ખાદ્ય પ્રક્રિયા ઉદ્યોગ મંત્રાલય (MoFPI), ભારત સરકાર અને વર્લ્ડ બેંક ગ્રૂપ દ્વારા સંયુક્ત રીતે આયોજિત બે દિવસીય પ્રાદેશિક ઉચ્ચ-સ્તરીય નીતિ સંવાદ “SAPLING (સાઉથ એશિયન પોલિસી લીડરશિપ ફોર ઈમ્પ્રુવ્ડ ન્યુટ્રિશન એન્ડ ગ્રોથ) ડાયલોગ 2026”, 10 જૂન, 2026ના રોજ અમદાવાદ, ગુજરાતમાં સફળતાપૂર્વક સંપન્ન થયો. “અનલોકિંગ વેલ્યુ: એડવાન્સિંગ ફૂડ પ્રોસેસિંગ ફોર એમ્પ્લોયમેન્ટ જનરેશન એન્ડ સસ્ટેનેબલ ગ્રોથ ઇન સાઉથ એશિયા” થીમ હેઠળ યોજાયેલા આ સંવાદમાં નીતિ નિર્માતાઓ, ઉદ્યોગ જગતના અગ્રણીઓ, આંતરરાષ્ટ્રીય સંગઠનો, વિકાસ ભાગીદારો, સંશોધકો, સ્ટાર્ટઅપ્સ, નાણાકીય સંસ્થાઓ અને દક્ષિણ એશિયાના દેશોના પ્રતિનિધિઓ સહિત આશરે 200 સહભાગીઓ આ પ્રદેશમાં સ્થિતિસ્થાપક, સમાવેશી અને ટકાઉ ખાદ્ય પ્રણાલીઓને મજબૂત કરવા પર વિચાર-વિમર્શ કરવા માટે એકસાથે આવ્યા હતા. કેન્દ્રીય ખાદ્ય પ્રક્રિયા ઉદ્યોગ મંત્રાલયના મંત્રી શ્રી ચિરાગ પાસવાને ઉદ્ઘાટન સત્રને સંબોધિત કરતી વખતે, વૈશ્વિક ફૂડ પ્રોસેસિંગ હબ તરીકે ભારતની વધતી જતી ભૂમિકા પર પ્રકાશ પાડ્યો હતો અને દક્ષિણ એશિયાની ખાદ્ય અર્થવ્યવસ્થાને બદલવામાં મૂલ્યવર્ધન, ટેકનોલોજી અપનાવવા અને પ્રાદેશિક સહયોગના મહત્વ પર ભાર મૂક્યો હતો.

સમાપન સત્રને સંબોધતા, ભારત સરકારના ખાદ્ય પ્રક્રિયા ઉદ્યોગ મંત્રાલયના સચિવ શ્રી અવિનાશ જોશીએ ભારપૂર્વક જણાવ્યું હતું કે ફૂડ પ્રોસેસિંગ એ માત્ર એક આર્થિક તક નથી પરંતુ દક્ષિણ એશિયા માટે રાષ્ટ્રીય અને પ્રાદેશિક અનિવાર્યતા છે. ભારતની ફ્લેગશિપ યોજનાઓ અને લાંબા ગાળાના વિકાસના વિઝન દ્વારા ભારતની પ્રતિબદ્ધતા પર પ્રકાશ પાડતા, તેમણે પુનરોચ્ચાર કર્યો કે ભારત પ્રાદેશિક ખાદ્ય પ્રક્રિયા પરિવર્તનને આગળ વધારવામાં એક ઉત્પ્રેરક અને પ્રતિબદ્ધ ભાગીદાર બંને તરીકે સેવા આપવા માટે તૈયાર છે. તેમણે વધુમાં રેખાંકિત કર્યું કે ફૂડ પ્રોસેસિંગ આધારિત વૃદ્ધિએ રોજગાર નિર્માણ, MSMEs, મહિલા ઉદ્યોગસાહસિકો અને ખેડૂત કલ્યાણ પર ધ્યાન કેન્દ્રિત કરવું જોઈએ, જેથી એ સુનિશ્ચિત કરી શકાય કે વૃદ્ધિના લાભો ગ્રામીણ સમુદાયો અને નાના વ્યવસાયો સુધી પહોંચે.

સહયોગના મહત્વ પર પ્રકાશ પાડતા, શ્રી જોશીએ જણાવ્યું હતું કે વિચારોને પ્રભાવશાળી ક્રિયાઓમાં રૂપાંતરિત કરવા માટે સરકારો, ઉદ્યોગો અને વિકાસ સંસ્થાઓએ સાથે મળીને કામ કરવું જોઈએ. તેમણે નોંધ્યું હતું કે સેપલિંગ ડાયલોગે સમગ્ર દક્ષિણ એશિયામાં સ્થિતિસ્થાપક અને ટકાઉ ખાદ્ય પ્રણાલીઓને આગળ વધારવામાં બહુ-હિતધારક ભાગીદારીની તાકાત દર્શાવી છે.

ખાદ્ય પ્રક્રિયા ઉદ્યોગ મંત્રાલય વતી, શ્રી જોશીએ આ સંવાદની કલ્પના કરવા અને સહ-આયોજન કરવા બદલ વર્લ્ડ બેંક ગ્રૂપ અને સમગ્ર સેપલિંગ ટીમ પ્રત્યે ઊંડી પ્રશંસા વ્યક્ત કરી હતી. તેમણે દક્ષિણ એશિયાના દેશોના પ્રતિષ્ઠિત પ્રતિનિધિઓનો પણ તેમના મૂલ્યવાન યોગદાન બદલ આભાર માન્યો હતો અને નોંધ્યું હતું કે તેમના દ્રષ્ટિકોણે ચર્ચાઓને સમૃદ્ધ બનાવી છે અને પ્રાદેશિક એકતા તથા સહકારની ભાવનાને મજબૂત કરી છે.

બે દિવસીય સેપલિંગ ડાયલોગ 2026 દક્ષિણ એશિયામાં ફૂડ પ્રોસેસિંગ સેક્ટરના સર્વાંગી વિકાસ માટે ખાદ્ય પ્રક્રિયા ઉદ્યોગ મંત્રાલય (MoFPI) અને વર્લ્ડ બેંક ગ્રૂપ વચ્ચે નક્કર એક્શન પ્લાન અને વધુ ગાઢ સહયોગના મજબૂત આહવાન સાથે સંપન્ન થયો.

SM/DK/GP/JT

સોશિયલ મીડિયા પર અમને ફોલો કરો :  @PIBAhmedabad    /pibahmedabad1964    /pibahmedabad  pibahmedabad1964[at]gmail[dot]com