بھارت سرکار نے جن وشواس ایکٹ، 2026 کے تحت ادویات اور کاسمیٹکس ایکٹ، 1940 اور فوڈ سیفٹی اینڈ اسٹینڈرڈز ایکٹ، 2006 سے متعلق اہم اصلاحات کو نافذ کیا ہے، جس کا مقصد اعتماد پر مبنی حکم رانی کو بڑھانا، کاروبار کے لیے تعمیل کا بوجھ کم کرنا، اور عوامی صحت کی حفاظتی تدابیر سے سمجھوتا کیے بغیر متناسب ضابطہ جاتی نفاذ کو یقینی بنانا ہے۔

ترمیمات کا مقصد کچھ معمولی اور تکنیکی خلاف ورزیوں کو غیر مجرمانہ بنانا اور مجرمانہ کارروائیوں کو انتظامی جرمانے سے بدلنا ہے، جس سے کاروبار میں آسانی کو فروغ ملے اور ضابطہ جاتی کارکردگی میں بہتری آئے۔ ساتھ ہی، عوامی صحت اور صارفین کی حفاظت کے لیے خطرات پیدا کرنے والے جرائم کے خلاف سخت دفعات نافذ العمل رہیں گی۔

اصلاحات کے ایک حصے کے طور پر، ادویات اور کاسمیٹکس ایکٹ، 1940 کی دفعہ 29، جو کسی بھی دوا یا کاسمیٹک کی تشہیر کے لیے سرکاری تجزیہ کار کی رپورٹ کے استعمال پر ایک لاکھ روپے تک کے جرمانے کا تعین کرتی تھی، کو خارج کر دیا گیا ہے۔

مزید برآں، کم خطرے والے کاسمیٹکس کی تیاری یا فروخت سے متعلق خلاف ورزیوں کو انتظامی جرمانے کے فریم ورک کے تحت لایا گیا ہے۔ ان میں ایسے معاملات شامل ہیں جہاں کوئی کاسمیٹک پروڈکٹ معمولی کوالٹی کے پیرامیٹرز پر پورا نہیں اترتا یا لیبلنگ میں نقائص اور غلطیاں پائی جاتی ہیں۔ تاہم، ملاوٹ شدہ یا جعلی کاسمیٹکس سے متعلق جرائم، جن کا صارفین کی حفاظت پر براہ راست اثر پڑتا ہے، وہ ایکٹ کے تحت سخت سزا کے دائرے میں آتے رہیں گے۔

ترمیمات نے دفعہ 28A کے تحت خلاف ورزیوں کو بھی انتظامی جرمانے میں تبدیل کر دیا ہے، جو بنیادی طور پر ریکارڈ رکھنے اور معلومات جمع کرانے جیسی طریقہ کار اور تعمیل کی ضروریات سے متعلق ہیں۔

نئے فریم ورک کے مؤثر نفاذ کو سہولت فراہم کرنے کے لیے، ضابطہ جاتی حکام کی تقرری اور اپیل کے طریقہ کار سے متعلق دفعات متعارف کرائی گئی ہیں، جو ایسی خلاف ورزیوں سے متعلق معاملات کے بروقت اور شفاف تصفیے کو قابل بناتی ہیں۔

فوڈ سیفٹی اینڈ اسٹینڈرڈز ایکٹ، 2006 کے تحت، فوڈ سیفٹی افسران کے خلاف جھوٹی شکایات سے متعلق معاملات میں عدالت کے جرمانے عائد کرنے کی دفعات کو انتظامی جرمانے کے طریقہ کار میں تبدیل کر دیا گیا ہے۔

ضبط شدہ اشیا میں مداخلت کرنے کی سزا کو منطقی بنایا گیا ہے، جس میں قید کی مدت چھ ماہ سے کم کرکے تین ماہ کر دی گئی ہے۔

مزید برآں، فوڈ سیفٹی اینڈ اسٹینڈرڈز ایکٹ سے فوڈ سیفٹی افسر کی راہ میں رکاوٹ ڈالنے یا مزاحمت کرنے سے متعلق دفعہ کو خارج کر دیا گیا ہے، کیوں کہ ایسے جرائم بھارتی نیا سنہتا (BNS) کی دفعات کے تحت پہلے ہی کافی حد تک شامل ہیں، جس سے قانونی فریم ورک میں تکرار سے بچا جا سکے گا۔

جن وشواس ایکٹ، 2026 کے ذریعے متعارف کرائی گئی اصلاحات، ایک جدید، شفاف اور اعتماد پر مبنی ضابطہ جاتی ایکو سسٹم کو فروغ دینے کے حکومت کے عزم کی عکاسی کرتی ہیں۔ تکنیکی یا طریقہ کار کی عدم تعمیل اور عوامی صحت کے سنگین جرائم کے درمیان فرق کر کے، ترامیم بھارت کے فوڈ اور ڈرگ ضابطہ جاتی فریم ورک کی سالمیت کو برقرار رکھتے ہوئے متناسب نفاذ کو یقینی بنانے کی کوشش کرتی ہیں۔

صحت اور خاندانی بہبود کی وزارت، ضابطہ جاتی ضوابط کے ذریعے عوامی صحت کی حفاظت کے ساتھ ساتھ غیر ضروری تعمیل کے بوجھ کو کم کرنے اور زیادہ موثر اور کاروبار دوست ضابطہ جاتی ماحول کی سہولت فراہم کرنے کے لیے عہدبستہ ہے

****

(ش ح - ع ا)

U.No. 9217