मुंबई, 12 जून 2026

19 व्या (MIFF- मिफ्फ) अर्थात मुंबई आंतरराष्ट्रीय चित्रपट महोत्सव जवळ येऊन ठेपला आहे. माहितीपट, लघुपट आणि ॲनिमेशन चित्रपटांच्या आठवडाभर चालणाऱ्या या महोत्सवात सहभागी होणारे जगभरातील चित्रपट निर्माते, कथाकार, चित्रपटसृष्टीतील दिग्गज आणि चित्रपटप्रेमींचे स्वागत करण्यासाठी मुंबई सज्ज झाली आहे. 15 ते 21 जून 2026 या कालावधीत आयोजित होणारा, नॉन-फीचर चित्रपटांसाठीचा बहुप्रतिक्षित द्वैवार्षिक चित्रपट महोत्सव, सर्जनशीलता, संस्कृती, नवोन्मेष आणि जागतिक सिनेमॅटिक प्रतिभेचा चैतन्यमय संगम घडवेल.  

मिफ्फ 2026 ला जगभरातून 1,459 चित्रपटांच्या प्रवेशिकांसह अभूतपूर्व प्रतिसाद मिळाल्याचे  एनएफडीसीचे व्यवस्थापकीय संचालक प्रकाश मगदूम यांनी आज आयोजित उद्घाटन-पूर्व पत्रकार परिषदेत सांगितले. स्पर्धा विभागात 144 चित्रपटांचा समावेश आहे, यात 52 आंतरराष्ट्रीय आणि 92 राष्ट्रीय चित्रपटांचा समावेश आहे. हे चित्रपट 13 देशांमधील चित्रपट निर्मात्यांचे प्रतिनिधित्व करतील. बिगर-स्पर्धा विभागात एकूण 202 चित्रपट दाखवले जातील, यात 106 आंतरराष्ट्रीय चित्रपट आणि 46 सहभागी देशांतील 96 चित्रपटांचा समावेश आहे. यामध्ये एकूण 83 तासांहून अधिक कालावधीचे स्क्रीनिंग (चित्रीकरण) सादर केले जाईल. हा विभाग मोझॅक, बेस्ट ऑफ फेस्ट, बुसान नेक्स्ट वेव्ह, ऑस्कर विनर्स, रायमुंड क्रुमे रेट्रोस्पेक्टिव्ह, एनएफडीसी शोकेस, इकोज फ्रॉम नॉर्थ ईस्ट आणि मराठी चित्रपट, यासारख्या 24 निवडक विभागांमध्ये आयोजित केला जाईल. यामध्ये प्रशंसेला पात्र ठरलेले चित्रपट, उदयोन्मुख आवाज आणि प्रादेशिक कथाकथनाला एकाच व्यासपीठावर एकत्र आणेल. या महोत्सवात ज्येष्ठ चित्रपट निर्माते डेव्हिड अॅटनबरो यांना, ‘सेंटेनरी ट्रिब्युट’ अंतर्गत त्यांचे दोन चित्रपट प्रदर्शित करून सन्मानित केले जाईल.

या प्रसंगी बोलताना, महाराष्ट्र चित्रपट, रंगभूमी आणि सांस्कृतिक विकास महामंडळाच्या व्यवस्थापकीय संचालक स्वाती म्हसे पाटील म्हणाल्या, "मिफ्फ हा महोत्सव नॉन-फीचर (लघुपट आणि माहितीपट) चित्रपटांसाठी आशियातील सर्वात प्रतिष्ठित व्यासपीठांपैकी एक म्हणून विकसित झाला आहे. हा महोत्सव, जगभरातील चित्रपट निर्माते, निर्माते, प्रसारक, विद्यार्थी, समीक्षक आणि प्रेक्षकांना एकाच छताखाली आणतो."

मराठी चित्रपट विभागावर प्रकाश टाकताना त्या म्हणाल्या की, या उपक्रमामुळे मराठी कथासादरीकरण, संस्कृती, वारसा आणि चित्रपटसृष्टीतील उत्कृष्टतेला एक आंतरराष्ट्रीय व्यासपीठ मिळेल. त्यांनी पुढे नमूद केले की, महाराष्ट्र केवळ भारताचे प्रमुख चित्रीकरण स्थळ  म्हणूनच नाही, तर अर्थपूर्ण आणि प्रभावी कथासादरीकरणाचे एक जागतिक प्रमुख केंद्र (ग्लोबल हब) म्हणून उदयास येण्यासाठी सज्ज आहे.

माहितीपट, लघुकथापट आणि अ‍ॅनिमेशनपटांसाठी प्रसिद्ध असलेल्या या महोत्सवाची सुरुवात या तिन्ही स्वरूपांमधील चित्रपटांच्या खेळांनी होईल. उद्घाटनपर चित्रपटांमध्ये कॉर्डेल बार्कर (कॅनडा) दिग्दर्शित 'गुड लक टू यू ऑल' या अ‍ॅनिमेटेडपटाचा, अर्विन बेलारमिनो आणि कायला डॅनियल रोमेरो (फिलिपिन्स) दिग्दर्शित 'अगापितो'  या शॉर्ट फिक्शनचा आणि सारा डोसा (अमेरिका आणि आइसलँड) दिग्दर्शित 'टाइम अँड वॉटर' या माहितीपटाचा समावेश असेल.

18 जून रोजी नियोजित असलेल्या कार्यक्रमाच्या रुपरेषेनुसार ('मिड-फेस्ट' लाईनअप) अँड्रिया झेलेसोव्हा (चेक प्रजासत्ताक आणि स्लोव्हाकिया) दिग्दर्शित 'ईनी, मीनी, मायनी, मो!' हा अ‍ॅनिमेटेडपट, अल्ताय उलान यांग (अमेरिका) दिग्दर्शित 'हायना' हा शॉर्ट फिक्शन आणि मॉरिस फ्रायबर्गहॉस (स्वित्झर्लंड) दिग्दर्शित 'आय लव्ह यू, आय लीव्ह यू' हा माहितीपट दाखवला जाईल. हे सर्व चित्रपट वैविध्यपूर्ण कथासादरीकरण शैली आणि आंतरराष्ट्रीय दृष्टिकोन सादर करतील.

या महोत्सवात आंतरराष्ट्रीय आणि राष्ट्रीय स्पर्धात्मक श्रेणींमध्ये 18 पुरस्कार प्रदान केले जातील. पुरस्काराचे स्वरूप एकूण 45 लाख रुपयांचे रोख पारितोषिक, पुरस्कार   आणि प्रमाणपत्र असे असेल. दिग्गज चित्रपट निर्माते व्ही. शांताराम यांच्या 125 व्या जयंती वर्षात दिला जाणारा प्रतिष्ठित 'व्ही. शांताराम जीवनगौरव पुरस्कार', हे उद्घाटन समारंभाचे मुख्य आकर्षण असेल.

19 व्या 'मिफ्फ' मध्ये प्रसिद्ध चित्रपट क्षेत्रातील तज्ञांच्या मार्गदर्शनाखाली 10 मार्गदर्शन सत्रांचे (मास्टरक्लासेस) देखील आयोजन केले जाईल; यामध्ये चित्रपट निर्मिती, कथासादरीकरण, अभिनय, पटकथा लेखन आणि सिनेमॅटोग्राफी या विषयांचा समावेश असेल. 'इंडियन डॉक्युमेंट्री प्रोड्युसर्स असोसिएशन' (आयडीपीए) या भारतीय माहितीपट निर्माता संघटनेद्वारे 19 व्या 'मिफ' मधील चित्रपट प्रदर्शनांच्या सोबत, पाच मुक्त चर्चासत्रांचे आयोजन केले जाईल.

राष्ट्रीय चित्रपट विकास महामंडळ-एनएफडीसी च्या संकुलाव्यतिरिक्त, चित्रपटांचे खेळ, दादर येथील रवींद्र नाट्य मंदिर आणि विलेपार्ले येथील 'एस व्ही के एम चे उषा प्रवीण गांधी कॉलेज ऑफ आर्ट्स, सायन्स अँड कॉमर्स' हे महाविद्यालय,तसेच वांद्रे पश्चिम येथील 'सेंट पॉल्स इन्स्टिट्यूट ऑफ कम्युनिकेशन एज्युकेशन' या दोन महाविद्यालयांमध्येही केले जाईल.

यावर्षीच्या आवृत्तीमध्ये दोन विशेष विभाग सुरु करण्यात आले आहेत - 'मराठी चित्रपट' आणि 'एकोज फ्रॉम नॉर्थईस्ट'.या विभागांच्या माध्यमातून प्रादेशिक चित्रपटसृष्टीतील अनोख्या कलात्मक अभिव्यक्तींचा आणि भारताच्या सांस्कृतिक विविधतेचा गौरव करणे हा त्यामागील उद्देश आहे. वेव्ह्ज डॉक बाजार विभागात उद्योगाभिमुख निवडक माहितीपट प्रदर्शित केले  जाणार असून, माहितीपट क्षेत्रातील प्रतिभांना प्रोत्साहन आणि उद्योग-जगताशी संवाद साधण्यासाठी महत्त्वाचे व्यासपीठ म्हणून त्याचे स्थान पुन्हा अधोरेखित होईल. या वर्षी एकूण 155 प्रवेशिका प्रदर्शित केल्या जातील, त्यासोबतच 'वर्क इन प्रोग्रेस (WIP) लॅब'मधील 5 प्रकल्प आणि 'फिल्म बाजार रेकमेंड्स' अंतर्गत 12 चित्रपट असतील, तसेच हे सर्व 155 चित्रपट  उद्योग क्षेत्रातील संबंधितांना पाहण्यासाठी व मूल्यमापनासाठी  'व्ह्यूइंग रूम'मध्ये उपलब्ध असतील.  या विभागाद्वारे प्रभावी B2B नेटवर्किंगला चालना दिली जाणार असून, नेटफ्लिक्स, झी, सोनी, स्टेज ओटीटी आणि वेव्ह्ज ओटीटी यांसारख्या अग्रगण्य प्लॅटफॉर्म्स आणि  प्रसारकांचा बैठकींसाठी सहभाग निश्चित झाला आहे. यामुळे माहितीपटांच्या शोध, सहनिर्मिती आणि वितरणासाठी महत्त्वपूर्ण मंच म्हणून या विभागाची ओळख आणखी दृढ होणार आहे.

मिफ्फ  मध्ये यंदा प्रथमच "मुंबई थ्रू अ थाऊजंड आइज" या शीर्षकाखाली एआय सिनेमा  हॅकॆथॉनचे आयोजन करण्यात येणार आहे. कृत्रिम बुद्धिमत्तेवर आधारित कथाकथनाच्या नव्या शक्यता शोधणारी ही 48 तासांची जागतिक चित्रपटनिर्मिती स्पर्धा असेल. याशिवाय, महोत्सवात नामवंत चित्रपट निर्माते आणि उद्योगक्षेत्रातील तज्ज्ञांच्या सहभागासह 10 मास्टरक्लासेस तसेच विविध विषयांवरील पॅनेल चर्चांचे आयोजन करण्यात येणार आहे.

मिफ्फ 2026 साठी विद्यार्थ्यांची नोंदणी विनामूल्य ठेवण्यात आली आहे.

पत्र सूचना कार्यालयाने सुरु केलेली विशेष मीडिया मायक्रोसाइट https://www.pib.gov.in/MIFF/2026 मिफ्फ संबंधित अधिकृत माहितीचे सर्वसमावेशक डिजिटल केंद्र असेल. या प्लॅटफॉर्मवर महोत्सवाशी संबंधित अधिकृत वृत्तांकन, छायाचित्रे आणि विविध मल्टिमीडिया सामग्री उपलब्ध करून देण्यात येणार आहे.

पत्रकार परिषदेत केलेले सादरीकरण येथे पाहता येईल.

निलीमा चितळे/सुषमा काणे/राजश्री आगाशे/आशुतोष सावे/भक्ती सोनटक्के/प्रिती मालंडकर

सोशल मिडियावर आम्हाला फॉलो करा:@PIBMumbai    /PIBMumbai    /pibmumbai  pibmumbai[at]gmail[dot]com  /PIBMumbai    /pibmumbai