કૌશલ્ય વિકાસ અને સાહસિકતા મંત્રાલયે (MSDE) આજે 'કૌશલ મહોત્સવ, વારાંગલ 2026' ની જાહેરાત કરી છે, જે 27 જૂન 2026 ના રોજ તેલંગાણાના વારાંગલ સ્થિત કાકતીય ઇન્સ્ટિટ્યૂટ ઓફ ટેકનોલોજી એન્ડ સાયન્સ (KITS) ખાતે યોજાનાર છે.

આ જાહેરાત કિટ્સ (KITS) ખાતે આયોજિત એક પત્રકાર પરિષદ દરમિયાન કરવામાં આવી હતી, જેને કૌશલ્ય વિકાસ અને સાહસિકતા મંત્રાલયના (MSDE) ડાયરેક્ટર શ્રી વી.એસ. અરવિંદે સંબોધિત કરી હતી. આ પ્રસંગે રોજગાર અને તાલીમ વિભાગના પ્રાદેશિક રોજગાર અધિકારી શ્રી થોટમ રામુ અને કિટ્સના રજિસ્ટ્રાર શ્રી કોમલ રેડ્ડી પણ ઉપસ્થિત રહ્યા હતા.

આગામી કૌશલ મહોત્સવ વિવિધ ક્ષેત્રોના 50 થી વધુ અગ્રણી નોકરીદાતાઓને એકસાથે લાવશે અને સમગ્ર તેલંગાણાના યુવાનો માટે રોજગારીની 5,000 થી વધુ તકો પ્રદાન કરશે. આ કાર્યક્રમનો ઉદ્દેશ્ય કુશળ ઉમેદવારોને સીધા ઉદ્યોગો સાથે જોડવાનો, સ્થળ પર જ ઇન્ટરવ્યુ (ઓન-ધ-સ્પોટ ઇન્ટરવ્યુ) ની સુવિધા આપવાનો અને રોજગાર તેમજ એપ્રેન્ટિસશિપની તકો દ્વારા ટકાઉ આજીવિકાના માર્ગોને મજબૂત કરવાનો છે.

આ મહોત્સવ વિવિધ શૈક્ષણિક પૃષ્ઠભૂમિ અને કૌશલ્ય સ્તર ધરાવતા ઉમેદવારોની જરૂરિયાતો પૂરી કરશે, જેમાં શાળા પાસ કરનારા યુવાનો, આઇટીઆઇ (ITI) સ્નાતકો, ડિપ્લોમા ધારકો, સ્નાતકો અને બહેતર કારકિર્દીની તકો શોધી રહેલા કુશળ યુવાનોનો સમાવેશ થાય છે. ભાગ લેનારા નોકરીદાતાઓ મેન્યુફેક્ચરિંગ, રીટેલ, લોજિસ્ટિક્સ, ઓટોમોટિવ, ટેક્સટાઇલ, આઇટી-આઇટીઇએસ (IT-ITeS), હેલ્થકેર, ટુરિઝમ એન્ડ હોસ્પિટાલિટી, ટેલિકોમ અને બેંકિંગ, ફાઇનાન્સિયલ સર્વિસીસ એન્ડ ઇન્સ્યોરન્સ (BFSI) જેવા ક્ષેત્રોનું પ્રતિનિધિત્વ કરશે, જે બદલાતા રોજગાર પરિદ્રશ્ય અને કુશળ પ્રતિભાઓની વધતી માંગને દર્શાવે છે.

ભારત સરકારના કૌશલ્ય વિકાસ અને સાહસિકતા મંત્રાલયના ડાયરેક્ટર શ્રી વી.એસ. અરવિંદે જણાવ્યું હતું કે, "કૌશલ મહોત્સવ એ પ્રત્યેક કુશળ યુવાન વ્યક્તિને અર્થપૂર્ણ તકો મળી રહે તે સુનિશ્ચિત કરવાની અમારી પ્રતિબદ્ધતાને પ્રતિબિંબિત કરે છે. નોકરીદાતાઓ અને મહત્વાકાંક્ષી ઉમેદવારોને એક જ પ્લેટફોર્મ પર લાવીને, અમે કૌશલ્ય વિકાસથી રોજગાર સુધીના વધુ મજબૂત માર્ગો બનાવી રહ્યા છીએ અને તેલંગાણાના યુવાનોની આકાંક્ષાઓને ટેકો આપી રહ્યા છીએ."

તેમણે વધુમાં રેખાંકિત કર્યું હતું કે કૌશલ મહોત્સવ ઉદ્યોગો, તાલીમ સંસ્થાઓ અને નોકરી શોધનારાઓને એક છત્ર હેઠળ લાવીને કૌશલ્ય વિકાસને વાસ્તવિક રોજગાર પરિણામોમાં પરિવર્તિત કરવા માટેનું એક મહત્વપૂર્ણ પ્લેટફોર્મ બનીને ઉભરી આવ્યું છે.

આ મહોત્સવમાં વારાંગલ અને પડોશી જિલ્લાઓમાંથી હજારો મહત્વાકાંક્ષી ઉમેદવારો ભાગ લે તેવી અપેક્ષા છે, જેનાથી એક એવું ગતિશીલ પ્લેટફોર્મ તૈયાર થશે જ્યાં સ્થાનિક પ્રતિભાઓ સીધા જ રિક્રૂટર્સ (ભરતી કરનારાઓ) સાથે જોડાઈ શકશે અને તેમના કૌશલ્ય તેમજ આકાંક્ષાઓને અનુરૂપ તકો શોધી શકશે.

ભરતીની તકો ઉપરાંત, કૌશલ મહોત્સવ – વારાંગલ 2026 ઉમેદવારોને એપ્રેન્ટિસશિપ કાર્યક્રમો, સરકારી કૌશલ્ય પહેલો, કારકિર્દીના માર્ગો, ભવિષ્ય માટે તૈયાર જોબ રોલ્સ અને ઉદ્યોગોની બદલાતી માંગ અનુસાર અપસ્કિલિંગ (કૌશલ્ય સુધારણા) તેમજ રીસ્કિલિંગની તકો વિશે માહિતી પૂરી પાડશે.

પ્રોમ્પ્ટ પર્સનલ પ્રાઇવેટ લિમિટેડ, પેરાડિમઆઇટી ટેકનોલોજી સર્વિસીસ પ્રાઇવેટ લિમિટેડ, સીતારામ સ્પિનર્સ પ્રાઇવેટ લિમિટેડ, રોયલ એનફિલ્ડ ડીલરશિપ નેટવર્ક, કેપસ્ટોન સર્વિસીસ લિમિટેડ, ક્રીમ સ્ટોન, જયભેરી ઓટોમોટિવ્સ પ્રાઇવેટ લિમિટેડ, બ્લિંક કોમર્સ પ્રાઇવેટ લિમિટેડ, ગેલેક્ટિક સોલ્યુશન, એસએમજી ઇલેક્ટ્રિક સ્કૂટર્સ, વરુણ મોટર્સ પ્રાઇવેટ લિમિટેડ અને ઇલેક્ટ્રોલેબ ઇન્ડિયા પ્રાઇવેટ લિમિટેડ સહિતના અગ્રણી નોકરીદાતાઓ આ મહોત્સવમાં ભાગ લે તેવી અપેક્ષા છે, જે વિવિધ ક્ષેત્રોમાં તકો ઓફર કરશે. તેલંગાણા ઓવરસીઝ મેનપાવર કંપની લિમિટેડ (TOMCOM) પણ એક રિક્રૂટમેન્ટ પાર્ટનર તરીકે ભાગ લેશે, જે તેલંગાણાના પાત્ર ઉમેદવારો માટે વિદેશમાં પ્લેસમેન્ટ (નોકરી) ની તકો સરળ બનાવશે.

છેલ્લા કેટલાક વર્ષોમાં, કૌશલ મહોત્સવ MSDE ના એક અગ્રણી પ્લેટફોર્મ તરીકે ઉભરી આવ્યું છે જે કુશળ યુવાનોને નોકરીદાતાઓ સાથે જોડે છે અને સાથે જ તાલીમ, એપ્રેન્ટિસશિપ અને રોજગાર વચ્ચેના સેતુને મજબૂત કરે છે. આ માત્ર એક જોબ ફેર (રોજગાર મેળો) નથી, પરંતુ તે કુશળ, સશક્ત અને આત્મનિર્ભર ભારતના વિઝનને અનુરૂપ પ્રતિભા, સાહસિકતા અને તકોની ઉજવણી છે.

 

SM/DK/JD

(रिलीज़ आईडी: 2278006) आगंतुक पटल : 10