ঙসি ন্যু দিল্লিগী সেবা তির্থদা প্রধান মন্ত্রী শ্রী নরেন্দ্র মোদীনা তোঙান তোঙানবা মিনিষ্ট্রিশিং অমসুং বিভাগশিংদা এসিষ্টন্ত সেক্রেতরিশিং ওইনা পোষ্ট পীরবা ২০২৪ বেতচগী আই.এ.এস ওফিসার ত্রেনি ১৮৩ গা ৱারি শানখ্রে। 

মখোয়না ত্রেনিং মনুংদগী অমসুং মিনিষ্ট্রিশিংদা থবক তৌবদগী খঙলকপশিং নহা ওইরিবা ওফিসার ত্রেনিশিংনা পাউদমখ্রে। ওফিসারশিংদা ৱা ঙাংবদা, প্রধান মন্ত্রীনা হায়খি চহি অনি মীয়ামগা লোয়ননা থবক তৌরুরবা অমসুং লৈবাক ঙাকপগী লমদা তম্লুরবা মতুংদা, মখোয় হৌজিক অরুবা তাঙ্কক অমদা লৈরে, মখোয়গী ৱারেপশিংনা মখোয় মশাগী শীনফম অসি শেম্বা খক নত্তনা, মীওই করোর কয়াগী তুংগী ফিবমসু শেম্লগনি। পুকচেল শেংনা, মীয়ামগী ইহুল খঙনা অমসুং হায়দোকখিবা ৱা ঙাকপগা লোয়ননা খুদক্ত থেংনবা থৌদোকশিং থেংনদুনা মীয়ামগী থবক তৌবগী অশেংবা চাংয়েং হৌরে।

মরম চানা থবক তৌবা, ইন্নোবেসন অমসুং মীয়ামগী য়াইফনবা লৈবাক ঙাকপগী অকনবা ৱাখলগা লোয়ননা লৈবাক শেমগৎপগী থবক্ত মখোয় মশামক কৎথোক্নবা নহা ওইরিবা সিবিল সর্ভেন্তশিংদা প্রধান মন্ত্রীনা তকশিনখ্রে। মহাক্না হায়খি মদুদি লৈবাক ঙাকপগী ফাইল খুদিংমক্কী মরুমদা লৈরিবা মীওইবদা পীদবা ইথিল অদু ওফিসারশিংনা মতম পুম্নমক্ত নিংশিংগদবনি। ফাইল খুদিংমক মশিং থিঙমদ্রবা মীয়ামগী অনিংবশিং, থবকশিং অমসুং পুন্সিশিংগী মহুৎশীল্লিবনি। ‘নাগরিক দেবো ভাবা’ গী লাইৱা লৈরি, ওফিসারশিংনা লৈবাক ঙাকপদা মীয়াম মরুওইনা লৌগদবনি অমসুং লৈবাক ঙাকপগী থবক অসি মীওইবগী অৱাবা খঙবা, খুদক্ত থবক ওইনা পাংথোকপা অমসুং খুদিংমক কোনশিনবা ওইগদবনি।

সরকারগী মিনিষ্ট্রিশিং অমসুং বিভাগশিং পুন্না থবক তৌমিন্ননবা তকশিল্লদুনা, প্রধান মন্ত্রীনা হায়খি মদুদি অমগা অমগা পাউ ফাওনদবনা চাউখৎনবা থবক পায়খৎপদা থেংনবা মরুওইবা খুদোংচাদবশিং কোকহনবা ঙম্লোই। ৱাহন্থোক লৈবা অমসুং তুংকোইনা কান্নবা ফলশিং ফংগদবা মাইপাকপ পুরকপা ঙম্নবা বিভাগশিং শীনবা থুংনা মপুংফানা পুন্না থবক তৌমিন্নবা তঙাইফদে।

বিকসিত ভারত ২০৪৭ গী পান্দম ফোঙদোক্লদুনা, প্রধান মন্ত্রীনা হায়খি মদুদি লাক্লিবা চহিশিংদা লৌগদবা লৈবাক ঙাকপগী ৱারেপ খুদিংমক অমসুং থৌশিল খুদিংমক বিকসিত ভারত অমা শেমগৎপদা মতেং পাংগদবনি। ঙসি ভারতকী মরুওইবা থবকশিংগী মনুংদা অত্মনির্ভর ভারত, মেক ইন ইন্দিয়া, মেনুফেকচরিং চাউখৎহনবা, ইনর্জি সেকুরিতি অমসুং নহারোলশিং থবক পীবা য়াওরি।

প্রধান মন্ত্রীনা হায়খি মদুদি হৌখিবা চহি ১০দা লৈবাক ঙাকপদা অওনবা পুরকখ্রে। লৈবাক ঙাকপগী থবক অদু থবক পাংথোকপগী নমুনাদা মরুওইনা লৌবগী মহুত্ত অফবা ফলশিং ফংনবা হোৎনবদা লাক্লে। সরকারগী কান্নবা মীয়ামদা ফংহনবা হেনগৎহনবা অমসুং লাইনা অমসুং অরোন-অথুপ লৈতনা মীয়াম্না কান্নবশিং ফংনবা, দিজিতেল শীজিন্নদুনা লৈবাক ঙাকপা, এ.আই অমসুং তেক্নোলোজিগী থৌদাং হেনগৎলক্লি।

প্রধান মন্ত্রীনা হায়খি মদুদি দেতাদা য়ুম্ফম ওইদুনা লৈবাক ঙাকপা য়াম্না মরুওই। দেতা অসি ইচম চম্বা মশিং খর ওইনা উরোইদবনি, মসি মীওই করোর কয়াগী পুন্সিশিং, খুদোংচাদবশিং অমসুং অনিংবশিংগী মমি অমনি। থৌশিলশিং থবক ওইনা মপুংফানা পাংথোকপরা হায়বদু ওফিসারশিংনা চাং নাইনা য়েংশিনগদবনি।

লৈবাক শেমগৎপগী থবক্ত নুপীশিংগী থৌদাং হেনগৎলক্লিবা অসি পল্লদুনা, প্রধান মন্ত্রীনা হায়খি মদুদি হৌজিক্কী বেতচ অসিদা নুপী ওফিসার চাদা ৪০ হেন্না য়াওরি।

প্রধান মন্ত্রীনা হায়খি মদুদি লৈবাক শেমগৎপগী থবক্ত মখোয়না পাংথোকখিবা থবক নহা ওইরিবা ওফিসারশিংনা লেপ্তনা নৈনগদবনি অমসুং পায়রিবা ফমশিং অদুদা পেন্থোকপগী মহুত্ত, মাইপাকপশিংদা য়েংলগা অপেনবা ওইগদবনি। ভারতকী চাউখৎপগী খোঙচৎ অনৌবা থাকশিংদা পুখৎপদা মখোয়গী মপাঙ্গল, হৈথোই-শিংথোইবা অমসুং কৎথোকপনা মরুওইবা থৌদাং অমা লৌগনি।

থৌরম অদুদা রাজ্য মন্ত্রী(পর্সোনেল) শ্রী জিতেন্দ্র সিংহ, প্রধান মন্ত্রীগী প্রিন্সিপাল সেক্রেতরি শ্রী পি.কে মিশ্রা, প্রধান মন্ত্রীগী প্রিন্সিপাল সেক্রেতরি-২ শ্রী শক্তিকান্ত দাস, কেবিনেত সেক্রেতরি শ্রী তি.ভি সোমনাথন, সেক্রেতরি(দি ও পি তি) রচনা সাহ, দিরেক্তর এল.বি.এস.এন.এ.এ শ্রী শ্রীরাম তারানিকান্তি অমসুং অতোপ্পা সেনিয়ার ওফিসারশিং শরুক য়াখি।

***