প্ৰধানমন্ত্ৰী শ্ৰী নৰেন্দ্ৰ মোদীয়ে নতুন দিল্লীত আজি সেৱা তীৰ্থত বিভিন্ন মন্ত্ৰালয় আৰু বিভাগত সহকাৰী সচিব হিচাপে সংযুক্ত হৈ থকা ২০২৪ বৰ্ষৰ ১৮৩ গৰাকী প্ৰশিক্ষাৰ্থী আই এ এছ বিষয়াৰ সৈতে মত বিনিময় কৰে।

যুৱ প্ৰশিক্ষাৰ্থী বিষয়াসকলে তেওঁলোকৰ ক্ষেত্ৰ প্ৰশিক্ষণৰ পৰা পোৱা অভিজ্ঞতা আৰু মন্ত্ৰালয়সমূহত তেওঁলোকৰ সম্পৰ্কৰ বিষয়ে ভাগ বাটোৱাৰা কৰে। বিষয়াসকলক সম্বোধন কৰি প্ৰধানমন্ত্ৰীয়ে কয় যে দুবছৰীয়া ক্ষেত্ৰ ভিত্তিত অভিজ্ঞতা আৰু প্ৰশাসনিক শিক্ষণৰ অন্তত এতিয়া তেওঁলোক এনে এক গুৰুত্বপূৰ্ণ পৰ্যায়ত থিয় দিছে য’ত তেওঁলোকৰ সিদ্ধান্তই কেৱল নিজৰ কেৰিয়াৰেই নহয়, কোটি কোটি নাগৰিকৰ ভৱিষ্যত গঢ় দিব। তেওঁ জোৰ দি কয় যে জনসেৱাৰ প্ৰকৃত পৰীক্ষা আৰম্ভ হয় বাস্তৱ জীৱনৰ পৰিস্থিতিসমূহ সততা, সংবেদনশীলতা আৰু দায়বদ্ধতাৰে চম্ভালি লোৱাৰ পৰা।

প্ৰধানমন্ত্ৰীয়ে যুৱ বিষয়াসকলক উদ্দেশ্যপূৰ্ণ, উদ্ভাৱনীমূলক আৰু নাগৰিককেন্দ্ৰিক শাসন ব্যৱস্থাৰ শক্তিশালী ভাৱনাৰে ৰাষ্ট্ৰ নিৰ্মাণৰ বাবে নিজকে উৎসৰ্গা কৰিবলৈ আহ্বান জনায়। প্ৰতিটো প্ৰশাসনিক ফাইলৰ আঁৰত থকা মানুহৰ ওপৰত পৰিব পৰা প্ৰভাৱ সদায় মনত ৰাখিবলৈ তেওঁ বিষয়াসকলক আহ্বান জনায়। তেওঁ কয় যে প্ৰতিটো ফাইলেই অগণন নাগৰিকৰ আকাংক্ষা, উদ্বেগ আৰু জীৱনক প্ৰতিনিধিত্ব কৰে। “নাগৰিক দেৱো ভৱ”ৰ মন্ত্ৰৰ ওপৰত গুৰুত্ব আৰোপ কৰি তেওঁ বিষয়াসকলক নাগৰিকক প্ৰতিটো সিদ্ধান্তৰ কেন্দ্ৰবিন্দুত ৰাখিবলৈ আহ্বান জনায় আৰু শাসন ব্যৱস্থা সহানুভূতিশীল, সঁহাৰিমূলক আৰু সৰ্বাংগীন হৈ থকাটো নিশ্চিত কৰিবলৈ আহ্বান জনায়।

সমগ্ৰ চৰকাৰী পন্থাৰ আহ্বান জনাই প্ৰধানমন্ত্ৰীয়ে গুৰুত্ব আৰোপ কৰে যে বৃহৎ উন্নয়নমূলক প্ৰত্যাহ্বানসমূহ বিচ্ছিন্নভাৱে সমাধান কৰিব নোৱাৰি। তেওঁ আৰু উল্লেখ কৰে যে অৰ্থপূৰ্ণ আৰু স্থায়ী ফলাফল লাভৰ বাবে বিভাগসমূহৰ মাজত ফলপ্ৰসূ সমন্বয় অতি প্ৰয়োজনীয়।

বিকশিত ভাৰত ২০৪৭ৰ দৃষ্টিভংগীৰ ওপৰত আলোকপাত কৰি প্ৰধানমন্ত্ৰীয়ে উল্লেখ কৰে যে অনাগত দশকসমূহৰ প্ৰতিটো নীতিগত আৰু প্ৰশাসনিক সিদ্ধান্তই এখন উন্নত ভাৰত গঢ়াৰ দিশত অৰিহণা যোগাব লাগিব। তেওঁ জোৰ দি কয় যে আজি ভাৰতৰ অগ্ৰাধিকাৰসমূহৰ ভিতৰত আছে আত্মনিৰ্ভৰ ভাৰত, মেক ইন ইণ্ডিয়া, উৎপাদন বৃদ্ধি, শক্তি সুৰক্ষা আৰু যুৱক-যুৱতীসকলৰ বাবে সুযোগ সৃষ্টি।

প্ৰধানমন্ত্ৰীয়ে যোৱা দশকত শাসন ব্যৱস্থাৰ পৰিৱৰ্তনৰ ওপৰত আলোকপাত কৰি প্ৰশাসনে প্ৰক্ৰিয়াকেন্দ্ৰিক আৰ্হিৰ পৰা ফলাফলমুখী পন্থালৈ গতি কৰা বুলি উল্লেখ কৰে। তেওঁ সেৱা প্ৰদানৰ উন্নতিৰ ক্ষেত্ৰত ডিজিটেল শাসন, কৃত্ৰিম বুদ্ধিমত্তা আৰু প্ৰযুক্তিৰ ক্ৰমবৰ্ধমান ভূমিকাৰ উল্লেখ কৰে, যাৰ ফলত নাগৰিকে সহজ আৰু স্বচ্ছতাৰে সেৱা লাভ কৰিব পাৰে।

তথ্য-চালিত শাসনৰ ওপৰত গুৰুত্ব আৰোপ কৰি প্ৰধানমন্ত্ৰীয়ে কয় যে তথ্যক কেৱল সংখ্যা হিচাপেই চাব নালাগে বৰঞ্চ লাখ লাখ লোকৰ সামূহিক জীৱন, প্ৰত্যাহ্বান আৰু আকাংক্ষাৰ প্ৰতিফলন হিচাপে চাব লাগিব। তেওঁ বিষয়াসকলক নীতিসমূহ বাস্তৱ ক্ষেত্ৰত ফলপ্ৰসূভাৱে ফলাফললৈ ৰূপান্তৰিত হৈছে নে নাই নিয়মিতভাৱে পৰীক্ষা কৰিবলৈ কয়।

প্ৰধানমন্ত্ৰীয়ে ৰাষ্ট্ৰ নিৰ্মাণত মহিলাৰ ক্ৰমবৰ্ধমান ভূমিকাত আলোকপাত কৰি উল্লেখ কৰে যে বৰ্তমানৰ চামটোৰ ৪০ শতাংশতকৈ অধিক মহিলা বিষয়া।

প্ৰধানমন্ত্ৰীয়ে যুৱ বিষয়াসকলক ৰাষ্ট্ৰ নিৰ্মাণৰ দিশত তেওঁলোকৰ অৱদানৰ অহৰহ মূল্যায়ন কৰিবলৈ আৰু গ্ৰহণ কৰা পদৰ পৰা নহয়, বৰং লাভ কৰা জুখিব পৰা ফলাফলৰ পৰা সন্তুষ্টি আহৰণ কৰিবলৈ আহ্বান জনায়। তেওঁ আত্মবিশ্বাস প্ৰকাশ কৰে যে তেওঁলোকৰ শক্তি, প্ৰতিভা আৰু নিষ্ঠাই ভাৰতৰ উন্নয়ন যাত্ৰাক নতুন শিখৰলৈ লৈ যোৱাৰ ক্ষেত্ৰত গুৰুত্বপূৰ্ণ ভূমিকা পালন কৰিব।

এই মত বিনিময়ৰ সময়ত ৰাজ্যিক মন্ত্ৰী (কৰ্মচাৰী) জিতেন্দ্ৰ সিং, প্ৰধানমন্ত্ৰীৰ প্ৰধান সচিব পি কে মিশ্ৰ, প্ৰধানমন্ত্ৰীৰ প্ৰধান সচিব-২ শক্তিকান্ত দাস, কেবিনেট সচিব টি ভি সোমানাথন, সচিব (কৰ্মচাৰী আৰু প্ৰশিক্ষণ বিভাগ) ৰচনা শ্বাহ, এল বি এছ এন এ এ-ৰ সঞ্চালক শ্ৰীৰাম তৰণীকান্তি আৰু অন্যান্য জ্যেষ্ঠ বিষয়াসকলো উপস্থিত আছিল।

***

MJPS/SS/VJ/HS