Ka NITI Aayog mynta ka sngi ka la pynlong ia ka jingialang iamir jingmut bad ki Myntri Rangbah jong ki jylla ka thain shatei lam mihngi. Ki nongmihkhmat na baroh phra tylli ki Jylla - Arunachal Pradesh, Assam, Manipur, Meghalaya, Mizoram, Nagaland, Sikkim bad Tripura ki la ïashim bynta bad ïamir jingmut halor ki mat ba kongsan ba iadei bad ka roi ka par, ki jingsaindur thymmai bad ki jingeh. Ka jingïakren na u Ashok Lahiri, Vice Chairperson ka NITI Aayog; Ki dkhot na ka NITI Aayog bad CEO, NITI Aayog ki la sakhi ïa ka jingïashim bynta jong ki Chief Secretary bad ki heh ophisar na ki Jylla ka thaiñ Shatei Lammihngi. Ki jingïamir jingmut ki la sakhi ïa ki jingïakren kiba seisoh bad kiba wanrah ïa ki jingmyntoi.

U Pema Khandu, Myntri Rangbah ka jylla Arunachal Pradesh u la ban jur ba ka thaiñ Shatei Lammihngi ka don hapdeng ka jingkylla kaba khraw bad ka paw kum ka kor ba kongsan jong ka jingroi. Haba ban jur ïa ka lad kaba khraw ba ka Jylla ka don, khamtam ha ka hydropower, u la ban jur ïa ka jingdonkam ban pynkhlain shuh shuh ïa ki sap bad bor treikam jong ki briew jong ka. U la ïasam ruh ïa ki sienjam ba thymmai ha ka kam ai jingsynshar ba dang pyntreikam ha ka Jylla kum ka Sarkar Aapke Dwar, Seva Aapke Dwar bad ka Cabinet Aapke Dwar, kaba thmu ban pynthikna ïa ka jingpynpoi ia ki lad jingshakri kiba paka bad ban pynbeit kloi ïa ki jingeh jong ki paidbah.

U Himanta Biswa Sarma, Myntri Rangbah ka Assam, u la ai jingmut ba ka roi ka par kadei ban long kaba ryntih khnang ban lait na ka jingïapher ha ki thaiñ bad ban pynthikna ïa ka jingkiew shaphrang kaba kynthup lang ïa baroh. U la ai khublei ïa ka MoU ba kongsan ba la ïasoi hynnin ka sngi hapdeng ka Sorkar India, Assam bad Nagaland na ka bynta ban pynsuk ïa ki kam pynmih umphniang ha ki jaka khappud ka Assam–Nagaland, da kaba ban jur ïa ka kum ka nuksa jong ka jingïatreilang ha ka roi ka par. U Sarma u la ong ruh ba ka Assam ka la paw kum ka Jylla kaba kiew stet tam ha ka ri katba ka dang kiew bha ha ki dak jong ka roi ka par ha ka imlang sahlang. U la ban jur ia ka jingdonkam ban weng ia ki jingdonkam ha ka thain ban pynneh bad pynsted ia kane ka jingkiew shaphrang.

Ha kane ka jingïakren, u Conrad K. Sangma, Myntri Rangbah ka Jylla Meghalaya, u la ban jur ba ka jingkiew ka ioh ka kot dei ban kylla sha ka jingkiew shaphrang jong ki briew kaba don jingmut. U la ïasam ïa ka jingthmu jong ka Meghalaya ha ka dur jong ka ‘Transformation Journey 2032’ kaba thmu ban pynurlong ïa ka thong jong ka Viksit Meghalaya.

U Sangma u la kren ruh shaphang ka bynta kaba kongsan jong ki Projek ba la iarap nabar ban pynbiang ia ki jingdon jingem kiba kongsan bad ban pynsted ia ka roi ka par. U la kyrshan ruh ia ka jingiatreilang kaba kham iar hapdeng ki Jylla jong ka thain shatei lammihngi ha ki bynta jong ka khaii pateng, ka jingshalan mar shabar ri bad ka jingpynneh pynsah ia ka mariang, katba u la ban jur ia ka jingdonkam ia ki polisi kiba iadei bad ki jingdonkam ba kyrpang jong ka thain.

U Lalduhoma, Myntri Rangbah ka Mizoram, ha ka jingai jingkren jong u u la ban jur ïa ka lad kaba khraw ba ka jylla ka don ha ka kam jngohkai pyrthei bad u la ïasam ïa ka kam jngohkai pyrthei kaba pynshong nongrim ha ka imlang sahlang kaba la pynïaid da ki self help group bad ki nongshong shnong jong ka thain. U la ong ba ka jingwan jong ki nongjngohkai pyrthei sha Mizoram ka la kiew bun shah ha kine ki saw snem ba la dep. U la pan jingkyrshan ruh na ka bynta ka Mizoram Ginger Mission bad u la ban jur ia ka jingdonkam ban don ka jingsuk ban pynkylla ia ki skhim ha Sikkim kiba la kyrshan da ka sorkar pdeng ban weng ia ki jingeh ha ka jingioh jingmyntoi kiba ju iakynduh da ki jylla ka thain shatei lammihngi.

U Neiphiu Rio, Myntri Rangbah ka Nagaland, u la ban jur ïa ka jingdonkam ban bteng ïa ka jingkyrshan ba la ai lyngba ka 15^th Finance Commission ban pynneh ïa ka roi ka par jong ka Jylla. U la kren shaphang ka lad ba don na ka bynta ki projek ba thymmai ba iadei bad ki jingdon jingem, ka jingpyniar ia ki kam ba iadei bad ka ioh ka kot, ka jingwad ia ka umphniang bad gas bad ka jingpynkhlain ia ka kam rep. U Rio u la ban jur ruh ia ka jingdonkam ban kyntiew ia ki lad leit jingleit bad ban kyntiew ia ka jinglah ban ioh ia ki mar ha kylleng ka pyrthei na ka bynta ki mar kum u coffee na Nagaland. Haba pynskhem biang ia ka jingangnud jong u ban iatreilang ha ka roi ka par, u la pynpaw ka jingkyrshan ia ka jingthmu jong baroh ban pynurlong ia ka Viksit Bharat.

U Y. Khemchand Singh, Myntri Rangbah ka Manipur, u la kren shaphang ki sienjam kiba dang ïaid shakhmat kiba ïadei bad ki lad ai jingiarap bad jaka sah ha ka Jylla. U la ban jur ia ka jingdonkam jong ki lad jingpeit bniah kiba khlain ban pynthikna ia ka jingpyntreikam ha ka por kaba biang ia ki sienjam ban tei pat bad ban shna iing, da kaba ban jur ia ka jingdonkam ban iatreilang ban kyrshan ia ki briew kiba shah ktah bad ban wanrah biang ia ka shongsuk shongsain.

U Prem Singh Tamang, Myntri Rangbah ka Sikkim, u la ïakren halor ka bynta ba kongsan jong ka kam jngohkai pyrthei, ka jingpynïasoh bad ki jingdon jingem ba iadei bad ki kam digital ha kaba kyntiew ïa ka roi ka par jong ka Jylla. U la ban jur ia ka jingdonkam ban don ka jingpyniasoh liengsuin kaba pynmih pisa bad ban kyntiew ia ki jingdon jingem ba iadei bad ki kam digital ban kyntiew ia ka jinglah ban ioh bad ki lad kamai ha kylleng ka thain. U Tamang u la kyntut ruh ban bteng ia ka North East Industrial Development Scheme (NEIDS) ban kyntiew ia ki karkhana, ban khring ia ki nongbei tyngka bad ban pynmih ki lad ioh kam. U la ban jur ia ka jingdonkam jong ki polisi kiba pyni ia ka jinglong ba kyrpang jong ka jingbun briew bad ki jingshisha ba iadei bad ka mariang ha ka thain shatei lammihngi katba ki pynthikna ia ka roi ka par kaba iaineh.

U Dr. Manik Saha, Myntri Rangbah ka Tripura, u la kren shaphang ki jingeh ha ka jaka jong ka Jylla, ki pud ki sam kiba heh bad ki jingduna ha ka jingtbit, da kaba ban jur ïa ka jingdonkam jong ki jingïarap ba la thmu ban pynsted ïa ka jingkiew ka ïoh ka kot bad ka jingbei tyngka. U la iohi ba donkam ban kyntiew ia ki jingdon jingem ha ka khaii pateng bad ka jingpyniasoh, kynthup ia ki check post ba la pyniasoh lang, ki jingshakri kiba iadei bad ki rel bad ki liengsuin. U Dr. Saha u la ban jur ruh ïa ka lad kaba khraw ha ki kam ba iadei bad ki siej, ki jri, ki jain, ki dawai, ki kam ïalehkai bad ka kam jngohkai pyrthei bad u la kyntu ïa ka jingkyrshan kaba kham khraw na ka bynta ka jingkyntiew ïa ki sap, ka jingsaindur thymmai, ka jingpynbha bad ka jingkyntiew ïa ka jingshalan mar shabar ri. U la ban jur shuh shuh ia ka jingdonkam ban kyntiew ia ki lad ai jingsumar bad ki jingdon jingem ba iadei bad ka pule puthi, katba u la kdew ba ka Tripura ka dei kawei na ki Jylla ba nyngkong ban pynkhreh ia ka kot jingthmu jong ka Viksit Tripura.

Ki jingiakren ki long halor ka jingiathuh ia ki sienjam kiba jop, ki jingpynwandur ia ki polisi bad ki skhim pynroi kiba ktah ha kylleng ki kam kum ka rep ka riang, ka jingkyntiew ia ki jaka nongkyndong, ka koit ka khiah, ka pule puthi, ka jingkyntiew ia ki sap, ka kam jngohkai pyrthei, ki lad kamai jakpoh, ki jingtei bad kiwei kiwei.

Ha ka jingkren pynkut jong ka, ka Joram Aniya, Dkhot ka NITI Aayog ka la ai khublei ïa baroh kiba la ïashim bynta bad kiba la ïasam ïa ka jingkiew, ki jingjop bad ki jingthmu pynroi jong ki jylla jong ki. Ka la kdew ia ki mat bad ki jingai jingmut ba la pynpaw ha ka jingiakren bad ka la ong ba ka NITI Aayog kan iai bteng ban iatreilang bad ki tnad sorkar pdeng bad ki tnad ba dei peit jong ka Sorkar India ban pynsuk ia ka roi ka par jong ki jylla ka thain shatei lammihngi.

***