કેન્દ્રીય કૃષિ અને ખેડૂત કલ્યાણ તથા ગ્રામીણ વિકાસ મંત્રી શ્રી શિવરાજ સિંહ ચૌહાણે આજે નવી દિલ્હીના કૃષિ ભવન ખાતે આસામના મુખ્યમંત્રી શ્રી હિમંતા બિસ્વા સરમા સાથે રાજ્યને સંબંધિત વિષયો પર ચર્ચા કરવા માટે બેઠક યોજી હતી. આ ઉચ્ચ સ્તરીય બેઠકમાં આસામમાં કૃષિ અને ગ્રામીણ વિકાસ વિભાગ દ્વારા ચલાવવામાં આવતી વિવિધ કેન્દ્રીય યોજનાઓની પ્રગતિની સમીક્ષા કરવામાં આવી હતી અને કેટલાક મહત્વપૂર્ણ મુદ્દાઓ પર વ્યાપક ચર્ચા-વિચારણા કરવામાં આવી હતી.

બેઠકમાં કેન્દ્રીય મંત્રી શ્રી શિવરાજ સિંહ ચૌહાણે જણાવ્યું હતું કે પ્રધાનમંત્રી શ્રી નરેન્દ્ર મોદીના માર્ગદર્શન હેઠળ આસામમાં કૃષિ અને ગ્રામીણ વિકાસ માટે ભંડોળ અને સંસાધનોની કોઈ અછત રહેશે નહીં. તેમણે એગ્રીકલ્ચર ઈન્ફ્રાસ્ટ્રક્ચર ફંડ (AIF), પ્રધાનમંત્રી આવાસ યોજના - ગ્રામીણ (PMAY-G), મનરેગા (MGNREGA) અને અન્ય કેન્દ્રીય યોજનાઓના મહત્તમ લાભો સુનિશ્ચિત કરવા માટે રાજ્યને સંપૂર્ણ સહયોગની ખાતરી આપી હતી.

ગ્રામીણ વિકાસ મંત્રાલયના એજન્ડા પર બોલતા સચિવ શ્રી રોહિત કંસલે માહિતી આપી હતી કે પ્રધાનમંત્રી આવાસ યોજના-ગ્રામીણ (PMAY-G) અને મનરેગા (MNREGA) પ્રણાલીઓમાં ટેકનિકલ અવરોધો સંપૂર્ણપણે હલ થઈ ગયા છે. આસામ સરકારની માંગ મુજબ મનરેગા હેઠળ ભંડોળ ફાળવવામાં આવ્યું છે. તેમણે એમ પણ જણાવ્યું કે, 1લી જુલાઈથી દેશભરમાં મનરેગાનું સ્થાન 'વિકાસ ભારત-રોજગાર એવમ આજીવિકા મિશન (ગ્રામીણ)' લેશે.

બેઠકમાં ચાના બગીચાના કામદારોને જમીન માલિકીના હકો (પટ્ટા) આપવાના આસામ સરકારના ઐતિહાસિક નિર્ણયની પ્રશંસા કરવામાં આવી હતી. કેન્દ્રીય મંત્રીએ જાહેરાત કરી હતી કે કેન્દ્ર સરકાર પાત્ર લાભાર્થીઓના નામ ડિજિટલી રીતે નોંધવા માટે એક વિશેષ સર્વે વિન્ડો ખોલશે જેથી આ કામદારોને પ્રધાનમંત્રી આવાસ યોજના-ગ્રામીણના લાભો મળી શકે.

આ પ્રસંગે કેન્દ્રીય મંત્રી શ્રી ચૌહાણે આસામની વિશિષ્ટ આબોહવા અને જમીનની લાક્ષણિકતાઓના આધારે તૈયાર કરાયેલ 'કૃષિ એક્શન પ્લાન' (કૃષિ કાર્ય યોજના) નો મુસદ્દો મુખ્યમંત્રી શ્રી સરમાને સોંપ્યો હતો. બેઠક દરમિયાન કૃષિ અને ગ્રામીણ વિકાસ સંબંધિત કેટલાક મહત્વપૂર્ણ નિર્ણયો પર સહમતિ સધાઈ હતી.

ગ્રામીણ વિકાસ મંત્રાલયના અધિકારીઓએ માહિતી આપી હતી કે આસામમાં લક્ષ્યાંક કરતાં વધુ, 9 લાખથી વધુ 'લખપતિ દીદી'ઓ બનાવીને મહિલા સશક્તિકરણ તરફ નોંધપાત્ર પ્રગતિ હાંસલ કરવામાં આવી છે. આ મહિલાઓના સાહસોને વધુ મજબૂત કરવા માટે આસામ કૃષિ યુનિવર્સિટી (AAU) ના ઈન્ક્યુબેટર્સના સહયોગથી કામગીરી ઝડપી બનાવવામાં આવશે.

કૃષિ ક્ષેત્રને મજબૂત કરવા માટે, કેન્દ્ર સરકારે કૃષિ યાંત્રિકીકરણ અને રાષ્ટ્રીય કૃષિ વિકાસ યોજના (RKVY) હેઠળ આસામમાં મંજૂર કરાયેલા પ્રોજેક્ટ્સ અને ભંડોળ વિશે માહિતી આપી હતી. કૃષિ મંત્રાલયના સચિવ શ્રી અતિશ ચંદ્રાએ મુખ્યમંત્રીને મહિલા ખેડૂતોને કૃષિ પાવર વીડર્સ પૂરા પાડવા માટે થઈ રહેલા પ્રયાસોથી માહિતગાર કર્યા હતા. ખાદ્ય તેલ પરના રાષ્ટ્રીય મિશન - ઓઈલ પામ (NMEO-OP) ના વિસ્તરણ અંગે પણ ચર્ચા કરવામાં આવી હતી.

રાજ્યમાં સુરક્ષિત ખેતીને પ્રોત્સાહન આપવા માટે આ વર્ષે 1,500 નવા વાંસના પોલીહાઉસ મંજૂર કરવામાં આવ્યા છે. કૃષિ માળખાકીય સુવિધાઓને મજબૂત કરવા માટે, રાષ્ટ્રીય કૃષિ વિકાસ યોજના (RKVY) હેઠળ પેસ્ટિસાઇડ ટેસ્ટિંગ લેબ (જંતુનાશક પરીક્ષણ પ્રયોગશાળા) અને એડિબલ ઓઇલ ટેસ્ટિંગ લેબ (ખાદ્ય તેલ પરીક્ષણ પ્રયોગશાળા) માટેની ઇમારતોને મંજૂરી આપવામાં આવી છે. આસામના ઓર્ગેનિક (જૈવિક) ઉત્પાદનોના આંતરરાષ્ટ્રીય માર્કેટિંગ અને નિકાસને પ્રોત્સાહન આપવા માટે એપેડા (APEDA) અને નેશનલ ઓર્ગેનિક કોઓપરેટિવ લિમિટેડ સાથે ભાગીદારી સ્થાપિત કરવામાં આવી રહી છે, જે ખેડૂતોને વ્યાપક પાયે સહયોગ પૂરો પાડશે.

બેઠકમાં આસામની સમૃદ્ધ જૈવ-વિવિધતાના પ્રચાર પર પણ વિગતવાર ચર્ચા કરવામાં આવી હતી. ડેરે (DARE) ના સચિવ અને આઈસીએઆર (ICAR) ના મહાનિર્દેશક ડૉ. એમ.એલ. જાટે માહિતી આપી હતી કે આસામ કૃષિ યુનિવર્સિટીના વર્તમાન કેન્દ્રોને વધુ મજબૂત કરવામાં આવશે. આ અંતર્ગત ઈન્સ્ટિટ્યૂટ ઓફ ફ્લોરીકલ્ચર, પુણેના સહયોગથી મસાલા માટે અખિલ ભારતીય સમન્વયિત સંશોધન કાર્યક્રમ અને રાજ્યના ફૂલ 'ફોક્સટેલ ઓર્કિડ' ના વિકાસ માટે નેટવર્ક કાર્યક્રમ ચલાવવામાં આવશે. કૃષિ વિજ્ઞાન કેન્દ્રો (KVKs) ના કર્મચારીઓના નિવૃત્તિ લાભો અને પેન્શન સંબંધિત બાકી કેસોના ઉકેલ અંગે પણ ચર્ચા કરવામાં આવી હતી.

જમીન સંસાધન વિભાગના સચિવ શ્રી નરેન્દ્ર ભૂષણે માહિતી આપી હતી કે આસામમાં જમીનના રેકોર્ડના ડિજિટલાઈઝેશન તરફ સકારાત્મક પ્રગતિ થઈ રહી છે.

મુખ્યમંત્રી શ્રી હિમંતા બિસ્વા સરમાએ રાજ્યમાં કૃષિ અને ગ્રામીણ વિકાસને વેગ આપવા માટે કેન્દ્ર સરકાર દ્વારા આપવામાં આવી રહેલા સહયોગ બદલ કેન્દ્રીય મંત્રી શ્રી શિવરાજ સિંહ ચૌહાણનો આભાર વ્યક્ત કર્યો હતો.

SM/DK/JD

(રીલીઝ આઈડી: 2268187) મુલાકાતી સંખ્યા : 6