నాడు పోస్టు చేయడమైనది:
10 JUN 2026 9:09PM by PIB Hyderabad
ప్రదర్శన కళల రంగంలో ఏడుగురు ప్రముఖులను అకాడమీ ఫెలోస్‌గా (అకాడమీ రత్న) ఎంపికచేసినట్లు ఢిల్లీలోని సంగీత నాటక అకాడమీ (జాతీయ సంగీత, నృత్య, నాటక అకాడమీ) ప్రకటించింది. 2026 మార్చి 22 నుంచి 26 వరకు దేశ రాజధానిలో జరిగిన జనరల్ కౌన్సిల్ సమావేశంలో ఈ ఏకగ్రీవ నిర్ణయం తీసుకున్నారు. అకాడమీ ఫెలోషిప్ దేశంలోనే అత్యున్నత, విశిష్టమైన గౌరవం. వీటి సంఖ్య గరిష్ఠంగా 40 మాత్రమే ఉంటుంది.
జనరల్ కౌన్సిల్ 2024, 2025 సంవత్సరాలకు గాను సంగీతం, నృత్యం, నాటకం, సంప్రదాయ- జానపద- గిరిజన- సంగీతం- నృత్యం- నాటకం- తోలుబొమ్మలాట, ప్రదర్శన కళలలో సమగ్ర సహకారం- పరిశోధన తదితర రంగాల నుంచి 108 మంది కళాకారులను సంగీత నాటక అకాడమీ అవార్డులకు (అకాడమీ పురస్కారం) ఎంపిక చేసింది.
దేశంలోని వివిధ రాష్ట్రాలు, కేంద్రపాలిత ప్రాంతాలకు చెందిన ఈ ఫెలోస్, అవార్డు గ్రహీతలు మొత్తం దేశానికి ప్రాతినిధ్యం వహిస్తారు. ఈ ప్రముఖ కళాకారులు సంగీతం, నృత్యం, నాటకం, జానపద- గిరిజన కళలు, తోలుబొమ్మలాట, వాటికి అనుబంధ రంగాలైన థియేటర్ ఆర్ట్స్ మొదలైన అన్ని రకాల ప్రదర్శన కళారూపాలకు చెందిన వారు.
అకాడమీకి చెందిన జనరల్ కౌన్సిల్ 2024, 2025 సంవత్సరాలకు గాను 106 మంది యువ కళాకారులను 'సంగీత నాటక అకాడమీ ఉస్తాద్ బిస్మిల్లా ఖాన్ యువ పురస్కారం' కోసం ఎంపిక చేసింది. ఈ పురస్కారాలను సంగీత నాటక అకాడమీ చైర్మన్ ఒక ప్రత్యేక కార్యక్రమంలో అందిస్తారు.
ఈ అకాడమీ పురస్కారాలను 1952 నుంచి అందజేస్తున్నారు. ఈ గౌరవాలు అత్యున్నత స్థాయి నైపుణ్యం, ప్రతిభకు ప్రతీకలుగా నిలవడమే కాకుండా కళారంగంలో వ్యక్తుల నిరంతర కృషిని, వారి సమగ్ర సహకారాన్ని గుర్తిస్తాయి. అకాడమీ ఫెలో (అకాడమీ రత్న) కింద రూ. 3,00,000, అకాడమీ అవార్డు కింద రూ. 1,00,000 నగదు బహుమతితో పాటు తామ్రపత్రం, అంగవస్త్రం అందజేస్తారు.
ఉస్తాద్ బిస్మిల్లా ఖాన్ యువ పురస్కారం కింద రూ. 25,000 నగదు బహుమతితో పాటు తామ్రపత్రం, అంగవస్త్రం అందజేస్తారు.
సంగీత నాటక అకాడమీ ఫెలోషిప్‌లు, అవార్డులను భారత రాష్ట్రపతి ఒక ప్రత్యేక అధికారిక కార్యక్రమంలో అందిస్తారు.
***