কেন্দ্রগী য়ুথ এফিয়র্স অমসুং স্পোর্তসকী রাজ্য মন্ত্রী, রক্ষা খরসেনা নোর্থ ইস্ত য়ুনাইতেদ এফ.সি.দা চৎতুনা ক্লব অসিগী মেনেজমেন্ত, কোচিং স্তাফ অমসুং নহা ওইরিবা ফুতবোলরশিংগা ৱারী শাখ্রে। লৈবাক শিনবা থুংবদগী, মরুওইনা অৱাং নোংপোক লমদমদগী, ফুতবোলগী হৈ-শিংবা মশক খঙদোক্নবা অমসুং শেমগৎনবা ক্লব অসিনা হোৎনরিবশিংবু মহাক্না থাগৎপা ফোংদোকখি।

খোঙচৎ অদুদা নোর্থ ইস্ত য়ুনাইতেদ এফ.সি.গী চীফ ইগজিক্যুতিব ওফিসর মান্দর তামহানে, রোহিত থোরাত, তেক্নিকেল দাইরেক্তর অমসুং রিজর্ব তীমগী হেদ কোচ নৌশাদ মুসা, ক্লবকী মেনেজমেন্ত তীমগী মেম্বরশিং, কোচিং স্তাফ অমসুং নহা ওইরিবা ফুটবোলরশিং শরুক য়াখি।

ৱারী শানবা অসিগী মনুংদা, ক্লবকী লুচিংবশিংনা রক্ষা খরসেদা নোর্থ ইস্ত য়ুনাইতেদ এফ.সি.গী নহা ওইরিবা মীওইশিংবু চাউখৎহন্নবা ফিলোসোফী, হৈশিংবা মশক খঙদোকপগী ফ্রেমৱার্ক অমসুং নহা ওইরিবা ফুটবোলরশিংগীদমক তুং কোইনা চৎকদবা লম্বী অমা শেমগৎনবগী অশাংবা মতমগী ওইবা মিৎয়েংগী মতাংদা পাউদমখি।

নহা ওইরিবা ফুতবোলরশিং মশক খঙদোক্নবা কোচশিংনা লৈবাক অসিগী তোঙান তোঙানবা মফমশিংদা চৎপা নহা ওইরিবা নৌশাদ মুসাগী লুচিং মখাদা ক্লব অসিগী পাক চাউবা তেলেন্ত স্কাউতিং ইনিসিএতিবকী মতাংদা মন্ত্রীদা পাউদমখি। কোচশিং অমসুং হান্নগী শান্নরোইশিংগী ক্লবকী নেৎৱার্ক, ওল ইন্দিয়া ফুতবোল ফেদরেসননা শিনবা য়ুথ কম্পিতিসনশিং অমসুং য়ুথ নেস্নেল তীমগী থাক্তা ভারতকী মহুৎ শিনবা শান্নরোইশিংবু লেপ্পা লৈতনা য়েংশিনবগী খুত্থাংদা শান্নরোইশিংবু স্কাউৎ তৌখি।

সেলেক্সন প্রোসেসকী শরুক অমা ওইনা, অঙকপা নহা ওইরিবা শান্নরোয় ৬০ রোমবু অরোইবা সেলেক্সন ত্রাইএলগীদমক গুৱাহাতিদা কৌখি। খনগৎলবা শান্নরোয়শিং অসিনা ক্লব অসিগী চহি ১৮ গী মখাদা লৈবা অমসুং রিজর্ব তীমগী সেতঅপকী কোর শেমগনি হায়না পানরি। মসিনা নোর্থ ইস্ত য়ুনাইতেদ এফ.সি.গী মতম শাংনা শান্নরোয় দিবেলপমেন্ত তৌবগী লম্বী হেন্না মপাঙ্গল কনখৎহল্লগনি।

রক্ষা খরসেনা ক্লব অসিগী তেলেন্ত মশক খঙদোকপা অমসুং শান্নরোইশিং চাউখৎহন্নবা মওং-মতৌগীদমক থাগৎপা ফোংদোকখি অমসুং নহা ওইরিবা শান্নরোইশিংগীদমক গ্রাসরুৎতগী ইলিৎ ফাওবগী মপাঙ্গল লৈবা লম্বী শেমগৎপগী মরুওইবা অদু পনখি।

ভারতকী ফুতবোলগী তুংলমচৎ অসি ঐখোয়গী হৈশিংবশিং ঙন্না মশক খঙদোকপা, মগুন লৈবা কোচিং পীবা অমসুং প্রোগ্রেসন্দা স্ত্রকচর তৌরবা খুদোংচাবশিং শেমগৎপা ঙম্বগী মখা পোল্লি। গ্রাসরুৎ স্কাউতিং, এথলেৎ দিবেলপমেন্ত অমসুং মতম শাংনা থৌরাং তৌবা অসি ভারতকী ফুটবোল ইকোসিস্তেম মপাঙ্গল কনখৎহন্নবগীদমক য়াম্না মরু ওই হায়না মহাক্না হায়খি।

অৱাং-নোংপোক লমদম অসি ভারতকী খ্বাইদগী মপাঙ্গল লৈবা শান্ন-খোৎনবগী লমদম অমা ওইদুনা লাক্লি অমসুং মসিদা অখন্নবা শান্নরোয় কয়া লেপ্পা লৈতনা পুথোক্লি হায়না মন্ত্রীনা পনখি। কোচিং, ইনফ্রাস্ত্রকচর অমসুং সাইন্তিফিক এথলেত দিবেলপমেন্তদা লেপ্পা লৈতনা ইনভেস্ত তৌবনা লমদম অসিগী হেন্না চাউবা পোতেন্সিএল ফংহনবদা মতেং পাংগনি হায়না মহাক্না অকনবা ৱাফম থমখি।

রক্ষা খরসেনা গ্রাসরুৎ স্পোর্তশিং প্রমোৎ তৌনবা, এথলেৎ দিবেলপমেন্ত সিস্তেমশিং মপাঙ্গল কনখৎহন্নবা অমসুং লৈবাক শিনবা থুংনা নহা ওইরিবা শান্নরোইশিংগীদমক খুদোংচাবশিং হেন্না ফংহন্নবা সরকারগী অচেৎপা ফিরেপ অদু অমুক হন্না ফোংদোকখি।

মহাক্না মেঘালয়া অমসুং অৱাং নোংপোক লমদমদা চৎখিবা অদুগী শরুক অমা ওইদুনা লমদম অসিদা স্পোর্তস ইনফ্রাস্ত্রকচর, এথলেৎ দিবেলপমেন্ত ইনিসিয়েতিবশিং অমসুং নহাশিংদা মীৎয়েং থম্বা প্রোগ্রামশিং য়েংশিনখি।

 ***