆಕ್ಸಿಸ್ ಬ್ಯಾಂಕ್, ಎಚ್‌ಡಿಎಫ್‌ಸಿ ಗ್ರೂಪ್, ಐಸಿಐಸಿಐ ಬ್ಯಾಂಕ್, ಕೊಟಕ್ ಮಹೀಂದ್ರಾ ಲೈಫ್ ಇನ್ಶೂರೆನ್ಸ್ ಮತ್ತು ಸ್ಟೇಟ್ ಬ್ಯಾಂಕ್ ಆಫ್ ಇಂಡಿಯಾ ಸೇರಿವೆ.

ಈ ಹೂಡಿಕೆದಾರರು ಆಸ್ಟ್ರೇಲಿಯಾ, ಕೆನಡಾ, ಜಪಾನ್, ಸಿಂಗಾಪುರ್, ಯುನೈಟೆಡ್ ಅರಬ್ ಎಮಿರೇಟ್ಸ್ ಮತ್ತು ಯುನೈಟೆಡ್ ಸ್ಟೇಟ್ಸ್ ಸೇರಿದಂತೆ ವಿವಿಧ ಭೌಗೋಳಿಕ ಪ್ರದೇಶಗಳವರಾಗಿದ್ದು, ಇದು ಭಾರತದ ಅಭಿವೃದ್ಧಿ ಪಥ ಮತ್ತು NIIF ನ ಆಡಳಿತ ಹಾಗೂ ವಾಣಿಜ್ಯ ಸಾಧನೆಗಳ ಮೇಲಿನ ಬಲವಾದ ಅಂತರರಾಷ್ಟ್ರೀಯ ವಿಶ್ವಾಸವನ್ನು ಪ್ರತಿಬಿಂಬಿಸುತ್ತದೆ.

NIIF ನ ನಾಲ್ಕು ಕಾರ್ಯಾಚರಣಾ ಹೂಡಿಕಾ ತಂತ್ರಗಳು - ಮೂಲಸೌಕರ್ಯ, ಖಾಸಗಿ ಮಾರುಕಟ್ಟೆಗಳು, ಗ್ರೋತ್ ಇಕ್ವಿಟಿ ಮತ್ತು ಇಂಡಿಯಾ-ಜಪಾನ್ ಬಿಸಿನೆಸ್ ಕಾರಿಡಾರ್‌ನಲ್ಲಿನ ಹವಾಮಾನ ಹೂಡಿಕೆಗಳು - ಗಮನಾರ್ಹ ಹೂಡಿಕಾ ವೇಗವನ್ನು ಸಾಧಿಸಿವೆ.

NIIF ನ ಮೊದಲ ಮೂಲಸೌಕರ್ಯ ನಿಧಿಯು 16,000 ಕೋಟಿ ರೂಪಾಯಿಗಳ ನಿಧಿಯೊಂದಿಗೆ ಭಾರತದ ಅತಿದೊಡ್ಡ ದೇಶೀಯ ಮೂಲಸೌಕರ್ಯ ನಿಧಿಯಾಗಿದೆ. ಇದು ಸಾರಿಗೆ (ರಸ್ತೆಗಳು, ಬಂದರುಗಳು ಮತ್ತು ಲಾಜಿಸ್ಟಿಕ್ಸ್, ಮತ್ತು ವಿಮಾನ ನಿಲ್ದಾಣಗಳು), ಇಂಧನ (ನವೀಕರಿಸಬಹುದಾದ ಇಂಧನ, ಸ್ಮಾರ್ಟ್ ಮೀಟರ್‌ಗಳು ಮತ್ತು ವಿದ್ಯುತ್ ಪ್ರಸರಣ) ಮತ್ತು ಡಿಜಿಟಲ್ ಮೂಲಸೌಕರ್ಯಗಳಾದ್ಯಂತ ವೇದಿಕೆಗಳನ್ನು ಸೃಷ್ಟಿಸಿದೆ. ಇದರ ಖಾಸಗಿ ಮಾರುಕಟ್ಟೆ ನಿಧಿಯು ಸ್ಥಳೀಯ ವ್ಯವಸ್ಥಾಪಕರಿಂದ ನಿರ್ವಹಿಸಲ್ಪಡುವ ಅನೇಕ 'ಡಾಟರ್ ಎಐಎಫ್' (AIFs) ಗಳಲ್ಲಿ ಹೂಡಿಕೆ ಮಾಡಿದೆ, ಇವು ಹವಾಮಾನ, ಕೈಗೆಟುಕುವ ವಸತಿ, ಕೈಗೆಟುಕುವ ಆರೋಗ್ಯ ಸೇವೆ ಮತ್ತು ವೆಂಚರ್ ಕ್ಯಾಪಿಟಲ್ (VC)/ತಂತ್ರಜ್ಞಾನದಂತಹ ಕ್ಷೇತ್ರಗಳಲ್ಲಿ ಹೂಡಿಕೆ ಮಾಡಿವೆ. NIIF ನ ಸ್ಟ್ರಾಟೆಜಿಕ್ ಅಪಾರ್ಚುನಿಟೀಸ್ ಫಂಡ್ ಹಣಕಾಸು ಸೇವೆಗಳು, ಆರೋಗ್ಯ ಮತ್ತು ಉತ್ಪಾದನೆಯಂತಹ ಬೆಳವಣಿಗೆಯ ವಲಯಗಳ ಮೇಲೆ ಕೇಂದ್ರೀಕರಿಸಿದೆ. NIIF ನ 'ಇಂಡಿಯಾ-ಜಪಾನ್ ಫಂಡ್' ಅದರ ಮೊದಲ ದ್ವಿಪಕ್ಷೀಯ ನಿಧಿಯಾಗಿದ್ದು, ಇದು ಹವಾಮಾನ ಮತ್ತು ವೃತ್ತಾಕಾರದ ಆರ್ಥಿಕತೆ ಹಾಗೂ ಇಂಧನ ಪರಿವರ್ತನೆಯ ಮೇಲೆ ಕೇಂದ್ರೀಕರಿಸುತ್ತದೆ.

ಒಟ್ಟಾರೆಯಾಗಿ, NIIF ನಿರ್ವಹಿಸುವ ನಿಧಿಗಳು ಭಾರತದ ಹಲವು ರಾಜ್ಯಗಳು ಮತ್ತು ಕೇಂದ್ರಾಡಳಿತ ಪ್ರದೇಶಗಳಲ್ಲಿ ಸಾರಿಗೆ, ಇಂಧನ ಪರಿವರ್ತನೆ, ಆರೋಗ್ಯ, ಡಿಜಿಟಲ್ ಮೂಲಸೌಕರ್ಯ, ಎಲೆಕ್ಟ್ರಿಕ್ ಮೊಬಿಲಿಟಿ, ಕೈಗೆಟುಕುವ ವಸತಿ, ಉತ್ಪಾದನೆ ಮತ್ತು ತಂತ್ರಜ್ಞಾನ ಸೇರಿದಂತೆ ಪ್ರಮುಖ ವಲಯಗಳಲ್ಲಿ ಬಂಡವಾಳವನ್ನು ನಿಯೋಜಿಸಿವೆ. ಈ ಹೂಡಿಕೆಗಳು ಗತಿ ಶಕ್ತಿ, ಡಿಜಿಟಲ್ ಇಂಡಿಯಾ, ಮೇಕ್ ಇನ್ ಇಂಡಿಯಾ, ಸಿಒಪಿ (COP) ಬದ್ಧತೆಗಳು ಮತ್ತು ಫೇಮ್ (FAME) ಹಾಗೂ ಪಿಎಂ ಇ-ಡ್ರೈವ್ (PM E-DRIVE) ನಂತಹ ಪ್ರಮುಖ ಯೋಜನೆಗಳಂತಹ ರಾಷ್ಟ್ರೀಯ ಆದ್ಯತೆಗಳೊಂದಿಗೆ ನಿಕಟವಾಗಿ ಹೊಂದಾಣಿಕೆಯಾಗಿವೆ.

NIIF ಕಾರ್ಯತಂತ್ರದ ಸಲಹಾ ಪಾತ್ರವನ್ನೂ ವಹಿಸುತ್ತದೆ. ಹೊಸ ಪಿಪಿಪಿ (PPP) ಉಪಕ್ರಮಗಳು ಮತ್ತು ಖಾಸಗಿ ವಲಯದ ಹೂಡಿಕೆಯನ್ನು ಉತ್ತೇಜಿಸುವ ಹೂಡಿಕಾ ಕಲ್ಪನೆಗಳ ಕುರಿತು ಕೇಂದ್ರ ಸರ್ಕಾರದ ಇಲಾಖೆಗಳು ಮತ್ತು ರಾಜ್ಯ ಸಂಸ್ಥೆಗಳಿಗೆ ಇದು ಸಹಾಯ ಮಾಡುತ್ತದೆ. ಇದು ಮ್ಯಾರಿಟೈಮ್ ಡೆವಲಪ್‌ಮೆಂಟ್ ಫಂಡ್ ಮತ್ತು ರಿಸರ್ಚ್ ಡೆವಲಪ್‌ಮೆಂಟ್ ಅಂಡ್ ಇನ್ನೋವೇಶನ್ ಫಂಡ್‌ನಂತಹ ಉಪಕ್ರಮಗಳ ರಚನೆ, ಹಣಗಳಿಕೆ ಮತ್ತು ಪಿಪಿಪಿ ರಚನೆಗಳ ಕುರಿತು ಸರ್ಕಾರಿ ಅಧಿಕಾರಿಗಳೊಂದಿಗೆ ಸಹಯೋಗ ಮತ್ತು ರಾಷ್ಟ್ರೀಯ ಆದ್ಯತೆಗಳಿಗೆ ಅನುಗುಣವಾದ ಇತರ ವಲಯ-ನಿರ್ದಿಷ್ಟ ಹೂಡಿಕಾ ಚೌಕಟ್ಟುಗಳ ಕುರಿತು ಸಲಹೆಯನ್ನು ಒಳಗೊಂಡಿದೆ.

ಭಾರತಕ್ಕೆ ಹೆಚ್ಚುವರಿ ಖಾಸಗಿ ಬಂಡವಾಳವನ್ನು ತರುವಲ್ಲಿ ಮತ್ತು ಭಾರತದ ಅಭಿವೃದ್ಧಿಯ ಪಯಣಕ್ಕೆ ಕೊಡುಗೆ ನೀಡುವಲ್ಲಿ NIIF ಕಳೆದ ವರ್ಷಗಳಲ್ಲಿ ವಹಿಸಿದ ಪಾತ್ರವನ್ನು ಗುರುತಿಸಿ, ಭಾರತ ಸರ್ಕಾರದ ಈ ಹೆಚ್ಚುವರಿ ಬದ್ಧತೆಯು ಸಾರಿಗೆ, ಇಂಧನ, ಡಿಜಿಟಲ್ ಮೂಲಸೌಕರ್ಯ, ನಗರ ಮೂಲಸೌಕರ್ಯ, ಇ-ಮೊಬಿಲಿಟಿ ಮತ್ತು ಇತರ ರಾಷ್ಟ್ರೀಯ ಪ್ರಾಮುಖ್ಯತೆಯ ಯೋಜನೆಗಳಾದ್ಯಂತ ಹೂಡಿಕೆಯನ್ನು ಉತ್ತೇಜಿಸುವ ನಿರೀಕ್ಷೆಯಿದೆ.

NIIF ನಲ್ಲಿ ಭಾರತ ಸರ್ಕಾರದ ಈ 30,000 ಕೋಟಿ ರೂಪಾಯಿಗಳ ಹೆಚ್ಚುವರಿ ಹೂಡಿಕೆಯ ಬದ್ಧತೆಯನ್ನು NIIF ನ ಎರಡನೇ ಮೂಲಸೌಕರ್ಯ ಕೇಂದ್ರೀಕೃತ ನಿಧಿಯನ್ನು ಸ್ಥಾಪಿಸಲು ಬಳಸಲಾಗುತ್ತದೆ. ಇದು ಈ ಉದ್ದೇಶವನ್ನು ಹೊಂದಿರುವ ಅದರ ಮೊದಲ ಪ್ರಮುಖ ನಿಧಿಯ ಉತ್ತರಾಧಿಕಾರಿಯಾಗಲಿದೆ. NIIF ಇನ್ಫ್ರಾಸ್ಟ್ರಕ್ಚರ್ ಫಂಡ್ II ಸುಮಾರು 30,000 ಕೋಟಿ ರೂಪಾಯಿಗಳ ಗುರಿ ನಿಧಿಯನ್ನು ಹೊಂದುವ ಪ್ರಸ್ತಾವನೆಯನ್ನು ಹೊಂದಿದೆ ಮತ್ತು ಸಾರಿಗೆ, ಇಂಧನ, ಡಿಜಿಟಲ್ ಮೂಲಸೌಕರ್ಯ ಹಾಗೂ ನಗರ ಮೂಲಸೌಕರ್ಯ ಮತ್ತು ಇ-ಮೊಬಿಲಿಟಿಯಂತಹ ಉದಯೋನ್ಮುಖ ಕ್ಷೇತ್ರಗಳಲ್ಲಿ ಹೂಡಿಕೆ ಕೈಗೊಳ್ಳುವ ನಿರೀಕ್ಷೆಯಿದೆ. ಈ ಹಂಚಿಕೆಯು NIIF ನ ಹೊಸ ನಿಧಿ ತಂತ್ರಗಳು ಮತ್ತು ಉತ್ತರಾಧಿಕಾರಿ ದ್ವಿಪಕ್ಷೀಯ ಹಾಗೂ ಇತರ ಕಾರ್ಯತಂತ್ರದ ನಿಧಿಗಳಿಗೂ ಬೆಂಬಲ ನೀಡಲಿದೆ.

ಸರ್ಕಾರದ ಈ ಪ್ರಸ್ತುತ ಹಂಚಿಕೆಯು, ಆಧಾರವಾಗಿರುವ ಆಸ್ತಿಗಳು ಮತ್ತು ಪೋರ್ಟ್‌ಫೋಲಿಯೊ ಕಂಪನಿಗಳಲ್ಲಿನ ಹೂಡಿಕೆಗಳ ಮೂಲಕ ಆರ್ಥಿಕತೆಯ ಮೇಲೆ ವೇಗವರ್ಧಕ ಪರಿಣಾಮವನ್ನು ಬೀರುವ ನಿರೀಕ್ಷೆಯಿದೆ. ಇದು ಉತ್ತಮ ಗುಣಮಟ್ಟದ ಮೂಲಸೌಕರ್ಯಕ್ಕೆ ಕೊಡುಗೆ ನೀಡುವುದು, ಉದ್ಯೋಗಗಳನ್ನು ಸೃಷ್ಟಿಸುವುದು (ನೇರ ಮತ್ತು ಪರೋಕ್ಷ) ಮತ್ತು ರಾಷ್ಟ್ರೀಯ ಪ್ರಾಮುಖ್ಯತೆಯ ಪ್ರಮುಖ ವಲಯಗಳ ಬೆಳವಣಿಗೆಯನ್ನು ಸಕ್ರಿಯಗೊಳಿಸುವ ಮೂಲಕ, ಆತ್ಮನಿರ್ಭರತೆಯನ್ನು ಬೆಂಬಲಿಸುತ್ತದೆ ಮತ್ತು 2047 ರ ವೇಳೆಗೆ ವಿಕಸಿತ ಭಾರತವಾಗುವ ದೇಶದ ಪಯಣಕ್ಕೆ ಸಹಕಾರಿಯಾಗಲಿದೆ.

*****