مرکزی وزیرِ مملکت برائے امورِ نوجوانان و کھیل رکشا کھڈسے نے نارتھ ایسٹ یونائیٹڈ ایف سی کا دورہ کیا اور کلب کی انتظامیہ، کوچنگ اسٹاف اور نوجوان فٹبالروں سے ملاقات کی۔ انہوں نے ملک بھر، بالخصوص شمال مشرقی خطے سے فٹبال کی صلاحیتوں کی تلاش اور ان کی تربیت و رہنمائی کے لیے کلب کی کوششوں کی بھرپور ستائش کی۔

اس دورے میں نارتھ ایسٹ یونائیٹڈ ایف سی کے چیف ایگزیکٹو آفیسر مندار تامہانے، روہت تھوراٹ، ٹیکنیکل ڈائریکٹر اور ریزرو ٹیم کے ہیڈ کوچ نوشاد موسیٰ کے علاوہ کلب کی انتظامیہ، کوچنگ اسٹاف اور نوجوان کھلاڑی بھی موجود تھے۔

ملاقات کے دوران کلب کی  لیڈرشپ نے  رکشا کھڈسے کو نارتھ ایسٹ یونائیٹڈ ایف سی کے نوجوان کھلاڑیوں کی ترقی سے متعلق نظریے، صلاحیتوں کی شناخت کے نظام اور نوجوان فٹبالروں کے لیے ایک پائیدار اور خاکہ بند ترقیاتی طریقہ  تیار کرنے کے طویل مدتی وژن سے آگاہ کیا۔

وزیرِ مملکت کو بتایا گیا کہ کلب کی جانب سے ٹیکنیکل ڈائریکٹر نوشاد موسیٰ کی قیادت میں صلاحیتوں کی دریافت  کا ایک وسیع پروگرام چلایا جا رہا ہے، جس کے تحت کوچ ملک کے مختلف حصوں کا دورہ کرکے باصلاحیت نوجوان فٹبالروں کی نشاندہی کرتے ہیں۔کھلاڑیوں کا انتخاب کلب کے کوچ اور سابق فٹبالروں کے نیٹ ورک، آل انڈیا فٹبال فیڈریشن (ہندوستانی فٹبال فیڈریشن) کے زیرِ اہتمام منعقد ہونے والے یوتھ مقابلوں، اور ہندوستان کی مختلف جونیئر قومی ٹیموں کی نمائندگی کرنے والے کھلاڑیوں کی مسلسل نگرانی کے ذریعے کیا جاتا ہے۔

انتخابی عمل کے ایک اہم مرحلے کے تحت تقریباً 60 باصلاحیت نوجوان کھلاڑیوں کو حتمی آزمائشی مقابلوں (ٹرائلز) کے لیے گوہاٹی مدعو کیا گیا۔ ان میں سے منتخب ہونے والے کھلاڑی نارتھ ایسٹ یونائیٹڈ ایف سی کی انڈر-18 اور ریزرو ٹیموں کا بنیادی حصہ بنیں گے، جس سے کلب کے طویل مدتی کھلاڑی ترقیاتی پروگرام کو مزید تقویت ملے گی۔

رکشا کھڈسے نے صلاحیتوں کی شناخت اور کھلاڑیوں کی تربیت و نشوونما کے لیے کلب کے منظم اور مربوط طریقۂ کار کی ستائش کی۔ انہوں نے اس بات پر زور دیا کہ نوجوان کھلاڑیوں کے لیے نچلی سطح (گراس روٹس) سے لے کر اعلیٰ سطح تک ترقی کے مضبوط اور مؤثر راستوں کی تشکیل نہایت ضروری ہے، تاکہ انہیں اپنی صلاحیتوں کے مکمل اظہار اور قومی و بین الاقوامی سطح پر کامیابی کے مواقع میسر آ سکیں۔

رکشا کھڈسے نے کہا، ہندوستانی فٹبال کا مستقبل اس بات پر منحصر ہے کہ ہم صلاحیتوں کی بروقت شناخت کریں، معیاری کوچنگ فراہم کریں اور کھلاڑیوں کی ترقی کے لیے منظم مواقع پیدا کریں۔ ایسی پہلیں جو نچلی سطح پر ٹیلنٹ کی شناخت، کھلاڑیوں کی ہمہ جہت تربیت اور طویل مدتی منصوبہ بندی کو یکجا کرتی ہیں، ہندوستان کے فٹبال نظام کو مضبوط بنانے کے لیے انتہائی اہم ہیں۔‘‘

وزیرِ مملکت نے کہا کہ شمال مشرقی خطہ بدستور ہندوستان کے سب سے مضبوط کھیلوں کے مراکز میں شمار ہوتا ہے اور اس نے مسلسل غیر معمولی فٹبال ٹیلنٹ پیدا کیے ہیں۔ انہوں نے زور دیا کہ کوچنگ، بنیادی ڈھانچے اور سائنسی بنیادوں پر کھلاڑیوں کی تربیت میں مسلسل سرمایہ کاری کے ذریعے اس خطے کی مزید بے پناہ صلاحیتوں کو بروئے کار لایا جا سکتا ہے اور فٹبال کے میدان میں نئی کامیابیاں حاصل کی جا سکتی ہیں۔

رکشا کھڈسے نے نچلی سطح پر کھیلوں کے فروغ، کھلاڑیوں کی تربیت و ترقی کے نظام کو مزید مضبوط بنانے اور ملک بھر کے نوجوان کھلاڑیوں کے لیے زیادہ سے زیادہ مواقع پیدا کرنے کے حکومت کے عزم کا بھی اعادہ کیا۔

یہ دورہ میگھالیہ اور شمال مشرقی خطے میں ان کی مختلف مصروفیات کا حصہ تھا، جن کا مقصد کھیلوں کے بنیادی ڈھانچے، کھلاڑیوں کی ترقی سے متعلق اقدامات اور نوجوانوں پر مرکوز مختلف پروگراموں کا جائزہ لینا اور انہیں مزید مؤثر بنانے کے امکانات کا مطالعہ کرنا تھا۔

******

(ش ح۔ م ش ع ۔ م ا)

UR No-7787

(ریلیز آئی ڈی: 2267318) وزیٹر کاؤنٹر : 12