نئی دہلی میں امور داخلہ اور باہمی تعاون کے مرکزی و زیر جناب امت شاہ کی صدارت میں منعقدہ ایک اہم میٹنگ میں طویل عرصے سے زیر التواء کشاؤ ملٹی پرپز ڈیم پروجیکٹ پر متعلقہ ریاستوں کے درمیان اتفاق رائے

امور داخلہ اور باہمی تعاون کے مرکزی  وزیر جناب امت شاہ کی صدارت میں آج نئی دہلی میں منعقدہ ایک اہم میٹنگ میں دریائے جمنا کی بحالی کے لیے طویل عرصے سے زیر التواء کشاؤ ملٹی پرپز ڈیم پروجیکٹ پر متعلقہ ریاستوں کے درمیان اتفاق رائے طے پایا ۔ مرکزی وزیر داخلہ کی پہل کے بعد ہماچل پردیش ، اتراکھنڈ ، دہلی ، اتر پردیش ، ہریانہ اور راجستھان کی ریاستوں نے کشاؤ ملٹی پرپز پروجیکٹ کے نفاذ کے لیے ایک مفاہمت نامے پر دستخط کرنے پر اتفاق کیا ۔ مفاہمت نامے پر دستخط کے بعد اس پروجیکٹ کو منظوری کے لیے مرکزی کابینہ کے سامنے رکھا جائے گا ۔

میٹنگ میں مرکزی وزیر توانائی جناب منوہر لال ، جل شکتی کے مرکزی وزیر جناب سی آر پاٹل ، ہماچل پردیش کے وزیر اعلی جناب سکھوندر سنگھ سکھو ، اتراکھنڈ کے وزیر اعلی جناب پشکر سنگھ دھامی ، مرکزی داخلہ سکریٹری ، مرکزی آبی وسائل کے سکریٹری ، بجلی کی وزارت کے سکریٹری ، ہماچل پردیش اور اتراکھنڈ کے چیف سکریٹری اور وزارت داخلہ ، وزیر اعظم کے دفتر اور جل شکتی کی وزارت کے سینئر عہدیداروں نے شرکت کی ۔

وزیر اعظم جناب نریندر مودی کی قیادت میں مرکزی حکومت کئی سالوں سے حل نہ ہونے والے قومی اور عوامی مفاد کے اہم مسائل پر اتفاق رائے پیدا کرکے 'بات چیت کے ذریعے حل' کے اصول کو عملی شکل دے رہی ہے ۔

اجلاس میں فیصلہ کیا گیا کہ کشاؤ ملٹی پرپز ڈیم پروجیکٹ کے پانی کے اجزاء کی لاگت کا 90 فیصد  مرکزی حکومت مرکزی امداد کے طور پر برداشت کرے گی ، جبکہ باقی 10فیصد  مالی بوجھ چھ ریاستوں میں تقسیم کیا جائے گا ۔

میٹنگ میں ہماچل پردیش کے پانی کے حصے کو دہلی اور راجستھان کے لیے مختص کرنے پر بھی اتفاق کیا گیا جس کے بدلے میں ہماچل پردیش کے بجلی کے حصے کی لاگت میں حصہ داری کی جائے گی ۔ یہ فیصلہ صاف ستھری اور تجدید شدہ جمنا کی طرف سفر میں ایک اہم سنگ میل ثابت ہوگا ، جس سے دریا میں صاف پانی کے بہاؤ میں اضافہ یقینی ہوگا ۔

*****

U.No:8724

ش ح۔ح ن۔س ا