શ્રમ અને રોજગાર મંત્રાલય
રાજ્યમંત્રી શોભા કરંદલાજેએ જીનીવામાં 114મા આંતરરાષ્ટ્રીય શ્રમ પરિષદ (ILC) ના પૂર્ણ સત્રને સંબોધિત કર્યું; ભારતના શ્રમ સુધારાઓ, સામાજિક સુરક્ષા અને ડિજિટલ જાહેર માળખા પર પ્રકાશ પાડ્યો
'અંત્યોદય'ના સિદ્ધાંતથી પ્રેરિત થઈને, શ્રમ કાયદાઓ પાલનને સરળ બનાવે છે, કામદાર કલ્યાણને મજબૂત બનાવે છે અને આધુનિક, પારદર્શક શ્રમ ઇકોસિસ્ટમ બનાવે છે: શ્રીમતી કરંદલાજે
114મા ILC ખાતેના તેમના સંબોધનમાં, રાજ્યમંત્રી કરંદલાજેએ યુવાનો અને મહિલાઓની કાર્યબળમાં ભાગીદારીની વધતી રોજગારક્ષમતા તરફ ધ્યાન દોર્યું
રાજ્યમંત્રી અને ILOના મહાનિર્દેશક વચ્ચેની ચર્ચામાં છેલ્લા દાયકામાં ભારતના સામાજિક સુરક્ષા કવરેજના ઝડપી વિસ્તરણ પર ભાર મૂકવામાં આવ્યો
प्रविष्टि तिथि:
11 JUN 2026 1:34PM by PIB Ahmedabad
કેન્દ્રીય શ્રમ અને રોજગાર, અને સૂક્ષ્મ, લઘુ અને મધ્યમ ઉદ્યોગ રાજ્ય મંત્રી, ભારત સરકાર, સુશ્રી શોભા કરંદલાજેએ સ્વિટ્ઝર્લેન્ડના જીનીવા ખાતે 114th આંતરરાષ્ટ્રીય શ્રમ પરિષદ (ILC)માં ભારતીય પ્રતિનિધિમંડળનું નેતૃત્વ કર્યું.
114th આંતરરાષ્ટ્રીય શ્રમ પરિષદના પૂર્ણ સત્રને સંબોધિત કરતા, કેન્દ્રીય મંત્રીએ આ પરિષદના આયોજન બદલ આંતરરાષ્ટ્રીય શ્રમ સંગઠન (ILO) ને અભિનંદન પાઠવ્યા હતા અને ઝડપથી બદલાતા વૈશ્વિક પરિવર્તનો વચ્ચે સામાજિક ન્યાય અને યોગ્ય કાર્યને પ્રોત્સાહન આપવા માટે તેના સતત નેતૃત્વની પ્રશંસા કરી હતી.
સુશ્રી શોભા કરંદલાજેએ હાઇલાઇટ કર્યું હતું કે ભારતે અનુપાલનને સરળ બનાવવા, શ્રમિકોના કલ્યાણને મજબૂત કરવા અને આધુનિક તથા પારદર્શક શ્રમ ઇકોસિસ્ટમ બનાવવા માટે 29 કેન્દ્રીય શ્રમ કાયદાઓને ચાર શ્રમ સંહિતાઓમાં એકીકૃત કરીને “અંત્યોદય” ના સિદ્ધાંત દ્વારા માર્ગદર્શન મેળવી વ્યાપક શ્રમ સુધારાઓ હાથ ધર્યા છે.
તેમણે વધુમાં જણાવ્યું હતું કે યુવાનોની રોજગાર ક્ષમતા 2014માં 34% થી વધીને 2025માં 56% થી વધુ થઈ ગઈ છે. 2017 અને 2025ની વચ્ચે, બેરોજગારીનો દર 6% થી ઘટીને 3.1% થયો છે, અને મહિલાઓની કાર્યબળમાં ભાગીદારી 22% થી વધીને 38.8% થઈ ગઈ છે.
કેન્દ્રીય મંત્રીએ નેશનલ કરિયર સર્વિસ પોર્ટલ અને ઇ-શ્રમ (e-Shram) પોર્ટલ દ્વારા શ્રમ અને રોજગાર ક્ષેત્રે ડિજિટલ પબ્લિક ઇન્ફ્રાસ્ટ્રક્ચર વિકસાવવામાં ભારતની પ્રગતિ પર પણ ભાર મૂક્યો હતો. કૌશલ્યો અને વ્યવસાયો પર આંતરરાષ્ટ્રીય સહકારના મહત્વ અને વ્યવસાયોના આંતરરાષ્ટ્રીય સંદર્ભ વર્ગીકરણને વિકસાવવા પર ILO સાથે ભારતના ફિઝિબિલિટી સ્ટડી પર પણ પ્રકાશ પાડવામાં આવ્યો હતો.
તેમણે ભારતના સામાજિક સુરક્ષા કવચના નોંધપાત્ર વિસ્તરણને વધુ સ્પષ્ટ કર્યું, જે ILOના પ્રારંભિક અંદાજો અનુસાર આશરે 1001 મિલિયન સુધી પહોંચી ગયું છે. ભારતની મહિલા શ્રમ દળની વધતી ભાગીદારી અને રોજગાર નિર્માણને પ્રોત્સાહન આપવા માટે પ્રધાનમંત્રી વિકસિત ભારત રોજગાર યોજનાની શરૂઆત પર પણ પ્રકાશ પાડવામાં આવ્યો હતો.
જિનીવામાં 114મી ઇન્ટરનેશનલ લેબર કોન્ફરન્સ અંતર્ગત, સુશ્રી શોભા કરંદલાજેએ રવાંડાના પબ્લિક સર્વિસ અને લેબર મંત્રી એમ્બ. ક્રિસ્ટિન ન્કુલિકીયિન્કા સાથે દ્વિપક્ષીય બેઠક યોજી હતી.
આ ચર્ચાઓ રોજગાર સેવાઓ, કૌશલ્ય પ્રવૃત્તિઓ, કાર્યબળ આયોજન અને ડિજિટલ ગવર્નન્સમાં દ્વિપક્ષીય સહયોગને મજબૂત કરવા પર કેન્દ્રિત હતી. ભારતે સ્કેલેબલ ડિજિટલ પબ્લિક ગુડ્સ તરીકે નેશનલ કરિયર સર્વિસ પોર્ટલ અને ઇ-શ્રમ પોર્ટલની સફળતા પર પ્રકાશ પાડ્યો હતો અને રોજગાર સેવાઓ, શ્રમિક નોંધણી, નોકરીઓ અને કૌશલ્ય મેચિંગ માટે ડિજિટલ પ્લેટફોર્મ વિકસાવવા માટે તકનીકી સહાય અને ક્ષમતા-નિર્માણ સપોર્ટ લંબાવ્યો હતો. રવાંડાએ ભારતના પ્રભાવશાળી ડિજિટલ પબ્લિક ઇન્ફ્રાસ્ટ્રક્ચર પર પ્રકાશ પાડ્યો હતો અને કૌશલ્ય વિકાસ તેમજ શ્રમ અનૌપચારિકતામાંથી ઔપચારિકતા તરફની સફર પર સમર્થન માંગ્યું હતું.
તેમણે શ્રીલંકાના શ્રમ મંત્રી શ્રી અનિલ જયંત ફર્નાન્ડો સાથે પણ દ્વિપક્ષીય બેઠક યોજી હતી. શ્રીલંકાએ ભારતના શ્રમ સુધારાઓમાં તીવ્ર રસ દાખવ્યો હતો અને ચાર નવી શ્રમ સંહિતાઓના સફળ અમલીકરણ અંગે આંતરદૃષ્ટિ માંગી હતી. ભારતીય પ્રતિનિધિમંડળે તેનો અનુભવ શેર કર્યો હતો, જેમાં સુધારાના રોડમેપ, અમલીકરણની પદ્ધતિઓ અને વ્યાપક હિતધારકોની પરામર્શ પ્રક્રિયાઓ પર પ્રકાશ પાડ્યો હતો જેણે આ પરિવર્તનકારી સફરને સક્ષમ બનાવી હતી.
ચર્ચાઓ ડિજિટલ પબ્લિક ઇન્ફ્રાસ્ટ્રક્ચરમાં સહયોગ પર પણ કેન્દ્રિત હતી, જેમાં ભારતે કૌશલ્ય, રોજગાર સેવાઓ અને કાર્યબળ વિકાસને મજબૂત કરવા માટે ઇ-શ્રમ અને નેશનલ કરિયર સર્વિસ પોર્ટલ જેવી પહેલો દ્વારા સમર્થનની ઓફર કરી હતી.
કેન્દ્રીય મંત્રીએ આંતરરાષ્ટ્રીય શ્રમ સંગઠન (ILO) ના ડાયરેક્ટર-જનરલ શ્રી ગિલ્બર્ટ એફ. હોંગબો સાથે પણ દ્વિપક્ષીય બેઠક યોજી હતી. બેઠક દરમિયાન, તેમણે યોગ્ય કાર્ય (ડીસેન્ટ વર્ક), સામાજિક ન્યાય અને સર્વસમાવેશક વૃદ્ધિને આગળ વધારવામાં ILO સાથેની તેની ભાગીદારીને મજબૂત કરવા માટે ભારતની પ્રતિબદ્ધતાને પુનરોચ્ચાર કર્યો હતો. તેમણે ડાયરેક્ટર-જનરલને ભારતના સામાજિક સુરક્ષા કવરેજના વિસ્તરણ વિશે માહિતગાર કર્યા, જે 2015માં 19% થી વધીને 2025માં 64.3% થયું છે, જેનાથી દેશભરમાં 940 મિલિયન લોકોને સામાજિક સુરક્ષા નેટ હેઠળ લાવવામાં આવ્યા છે.
ડાયરેક્ટર જનરલ, ILO એ ટૂંકા ગાળામાં ભારતના સામાજિક સુરક્ષા કવરેજમાં થયેલા નોંધપાત્ર વધારાની પ્રશંસા કરી હતી. તેમણે એ પણ હાઇલાઇટ કર્યું કે આ કવરેજમાં પાછલા વર્ષ દરમિયાન વધુ વિસ્તરણ જોવા મળ્યું છે, જેનાથી વસ્તીના વધુ મોટા ટકાવારી હિસ્સાને સામાજિક સુરક્ષાના દાયરામાં લાવવામાં આવ્યો છે.
આ ચર્ચાઓ ચાર શ્રમ સંહિતાઓ દ્વારા ભારતના સીમાચિહ્નરૂપ શ્રમ સુધારાઓ, સામાજિક સુરક્ષા કવચના વિસ્તરણ, શ્રમ અને રોજગાર ક્ષેત્રે ડિજિટલ પબ્લિક ઇન્ફ્રાસ્ટ્રક્ચરના વિકાસ, ભવિષ્યલક્ષી કૌશલ્ય પહેલો અને આંતરરાષ્ટ્રીય શ્રમ ગતિશીલતા પર કેન્દ્રિત હતી.
રાજ્ય મંત્રીએ ભારત સાથેના ILOના તકનીકી સહયોગની પણ પ્રશંસા કરી હતી, જેમાં વ્યવસાયોના આંતરરાષ્ટ્રીય સંદર્ભ વર્ગીકરણના વિકાસ પરના સંભવિતતા અભ્યાસ માટેના સમર્થનનો સમાવેશ થાય છે. સમાવેશી, સ્થિતિસ્થાપક અને ભવિષ્ય માટે સજ્જ શ્રમ બજારો બનાવવા માટે ILO સાથે નજીકથી કામ કરવાની ભારતની પ્રતિબદ્ધતા પણ રેખાંકિત કરવામાં આવી હતી.
“ગ્લોબલ ડાયલોગ ઓન ઇન્ડિયાઝ ન્યૂ લેબર કોડ્સ” પરની ઉચ્ચ સ્તરીય સાઇડ ઇવેન્ટમાં, કેન્દ્રીય મંત્રીએ ચાર શ્રમ સંહિતાઓ દ્વારા ભારતના વ્યાપક શ્રમ સુધારાઓ પર પ્રકાશ પાડ્યો હતો.
તેમણે વધુમાં રેખાંકિત કર્યું હતું કે આ સુધારાઓ લઘુત્તમ વેતન સુરક્ષાને મજબૂત કરે છે, અસંગઠિત, ગિગ અને પ્લેટફોર્મ શ્રમિકો સુધી સામાજિક સુરક્ષા કવચ લંબાવે છે, વ્યાવસાયિક સુરક્ષા અને આરોગ્યના ધોરણોને મજબૂત કરે છે, લિંગ સમાનતાને પ્રોત્સાહન આપે છે અને સામૂહિક વાટાઘાટોને મજબૂત કરે છે. સુરક્ષિત, વ્યવસ્થિત અને પારદર્શક સ્થળાંતર માર્ગો સુનિશ્ચિત કરીને વૈશ્વિક રોજગારની તકો સાથે કૌશલ્યને જોડતા સંકલિત સમગ્ર-સરકારી અભિગમ (હોલ-ઓફ-ગવર્નમેન્ટ એપ્રોચ) દ્વારા આંતરરાષ્ટ્રીય શ્રમ ગતિશીલતા પર ભારતના વધતા ફોકસને સ્પષ્ટ કરવામાં આવ્યો હતો.
સુશ્રી શોભા કરંદલાજેએ યોગ્ય અને ગૌરવપૂર્ણ રોજગારને પ્રોત્સાહન આપવા, શ્રમિકોની સુરક્ષાને મજબૂત કરવા, વૈશ્વિક રોજગાર ક્ષમતા વધારવા અને આંતરરાષ્ટ્રીય સહકાર અને સામાજિક સંવાદ દ્વારા ન્યાયી, સમાવેશી અને ભવિષ્ય માટે સજ્જ શ્રમ બજાર પ્રણાલીઓનું નિર્માણ કરવા માટે ILO અને સભ્ય દેશો સાથે નજીકથી કામ કરવાની ભારતની પ્રતિબદ્ધતાનો પુનરોચ્ચાર કર્યો હતો.
SM/BS/GP/JT
(रिलीज़ आईडी: 2271594)
आगंतुक पटल : 11