بھارتی ریلوے نے ریل سہولت کی آسانی اور رابطے کو بہتر بنانے کے مقصد سے مسافروں کے لیے شروع کی گئی ایک پہل کے تحت ہریانہ اور راجستھان کے اہم ریلوے اسٹیشنوں پر چار ٹرینوں کے اضافی اسٹاپس کی منظوری دے دی ہے۔ اس اقدام سے مقامی مسافروں، طلبہ، کسانوں، تاجروں اور دیگر ریل صارفین کو فائدہ ہوگا۔

منظور شدہ نئے اسٹاپس درج ذیل ہیں:

• ہریانہ کے پٹوواس مہرانہ اسٹیشن پر 54085/54086 دہلی–سترود پیسنجر ٹرین۔
• ہریانہ کے ہانسی اسٹیشن پر 14619/14620 اگرتلہ–فیروزپور ایکسپریس۔
• ہریانہ کے ہانسی اسٹیشن پر 14717/14718 بیکانیر–ہریدوار ایکسپریس۔
• راجستھان کے بجائنگر اسٹیشن پر 12981/12982 جے پور–آسروا ایکسپریس۔

یہ فیصلہ تفصیلی آپریشنل جائزے اور مسافروں کی مانگ  کا جائزہ لینے کے بعد کیا گیا اور مجوزہ اسٹاپس کو آپریشنل لحاظ سے قابلِ عمل پایا گیا۔

پٹوواس مہرانہ کے لیے بہتر ریلوے رابطہ

ریواڑی–بھوانی سیکشن پر واقع پٹوواس مہرانہ اسٹیشن پر اس وقت 3 جوڑی میل/ایکسپریس ٹرینیں اور 2 جوڑی پیسنجر ٹرینیں چلتی ہیں۔ دہلی–ستروڈ پیسنجر ٹرین نمبر 54085/54086 کے اسٹاپ کی منظوری سے آس پاس کے علاقوں کے رہائشیوں کے لیے ریلوے رابطہ مزید مضبوط ہوگا اور انہیں روزمرہ سفر کے لیے بہتر سہولت حاصل ہوگی۔

اس سے قبل اس ٹرین کے قریب ترین اسٹیشن جھارلی اور چرخی دادری تھے، جو بالترتیب تقریباً 6 اور 7 کلومیٹر کے فاصلے پر واقع ہیں۔ نئے اسٹاپ سے قریبی اسٹیشنوں پر انحصار کم ہوگا، ابتدائی اور آخری مرحلے کے سفر کی سہولت بہتر ہوگی، اور مقامی مسافروں، طلبہ اور روزانہ سفر کرنے والوں کو زیادہ آسانی میسر آئے گی۔

ہانسی کے لیے بہتر رابطہ سہولت

بھوانی–حصار سیکشن پر واقع اہم اسٹیشن ہانسی پر پہلے ہی 8 جوڑی میل/ایکسپریس ٹرینیں، 7 جوڑی پیسنجر ٹرینیں اور 2 جوڑی خصوصی ٹرینیں چلتی ہیں، جس سے یہ علاقہ ایک اہم مسافر مرکز بن چکا ہے۔

14619/14620 اگرتلہ–فیروزپور ایکسپریس اور 14717/14718 بیکانیر–ہریدوار ایکسپریس کے نئے اسٹاپس کی منظوری سے ہانسی اور اس کے آس پاس کے علاقوں کے مسافروں کو اضافی طویل فاصلے کی ریلوے خدمات کا براہِ راست فائدہ ملے گا۔ اس سے پہلے یہ ٹرینیں بھوانی سٹی اور حصار میں رکتی تھیں، جو بالترتیب تقریباً 37 اور 25 کلومیٹر دور ہیں۔ نئے اسٹاپ سے سفر مزید آسان ہوگا، ملک کے شمالی، مشرقی اور مغربی حصوں سے رابطہ بہتر ہوگا اور مسافروں کو اپنے قریبی اسٹیشن سے سفر کے مزید اختیارات حاصل ہوں گے۔

بجائنگر کے لیے اضافی ریلوے سہولت

راجستھان کے بجائنگر اسٹیشن پر اس وقت 19 جوڑی میل/ایکسپریس ٹرینیں اور 8 جوڑی خصوصی ٹرینیں چلتی ہیں، جو اجمیر–چندیریا سیکشن پر اس کی اہمیت کو ظاہر کرتی ہیں۔

بجائنگر آنے اور جانے والے مسافر اب 12981/12982 جے پور–آسروا ایکسپریس کے منظور شدہ اسٹاپ سے فائدہ اٹھا سکیں گے۔ اس سے پہلے یہ ٹرین ناصرآباد اور بھیلواڑہ میں رکتی تھی، جو بالترتیب تقریباً 42 اور 67 کلومیٹر کے فاصلے پر واقع ہیں۔ اس نئے اسٹاپ سے اس اہم بین ریاستی سروس تک براہِ راست رسائی حاصل ہوگی، راجستھان اور گجرات کے درمیان رابطہ مزید مضبوط ہوگا اور اس خطے کے مسافروں، تاجروں، طلبہ اور کاروباری افراد کو زیادہ سہولت ملے گی۔

مسافر دوست فیصلہ

یہ منظوری بھارتی ریلوے کے اس مسلسل عزم کی عکاسی کرتی ہے کہ بہتر ریلوے رابطے اور مؤثر سروس منصوبہ بندی کے ذریعے مسافروں کی سہولت میں اضافہ کیا جائے۔ جن اسٹیشنوں پر مسافروں کی جائز مانگ ہے اور آپریشنل اعتبار سے منظوری ممکن ہے، وہاں نئے اسٹاپس متعارف کرا کے بھارتی ریلوے ملک بھر کے لوگوں کے لیے ریل سفر کو مزید قابلِ رسائی اور سہل بنانے کی سمت میں کام کر رہی ہے۔

******

ش ح۔ ع ح۔ م ش

U-NO 9066