لوک سبھا کے اسپیکر جناب اوم برلا 8 جون 2026 کو ہریانہ قانون ساز اسمبلی، چنڈی گڑھ میں دوسری کامن ویلتھ پارلیمانی ایسوسی ایشن(سی پی اے) انڈیا ریجن زون II نارتھ زون کانفرنس کا افتتاح کریں گے۔

اس موقع پر ہریانہ کے وزیر اعلیٰ جناب نائب سنگھ، راجیہ سبھا کے ڈپٹی چیئرمین جناب ہری ونش، ہریانہ اسمبلی کے اسپیکر جناب ہروندر کلیان اور ہریانہ کے وزیر برائے پارلیمانی امور جناب مہیپال ڈھانڈا بھی اس باوقار تقریب سے خطاب کریں گے۔

اس دو روزہ کانفرنس کے دوران، تمام معزز شخصیات کانفرنس کے موضوع ’ایک باخبر معاشرے اور قانون سازوں کا مستقبل کے چیلنجوں کو سمجھنے اور وِکْسِت بھارت 2047کے ہدف کو حاصل کرنے میں کردار‘پر تبادلہ خیال کریں گی۔

کانفرنس کا اختتام 9 جون 2026 کو ہریانہ کے گورنر پروفیسر اشیم کمار گھوش کے الوداعی خطاب کے ساتھ ہوگا۔ لوک سبھا اسپیکر جناب اوم برلا، راجیہ سبھا کے ڈپٹی چیئرمین جناب ہری ونش، ہریانہ اسمبلی کے اسپیکر جناب ہروندر کلیان اور دیگر معزز شخصیات اس الوداعی سیشن میں شرکت کریں گی اور حاضرین سے خطاب کریں گی۔

اس کانفرنس میں پریزائیڈنگ افسران (جن میں چیئرمین، اسپیکر، ڈپٹی چیئرمین اور ڈپٹی اسپیکر شامل ہیں)، اور کامن ویلتھ پارلیمانی ایسوسی ایشن (سی پی اے) انڈیا ریجن زون II کی پانچ اسمبلیوں کے ارکانِ اسمبلی شرکت کریں گے۔ اس کے علاوہ مرکزی وزراء، ارکانِ پارلیمنٹ ، اور ہریانہ ودھان سبھا کے سابق اسپیکرز اور ڈپٹی اسپیکرز بھی اس میں شامل ہوں گے۔ مزید برآں، راجستھان، آندھرا پردیش، چھتیس گڑھ، سکم، گوا، مہاراشٹر اور اتر پردیش کی اسمبلیوں کے پریزائیڈنگ افسران کو بھی اس کانفرنس میں مدعو کیا گیا ہے۔

سی پی اے انڈیا ریجن زون II میں جموں و کشمیر، ہماچل پردیش، پنجاب، ہریانہ اور دہلی کی اسمبلیاں شامل ہیں۔ 2024 میں سی پی اے انڈیا ریجن کو نو (9) زونز میں دوبارہ تقسیم کیے جانے کے بعد، زون II کی یہ دوسری سالانہ کانفرنس ہوگی۔ ہریانہ قانون ساز اسمبلی کے معزز اسپیکر فی الحال سی پی اے انڈیا ریجن زون II کے چیئرپرسن کے طور پر خدمات انجام دے رہے ہیں۔

اس کانفرنس کا مقصد پارلیمانی تعاون کو مضبوط بنانا، بہترین قانون سازی اور پارلیمانی طریقوں کے تبادلے کو آسان بنانا، اور علاقائی و قومی اہمیت کے مسائل پر مثبت گفتگو کو فروغ دینا ہے۔ یہ کانفرنس پریزائیڈنگ افسران اور قانون سازوں کو اپنے تجربات شیئر کرنے اور 2047 تک ایک ترقی یافتہ ہندوستان (وِکْسِت بھارت) کے خواب کو پورا کرنے کے لیے حکمت عملیوں پر بحث کرنے کا ایک اہم پلیٹ فارم بھی فراہم کرے گی۔

****

 (ش ح –ش ت-ع ن)

U. No. 8090