કેન્દ્રીય ગૃહ અને સહકારિતા મંત્રી શ્રી અમિત શાહની અધ્યક્ષતામાં આજે નવી દિલ્હીમાં યોજાયેલી એક મહત્વપૂર્ણ બેઠકમાં, યમુના નદીના પુનરુદ્ધાર માટે લાંબા સમયથી પડતર એવા કિશાઉ બહુહેતુક ડેમ પ્રોજેક્ટ પર સંબંધિત રાજ્યો વચ્ચે સર્વસંમતિ સધાઈ હતી. કેન્દ્રીય ગૃહ મંત્રીની પહેલને પગલે, હિમાચલ પ્રદેશ, ઉત્તરાખંડ, દિલ્હી, ઉત્તર પ્રદેશ, હરિયાણા અને રાજસ્થાન રાજ્યો કિશાઉ બહુહેતુક પ્રોજેક્ટના અમલીકરણ માટે એમઓયુ પર હસ્તાક્ષર કરવા સંમત થયા હતા. એમઓયુ પર હસ્તાક્ષર થયા બાદ, આ પ્રોજેક્ટને મંજૂરી માટે કેન્દ્રીય કેબિનેટ સમક્ષ મૂકવામાં આવશે.

આ બેઠકમાં કેન્દ્રીય ઊર્જા મંત્રી શ્રી મનોહર લાલ, કેન્દ્રીય જલ શક્તિ મંત્રી શ્રી સી. આર. પાટીલ, હિમાચલ પ્રદેશના મુખ્યમંત્રી શ્રી સુખવિંદર સિંહ સુખુ, ઉત્તરાખંડના મુખ્યમંત્રી શ્રી પુષ્કર સિંહ ધામી, કેન્દ્રીય ગૃહ સચિવ, કેન્દ્રીય જળ સંસાધન સચિવ, ઊર્જા મંત્રાલયના સચિવ, હિમાચલ પ્રદેશ અને ઉત્તરાખંડના મુખ્ય સચિવો તેમજ ગૃહ મંત્રાલય, પ્રધાનમંત્રી કાર્યાલય (PMO) અને જલ શક્તિ મંત્રાલયના વરિષ્ઠ અધિકારીઓ ઉપસ્થિત રહ્યા હતા.

પ્રધાનમંત્રી શ્રી નરેન્દ્ર મોદીના નેતૃત્વ હેઠળ, કેન્દ્ર સરકાર રાષ્ટ્રીય અને જનહિતના મહત્વપૂર્ણ મુદ્દાઓ, જે ઘણા વર્ષોથી વણઉકેલાયેલા હતા, તેના પર સર્વસંમતિ બનાવીને ‘સંવાદ દ્વારા ઉકેલ’ ના સિદ્ધાંતને કાર્યરૂપ આપી રહી છે.

બેઠકમાં એવો નિર્ણય લેવામાં આવ્યો હતો કે કિશાઉ બહુહેતુક ડેમ પ્રોજેક્ટના પાણીના ઘટકના ખર્ચના 90% કેન્દ્રીય સહાય તરીકે કેન્દ્ર સરકાર દ્વારા ખર્ચ કરવામાં આવશે, જ્યારે બાકીનો 10% નાણાકીય ભાગ છ સહભાગી રાજ્યો વચ્ચે વહેંચવામાં આવશે.

બેઠકમાં પાવર (વીજળી) ઘટકના હિમાચલ પ્રદેશના ભાગના ખર્ચને વહેંચવાના બદલામાં, હિમાચલ પ્રદેશના પાણીના હિસ્સાને દિલ્હી અને રાજસ્થાનને ફાળવવા અંગે પણ સર્વસંમતિ સધાઈ હતી. આ નિર્ણય યમુના નદીમાં સ્વચ્છ પાણીનો પ્રવાહ વધારવાની ખાતરી આપીને, તેને વધુ સ્વચ્છ અને પુનર્જીવિત કરવાની યાત્રામાં એક મહત્વપૂર્ણ સીમાચિહ્નરૂપ સાબિત થશે.

SM/NP/JD