প্ৰধানমন্ত্ৰী শ্ৰী নৰেন্দ্ৰ মোদীয়ে ১৪ জুন, ২০২৬ত নাইচৰ ভিলা কেৰিলছত ফ্ৰান্সৰ ৰাষ্ট্ৰপতি মহামহিম শ্ৰীযুত ইমানুৱেল মেক্ৰনৰ সৈতে দ্বিপাক্ষিক আলোচনাত মিলিত হয়। চলিত বৰ্ষৰ আৰম্ভণিতে ভাৰত-ফ্ৰান্সৰ সম্পৰ্কক 'বিশেষ গোলকীয় কৌশলগত অংশীদাৰিত্ব'ৰ পৰ্যায়লৈ উন্নীত কৰাৰ পিছত দুয়োগৰাকী নেতাৰ মাজত এয়া আছিল প্ৰথমখন বৈঠক।

দুয়োগৰাকী নেতাই দ্বিপাক্ষিক সম্পৰ্কৰ বিভিন্ন দিশ সামৰি বিস্তৃত আলোচনা কৰে। তেওঁলোকে সকলো ক্ষেত্ৰতে দ্বিপাক্ষিক প্ৰতিৰক্ষা সহযোগিতাৰ উৎকৃষ্ট বিকাশ আৰু গভীৰতাক লৈ সন্তুষ্টি প্ৰকাশ কৰে আৰু প্ৰতিৰক্ষা প্লেটফৰ্ম আৰু উন্নত প্ৰযুক্তিৰ সহ-ডিজাইন, সহ-বিকাশ আৰু সহ-উৎপাদনৰ ওপৰত গুৰুত্ব আৰোপ কৰি ইয়াক অধিক তীব্ৰতৰ কৰিবলৈ সন্মত হয়। দুয়োগৰাকী নেতাই মহাকাশ খণ্ডত সহযোগিতাৰ চহকী ঐতিহ্যৰ কথা উল্লেখ কৰে আৰু মানৱ মহাকাশ উৰণ আৰু মহাকাশ পৰিস্থিতিগত সজাগতাৰ ক্ষেত্ৰত সহযোগিতা আগবঢ়াই নিয়াৰ বিষয়ে আলোচনা কৰে। তেওঁলোকে মহাকাশ খণ্ডত ব্যক্তিগত খণ্ডৰ সহযোগিতা সম্প্ৰসাৰণৰ উপায় সন্দৰ্ভতো আলোচনা কৰে। অসামৰিক পাৰমাণৱিক শক্তিৰ ক্ষেত্ৰত, তেওঁলোকে লক্ষ্য কৰে যে ভাৰতৰ শান্তি আইনখনে সৰু আৰু উন্নত মডুলাৰ ৰিয়েক্টৰকে ধৰি সহযোগিতাৰ বাবে নতুন সুযোগৰ সৃষ্টি কৰিছে।

হৰাইজন ২০৪৭ ৰ'ডমেপৰ অধীনৰ অগ্ৰগতিৰ পৰ্যালোচনা কৰি দুয়োগৰাকী নেতাই অৰ্থনৈতিক বিকাশ, প্ৰযুক্তি আৰু উদ্ভাৱন, প্ৰতিভাৰ গতিশীলতা আৰু জনসাধাৰণৰ সৈতে জনসাধাৰণৰ যোগাযোগ আৰু সাংস্কৃতিক বিনিময়ৰ ক্ষেত্ৰত দ্বিপাক্ষিক সম্পৰ্ক শক্তিশালী আৰু বৈচিত্ৰ্যময় কৰাৰ বাবে সুনিৰ্দিষ্ট ধাৰণা বিনিময় কৰে। এই প্ৰেক্ষাপটত তেওঁলোকে দ্বিপাক্ষিক বাণিজ্যৰ সুস্থিৰ বিকাশৰ কথা উল্লেখ কৰে আৰু পাঁচ বছৰৰ ভিতৰত ইয়াক দুগুণ কৰাৰ বাবে এক উচ্চ-স্তৰীয় ব্যৱস্থা স্থাপন কৰিবলৈ সন্মত হয়। তেওঁলোকে ভাৰত-ইউৰোপীয় সংঘৰ মুক্ত বাণিজ্য চুক্তিৰ দ্ৰুত ৰূপায়ণৰ আহ্বান জনায়, যিয়ে দ্বিপাক্ষিক বাণিজ্য আৰু বিনিয়োগ সম্প্ৰসাৰণৰ বাবে এক অনন্য সুযোগ প্ৰদান কৰে। নেতাসকলে এছএমই, বিমান পৰিবহণ আৰু ৰেলৱে খণ্ডত সহযোগিতা বৃদ্ধিৰ উপায় সন্দৰ্ভতো আলোচনা কৰে। তেওঁলোকে কানপুৰত এৰোনেটিক্সত দক্ষতা বিকাশৰ বাবে এটা উৎকৰ্ষ কেন্দ্ৰ স্থাপনৰ চুক্তিক আদৰণি জনায়। অৰ্থনৈতিক নিৰাপত্তাৰ ওপৰত এক আলোচনা স্থাপনক আদৰণি জনাই দুয়োগৰাকী নেতাই বিশেষকৈ গুৰুত্বপূৰ্ণ খনিজ পদাৰ্থসমূহৰ ক্ষেত্ৰত যোগান শৃংখলাৰ সুস্থিৰতা শক্তিশালী কৰিবলৈ সন্মত হয়।

দ্বিপাক্ষিক সম্পৰ্কত উদ্ভাৱন আৰু প্ৰযুক্তিৰ মূল ভূমিকাক স্বীকৃতি দি, অংশীদাৰিত্বক এক দীৰ্ঘম্যাদী দিশ প্ৰদান কৰাৰ বাবে দুয়োপক্ষই "উদ্ভাৱন ৰোডমেপ ২০৩০"গ্ৰহণ কৰে। দুয়োগৰাকী নেতাই কৃত্ৰিম বুদ্ধিমত্তাৰ ক্ষেত্ৰত সহযোগিতা সম্প্ৰসাৰণৰ বিষয়ে আলোচনা কৰে আৰু এই উদ্দেশ্যে এক যুটীয়া ভাৰত-ফ্ৰান্স এআই কৰ্মগোট গঠন কৰিবলৈ সন্মত হয়। নেতাসকলৰ দ্বাৰা নিচত 'ভাৰত ইনোভেটস'ৰ যুটীয়া উদ্বোধন আৰু পেৰিছৰ ভিভাটেকত প্ৰধানমন্ত্ৰীৰ আগন্তুক অংশগ্ৰহণে ডীপ-টেক, অৰ্ধপৰিবাহী, এগ্ৰি-টেক, মেড-টেক, নৱীকৰণযোগ্য শক্তি, প্ৰতিৰক্ষা আৰু মহাকাশৰ দৰে খণ্ডসমূহত দুয়োখন দেশৰ মাজৰ অংশীদাৰিত্বক অধিক শক্তিশালী কৰি তুলিছে। দুয়োগৰাকী নেতাই ফ্ৰান্সত ইউপিআইৰ নিৰন্তৰ সম্প্ৰসাৰণৰ লগতে দুয়োখন দেশৰ উদ্ভাৱনী পৰিৱেশৰ প্ৰতিষ্ঠানসমূহৰ মাজত স্বাক্ষৰিত ১৯খন চুক্তিক প্ৰশংসা কৰে।

দুয়োগৰাকী নেতাই দুয়োখন দেশৰ জনসাধাৰণৰ মাজত সম্পৰ্ক বৃদ্ধিৰ গুৰুত্বৰ ওপৰত জোৰ দিয়ে। এই প্ৰেক্ষাপটত, ফ্ৰান্সৰ বিমানবন্দৰসমূহত ভাৰতীয় নাগৰিকসকলৰ বাবে ভিছামুক্ত ট্ৰেনজিট দ্ৰুতভাৱে কাৰ্যকৰী কৰাৰ বাবে প্ৰধানমন্ত্ৰীয়ে ৰাষ্ট্ৰপতি মেক্ৰনক ধন্যবাদ জ্ঞাপন কৰে। তেওঁলোকে দুয়োখন দেশৰ মাজত প্ৰতিভা আৰু শিক্ষাৰ্থীসকলৰ গতিশীলতা বৃদ্ধি আৰু শিক্ষাগত অৰ্হতাৰ পাৰস্পৰিক স্বীকৃতি সম্প্ৰসাৰণৰ উপায় সন্দৰ্ভতো অধিক আলোচনা কৰে। প্ৰধানমন্ত্ৰীয়ে ফ্ৰান্সৰ বিশ্ববিদ্যালয়সমূহক নতুন শিক্ষানীতিৰ অধীনত ভাৰতত চৌহদ মুকলি কৰিবলৈ আমন্ত্ৰণ জনায়। নেতাসকলে লোথালত থকা ৰাষ্ট্ৰীয় সামুদ্ৰিক ঐতিহ্য প্ৰকল্পকে ধৰি সংগ্ৰহালয় আৰু সাংস্কৃতিক প্ৰতিষ্ঠানসমূহৰ মাজত সহযোগিতা বৃদ্ধিতো সন্মতি প্ৰকাশ কৰে।

নেতাসকলে পশ্চিম এছিয়া আৰু ইউক্ৰেইনৰ পৰিস্থিতিকে ধৰি গোলকীয় গুৰুত্বপূৰ্ণ বিষয়সমূহৰ ওপৰত নিজৰ দৃষ্টিভংগী বিনিময় কৰে। প্ৰধানমন্ত্ৰীয়ে এভিয়ানত অনুষ্ঠিত হ'বলগীয়া আগন্তুক জি-৭ সন্মিলনত অংশগ্ৰহণ কৰিবলৈ আগ্ৰহ প্ৰকাশ কৰে আৰু সন্মিলনৰ পূৰ্বে ভাৰতক গুৰুত্বপূৰ্ণ আলোচনাত অন্তৰ্ভুক্ত কৰাৰ বাবে ৰাষ্ট্ৰপতি মেক্ৰনক ধন্যবাদ জনায়।

দুয়োগৰাকী নেতাই দুয়োখন দেশৰ জনসাধাৰণৰ বাবে অধিক সুযোগ সৃষ্টি কৰা আৰু আন্তঃৰাষ্ট্ৰীয় শান্তি, স্থিৰতা আৰু সমৃদ্ধিক আগুৱাই নিয়াৰ ক্ষেত্ৰত ভাৰত-ফ্ৰান্স বিশেষ গোলকীয় কৌশলগত অংশীদাৰিত্বৰ গুৰুত্বৰ কথা দোঁহাৰে।

প্ৰধানমন্ত্ৰী আৰু ৰাষ্ট্ৰপতি মেক্ৰনে ভাৰতৰ জয়পুৰত ১০ দিনীয়া আৰ্ট ৰেছিডেন্সীৰ সময়ত ফ্ৰান্সৰ শিল্পী শ্ৰীযুত থিব'ল্ট ডি লা লেন্স আৰু শ্ৰীযুত থিওফাইল ডি বাশ্বাৰে সৃষ্টি কৰা শিল্পকৰ্মসমূহো প্ৰত্যক্ষ কৰে। শিল্পীসকলে ভাৰতীয় ঐতিহ্য আৰু নান্দনিকতাৰ পৰা অনুপ্ৰেৰণা লাভ কৰিছিল যাৰ ফলস্বৰূপে সৃষ্টি হোৱা শিল্পকৰ্মসমূহত ভাৰত আৰু ফ্ৰান্সৰ সাংস্কৃতিক মিলন প্ৰতিফলিত হৈছে।

আলোচনাৰ অন্তত ৰাষ্ট্ৰপতি মেক্ৰনে প্ৰধানমন্ত্ৰী মোদীৰ সন্মানাৰ্থে এক মধ্যাহ্নভোজনৰ আয়োজন কৰে।

**************

MJPS/SS/ST/DB