13 واں برکس اربنائزیشن فورم آج سشما سوراج بھون، نئی دہلی میں، جامع، مضبوط اور عوام پر مبنی شہری ترقی پر وزارتی اعلانیے کو اپنانے کے ساتھ اختتام پذیر ہوا۔

2026 میں بھارت کی برکس صدارت کے تحت ہاؤسنگ اور شہری امور کی وزارت کی میزبانی منعقدہ، یہ دو روزہ فورم  ’عوام کے لیے شہر: مبنی بر شمولیت اور مضبوط شہری مستقبل کے لیے برکس تعاون‘ کے موضوع پر تبادلہ خیال کی غرض سے برکس رکن ممالک کے وزراء، سینئر سرکاری افسران اور شہری امور کے ماہرین کو ایک اسٹیج پر لے کر آیا۔  فورم کا باضابطہ افتتاح جناب منوہر لال، عزت مآب مرکزی وزیر برائے ہاؤسنگ اور شہری امور نے کیا۔ 2013 میں نئی ​​دہلی، 2016 میں وشاکھاپٹنم اور عملی طور پر 2021 میں منعقد ہونے والے ایڈیشن کے بعد، ہندوستان نے چوتھی مرتبہ اس فورم کی میزبانی کی۔

اپنے افتتاحی خطاب میں، عزت مآب وزیر نے کہا کہ یہ فورم شہری ایجنڈے کو عالمی ترقی کے مباحثے میں مزید مضبوطی سے لانے کا ایک موقع تھا، اور اس نے جامع شہری ترقی، آب و ہوا اور آفات سے بچنے والے بنیادی ڈھانچے، مضبوط اداروں اور ڈیجیٹل اختراع کو ہندوستان کے شہری ترقی کے نقطہ نظر کے کلیدی اینکر کے طور پر اجاگر کیا۔

سیشن کے دوران، ہاؤسنگ اور شہری امور کے مرکزی وزیر جناب منوہر لال نے  ’بھارت کا شہری تغیر: تبدیلی کی داستانیں‘ نامی رسالے کا اجراء کیا، جس میں  فورم کے چار ترجیحی شعبوں میں بھارت کی ریاستوں اور مرکز کے زیر انتظام علاقوں کے منتخبہ شہری طور طریقوں کا ذکر کیا گیا ہے۔

افتتاحی اجلاس کے بعد معزز وزیر کے زیر صدارت ایک اعلیٰ سطحی مکمل اجلاس منعقد کیا گیا جس میں شریک ممالک نے اپنے ملکی بیانات کے ذریعے قومی تجربات، ترجیحات اور شہری مستقبل کے لیے خواہشات کا تبادلہ کیا۔

ثقافتی پروگرام اور نیٹ ورکنگ ڈنر کے ساتھ دن کے اختتام سے قبل وفود نے نئی دہلی اور اس کے آس پاس شہری مداخلتوں کو منتخب کرنے کے لیے ایک کیوریٹڈ فیلڈ وزٹ بھی کیا، جس میں نیو پارلیمنٹ کمپلیکس اور انڈیا گیٹ – کرتاویہ پاتھ شامل ہیں۔

اجلاس کے شانہ بہ شانہ باہمی ملاقاتیں بھی ہوئیں جن میں بھارت اور روس، بھارت اور ایران، ایران اور روس، ایران اور چین اور روس اور متحدہ عرب امارات کے درمیان ملاقاتیں بھی شامل ہیں۔

فورم کے دوسرے دن میں جامع اور لچکدار شہری ترقی، شہری اداروں کو مضبوط بنانے اور لوگوں پر مرکوز شہروں کے لیے جدت طرازی کے بارے میں دو اعلیٰ سطحی پینل مباحثے ہوئے۔ دونوں اجلاسوں کی صدارت جناب توخان ساہو، عزت مآب وزیر مملکت برائے ہاؤسنگ اور شہری امور، حکومت ہند نے کی۔

پہلی پینل ڈسکشن، بعنوان’مضبوط اور مساوی شہروں کے لیے مبنی بر شمولیت راستوں کی تعمیر،‘ کی نظامت محترمہ روپا مشرا، جوائنٹ سکریٹری، بین الاقوامی تعاون، ہاؤسنگ اور شہری امور کی وزارت نے کی۔ برکس کے رکن ممالک کے نمائندوں نے اس بات کو یقینی بنانے کے طریقوں پر تبادلہ خیال کیا کہ شہری ترقی سے رہائش، نقل و حرکت، بنیادی خدمات، ذریعہ معاش اور عوامی جگہوں تک رسائی کو بہتر بنایا جائے، خاص طور پر کمزور اور پسماندہ کمیونٹیز کے لیے۔ سیشن کے دوران ہندوستان کی نمائندگی کرتے ہوئے، ہاؤسنگ اور شہری امور کی وزارت کے سکریٹری، جناب سری نواس کتی کتھالا نے کہا، "شہری ترقی کی کامیابی اس بات میں نہیں ہے کہ ہمارے شہر کتنا استعمال کرتے ہیں، بلکہ اس بات میں ہے کہ وہ معیار زندگی کو بہتر بنانے کے لیے وسائل کا کس قدر موثر اور مساوی استعمال کرتے ہیں۔" بحث میں سماجی شمولیت کو ماحولیاتی لچک اور آفات کی تیاری کے ساتھ مربوط کرنے کی ضرورت کا بھی جائزہ لیا گیا، تاکہ شہر لوگوں، بنیادی ڈھانچے اور ضروری خدمات کے تحفظ کے لیے بہتر طریقے سے لیس ہوں۔

دوسری پینل ڈسکشن، بعنوان ’عوام پر مرتکز شہروں کے لیے اداروں کی مضبوطی اور اختراع کی توسیع‘کی نظامت نیشنل کیپیٹل ریجن ٹرانسپورٹ کارپوریشن کے منیجنگ ڈائریکٹر جناب شلبھ گوئل نے کی۔ سیشن کے دوران ہندوستان کی نمائندگی کرتے ہوئے، محترمہ ڈی تارا، ایڈیشنل سکریٹری، ہاؤسنگ اور شہری امور کی وزارت نے کہا، "شہری نظم و نسق کا مستقبل الگ تھلگ اختراعات میں نہیں ہے، بلکہ ایسے اداروں میں ہے جو ان کو بڑھا سکتے ہیں۔" برکس کے رکن ممالک کے نمائندوں نے شہری اداروں کو مضبوط بنانے، میونسپل کی صلاحیت کو بڑھانے، حکومت کی سطحوں پر رابطہ کاری کو بہتر بنانے اور خدمات کی فراہمی کو بڑھانے کے لیے ٹیکنالوجی اور ڈیٹا کے استعمال پر تجربات کا تبادلہ کیا۔ سیشن میں اس بات پر بھی غور کیا گیا کہ کس طرح کامیاب مقامی اختراعات کو مختلف شہری سیاق و سباق میں ڈھال اور اسکیل کیا جا سکتا ہے۔

اختتامی اجلاس کے دوران، برکس کے رکن ممالک نے وزارتی اعلانیے کو اپنایا۔ اعلانیہ رکن ممالک کی جانب سے مشترکہ ترجیحات پر روشنی ڈالتا ہے اور عوام پر مبنی شہری ترقی کو آگے بڑھانے کے عزم کی تصدیق کرتا ہے۔ یہ جامع، پائیدار، لچکدار اور قابل رہائش شہر بنانے کی اہمیت پر زور دیتا ہے جو شہری خدمات تک مساوی رسائی کو یقینی بناتے ہیں، خاص طور پر پسماندہ گروہوں کے لیے۔

 

برکس شیرپا اور وزارت خارجہ میں خارجی تعلقات کے سکریٹری، جناب سدھاکر دلیلا نے فورم کے کامیاب اختتام پر ہاؤسنگ اور شہری امور کی وزارت کی ستائش کی۔

فورم نے برکس ممالک کے اچھے طور طریقوں کی ایک تالیف بعنوان ’عوام کے لیے شہر: برکس ممالک کی شہری داستانیں‘ بھی پیش کی۔

برکس اربنائزیشن فورم کے سیکھنے کو آگے بڑھانے کے لیے، اور مسلسل تعاون کے لیے، رکن ممالک نے قابل اطلاق شہری تحقیق، علم کے اشتراک، اور ہم مرتبہ سیکھنے کے لیے ’برکس شہری تحقیقی اور علمی نیٹ ورک‘ کے قیام کے لیے ہندوستان کی تجویز کا خیرمقدم کیا۔

برکس کے اندر شہری تعاون کے لیے ایک عملی اور پائیدار طریقہ کار فراہم کرنے کے لیے نیٹ ورک کو چیئر شپ کی قیادت میں ادارہ جاتی طور پر منسلک پلیٹ فارم کے طور پر ڈیزائن کیا گیا ہے۔ یہ عملی حل، شہر کی سطح کے تجربات اور آپریشنل اسباق کے تبادلے کے ذریعے پالیسی اور عمل درآمد کے درمیان فرق کو ختم کرنے میں مدد کرتے ہوئے منظم علم کے اشتراک اور باہمی سیکھنے میں مدد کرے گا۔ ایک ورچوئل، کم لاگت اور لچکدار ماڈل کے ذریعے کام کرتے ہوئے، نیٹ ورک کو ہر سال برکس چیئر ملک کے اہم ادارے کے ذریعے مربوط کیا جائے گا، جس میں سرگرمیاں اور نتائج اگلی چیئر شپ کے حوالے کیے جائیں گے۔

ہاؤسنگ اور شہری امور کی وزارت کے سکریٹری جناب سری نواس کتی کتھالا نے دو روزہ فورم کا خلاصہ پیش کیا، جس میں ملکی بیانات، پینل مباحثوں، دو طرفہ مصروفیات اور اعلامیہ پر ہونے والی بات چیت سے سامنے آنے والے اہم موضوعات پر روشنی ڈالی۔

ایک اختتامی ویڈیو میں 13ویں برکس اربنائزیشن فورم کی کارروائی کی جھلکیاں پیش کی گئیں۔

اختتامی خطاب میں، ہاؤسنگ اور شہری امور کے مرکزی وزیر جناب منوہر لال نے برکس کے رکن ممالک کے درمیان مشترکہ سیکھنے اور عملی تعاون کے پلیٹ فارم کے طور پر فورم کی اہمیت پر زور دیا۔ انہوں نے نئی دہلی میں ہونے والی بات چیت کو مستقل ادارہ جاتی مشغولیت، شہروں کے درمیان تبادلے اور ہندوستان کی صدارت سے آگے جاری تعاون کے ذریعے آگے بڑھانے پر زور دیا۔

اس دو روزہ فورم کے نتائج  ان شہروں کی تعمیر میں برکس ممالک کے لیے ساجھا روڈمیپ  میں تعاون  دیں گےجو مبنی بر شمولیت، مضبوط پائیدار اور بہترنظم و نسق والے ہیں۔

**********

 

 

 (ش ح –ا ب ن)

U.No:8559

(रिलीज़ आईडी: 2272356) आगंतुक पटल : 5