নীটি আয়োগে আজি উত্তৰ-পূবৰ ৰাজ্যসমূহৰ মুখ্যমন্ত্ৰীসকলৰ সৈতে এক মত বিনিময় কাৰ্যসূচী অনুষ্ঠিত কৰে। আঠখন ৰাজ্য-অৰুণাচল প্ৰদেশ, অসম, মণিপুৰ, মেঘালয়, মিজোৰাম, নাগালেণ্ড, ছিকিম আৰু ত্ৰিপুৰাৰ প্ৰতিনিধিয়ে ইয়াত অংশগ্ৰহণ কৰে আৰু উন্নয়নৰ অগ্ৰাধিকাৰ, উদ্ভাৱন তথা প্ৰত্যাহ্বানসমূহৰ ওপৰত আলোচনা কৰে। নীটি আয়োগৰ উপাধ্যক্ষ শ্ৰী অশোক লাহিড়ী, নীটি আয়োগৰ সদস্য আৰু নীটি আয়োগৰ মুখ্য কাৰ্যবাহী বিষয়াৰ এই মত বিনিময় অনুষ্ঠানত উত্তৰ-পূবৰ ৰাজ্যসমূহৰ মুখ্য সচিব আৰু জ্যেষ্ঠ বিষয়াসকলে অংশগ্ৰহণ কৰে। এই অনুষ্ঠানত গঠনমূলক আৰু ফলাফলমুখী আলোচনা কৰা হয়।

অৰুণাচল প্ৰদেশৰ মুখ্যমন্ত্ৰী শ্ৰী পেমা খাণ্ডুৱে উল্লেখ কৰে যে উত্তৰ-পূবত এক গুৰুত্বপূৰ্ণ পৰিৱৰ্তন ঘটিছে আৰু বিকাশৰ এক মূল ইঞ্জিন হিচাপে আত্মপ্ৰকাশ কৰিছে। বিশেষকৈ জলবিদ্যুৎৰ ক্ষেত্ৰত ৰাজ্যখনৰ অপৰিসীম সম্ভাৱনাৰ ওপৰত গুৰুত্ব আৰোপ কৰি তেওঁ ইয়াৰ মানৱ সম্পদৰ দক্ষতা আৰু সামৰ্থ্য নিৰ্মাণ অধিক শক্তিশালী কৰাৰ প্ৰয়োজনীয়তাৰ ওপৰত গুৰুত্ব আৰোপ কৰে। তেওঁ লগতে ৰাজ্যখনত ৰূপায়ণ কৰা চৰকাৰ আপকে দ্বাৰ, সেৱা আপকে দ্বাৰ আৰু কেবিনেট আপকে দ্বাৰৰ দৰে উদ্ভাৱনীমূলক প্ৰশাসনৰ পদক্ষেপসমূহৰ বিষয়েও শ্বেয়াৰ কৰে, যাৰ লক্ষ্য হৈছে দক্ষ সেৱা প্ৰদান আৰু ৰাজহুৱা অভিযোগসমূহৰ দ্ৰুত নিষ্পত্তি নিশ্চিতকৰণ।

অসমৰ মুখ্যমন্ত্ৰী শ্ৰী হিমন্ত বিশ্ব শৰ্মাই মত প্ৰকাশ কৰে যে আঞ্চলিক বৈষম্য পৰিহাৰ কৰিবলৈ আৰু সামগ্ৰিক বিকাশ নিশ্চিত কৰিবলৈ উন্নয়ন সন্তুলিত হ’ব লাগিব। তেওঁ কালি ভাৰত চৰকাৰ, অসম আৰু নাগালেণ্ডৰ মাজত অসম-নাগালেণ্ড সীমান্ত অঞ্চলত খনিজ তেলৰ কাৰ্য্যকলাপ সহজ কৰি তোলাৰ বাবে স্বাক্ষৰিত ঐতিহাসিক ত্ৰিপাক্ষিক বুজাবুজি চুক্তিক প্ৰশংসা কৰি ইয়াক সহযোগিতামূলক উন্নয়নৰ আৰ্হি হিচাপে অভিহিত কৰে। শ্ৰী শৰ্মাই লগতে উল্লেখ কৰে যে সামাজিক উন্নয়ন সূচকত গুৰুত্বপূৰ্ণ অগ্ৰগতি লাভ কৰাৰ লগতে অসম দেশৰ দ্ৰুততম বিকাশশীল ৰাজ্য হিচাপে আত্মপ্ৰকাশ কৰিছে। তেওঁ এই প্ৰগতি অব্যাহত ৰাখিবলৈ আৰু ত্বৰান্বিত কৰিবলৈ আঞ্চলিক প্ৰয়োজনীয়তাবোৰ সমাধান কৰাৰ প্ৰয়োজনীয়তাৰ ওপৰত গুৰুত্ব আৰোপ কৰে।

মত বিনিময়ৰ সময়ত মেঘালয়ৰ মুখ্যমন্ত্ৰী শ্ৰী কনৰাড কে চাংমাই অৰ্থনৈতিক বিকাশক অৰ্থপূৰ্ণ মানৱ বিকাশত পৰিণত কৰিব লাগিব বুলি গুৰুত্ব আৰোপ কৰে। তেওঁ মেঘালয়ৰ দৃষ্টিভংগী 'ৰূপান্তৰ যাত্ৰা ২০৩২' ৰ ৰূপত শ্বেয়াৰ কৰে যাৰ লক্ষ্য হৈছে বিকশিত মেঘালয়ৰ লক্ষ্য বাস্তৱায়িত কৰা।

শ্ৰী চাংমাই গুৰুত্বপূৰ্ণ সম্পদ সৃষ্টি আৰু উন্নয়ন ত্বৰান্বিত কৰাৰ ক্ষেত্ৰত বাহ্যিক সাহায্যপ্ৰাপ্ত প্ৰকল্পসমূহৰ গুৰুত্বপূৰ্ণ ভূমিকাৰ ওপৰত আলোকপাত কৰে। তেওঁ অঞ্চলটোৰ অনন্য প্ৰয়োজনীয়তাৰ সৈতে খাপ খোৱা নীতিৰ প্ৰয়োজনীয়তাৰ ওপৰত গুৰুত্ব আৰোপ কৰাৰ লগতে বাণিজ্য, ৰপ্তানি আৰু পৰিৱেশৰ সুস্থিৰতাৰ ক্ষেত্ৰত উত্তৰ-পূবৰ ৰাজ্যসমূহৰ মাজত অধিক সহযোগিতাৰ পোষকতা কৰিছিল।

মিজোৰামৰ মুখ্যমন্ত্ৰী শ্ৰী লালদুহোমাই তেওঁৰ ভাষণত ৰাজ্যখনৰ অপৰিসীম পৰ্যটন সম্ভাৱনাৰ ওপৰত আলোকপাত কৰে আৰু আত্মসহায়ক গোট তথা স্থানীয় সম্প্ৰদায়ৰ দ্বাৰা পৰিচালিত ইয়াৰ সফল সম্প্ৰদায়ভিত্তিক পৰ্যটন আৰ্হিৰ বিষয়ে শ্বেয়াৰ  কৰে। তেওঁ উল্লেখ কৰে যে যোৱা চাৰি বছৰত মিজোৰামত পৰ্যটকৰ সংখ্যা বহুগুণে বৃদ্ধি পাইছে। তেওঁ মিজোৰাম জিঞ্জাৰ মিছনৰ বাবেও সমৰ্থন বিচাৰে আৰু উত্তৰ-পূবৰ ৰাজ্যসমূহে প্ৰায়ে সন্মুখীন হোৱা যোগ্যতাৰ প্ৰত্যাহ্বানৰ মোকাবিলা কৰিবলৈ কেন্দ্ৰীয় পৃষ্ঠপোষকতা আঁচনিসমূহত অধিক নমনীয়তাৰ প্ৰয়োজনীয়তাৰ ওপৰত গুৰুত্ব আৰোপ কৰে।

নাগালেণ্ডৰ মুখ্যমন্ত্ৰী শ্ৰী নেইফিউ ৰিঅ’ই ৰাজ্যখনৰ উন্নয়নৰ গতি বজাই ৰাখিবলৈ পঞ্চদশ বিত্ত আয়োগৰ জৰিয়তে প্ৰদান কৰা সমৰ্থন অব্যাহত ৰখাৰ প্ৰয়োজনীয়তাৰ ওপৰত গুৰুত্ব আৰোপ কৰে। তেওঁ নতুন আন্তঃগাঁথনি প্ৰকল্প, অৰ্থনৈতিক কাৰ্যকলাপৰ সম্প্ৰসাৰণ, তেল আৰু গেছ অন্বেষণ তথা কৃষি খণ্ডক শক্তিশালী কৰাৰ সম্ভাৱনাৰ ওপৰত আলোকপাত কৰে। শ্ৰী ৰিঅ’ই নাগালেণ্ডৰ কফিৰ দৰে সামগ্ৰীৰ বাবে উন্নত পৰিবহণ আন্তঃগাঁথনি আৰু বিশ্ব বজাৰ প্ৰৱেশাধিকাৰ বৃদ্ধিৰ প্ৰয়োজনীয়তাৰ ওপৰতো গুৰুত্ব আৰোপ কৰে। সহযোগিতামূলক উন্নয়নৰ প্ৰতি তেওঁৰ প্ৰতিশ্ৰুতি পুনৰ নিশ্চিত কৰি তেওঁ বিকশিত ভাৰত প্ৰাপ্ত কৰাৰ অংশীদাৰী দৃষ্টিভংগীৰ প্ৰতি সমৰ্থন প্ৰকাশ কৰে।

মণিপুৰৰ মুখ্যমন্ত্ৰী শ্ৰী ৱাই খেমচান্দ সিঙে ৰাজ্যখনত পুনৰ্সংস্থাপন ব্যৱস্থাৰ সৈতে চলি থকা প্ৰচেষ্টাসমূহৰ ওপৰত আলোকপাত কৰে। তেওঁ পুনৰ নিৰ্মাণ আৰু গৃহ নিৰ্মাণৰ পদক্ষেপৰ সময়োপযোগী ৰূপায়ণ নিশ্চিত কৰিবলৈ শক্তিশালী নিৰীক্ষণ ব্যৱস্থাৰ প্ৰয়োজনীয়তাৰ ওপৰত গুৰুত্ব আৰোপ কৰে। প্ৰভাৱিত সম্প্ৰদায়সমূহক সমৰ্থন কৰা আৰু স্বাভাৱিক অৱস্থা ঘূৰাই অনাৰ বাবে সমন্বিত প্ৰচেষ্টাৰ প্ৰয়োজনীয়তাৰ ওপৰতো তেওঁ গুৰুত্ব আৰোপ কৰে।

ছিকিমৰ মুখ্যমন্ত্ৰী শ্ৰী প্ৰেম সিং তামাঙে ৰাজ্যখনৰ উন্নয়নত পৰ্যটন, সংযোগ আৰু ডিজিটেল আন্তঃগাঁথনিৰ গুৰুত্বপূৰ্ণ ভূমিকাৰ বিষয়ে আলোচনা কৰে। তেওঁ সমগ্ৰ অঞ্চলটোত সূচলতা আৰু অৰ্থনৈতিক সুযোগ বৃদ্ধিৰ বাবে বাণিজ্যিকভাৱে ব্যৱহাৰযোগ্য বিমান সংযোগ আৰু উন্নত ডিজিটেল আন্তঃগাঁথনিৰ প্ৰয়োজনীয়তাৰ ওপৰত গুৰুত্ব আৰোপ কৰে। শ্ৰী তামাঙে ঔদ্যোগিক বিকাশৰ প্ৰসাৰ, বিনিয়োগ আকৰ্ষণ আৰু নিযুক্তি সৃষ্টিৰ বাবে উত্তৰ-পূব ঔদ্যোগিক উন্নয়ন আঁচনি (এন ই আই ডি এছ) অব্যাহত ৰখাৰ বাবেও আহ্বান জনায়। তেওঁ বহনক্ষম উন্নয়ন নিশ্চিত কৰাৰ লগতে উত্তৰ-পূব অঞ্চলৰ অনন্য জনগাঁথনিগত আৰু পৰিৱেশগত বাস্তৱতাক প্ৰতিফলিত কৰা নীতিগত পৰিকাঠামোৰ প্ৰয়োজনীয়তাৰ ওপৰতো গুৰুত্ব আৰোপ কৰে।

ত্ৰিপুৰাৰ মুখ্যমন্ত্ৰী ডঃ মাণিক সাহাই ৰাজ্যখনৰ ভৌগোলিক সীমাবদ্ধতা, ব্যাপক আন্তঃৰাষ্ট্ৰীয় সীমা আৰু দক্ষতাৰ ব্যৱধানৰ ওপৰত আলোকপাত কৰি অৰ্থনৈতিক বিকাশ তথা বিনিয়োগ ত্বৰান্বিত কৰাৰ বাবে লক্ষ্যযুক্ত হস্তক্ষেপৰ প্ৰয়োজনীয়তাৰ ওপৰত গুৰুত্ব আৰোপ কৰে। তেওঁ লক্ষ্য কৰে যে সমন্বিত চেকপোষ্ট, ৰে’ল সেৱা আৰু বিমান সংযোগকে ধৰি বাণিজ্য আৰু সংযোগ আন্তঃগাঁথনি বৃদ্ধি কৰাৰ প্ৰয়োজন আছে। ডাঃ সাহাই বাঁহ, ৰবৰ, বস্ত্ৰ, ফাৰ্মাচিউটিকেলছ, ক্ৰীড়া আৰু পৰ্যটনৰ দৰে খণ্ডৰ সম্ভাৱনাৰ ওপৰতো গুৰুত্ব আৰোপ কৰে আৰু দক্ষতা বিকাশ, উদ্ভাৱন, মূল্য সংযোজন তথা ৰপ্তানিৰ প্ৰচাৰৰ দিশত অধিক সমৰ্থনৰ আহ্বান জনায়। তেওঁ লগতে স্বাস্থ্যসেৱা আৰু শৈক্ষিক আন্তঃগাঁথনিৰ প্ৰয়োজনীয়তাৰ ওপৰত গুৰুত্ব আৰোপ কৰি উল্লেখ কৰে যে বিকশিত ত্ৰিপুৰা ভিজন ডকুমেণ্ট প্ৰস্তুত কৰা প্ৰথম কেইখনমান ৰাজ্যৰ ভিতৰত ত্ৰিপুৰা অন্যতম।

এই আলোচনাত কৃষি, গ্ৰাম্য উন্নয়ন, স্বাস্থ্যসেৱা, শিক্ষা, দক্ষতা বিকাশ, পৰ্যটন, জীৱিকা, আন্তঃগাঁথনি আদিৰ দৰে খণ্ডসমূহত সফল পদক্ষেপ, নীতিগত উদ্ভাৱন আৰু প্ৰভাৱশালী উন্নয়ন আঁচনিসমূহৰ আদান-প্ৰদানৰ ওপৰত গুৰুত্ব আৰোপ কৰা হয়।

সামৰণি ভাষণত, নীটি আয়োগৰ সদস্য শ্ৰীমতী জোৰাম আনিয়াই সকলোকে তেওঁলোকৰ অংশগ্ৰহণৰ বাবে আৰু নিজ নিজ ৰাজ্যৰ প্ৰগতি, সাফল্য তথা উন্নয়নমূলক অগ্ৰাধিকাৰসমূহ শ্বেয়াৰ কৰাৰ বাবে ধন্যবাদ জ্ঞাপন কৰে। মত বিনিময়ৰ সময়ত উত্থাপন কৰা বিষয় আৰু পৰামৰ্শসমূহৰ কথা উল্লেখ কৰি তেওঁ কয় যে নীটি আয়োগে উত্তৰ-পূবৰ ৰাজ্যসমূহৰ উন্নয়নৰ বাবে ভাৰত চৰকাৰৰ সংশ্লিষ্ট মন্ত্ৰালয় আৰু বিভাগসমূহৰ সৈতে ঘনিষ্ঠভাৱে কাম কৰি থাকিব।

***

MJPS/SS/PRK/MK