લોકસભા અધ્યક્ષ શ્રી ઓમ બિરલાએ આજે ​​ભારપૂર્વક જણાવ્યું હતું કે વર્ષ 2047 સુધીમાં વિકસિત રાષ્ટ્ર બનવાની ભારતની સફર તેના ખેતરો, ખેડૂતો અને ગામડાઓમાંથી પસાર થાય છે. તેમણે ભારપૂર્વક જણાવ્યું હતું કે ટકાઉ કૃષિ, નવીનતા અને સંશોધન વિકસિત ભારત@2047નો મુખ્ય આધાર છે, અને આધુનિક ટેકનોલોજી સાથે પરંપરાગત જ્ઞાનનું મિશ્રણ ભારતને વૈશ્વિક કૃષિ અગ્રણી તરીકે ઉભરવા માટે સક્ષમ બનાવશે.

શ્રી બિરલાએ આ મંતવ્યો “વિકસિત ભારત@2047 માટે ટકાઉ કૃષિ: પરંપરા, ટેકનોલોજી અને પ્રત્યક્ષ પરિણામો” (Sustainable Agriculture for Viksit Bharat@2047: Tradition, Technology and Tangible Outcomes) વિષય પર બે દિવસીય રાષ્ટ્રીય પરિષદના ઉદ્ઘાટન સત્રને સંબોધિત કરતી વખતે વ્યક્ત કર્યા હતા. આ કાર્યક્રમનું આયોજન નવી દિલ્હીમાં અખિલ ભારતીય રાષ્ટ્રીય શૈક્ષિક મહાસંઘ (ABRSM) દ્વારા ભારતીય કૃષિ અનુસંધાન પરિષદ (ICAR) અને કૃષિ અને ખેડૂત કલ્યાણ મંત્રાલયના સહયોગથી કરવામાં આવ્યું હતું.

આ પ્રસંગે  શ્રી બિરલાએ કહ્યું હતું કે ભારતમાં કૃષિ એ આર્થિક ક્ષેત્ર કરતાં ઘણું વધારે છે; તે દેશની સંસ્કૃતિ, સભ્યતા અને જીવનશૈલીનો એક અભિન્ન ભાગ છે. તેમણે નોંધ્યું હતું કે ખાદ્ય સુરક્ષા, ગ્રામીણ સમૃદ્ધિ, સામાજિક સમરસતા અને સમાવેશી વિકાસને સુનિશ્ચિત કરીને વિકસિત ભારતના વિઝનમાં ખેતી કેન્દ્રસ્થાને રહેશે. તેમણે જણાવ્યું હતું કે, "ભારતના ગામડાઓ દેશની સાચી તાકાત છે અને આપણા ખેડૂતો આપણી અર્થવ્યવસ્થા અને સામાજિક તાણાવાણા બંનેની કરોડરજ્જુ સમાન છે."

આબોહવા પરિવર્તન અને બદલાતી વૈશ્વિક ગતિશીલતા દ્વારા ઉભા થતા પડકારો પર પ્રકાશ પાડતા, શ્રી બિરલાએ ભારપૂર્વક જણાવ્યું હતું કે વિજ્ઞાન આધારિત, સંશોધન પ્રેરિત અને નવીનતા સંચાલિત કૃષિ એ સમયની માંગ છે. તેમણે ટકાઉ, નફાકારક અને સ્થિતિસ્થાપક ખેતી ઇકોસિસ્ટમ બનાવવા માટે આધુનિક ટેકનોલોજી સાથે સમયની કસોટી પર ખરી ઉતરેલા પરંપરાગત શાણપણને સાંકળવાના મહત્વ પર ભાર મૂક્યો હતો.

શ્રી બિરલાએ કૃષિ યુનિવર્સિટીઓ, સંશોધન સંસ્થાઓ, વૈજ્ઞાનિકો અને સંશોધકોને ભારતના કૃષિ ભવિષ્યના પ્રાથમિક સ્તંભો તરીકે ઓળખાવ્યા હતા. તેમણે અવલોકન કર્યું કે આગામી પેઢીની ટેકનોલોજી — જેમ કે ડ્રોન, આર્ટિફિશિયલ ઇન્ટેલિજન્સ (AI), ડેટા એનાલિટિક્સ અને ડિજિટલ ફાર્મિંગ — કૃષિને વધુને વધુ સચોટ અને ઉત્પાદક બનાવી રહી છે. તેમણે ગ્રામીણ વિકાસને વેગ આપવા અને ખેડૂતોની આજીવિકા સુધારવા માટે કૃષિ-આધારિત ઉદ્યોગો, ફૂડ પ્રોસેસિંગ યુનિટ્સ અને એગ્રી-સ્ટાર્ટઅપ્સનો વિસ્તાર કરવાની તાતી જરૂરિયાત પર પણ ભાર મૂક્યો હતો.

પર્યાવરણીય ચિંતાઓ તરફ વળતા, લોકસભા અધ્યક્ષે જળ સંરક્ષણ, કાર્યક્ષમ માઇક્રો-ઇરિગેશન (સૂક્ષ્મ પિયત), જમીન આરોગ્ય વ્યવસ્થાપન, ઉચ્ચ ગુણવત્તાવાળા બિયારણ, ખાતરનો સંતુલિત ઉપયોગ અને આબોહવા-સ્થિતિસ્થાપક પાકની જાતોના નિર્ણાયક મહત્વ પર પ્રકાશ પાડ્યો હતો. તેમણે કૃષિ ઉત્પાદકતાને મજબૂત કરતા એન્જિનિયરિંગ ઉકેલો વિકસાવવામાં ICAR અને વ્યાપક વૈજ્ઞાનિક સમુદાયના સતત પ્રયાસોની પ્રશંસા કરી હતી.

વધુમાં, શ્રી બિરલાએ  જણાવ્યું હતું કે યુવા ઉર્જા, મહિલા નેતૃત્વ અને પાયાની નવીનતાઓ ગ્રામીણ અર્થતંત્રને મહત્વપૂર્ણ ગતિ આપશે. તેમણે શિક્ષકો, વૈજ્ઞાનિકો, સંશોધકો, નીતિ નિર્માતાઓ અને ખેડૂતોને લાંબા ગાળાની સમૃદ્ધિને પ્રોત્સાહન આપતા આત્મનિર્ભર કૃષિ મોડલ વિકસાવવા માટે સામૂહિક રીતે કામ કરવા હાકલ કરી હતી.

પ્રતિનિધિઓને તેમની શુભેચ્છાઓ પાઠવતા શ્રી બિરલાએ આ પરિષદને દેશની સામૂહિક બૌદ્ધિક શક્તિનું પ્રતિબિંબ ગણાવ્યું હતું. તેમણે પુનરોચ્ચાર કર્યો હતો કે વિકસિત ભારત@2047નું વિઝન નાગરિકો, શૈક્ષણિક સંસ્થાઓ, સામાજિક સંગઠનો અને નીતિ નિર્માતાઓના સંયુક્ત પ્રયાસો દ્વારા જ પ્રાપ્ત કરી શકાય છે.

આ કાર્યક્રમના પરિણામ અંગે સંપૂર્ણ વિશ્વાસ વ્યક્ત કરતા, શ્રી બિરલાએ નિષ્કર્ષ આપ્યો કે આગામી બે દિવસ દરમિયાન થનારી ચર્ચા-વિચારણા કૃષિ શિક્ષણ અને ટકાઉ ખેતી પદ્ધતિઓને નોંધપાત્ર રીતે મજબૂત કરશે, જે આખરે ખેડૂતોના જીવનમાં પરિવર્તન લાવશે અને આત્મનિર્ભરતા તરફ ભારતની સફરને વેગ આપશે.

SM/DK/JD