কেন্দ্ৰীয় গৃহমন্ত্ৰী তথা সমবায় দপ্তৰৰ  মন্ত্ৰী শ্ৰী অমিত শ্বাহৰ সভাপতিত্বত আজি দিল্লীত যমুনা পুনৰুজ্জীৱিতকৰণৰ বিষয়ত এখন পৰ্যালোচনা বৈঠক অনুষ্ঠিত হয়। কেন্দ্ৰীয় গৃহ নিৰ্মাণ আৰু নগৰ পৰিক্ৰমা মন্ত্ৰী শ্ৰী মনোহৰ লাল, কেন্দ্ৰীয় জল শক্তি মন্ত্ৰী শ্ৰী চি আৰ পাটিল, দিল্লীৰ উপ-ৰাজ্যপাল শ্ৰী তৰণজিৎ সিং সন্ধু, মুখ্যমন্ত্ৰী শ্ৰীমতী  ৰেখা গুপ্তা, শ্ৰী পৰবেশ  চাহিব সিং আৰু বহু উচ্চপদস্থ বিষয়া উপস্থিত থাকে।

বৈঠকত ভাষণ দি কেন্দ্ৰীয় গৃহমন্ত্ৰী তথা সমবায় দপ্তৰৰ  মন্ত্ৰী শ্ৰীযুত অমিত শ্বাহে উল্লেখ কৰে যে যমুনা পৰিষ্কাৰ কৰাটো প্ৰধানমন্ত্ৰী শ্ৰী নৰেন্দ্ৰ মোদীৰ নেতৃত্বত গ্ৰহণ কৰা এক সংকল্প  আৰু এই লক্ষ্য অতি সোনকালে লাভ কৰিবলৈ সকলোৱে একেলগে কাম কৰিব লাগিব।

তেওঁ দিল্লী, হাৰিয়ানা, আৰু উত্তৰ প্ৰদেশ চৰকাৰৰ লগতে সংশ্লিষ্ট সকলো মন্ত্ৰালয়ক যমুনা পৰিষ্কাৰ কৰাৰ দিশত খণ্ডিতভাৱে নহয়, দলীয় কামৰ মনোভাৱেৰে পৰিচালিত এক সংহত কাৰ্য্য পৰিকল্পনাৰ জৰিয়তে কাম কৰিবলৈ আহ্বান জনায়।

শ্ৰী অমিত শ্বাহে কয় যে হাৰিয়ানা, দিল্লী, আৰু উত্তৰ প্ৰদেশ তিনিখন ৰাজ্যই সামূহিকভাৱে যমুনা নদীত এক মানক পৰিৱেশগত প্ৰবাহ নিশ্চিত কৰিব লাগিব। তেওঁ ঘোষণা কৰে যে দিল্লীৰ দুগ্ধ কাৰখানাৰ আৱৰ্জনা যমুনাত প্ৰৱেশ ৰোধ কৰিবলৈ দিল্লীৰ পৌৰ নিগম আৰু ৰাষ্ট্ৰীয় দুগ্ধ উন্নয়ন ব’ৰ্ডৰ মাজত বুজাবুজিৰ চুক্তি স্বাক্ষৰিত হ’ব; এই আৱৰ্জনাবোৰ ইয়াৰ পৰিৱৰ্তে জৈৱ গেছ আৰু গোবৰলৈ ৰূপান্তৰিত কৰা হ’ব।

গৃহমন্ত্ৰীগৰাকীয়ে লগতে কয় যে এন ডি ডি বি মডেলৰ অধীনত যমুনাৰ পাৰৰ আৱৰ্জনাসমূহৰ বৈজ্ঞানিক ব্যৱস্থাপনাৰ সমান্তৰালভাৱে দুগ্ধ আৰু গৌশালা (গো আশ্ৰয় শিবিৰ)ৰ পৰা গোবৰ পোনপটীয়াকৈ গেছ আৰু গোবৰ প্লাণ্টলৈ লৈ যোৱা হ’ব।

কেন্দ্ৰীয় গৃহমন্ত্ৰী তথা সমবায় দপ্তৰৰ  মন্ত্ৰীয়ে উল্লেখ কৰে যে যমুনা নদীত নিৰ্গত হোৱা নলাসমূহৰ ডিচিলটিং দ্ৰুতগতিত আগবাঢ়িছে। এই বছৰ আঁতৰোৱাৰ লক্ষ্য নিৰ্ধাৰণ কৰা ২৮.৫৭ লাখ মেট্ৰিক টন পলিৰ ভিতৰত ৯৭% ইতিমধ্যে উলিওৱা হৈছে, আৰু বাকীখিনি ১৫ জুনলৈকে আঁতৰোৱা হ’ব।

শ্ৰী অমিত শ্বাহে উল্লেখ কৰে যে সমগ্ৰ দিল্লী, হাৰিয়ানা, আৰু উত্তৰ প্ৰদেশত এতিয়ালৈকে ১২৯টা নলা পৰিশোধন প্লাণ্ট (এছটিপি) নিৰ্মাণ কৰা হৈছে  আৰু ২০২৭ চনৰ শেষৰ ফালে অতিৰিক্ত ৫৯টা এছটিপি নিৰ্মাণ কৰা হ’ব। তেওঁ জোৰ দি কয় যে কেৱল সন্তোষজনক প্ৰদৰ্শনৰ পৰিৱৰ্তে নিখুঁত ফলাফল লাভ কৰাতহে গুৰুত্ব দিব লাগে। শ্ৰী শ্বাহে আৰু নিৰ্দেশ দিয়ে যে ঔদ্যোগিক কমন এফ্লুৱেণ্ট ট্ৰিটমেণ্ট প্লাণ্ট (চিইটিপি) আৰু দুগ্ধ আৱৰ্জনা পৰিশোধন প্লাণ্ট নিৰ্মাণৰ কাম ভৱিষ্যতৰ প্ৰয়োজনীয়তাক লক্ষ্য কৰি ল’ব লাগিব।

কেন্দ্ৰীয় গৃহমন্ত্ৰী তথা সমবায় দপ্তৰৰ মন্ত্ৰীয়ে কয় যে যমুনাৰ সৈতে সংযুক্ত সকলো নলা আৰু পানীৰ উৎসত জৈৱৰাসায়নিক অক্সিজেন চাহিদা (বি অ’ ডি), ৰাসায়নিক অক্সিজেন চাহিদা (চি অ’ ডি) আৰু মুঠ স্থগিত কঠিন পদাৰ্থ (টি এছ এছ) আদি বিভিন্ন বিশুদ্ধকৰণ পৰিমাপসমূহৰ নিৰন্তৰ নিৰীক্ষণৰ ব্যৱস্থা কৰা উচিত। ইয়াৰ লগতে যমুনা ৰিজুভেনেচন প্ৰজেক্টৰ সকলো প্ৰকল্পৰ বিশদ কাৰ্য্য পৰিকল্পনা আৰু কাৰ্যকৰীকৰণৰ তাৰিখ নিৰ্ধাৰণ কৰিব লাগে আৰু ইয়াৰ দীৰ্ঘম্যাদী ৰক্ষণাবেক্ষণৰ ব্যৱস্থাও নিশ্চিত কৰিব লাগে। গৃহমন্ত্ৰীগৰাকীয়ে প্ৰতি ২০ দিনৰ মূৰে মূৰে যমুনা সজীৱতা প্ৰকল্পৰ কামৰ অগ্ৰগতি পুনৰীক্ষণ কৰিবলৈও নিৰ্দেশ দিয়ে।

*****

RK/PR/PS/DM