దాదర్‌లోని రవీంద్ర నాట్య మందిరంలో వైభవంగా జరిగిన ముగింపు వేడుకతో 19వ ముంబయి అంతర్జాతీయ చలనచిత్రోత్సవం (ఎంఐఎఫ్ఎఫ్) ఘనంగా ముగిసింది. ఈ వేడుకలో డాక్యుమెంటరీ, షార్ట్ ఫిక్షన్, యానిమేషన్ సినిమా రంగాలకు చెందిన ప్రతిభావంతులను చలనచిత్రోత్సవ ప్రతిష్ఠాత్మక 'గోల్డెన్ కాంచ్', 'సిల్వర్ కాంచ్' అవార్డులతో సత్కరించారు.
ఈ చలనచిత్రోత్సవంలో అత్యున్నత పురస్కారమైన బంగారు శంఖం (గోల్డెన్ కాంచ్) అవార్డును పోలిష్ డాక్యుమెంటరీ చిత్రం 'సిల్వర్' కైవసం చేసుకుంది. మాసీజ్ కుబికీ నిర్మించిన ఈ చిత్రానికి నటాలియా కొనియార్జ్ దర్శకత్వం వహించారు. పేదరికం, శ్రమ, ఆత్మగౌరవాన్ని ఒక కవితాత్మక దృక్పథంతో, అదే సమయంలో ఎక్కడా రాజీ పడకుండా అన్వేషించిన చిత్రమిది. స్థానిక వాస్తవికతను ప్రపంచవ్యాప్త అన్యాయంపై ఒక లోతైన ఆలోచనగా మార్చిన విధానం అద్భుతం అని జ్యూరీ ఈ చిత్రాన్ని ప్రశంసించింది. చలనచిత్ర నిర్మాతల తరపున పోలిష్ ఇన్‌స్టిట్యూట్ డైరెక్టర్, మినిస్టర్ ప్లీనిపోటెన్షియరీ మాల్గోర్జాతా వెజ్సిస్ గోలెంబియాక్ ఈ అవార్డును అందుకున్నారు.
చిత్ర దర్శకురాలు నటాలియా కొనియార్జ్, చిత్ర నిర్మాత మాసీజ్ కుబికీ తరపున పోలిష్ ఇన్‌స్టిట్యూట్ డైరెక్టర్, మినిస్టర్ ప్లీనిపోటెన్షియరీ మాల్గోర్జాతా వెజ్సిస్-గోలెంబియాక్ ఉత్తమ అంతర్జాతీయ డాక్యుమెంటరీ చిత్ర ‘బంగారు శంఖం‘ అవార్డును అందుకుంటున్న చిత్రం.
జాతీయ పోటీలు: భారతీయ కథల వైభవం
జాతీయ స్థాయి పోటీలు సమకాలీన భారతీయ నాన్-ఫీచర్ సినిమా సత్తాను, వైవిధ్యాన్ని కళ్ళకు కట్టాయి. ఇందులో భాగంగా మూడు విశిష్ట చిత్రాలు ప్రతిష్ఠాత్మక ‘వెండి శంఖం‘ పురస్కారాలను సొంతం చేసుకున్నాయి.
ఉత్తమ భారతీయ యానిమేషన్ చిత్రంగా సిల్వర్ కాంచ్ అవార్డును భువనేశ్ ఎం. కుమార్ అలియాస్ బంజ్ దర్శకత్వం వహించి, నిర్మించిన ఆర్మ్‌స్ట్రాంగ్ ఫ్రం అంగాళమ్మన్ టెంపుల్ స్ట్రీట్ దక్కించుకుంది. భవిష్యత్తును ధైర్యంగా ఆవిష్కరించిన తీరు, సంప్రదాయం, మార్పులపై పదునైన సామాజిక వ్యాఖ్యానం, యానిమేషన్‌ను కేవలం దృశ్య రూపంగా కాకుండా శక్తివంతమైన సినీ భాషగా వినియోగించిన విధానాన్ని జ్యూరీ ప్రత్యేకంగా ప్రశంసించింది.
ఎఫ్టీటీఐ నిర్మించిన స్మాల్ క్లౌడ్స్ చిత్రానికి ఉత్తమ భారతీయ షార్ట్ ఫిక్షన్ ఫిల్మ్ విభాగంలో లభించిన సిల్వర్ కాంచ్ అవార్డును స్వీకరిస్తున్న ఎఫ్టీటీఐ వైస్ ఛాన్సలర్ శ్రీ ధీరజ్ సింగ్, దర్శకుడు శ్రీ శుభమ్ సుమిత్
ఉత్తమ భారతీయ షార్ట్ ఫిక్షన్ చిత్రంగా సిల్వర్ కాంచ్ అవార్డు ‘స్మాల్ క్లౌడ్స్‘ కు దక్కింది. శుభమ్ సుమిత్ దర్శకత్వం వహించి, ధీరజ్ సింగ్ నిర్మించిన ఈ చిత్రం మంచు కురిసే సముద్ర తీర దృశ్యాలు, వర్షంతో తడిసిన ఇంటి ఆవరణల నేపథ్యంతో సాగే ఒక హృద్యమైన ఎదుగుదల కథాంశాన్ని ఈ చిత్రం అద్భుతంగా ఆవిష్కరించింది. బాల్యం, ఎడబాటు, కాల గమనాన్ని ఎంతో సున్నితంగా ప్రతిబింబించిన విధానం ప్రశంసనీయమని జ్యూరీ తన ప్రశంసా పత్రంలో కొనియాడింది.
ఉత్తమ భారతీయ డాక్యుమెంటరీ చిత్రంగా సిల్వర్ కాంచ్ పురస్కారాన్ని 'వాయి' చిత్రం దక్కించుకుంది. ఈ చిత్రానికి సాయినాథ్ ఎస్. ఉస్కైకర్ దర్శకత్వం వహించగా, భరత్‌బాలా గణపతి నిర్మించారు. అంతరించిపోతున్న ఒక సంచార సంగీత సంప్రదాయాన్ని దృశ్య రూపంలో అద్భుతంగా ఆవిష్కరించిన తీరు, జ్ఞాపకాలు, వారసత్వం, సాంస్కృతిక కొనసాగింపును ఎంతో ఆత్మీయంగా అన్వేషించిన విధానం అభినందనీయమని జ్యూరీ పేర్కొంది. నిర్మాత భరత్‌బాలా గణపతి తరపున దర్శకుడు ఉస్కైకర్, జవాహర్ శర్మతో కలిసి ఈ అవార్డును అందుకున్నారు.
అంతర్జాతీయ పోటీలు: ప్రపంచ సినిమాకు పట్టాభిషేకం
అంతర్జాతీయ స్థాయి పోటీలు వివిధ ఖండాల వ్యాప్తంగా కళాత్మక, కథాంశాల సరిహద్దులను సరికొత్తగా ఆవిష్కరించిన విశిష్ట చిత్రాలను సత్కరించాయి.
ఉత్తమ అంతర్జాతీయ యానిమేషన్ చిత్రంగా 'సిల్వర్ కాంచ్' పురస్కారాన్ని జర్మనీకి చెందిన 'మాయాస్ సాంగ్' చిత్రం దక్కించుకుంది. ఈ చిత్రాన్ని ఫ్రాన్సిస్కా షోనెన్‌బెర్గర్, జయకృష్ణన్ సుబ్రమణియన్ దర్శకత్వం వహించారు. అస్తిత్వం, గుర్తింపు, స్వీయ అన్వేషణల లోతైన ప్రయాణాన్ని సార్వత్రిక ఆకర్షణతో, ఊహాత్మకంగా, భావోద్వేగభరితంగా ఆవిష్కరించిన కథా విధానం అద్భుతమని జ్యూరీ ఈ చిత్రాన్ని కొనియాడింది. చిత్ర నిర్మాతల తరపున లీడ్ యానిమేటర్, స్టూడియో ప్రతినిధి సానికా కుల్కర్ణి ఈ అవార్డును అందుకున్నారు.
ఉత్తమ అంతర్జాతీయ షార్ట్ ఫిక్షన్ చిత్రంగా సిల్వర్ కాంచ్ పురస్కారాన్ని ఇరాన్ చిత్రం ‘అండర్ ది స్నో‘ చిత్ర దర్శకురాలు నఫీసే జారే, మరో నిర్మాత కొట్టుకతీర ప్రకాష్ తరపున అందుకుంటున్న మరో నిర్మాత దీపాంకర్ ప్రకాష్.
అంతర్జాతీయ పోటీల విభాగంలో ఉత్తమ షార్ట్ ఫిక్షన్ చిత్రంగా సిల్వర్ కాంచ్ పురస్కారాన్ని ఇరాన్ దేశానికి చెందిన 'అండర్ ది స్నో' చిత్రం దక్కించుకుంది. ఈ చిత్రానికి నఫీసే జారే దర్శకత్వం వహించారు. సామాజిక ఆంక్షల నడుమ ఒక యువతి తన వ్యక్తిగత నిజాలను నిలబెట్టుకోవడానికి చేసే ప్రయత్నాన్ని ఎంతో సాహసోపేతంగా, సున్నితమైన భావోద్వేగాలతో ఆవిష్కరించిన తీరు, ఎంతో నిశ్శబ్దంగా ఉంటూనే గుండెలను హత్తుకునేలా ఉపయోగించిన సినిమాటిక్ భాష అద్భుతమని జ్యూరీ ఈ చిత్రాన్ని ప్రశంసించింది. చిత్ర దర్శకురాలు, సహ నిర్మాత కొట్టుకతీర ప్రకాష్, పూయా సయీది తరపున నిర్మాత దీపాంకర్ ప్రకాష్ ఈ అవార్డును అందుకున్నారు.
ఎంఐఎఫ్ఎఫ్ 2026 చలనచిత్రోత్సవంలోనే అత్యంత విశిష్టమైన సృష్టిగా నిలిచి, తన శక్తివంతమైన మానవీయ కోణానికీ, సార్వత్రిక ప్రాధాన్యతకకూ గానూ ఈ ఉత్సవం అత్యున్నత పురస్కారాన్ని దక్కించుకున్న 'సిల్వర్' చిత్రానికి ప్రతిష్ఠాత్మక గోల్డెన్ కాంచ్ అవార్డును బహూకరించడంతో ఈ వేడుక ఘనంగా ముగిసింది.
ఇతర ప్రతిష్ఠాత్మక పురస్కారాలు:
శంఖం అవార్డులతో పాటు చలనచిత్ర దర్శకుడు ప్రదీప్ కెంచనూరు తన 'ది హగ్ ఆఫ్ ఎంప్టీనెస్' చిత్రానికి గానూ ఎఫ్ఐపీఆర్ఈఎస్సీఐ ఇంటర్నేషనల్ క్రిటిక్స్ ప్రైజ్ ను కూడా గెలుచుకున్నారు. 'ది ఓల్డ్ బుల్ నోస్, ఆర్ వన్స్ న్యూ' చిత్రానికి గానూ మిలన్ కుమార్ 'ఉత్తమ విద్యార్థి చిత్రం'గా ఐడిపీఏ అవార్డును అందుకున్నారు.
'రజా' చిత్రానికి గానూ పూజా తోలానీని ఉత్తమ తొలిచిత్ర దర్శకురాలుగా ప్రతిష్ఠాత్మక 'దాదాసాహెబ్ ఫాల్కే చిత్రనగరి అవార్డుతో సత్కరించారు. 'ది లాస్ట్ షెల్టర్' చిత్రం 'వికసిత్ భారత్ / వందేమాతరం 150 ఏళ్లు / భారత్@2026' విభాగంలో 'ఉత్తమ షార్ట్ ఫిలిం ప్రత్యేక పురస్కారాన్ని' సొంతం చేసుకోగా, తైవాన్ చలనచిత్ర దర్శకుడు చువాన్-యింగ్ లియావో తన 'ది హోర్డర్స్' చిత్రానికి గానూ అత్యంత సృజనాత్మక/ప్రయోగాత్మక చిత్రంగా ప్రమోద్ పతి స్పెషల్ జ్యూరీ అవార్డును అందుకున్నారు.
జాతీయ పోటీల సాంకేతిక విభాగాలలో ‘కోవర్టి' చిత్రానికి గానూ బిగ్యనా దహల్ ఉత్తమ సౌండ్ డిజైన్ పురస్కారాన్ని గెలుచుకోగా, 'మేడే' చిత్రానికి గానూ అఖిల్ కృష్ణన్ ఉత్తమ ఎడిటింగ్ అవార్డును సొంతం చేసుకున్నారు. 'స్మాల్ క్లౌడ్స్' చిత్రానికి గానూ రణధీర్ బిస్వాస్ ఉత్తమ సినిమాటోగ్రఫీ పురస్కారానికి ఎంపికయ్యారు.
అంతర్జాతీయ పోటీల సాంకేతిక విభాగాలలో 'దేవా ఆజ్ పణ్ వ్హాయ్' చిత్రానికి గానూ అభయ్ రుమ్డే ఉత్తమ సౌండ్ డిజైన్ పురస్కారాన్ని గెలుచుకోగా, రష్యాకు చెందిన 'అబౌట్ ది కౌ' చిత్రానికి ఎవ్గెనీ స్మిర్నోవ్, మాక్సిమ్ స్మిర్నోవ్ ఉత్తమ ఎడిటింగ్ అవార్డును సొంతం చేసుకున్నారు. 'టర్టిల్ వాకర్' చిత్రానికి గానూ క్రిష్ మఖిజాను ఉత్తమ సినిమాటోగ్రఫీ పురస్కారంతో సత్కరించారు.
ఈ మహోత్సవ ముగింపు వేడుకకు మహారాష్ట్ర గవర్నర్ శ్రీ జిష్ణు దేవ్ వర్మ, పీఐబీ ప్రిన్సిపల్ డైరెక్టర్ జనరల్ శ్రీ ధీరేంద్ర ఓఝా, సమాచార, ప్రసార మంత్రిత్వ శాఖ అదనపు కార్యదర్శి శ్రీ ప్రభాత్, ప్రముఖ చలనచిత్ర దర్శకుడు శ్రీ అశుతోష్ గోవారికర్, ఎన్ఎఫ్‌డిసి మేనేజింగ్ డైరెక్టర్, ఫెస్టివల్ డైరెక్టర్ శ్రీ ప్రకాష్ మగ్దుమ్, సినీ పరిశ్రమకు చెందిన ప్రముఖులు, చలనచిత్ర ప్రేమికులు హాజరయ్యారు. భారతదేశంతో పాటు ప్రపంచవ్యాప్తంగా ఉన్న ఎన్నో అద్భుతమైన కథలను, కథా వైవిధ్యాన్ని కొనియాడుతూ ఈ వారం రోజుల వేడుకను ఘనంగా ముగించారు.
గోల్డెన్ కాంచ్ పురస్కారాన్ని గెలుచుకున్న డాక్యుమెంటరీ చిత్రం 'సిల్వర్' ను ముగింపు చిత్రంగా ప్రదర్శించారు. ఎంఐఎఫ్ఎఫ్ తదుపరి ఎడిషన్ 2028 వరకు వీడ్కోలు చెప్పే ముందు, ప్రేక్షకులకు ఇది చివరి సినీమాటిక్ అనుభూతిని అందించింది.
***