نیتی آیوگ نے ​​آج شمال مشرقی ریاستوں کے وزرائے اعلیٰ کے ساتھ ایک اجلاس کا انعقاد کیا جس میں سبھی آٹھ ریاستوں: اروناچل پردیش، آسام، منی پور، میگھالیہ، میزورم، ناگالینڈ، سکم اور تریپورہ کے نمائندوں نے شرکت کی۔ اجلاس میں ترقیاتی ترجیحات، اختراعات اور چیلنجوں کے حوالے سے بات چیت پر توجہ مرکوز کی گئی۔ شمال مشرقی ریاستوں کے چیف سکریٹریوں اور سینیئر عہدیداروں نے بھی اس بات چیت میں حصہ لیا، جس کا انعقاد نیتی آیوگ کے وائس چیئرمین جناب اشوک لہڑی نے کمیشن کے ارکان اور چیف ایگزیکٹو آفیسر کے ساتھ کیا۔ اجلاس میں تعمیری اور نتیجہ خیز گفتگو ہوئی۔

شمال مشرقی خطے میں اہم تبدیلی پر روشنی ڈالتے ہوئے، اروناچل پردیش کے وزیر اعلیٰ پیما کھانڈو نے کہا کہ یہ ترقی کے کلیدی انجن کے طور پر ابھر رہا ہے۔ ہائیڈرو پاور سیکٹر سمیت اروناچل پردیش کی بے پناہ صلاحیتوں پر بات کرتے ہوئے انہوں نے انسانی وسائل کے لیے ہنر اور صلاحیت سازی کو مزید مضبوط کرنے کی ضرورت پر زور دیا۔ انہوں نے ریاست میں نافذ کیے گئے جدید طرز حکمرانی کے اقدامات کا خاکہ پیش کیا، جیسے ’سرکار آپ کے دوار‘ (حکومت آپ کی دہلیز پر)، ’سیوا آپ کے دوار‘ (خدمت آپ کی دہلیز پر) اور ’کابینہ آپ کے دوار‘ (کیبنٹ آپ کے دروازے پر)، جس کا مقصد عوامی خدمت کی تیز رفتار فراہمی کو یقینی بنانا ہے۔

آسام کے وزیر اعلیٰ ہمنتا بسوا سرما نے کہا کہ علاقائی تفاوت سے بچنے اور جامع ترقی کو یقینی بنانے کے لیے ترقی کے لیے متوازن نقطہ نظر ضروری ہے۔ انہوں نے مرکزی حکومت، آسام حکومت اور ناگالینڈ حکومت کے درمیان کل دستخط کیے گئے تاریخی سہ فریقی مفاہمت کی یادداشت (ایم او یو) کی تعریف کی جس کا مقصد آسام-ناگالینڈ کے سرحدی علاقوں میں معدنی تیل کی کارروائیوں کو آسان بنانا ہے۔ جناب شرما نے کہا کہ آسام سماجی ترقی کے اشارے میں نمایاں پیش رفت کر رہا ہے اور ملک میں سب سے تیزی سے ترقی کرنے والی ریاستوں میں سے ایک کے طور پر ابھرا ہے۔ انہوں نے اس پیش رفت کو برقرار رکھنے اور اسے مزید متحرک بنانے کے لیے علاقائی ضروریات کو پورا کرنے کی اہمیت پر زور دیا۔

مشاورتی میٹنگ سے خطاب کرتے ہوئے، میگھالیہ کے وزیر اعلیٰ کونراڈ کے سنگما نے کہا کہ اقتصادی ترقی کو بامعنی انسانی ترقی میں منتقل کیا جانا چاہیے۔ انہوں نے میگھالیہ کی وژن دستاویز، ’ٹرانسفارمیشن جرنی 2032‘ کا اشتراک کیا، جس کا مقصد ایک ترقی یافتہ میگھالیہ کے ہدف کو حاصل کرنا ہے۔

جناب سنگما نے اہم بنیادی ڈھانچے کی تعمیر اور ترقی کو تیز کرنے میں بیرونی امداد یافتہ پروجیکٹوں کے اہم کردار کو اجاگر کیا۔ تجارت، برآمدات اور ماحولیاتی استحکام جیسے شعبوں میں شمال مشرقی ریاستوں کے درمیان تعاون بڑھانے کی وکالت کرتے ہوئے، انہوں نے خطے کی مخصوص ضروریات کے مطابق پالیسیاں بنانے کی ضرورت پر زور دیا۔

اپنے خطاب میں میزورم کے وزیر اعلی جناب لالدوہوما نے ریاست کی سیاحت کی بے پناہ صلاحیت کو اجاگر کیا اور سیلف ہیلپ گروپ اور مقامی کمیونٹیوں کے ذریعہ چلائے جانے والے کمیونٹی کی قیادت میں کامیاب سیاحتی ماڈلوں کے بارے میں بات کی۔ انہوں نے کہا کہ میزورم میں سیاحوں کی آمد میں پچھلے چار سالوں میں کئی گنا اضافہ ہوا ہے۔ انہوں نے ’میزورم جنجر مشن‘ کے لیے تعاون بھی طلب کیا اور شمال مشرقی ریاستوں کو اکثر درپیش اہلیت سے متعلق چیلنجوں سے نمٹنے کے لیے مرکزی اسپانسر شدہ اسکیموں میں زیادہ لچک کی ضرورت پر زور دیا۔

ناگالینڈ کے وزیر اعلیٰ نیفیو ریو نے ریاست کی ترقی کی رفتار کو برقرار رکھنے کے لیے 15ویں مالیاتی کمیشن کی حمایت جاری رکھنے کی اہمیت پر زور دیا۔ انہوں نے انفراسٹرکچر کے نئے منصوبوں، اقتصادی سرگرمیوں میں توسیع، تیل اور گیس کی تلاش اور زرعی شعبے کی مضبوطی کے امکانات کو اجاگر کیا۔ جناب ریو نے ٹرانسپورٹ کے بنیادی ڈھانچے کو بہتر بنانے اور ناگالینڈ کی مصنوعات جیسے کافی کے لیے عالمی منڈی تک رسائی کو بڑھانے کی ضرورت پر زور دیا۔ باہمی تعاون پر مبنی ترقی کے عزم کا اعادہ کرتے ہوئے، انہوں نے ’وکست بھارت‘ کے مشترکہ وژن کی حمایت کا اظہار کیا۔

منی پور کے وزیر اعلیٰ جناب وائی کھیم چند سنگھ نے ریاست میں بحالی اور باز آبادکاری کے اقدامات کے بارے میں بات کی۔ انہوں نے تعمیر نو اور ہاؤسنگ کے اقدامات کے بروقت نفاذ کو یقینی بنانے کے لیے ایک مضبوط نگرانی کے طریقہ کار کے قیام کی اہمیت پر زور دیا۔ جناب وائی کھیم چند سنگھ نے متاثرہ برادریوں کو امداد فراہم کرنے اور معمولات کو بحال کرنے کے لیے مربوط کوششوں کی ضرورت پر زور دیا۔

سکم کے وزیر اعلیٰ پریم سنگھ تمانگ نے ریاست کی ترقی میں سیاحت، رابطے اور ڈیجیٹل بنیادی ڈھانچے کے اہم کردار پر تبادلہ خیال کیا۔ انہوں نے پورے شمال مشرقی خطے میں رسائی اور اقتصادی مواقع کو بڑھانے کے لیے تجارتی طور پر قابل عمل ہوائی رابطہ اور بہتر ڈیجیٹل انفراسٹرکچر کی ضرورت پر زور دیا۔ جناب تمانگ نے صنعتی ترقی کو فروغ دینے، سرمایہ کاری کو راغب کرنے اور روزگار پیدا کرنے کے لیے شمال مشرقی صنعتی ترقی کی اسکیم (این ای آئی ڈی ایس) کو جاری رکھنے کی وکالت کی۔ ایک پالیسی فریم ورک کی اہمیت کو اجاگر کرتے ہوئے جو شمال مشرقی خطے کی منفرد آبادیاتی اور ماحولیاتی حقیقتوں کی عکاسی کرتا ہے، انہوں نے پائیدار ترقی کو یقینی بنانے کی ضرورت پر زور دیا۔

تریپورہ کے وزیر اعلیٰ ڈاکٹر مانک ساہا نے ریاست کے جغرافیائی چیلنجوں، اس کی وسیع بین الاقوامی سرحد اور اقتصادی ترقی اور سرمایہ کاری کو تیز کرنے کے لیے ہدفی اقدامات کے ذریعے ہنر مندی کی ترقی میں خلا کو دور کرنے کی ضرورت پر روشنی ڈالی۔ انہوں نے انٹیگریٹڈ چیک پوسٹ، ریل خدمات اور ہوائی رابطہ سمیت تجارت اور رابطے کے بنیادی ڈھانچے کو بہتر بنانے کی ضرورت پر زور دیا۔ بانس، ربڑ، ٹیکسٹائل، فارماسیوٹیکل، کھیل اور سیاحت جیسے شعبوں کی صلاحیتوں کی طرف اشارہ کرتے ہوئے، ڈاکٹر ساہا نے مہارت کی ترقی، اختراع، قدر میں اضافے، اور برآمدات کے فروغ کے لیے زیادہ تعاون کی درخواست کی۔ صحت کی دیکھ بھال اور تعلیمی بنیادی ڈھانچے کو بہتر بنانے کی ضرورت پر زور دیتے ہوئے، انہوں نے کہا کہ تریپورہ ان منتخب ریاستوں میں سے ایک ہے جنہوں نے مستقبل کے ترقیاتی منصوبے کو وکست تریپورہ ویژن دستاویز کی شکل میں تیار کیا ہے۔

نیتی آیوگ اور شمال مشرقی ریاستوں کے وزرائے اعلیٰ کے درمیان بات چیت کی میٹنگ زراعت، دیہی ترقی، صحت کی دیکھ بھال، تعلیم، ہنرمندی کی ترقی، سیاحت، ذریعہ معاش اور بنیادی ڈھانچے جیسے شعبوں میں کامیاب اقدامات، پالیسی اختراعات اور مؤثر ترقیاتی منصوبوں کو بانٹنے پر مرکوز تھی۔

اپنے اختتامی کلمات میں، نیتی آیوگ کی رکن محترمہ جورم انیا نے اپنی ریاستوں کی ترقی، کامیابیوں اور ترقی کی ترجیحات کو شیئر کرنے کے لیے تمام شرکا کا شکریہ ادا کیا۔ بحث کے دوران اٹھائے گئے مسائل اور تجاویز کو تسلیم کرتے ہوئے، انہوں نے کہا کہ نیتی آیوگ شمال مشرقی ریاستوں میں ترقیاتی سرگرمیوں کو آسان بنانے کے لیے متعلقہ مرکزی وزارتوں اور محکموں کے ساتھ مل کر کام کرتا رہے گا۔

***********

ش ح۔ ف ش ع

 U: 8552