ఉపాధ్యాయులకు జాతీయ అవార్డులు-2026 (ఉన్నత విద్యా సంస్థలు, పాలిటెక్నిక్‌లు) కోసం

ఉపాధ్యాయులకు అందించే జాతీయ అవార్డులు-2026 (ఉన్నత విద్యాసంస్థలు, పాలిటెక్నిక్‌లు) కోసం కేంద్ర విద్యా మంత్రిత్వ శాఖకు చెందిన ఉన్నత విద్యా విభాగం ప్రతిపాదనలను ఆహ్వానిస్తోంది. అర్హులైన వారు కేంద్ర ప్రభుత్వ అధికారిక అవార్డుల వేదిక అయిన రాష్ట్రీయ పురస్కార్ పోర్టల్ (www.awards.gov.in) ద్వారా ప్రతిపాదనలను సమర్పించవచ్చు. ఈ  అవార్డుల నిర్వహణలో అఖిల భారత సాంకేతిక విద్యా మండలి (ఏఐసీటీఈ) సంస్థాగత భాగస్వామిగా వ్యవహరిస్తోంది.

దేశవ్యాప్తంగా ఉన్న సాంకేతిక, సాంకేతికేతర ఉన్నత విద్యాసంస్థలతో పాటు పాలిటెక్నిక్ కళాశాలల్లో అసాధారణ ప్రతిభ కనబరిచి, ఆదర్శంగా నిలిచిన ఉపాధ్యాయులకు ఈ జాతీయ పురస్కారాలను అందజేస్తారు.

అవార్డుల విభాగాలు

విభాగం I: ఉన్నత విద్యా సంస్థల అధ్యాపకులు

ఈ విభాగానికి సంబంధించిన ప్రధాన సబ్జెక్టులను మూడు ఉప విభాగాలుగా వర్గీకరించారు అవి..

ఉప-విభాగం (i) : ఇంజనీరింగ్, సాంకేతిక విద్య, ఆర్కిటెక్చర్ మొదలైనవి.

ఉప-విభాగం (ii) : గణితం, భౌతిక శాస్త్రాలు, జీవ శాస్త్రాలు, రసాయన శాస్త్రాలు, వైద్యం, ఔషధం మొదలైనవి.

ఉప-విభాగం (iii): కళలు, సామాజిక శాస్త్రాలు, మానవీయ శాస్త్రాలు, భాషలు, న్యాయ విద్య, వాణిజ్య శాస్త్రం, మేనేజ్‌మెంట్ మొదలైనవి.

పై జాబితాలో పేర్కొన్న సబ్జెక్టులు కేవలం సూచనాత్మకమైనవి మాత్రమే. ఉన్నత విద్యా రంగానికి సంబంధించిన ఇతర సబ్జెక్టులు, విభాగాలు లేదా కొత్తగా అభివృద్ధి చెందుతున్న  విజ్ఞాన విభాగాలు  కూడా ఈ అవార్డుల పరిధిలోకి వస్తాయి.

విభాగం II: పాలిటెక్నిక్ సంస్థల అధ్యాపకులు

ఈ అవార్డును పాలిటెక్నిక్ కళాశాలల్లో అద్భుత ప్రతిభ కనబరిచి, ఆదర్శంగా నిలిచిన ఉపాధ్యాయులకు అందజేస్తారు.

దేశంలోని వివిధ కళాశాలలు, విశ్వవిద్యాలయాలు, ఉన్నత విద్యా సంస్థలు, పాలిటెక్నిక్‌ కళాశాల్లో అధ్యాపకులుగా పనిచేస్తూ, నిర్దేశిత అర్హతల కలిగిన వారు ఈ అవార్డుల కోసం దరఖాస్తు చేసుకోవచ్చు.  దరఖాస్తుదారులకు డిగ్రీ, పోస్ట్ గ్రాడ్యుయేట్ స్థాయిలో కనీసం అయిదు సంవత్సరాల పూర్తికాల బోధనానుభవం కలిగి ఉండాలి. ప్రతిపాదనల సమర్పణకు చివరి తేదీ నాటికి 55 సంవత్సరాల కంటే ఎక్కువ వయస్సు ఉండకూడదు. వైస్-ఛాన్సలర్లు, డైరెక్టర్లు, ప్రిన్సిపాల్‌లు శాశ్వత ఉద్యోగులు అయినా లేదా తాత్కాలికమైనా దరఖాస్తు చేయడానికి అర్హులు కారు. ఒకవేళ గతంలో అటువంటి పదవులను నిర్వహించి 55 సంవత్సరాల కంటే తక్కువ వయస్సు కలిగి ప్రస్తుతం క్రియాశీల సేవల్లో కొనసాగుతున్న వారు దరఖాస్తు చేసుకోవడానికి అర్హులు.

నామినేషన్ విధానాలు (ప్రజా భాగస్వామ్యం ప్రాతిపదికన కేవలం ఆన్‌లైన్ ద్వారా నామినేషన్లు స్వీకరిస్తారు)

·       స్వీయ ప్రతిపాదన

·       సంస్థాగత ప్రతిపాదన: ఉన్నత విద్యాసంస్థలు లేదా పాలిటెక్నిక్ అధినేతలు (డైరెక్టర్, ప్రిన్సిపాల్ లేదా వైస్ ఛాన్సలర్) తమ పరిధిలోని ఉత్తమ అధ్యాపకులను నామినేట్ చేయడం.

·       సహోద్యోగుల ప్రతిపాదన: ఒక అధ్యాపకుడు శాశ్వతంగా పనిచేస్తున్న విశ్వవిద్యాలయం, సంస్థ, కళాశాల, పాలిటెక్నిక్‌కు చెందిన తోటి సహోద్యోగులు వారి పేరును ప్రతిపాదించడం.

అన్ని నామినేషన్లను నిర్ణీత విధానంలో కేంద్ర ప్రభుత్వ అధికారిక వెబ్‌సైట్ రాష్ట్రీయ పురస్కార్ వేదిక (awards.gov.in) ద్వారానే సమర్పించాల్సి ఉంటుంది.

నామినేషన్లు సమర్పించడానికి చివరి తేదీ: 05.07.2026

ఈ అవార్డులకు సంబంధించి ఎలాంటి సందేహాలు ఉన్నా కింది వివరాల ద్వారా సంప్రదించవచ్చు

ఇమెయిల్: helpdesknataward26@aicte-india.org

ఫోన్ నంబర్లు: 011-29581051 / 011-295811236

(ఉదయం 9.30 గంటల నుంచి సాయంత్రం 5.30 గంటల మధ్య మాత్రమే ఫోన్ చేయాలి)

***