عزت مآب وزیر اعظم نے مسلسل اس بات پر زور دیا ہے کہ ملک کی مال بردار نقل و حمل کا ایک بڑا حصہ ریل کے ذریعے کیا جانا چاہیے ، کیونکہ یہ نقل و حمل کا ایک سرسبز اور زیادہ توانائی سے مؤثر طریقہ ہے ۔ ہندوستانی ریلوے کے 100 فیصد برق کاری کے قریب ہونے کے ساتھ ، ریل پر مبنی مال برداری میں اضافے نے درآمد شدہ ڈیزل پر ملک کا انحصار کم کیا ہے اور ماحولیاتی پائیداری کو بھی فروغ دیا ہے۔

مرکزی وزیر ریلوے جناب اشونی ویشنو نے آج ریلوے کے سینئر عہدیداروں کے ساتھ ایک جائزہ میٹنگ کی، جہاں ہندوستانی ریلوے کو مختلف قسم کی اشیاء کے لیے مال بردار نقل و حمل کا ترجیحی ذریعہ بنانے کے مقصد سے اصلاحات پر تبادلہ خیال کیا گیا۔ میٹنگ کے دوران، ریلوے کے وزیر مملکت جناب وی سومنا اور جناب رونیت سنگھ بٹو، آر ڈی ایس او (ریسرچ ڈیزائنز اینڈ اسٹینڈرڈز آرگنائزیشن) ریلوے بورڈ کے ڈائریکٹر جنرل ممبران اور دیگر سینئر عہدیدار بھی موجود تھے۔

اس سمت میں ، ہندوستانی ریلوے مختلف صنعتوں ، تجارتی اداروں  اور ان اشیا سے وابستہ بڑے مال بردار صارفین کے ساتھ بڑے پیمانے پرمشاورت کر رہی ہے جن میں ریل نقل و حمل کی نمایاں صلاحیت ہے۔ ان مباحثوں کے دوران، صنعت کے نمائندوں نے مشورہ دیا کہ اگر ویگن کے ڈیزائن کو مختلف اجناس کی مخصوص ہینڈلنگ ، لوڈنگ، ان لوڈنگ اور نقل و حمل کی ضروریات کے مطابق بنایا جائے تو ریل ٹرانسپورٹ کو بہت وسیع پیمانے پر اپنایا جا سکتا ہے۔

میٹنگ میں اس بات پر بھی روشنی ڈالی گئی کہ سیمنٹ اور نمک جیسی اشیاء کے لیے حال ہی میں تیار کردہ خصوصی ویگنز کی کامیابی نے صنعت کی آپریشنل ضروریات کے مطابق ویگنز کو ڈیزائن کرنے کی اہمیت کو ظاہر کیا ہے۔ اجناس سے متعلق مخصوص ویگنزنے لوڈنگ، ان لوڈنگ اور نقل و حمل کی کارکردگی کو بہتر بنایا ہے، اس طرح ریل لاجسٹکس کی کشش میں اضافہ ہوا ہے۔

اس تناظر میں، بھارتی ریلوے نے موجودہ ویگن ڈیزائن پالیسی میں جامع اصلاحات کرنے کا فیصلہ کیا ہے۔ مختلف اشیاء کی ضروریات کے مطابق خصوصی ویگنز کی تیاری کے لیے ایک صنعت دوست فریم ورک فراہم کرنے کی غرض سے یہ طے کیا گیا ہے کہ نئی ویگن ڈیزائن پالیسی 15 دن کے اندر حتمی شکل دے کر جاری کی جائے گی۔

مرکزی وزیر ریلوے نے کہا کہ ڈیزائن کی منظوری اور پروٹو ٹائپ کی ترقی کے لیے سخت معیارات ہندوستان میں اعلیٰ ترین معیار کے ویگنز کی پیداوار کو یقینی بنائیں گے۔ ریلوے بورڈ نے ویگن ڈیزائن پالیسی میں بڑی اصلاحات متعارف کرانے کا بھی فیصلہ کیا ہے۔ مجوزہ پالیسی کے تحت صنعتوں کو اپنی مخصوص ضروریات کے مطابق ویگن ڈیزائن کرنے کی اجازت ہوگی۔ مثال کے طور پر، اسٹیل کنڈلوں کی نقل و حمل کے لیے خصوصی بائنڈنگ انتظامات اور مخصوص لوڈنگ اور ان لوڈنگ سسٹم کی ضرورت ہوتی ہے، جبکہ کئی دیگر اشیاء کی بھی اپنی الگ آپریشنل ضروریات ہوتی ہیں۔ نئے فریم ورک کے تحت صنعتوں کو اپنی ضروریات کے مطابق ویگن کے ڈیزائن میں ترمیم کی تجویز پیش کرنے کا اختیار دیا جائے گا۔ ویگن کی حفاظت کو یقینی بنانے کی ذمہ داری آر ڈی ایس او اور چیف کمشنر آف ریلوے سیفٹی (سی سی آر ایس) پر ہوگی۔ توقع ہے کہ ان اصلاحات سے کئی نئی صنعتیں ریلوے فریٹ ایکو نظام میں داخل ہوں گی۔

یہ اصلاح ویگن کی ترقی میں اختراع کو فروغ دے گی اور ہندوستانی ریلوے کے مال بردار نقل و حمل کے نظام کو مضبوط کرے گی۔ اجناس سے متعلق مخصوص نقل و حمل کے حل فراہم کرکے، ہندوستانی ریلوے کا مقصد مال برداری کے نئے سلسلے کو راغب کرنا، صارفین کی سہولت کو بڑھانا اور قومی لاجسٹک سیکٹر میں ریل کے حصے میں نمایاں اضافہ کرنا ہے۔

صنعتوں کو زیادہ مقدار میں مال برداری کو سڑک سے ریل کی طرف منتقل کرنے کے قابل بنا کر، نئی ویگن ڈیزائن پالیسی گرین ریلوے اور گرین لاجسٹکس کے وژن کو آگے بڑھائے گی۔ ریل نقل و حمل سڑک نقل و حمل کے مقابلے میں تقریباً 90 فیصد زیادہ ماحول دوست ہے  اور ہندوستانی ریلوے کی تقریبا ًمکمل برق کاری کے ساتھ، ریل پر مبنی مال بردار نقل و حرکت میں اضافہ درآمد شدہ ڈیزل پر انحصار کو کم کرے گا، لاجسٹک لاگت کو کم کرے گا، کاربن کے اخراج کو کم کرے گا  اور شہریوں کے لیے ضروری سامان کو زیادہ سستی بنائے گا۔

مجوزہ ویگن ڈیزائن پالیسی ہندوستانی ریلوے کی طرف سے ایک جدید، صارفین پر مرکوز اور اختراع پر مبنی مال بردار نقل و حمل کے نظام کی تعمیر کے لیے ایک اور اہم اصلاح ہے۔ یہ اقتصادی ترقی کو تیز کرنے، ماحولیاتی پائیداری کو مضبوط بنانے اور وکست بھارت کے وژن کے عزم کی تصدیق کرتا ہے۔

*******

) ش ح –ش آ۔ن ع )

U.No. 9181