U Myntri sorkar Pdeng ba dei khmih ia ka Tnad Youth Affairs & Sports, u Dr. Mansukh Mandaviya mynta ka sngi u la pyniaid ia ka jingialang peit bniah ban peit ïa ki jingpynkhreh jong ka Meghalaya ban pynlong ïa ka 39th National Games ha u 2027.

Ha kane ka jingialang la iadonlang u Myntri Rangbah ka jylla Meghalaya, Conrad Sangma, Myntri Khynnah ka sorkar pdeng ba dei khmih ia ka Tnad Youth Affairs & Sports Raksha Khadse, IOA President P.T Usha, Myntri ba dei khmih ia ka tnad kam ialehkai jong ka jylla Meghalaya Bah Wailadmiki Shylla, ki ophisar ba dei khmih ia ka tnad kam ialehkai na ki phra tylli ki jylla ka thain shatei lammihngi, bad ki heh ophisar na ka Tnad Youth Affairs & Sports jong ka sorkar pdeng.

Ha kane ka jingïalang, u Dr. Mandaviya u la ban jur ba, katkum ka jingthmu jong u Myntri Rangbahduh ka ri u Narendra Modi, ka 39th National Games kadei ban long ym tang kum ka jingïalehkai ba halor tam hynrei kum ka rynsan ban pyni ïa ka pateng kolshor kaba riewspah, kaba iar, bad ka jinglong kyrpang jong ka Meghalaya bad ka thaiñ shatei lammihngi baroh kawei sha ka ri bad ka pyrthei.

U la ban jur ia ka jingdonkam ban pynthikna ia ki jingdon jingem kiba katkum ka juk mynta ha kaba iadei bad ka kam ialehkai, ka jingpyniaid kaba ryntih, bad ka jingiashim bynta paidbah kaba iar ban pynlong ia ka Lympung ialehkai kum ka kam kaba kyrpang na ka bynta ki jingialehkai jong ka ri India.

“Ka jingiaineh bad ka jingiar kadei ka khubor jong ngi na ka bynta ka National Games kaba 39 ha Meghalaya ha u snem 2027,” ong u Dr. Mandaviya.

Haba peit ia ka jingkiew ka jingiashim bynta na ki jylla bapher bapher na ka bynta ban pynlong ia ki jingialehkai, u Myntri Sorkar Pdeng u la ong ba ka National Games ka dei ban pynleit jingmut ha ka jingithuh ia ki sap bad ka jingwad ia ki sap.

“Dei ruh ban pyndonkam ïa ka National Games kum ka lad ban pynsaphriang jingtip halor ka jingpyndonkam da ki dawai pynkhlain. Dei ban pynsngewthuh ïa ki nongïalehkai shaphang ka jingktah jong ka jingpyndonkam ia ki dawai pynkhlain,” u la bynrap.

U Dr. Mandaviya ka la ong ba dei ban pyndonkam ia ki nongtrei mon sngewbha jong ka MY Bharat ha ka National Games ha Meghalaya.

U Myntri Sorkar Pdeng u la peit bniah ruh ia ka jingiaid shaphrang jong ka jingkyntiew ia ki jingdon jingem ba iadei bad ka kam ialehkai ha kylleng ki jylla Ashtalakshmi (ka thain shatei lammihngi).

Ha kane ka jingialang, la ai ia ka jingbatai kaba bniah hakhmat u Myntri halor ka jinglong jingman jong ki projek na ka bynta ki jingdon jingem ha ki kam ialehkai, ka jingpynkhreh ia ki jaka, bad ki jingpynkhreh baroh na ka bynta ka 39th National Games 2027, kynthup ia ki por ban pyndep bad ki bynta ba kongsan kiba donkam ban pyrkhat bha.

U Dr. Mandaviya, uba don ha ka jingwan jngoh kaba lai sngi ia ka thain shatei lammihngi, u la plie paidbah ruh ia ka Multipurpose Integrated Sports Indoor Hall ha nongbah Shillong mynta ka sngi.

U la ong ba kane ka jaka kan plie ki lad ba thymmai ia ki samla nongialehkai bad kan don ka bynta kaba kongsan ha kaba pynwandur ia ka lawei jong ka kam ialehkai ha Meghalaya bad ka thain shatei lammihngi, katba kan nang pynkhlain shuh shuh ia ka jinglong jingman ka kam ialehkai bad kyntiew ia ka pateng ban wan kiba don ka sap ialehkai.

U Dr. Mandaviya u la pynbna ruh ba shen yn sa shna ia ka High-altitude training centre, kaba katkum ka juk mynta ha Meghalaya kaba shongdor T.150 klur.

Haba ïaroh ïa u Myntri Rangbah ka Jylla Meghalaya u Conrad Sangma, u Dr. Mansukh Mandaviya u la ong ba ka jylla ka la sakhi ïa ka jingkiew kaba kongsan ha ka kam ïalehkai ha kine ki phra snem ba la dep hapoh ka jingïalam jong u.

“U la shim ia ki sienjam kiba pura bad kiba shemphang ban pynkhlain ia ki kam ialehkai ha Meghalaya. Naduh ka jingkyntiew ia ka kam sian ha ki kam ialehkai haduh ki rukom ai jinghikai katkum ka juk mynta ban pynbiang ia ka lad ban lap ia kiba don sap bad ruh ki prokram ban kyntiew ia ki nongialehkai ha ki jaka nongkyndong, u Myntri Rangbah u la buh ia ka nuksa na ka bynta kiwei kiwei ki jylla,” la ong u Myntri.

Haba kren shaphang ka jingkiew ka jingkongsan jong ka thain shatei lammihngi ha ki kam ialehkai jong ka India, u Myntri Sorkar Pdeng u la ong ba haba ka jylla kum ka Meghalaya ka wan shakhmat ban pynlong ia ka National Games, ka long ka jingsngew sarong ia baroh kawei ka ri.

U la kdew ba ka thain ka la pynmih shibun ki nongialehkai kiba tbit bha bad ba ka jingpynlong ia kane ka lympung ialehkai kan pynkhlain shuh shuh ia ka jingkyntiew ia ki kam ialehkaim, kan ai mynsiem ia ki nongialehkai kiba dang khynnah, bad kan pyni ia ka kolshor kaba riewspah, ka rukom pdiang briew, bad ki lad ki lynti kiba don ha ka thain shatei lammihngi sha baroh kawei ka ri.

“Nga la peit ia ka jingiaid shakhmat jong ki jingdon jingem bad ka jingpynkhreh na ka bynta ka National Games ba 39 ha Meghalaya, bad nga lah ban ong da ka jingskhem jingmut ba ka National Games 2027 kan long ka nuksa kaba thymmai ha ka histori jong kane ka lympung ialehkai,” la bynrap u Myntri.

Da kaba kdew sha ka jingpeit bniah ka Sorkar Pdeng ia ka jingkyntiew ia ki kam ialehkai ha ka thain shatei lammihngi, u Myntri Sorkar Pdeng u la ong ba ka jingrit ne ka jing duna ki briew ha kane ka jylla kam ktah shuh ia ka rukom buh bhah na ka bynta ki jingdon jingem bad ki lad kiba iadei bad ki kam ialehkai.

“Mynta, ka thain shatei lammihngi ka don tang 4% na baroh ki briew ha ka India, hynrei jan 25% jong ki Khelo India Centre jong ka ri ki don ha kane ka thain. Kane ka pyni ia ka jingkut jingmut ka Sorkar Pdeng ban plie ia ki lad kiba bun kiba don ha ki kam ialehkai jong ka thain shatei lammihngi. Katba ki don bun ki distrik ha ka ri kiba don tang kawei ka Khelo India Centre, shibun ki distrik ha ka thain shatei lammihngi ki dei kiba la pynbiang ar tylli ki centre, kaba pynthikna ba ki nongialehkai ki ioh ia ka jinghikai bad ruh ba ka don ka jingkyntiew ia ki kam ialehkai ha ki jaka nongkyndong. Kane ka pyni ia ka jingpeit bniah ban kyntiew ia kiba don sap bad ban tei ia ka kam ialehkai kaba khlain bha ha kane ka thain,” u la ong.

*****