কেন্দ্ৰীয় যুৱ পৰিক্ৰমা আৰু ক্ৰীড়া বিভাগৰ ৰাজ্য মন্ত্ৰী ৰক্ষা খাডছেই আজি ভাৰতীয় ব্যৱস্থাপনা প্ৰতিষ্ঠান (আইআইএম), শ্বিলঙত যুৱ পৰিক্ৰমা বিভাগৰ অধীনত এমৱাই ভাৰতৰ দ্বাৰা আয়োজিত ‘বিকশিত ভাৰত-পূৰ্বোত্তৰৰ বাবে নশা মুক্ত যুৱ’ কাৰ্যসূচী সম্বোধন কৰি যুৱক-যুৱতীসকলৰ মাজত মাদক দ্ৰব্যৰ অপব্যৱহাৰৰ বৰ্ধিত প্ৰত্যাহ্বানৰ বিৰুদ্ধে যুঁজিবলৈ এক সামূহিক, মিছন-মোড দৃষ্টিভংগীৰ আহ্বান জনায়।

এই কাৰ্যসূচীয়ে ২৪টা আধ্যাত্মিক আৰু সামাজিক সংগঠনৰ প্ৰতিনিধিসকল, যুৱ বিষয়া, নাগৰিক সমাজৰ অংশীদাৰ আৰু প্ৰতিষ্ঠানিক নেতাসকলক সমগ্ৰ উত্তৰ-পূব অঞ্চলত মাদক দ্ৰব্যবিৰোধী সজাগতা তথা যুৱ অংশগ্ৰহণৰ পদক্ষেপ শক্তিশালী কৰাৰ বাবে ৰণনীতিৰ ওপৰত আলোচনা কৰিবলৈ একত্ৰিত কৰে।

অনুষ্ঠানত যুৱ পৰিক্ৰমা বিভাগৰ সচিব পল্লৱী জৈন গোভিল, এম ৱাই ভাৰতৰ চি ই অ’ ড০ প্ৰিয়ংকা শুক্লা আৰু আই আই এম শ্বিলঙৰ সঞ্চালক অধ্যাপক নলিনী প্ৰভা ত্ৰিপাঠীৰ লগতে অন্যান্য বিশিষ্ট ব্যক্তিসকলে অংশগ্ৰহণ কৰে।

সমাৱেশত সম্বোধন কৰি ৰক্ষা খাডছেয়ে কয় যে ভাৰতৰ যুৱ জনসংখ্যা হৈছে দেশৰ আটাইতকৈ ডাঙৰ শক্তি আৰু ২০৪৭ চনৰ ভিতৰত বিকশিত ভাৰতৰ দৃষ্টিভংগী প্ৰাপ্ত কৰাৰ বাবে যুৱসকলক সঠিক দিশত পথ প্ৰদৰ্শন কৰাটো গুৰুত্বপূৰ্ণ হ’ব।

 ‘আমি সামূহিকভাৱে মিছন মোডত নিচা মুক্ত অভিযানক আগুৱাই নিব লাগিব। আমাৰ যুৱক-যুৱতীসকল দেশৰ আটাইতকৈ ডাঙৰ শক্তি আৰু তেওঁলোকক সঠিক দিশত পথ প্ৰদৰ্শন কৰাটো আমাৰ যৌথ দায়িত্ব। যদি আমি তেওঁলোকক ইতিবাচক নিৰ্দেশনা আৰু সুযোগ প্ৰদান কৰো, আমি নিশ্চিতভাৱে বিকশিত ভাৰত২০৪৭ৰ লক্ষ্যত উপনীত হ’ম’, তেওঁ কয়।

 মাদক দ্ৰব্যৰ অপব্যৱহাৰ আৰু আসক্তিৰ ওপৰত আলোকপাত কৰি মন্ত্ৰীগৰাকীয়ে উল্লেখ কৰে যে বিষয়টো কেৱল এক ব্যক্তিগত প্ৰত্যাহ্বান হিচাপেই নহয় বৰঞ্চ এক বৃহৎ সামাজিক চিন্তা হিচাপে চাব লাগিব, যাৰ বাবে সমন্বিত সামূহিক পদক্ষেপ আৰু বহনক্ষম প্ৰতিষ্ঠানিক হস্তক্ষেপৰ প্ৰয়োজন।

মাই ভাৰতৰ ভূমিকাৰ কথা উল্লেখ কৰি তেওঁ কয় যে যুৱপ্ৰজন্মক ৰাষ্ট্ৰ নিৰ্মাণৰ পদক্ষেপৰ সৈতে সংযোগ কৰিবলৈ আৰু তৃণমূল পৰ্যায়ত সামাজিক প্ৰত্যাহ্বানৰ মোকাবিলা কৰাত তেওঁলোকৰ সক্ৰিয় অংশগ্ৰহণক উৎসাহিত কৰিবলৈ এই মঞ্চৰ কল্পনা কৰা হৈছে। তেওঁ যুৱ বিষয়া আৰু অংশীদাৰ সংগঠনসমূহক মাই ভাৰত উদ্যোগসমূহ সমাজৰ প্ৰতিখন জিলা আৰু প্ৰতিটো শ্ৰেণীত উপনীত হোৱাটো নিশ্চিত কৰিবলৈ আহ্বান জনায়।

ৰক্ষা খাডছেয়ে যুৱক-যুৱতীসকলক ইতিবাচকভাৱে জড়িত কৰিবলৈ আৰু আসক্তি, মানসিক চাপ আৰু সামাজিক বিচ্ছিন্নতাৰ প্ৰতি দুৰ্বলতা হ্ৰাস কৰিবলৈ সক্ষম এক পৰিৱৰ্তনশীল সামাজিক শক্তি হিচাপে ক্ৰীড়াৰ প্ৰয়োজনীয়তাৰ ওপৰতো গুৰুত্ব আৰোপ কৰে।

‘ক্ৰীড়া যুৱ শক্তিক গঠনমূলক দিশত প্ৰেৰণ কৰাৰ বাবে আটাইতকৈ কাৰ্যকৰী সঁজুলি হিচাপে পৰিগণিত হ’ব পাৰে। ঝাৰখণ্ড, বিহাৰ, পশ্চিম বংগ, অন্ধ্ৰ প্ৰদেশ আৰু গোৱাৰ লগতে সমগ্ৰ উত্তৰ-পূবৰ ৰাজ্যসমূহত ইতিমধ্যে এক শক্তিশালী ক্ৰীড়া সংস্কৃতি আছে। আমি ক্ৰীড়া, স্থানীয় সাংস্কৃতিক কাৰ্যকলাপ আৰু ইতিবাচক সামূহিক অংশগ্ৰহণৰ সৈতে অধিক যুৱক-যুৱতীক সংযোগ কৰিব লাগিব’, তেওঁ কয়।

তেওঁ লগতে কয় যে সাংস্কৃতিক তথা আধ্যাত্মিক কাৰ্যসূচীত যুৱক-যুৱতীসকলৰ বৰ্ধিত অংশগ্ৰহণে তেওঁলোকক গঠনমূলক সামাজিক সম্পৰ্ক আৰু সামূহিক দায়বদ্ধতাৰ দিশত পথ প্ৰদৰ্শন কৰাৰ এক সুযোগ প্ৰদান কৰে।

অনুষ্ঠানত আইআইএম শ্বিলঙৰ সঞ্চালক অধ্যাপক নলিনী প্ৰভা ত্ৰিপাঠীয়ে কয় যে দায়িত্বশীল নাগৰিক আৰু ভৱিষ্যতৰ নেতাসকলক গঢ় দিয়াৰ ক্ষেত্ৰত ক্ৰীড়া আৰু ব্যৱস্থাপনা শিক্ষাই একেলগে এক গুৰুত্বপূৰ্ণ ভূমিকা পালন কৰে। তেওঁ লক্ষ্য কৰে যে ক্ৰীড়াই যুৱক-যুৱতীসকলৰ মাজত অনুশাসন, দলীয় কৰ্ম আৰু সহযোগিতা বৃদ্ধি কৰাৰ লগতে মানসিক চাপ আৰু উদ্বেগ হ্ৰাস কৰাত সহায় কৰে।

তেওঁ লগতে কয় যে আইআইএম শ্বিলঙে যুৱক-যুৱতীসকলৰ মাজত ইতিবাচক সামাজিক আৰু আৱেগিক বিকাশ নিশ্চিত কৰিবলৈ ক্ৰীড়া, যোগ, ধ্যান, সাংস্কৃতিক কাৰ্যকলাপ তথা সহ-পাঠ্যক্ৰমত শিক্ষাৰ্থীসকলক অংশগ্ৰহণ কৰিবলৈ নিৰন্তৰভাৱে উৎসাহিত কৰে।

অংশগ্ৰহণকাৰীসকলক মাদক দ্ৰব্যৰ অপব্যৱহাৰৰ বিৰুদ্ধে ৰাষ্ট্ৰদূত হিচাপে আত্মপ্ৰকাশ কৰিবলৈ আহ্বান জনাই অধ্যাপক ত্ৰিপাঠীয়ে এই কাৰ্যসূচীৰ সময়ত হোৱা আলোচনা আৰু মত বিনিময়সমূহে ৰাষ্ট্ৰীয় মাদক দ্ৰব্য বিৰোধী আন্দোলনক শক্তিশালী কৰাৰ দিশত অৰ্থপূৰ্ণ অৰিহণা যোগাব বুলি আস্থা প্ৰকাশ কৰে।

কাৰ্যসূচীৰ সময়ত, মাই ভাৰত পৰ্টেল, মাই ভাৰত প্ৰতিষ্ঠানিক পদক্ষেপ আৰু মাদক দ্ৰব্যৰ আসক্তি নিৰাময় তথা যুৱ প্ৰসাৰৰ ক্ষেত্ৰত কাম কৰা সংস্থাসমূহে হাতত লোৱা সৰ্বশ্ৰেষ্ঠ অনুশীলনসমূহৰ বিষয়েও উপস্থাপন কৰা হয়।

ৰক্ষা খাডছে উল্লেখ কৰে যে ইয়াৰ পূৰ্বে বাৰাণসীত অনুষ্ঠিত একেধৰণৰ আলোচনাৰ ফলত ‘কাশী ঘোষণা’ৰ অধীনত গুৰুত্বপূৰ্ণ পৰামৰ্শ আগবঢ়োৱা হৈছিল, যাৰ কেইবাটাও দিশ মন্ত্ৰালয়ে সক্ৰিয়ভাৱে আগবঢ়াই লৈ গৈছে।

সহযোগিতামূলক মাদকদ্ৰব্য বিৰোধী পদক্ষেপসমূহক সমৰ্থন কৰাৰ বাবে চৰকাৰৰ প্ৰতিশ্ৰুতিৰ দোহাৰি তেওঁ অংশগ্ৰহণকাৰী সংগঠনসমূহক আশ্বাস দিয়ে যে যুৱ পৰিক্ৰমা আৰু ক্ৰীড়া মন্ত্ৰালয়ে সমগ্ৰ দেশতে সজাগতা, প্ৰসাৰ তথা তৃণমূল পৰ্যায়ৰ ৰূপায়ণৰ প্ৰচেষ্টাক শক্তিশালী কৰিবলৈ প্ৰতিষ্ঠান, বেচৰকাৰী সংস্থা আৰু সম্প্ৰদায়ৰ অংশীদাৰসকলৰ সৈতে ঘনিষ্ঠভাৱে কাম কৰি থাকিব।

বিকশিত ভাৰত ২০৪৭ ৰ দৃষ্টিভংগীৰ সৈতে সংগতি ৰাখি মাদকদ্ৰব্য-মুক্ত, স্বাস্থ্যকৰ আৰু সামাজিকভাৱে শক্তিশালী ভাৰত গঢ়ি তোলাৰ দিশত যুৱ-নেতৃত্বাধীন প্ৰচেষ্টাক শক্তিশালী কৰাৰ সামূহিক সংকল্পৰে এই কাৰ্যসূচীৰ সামৰণি পৰে।

*****

Ayushman Kumar/MK