ఆయుష్ మంత్రిత్వ శాఖ పరిధిలోని మొరార్జీ దేశాయ్ జాతీయ యోగా సంస్థ (ఎండీఎన్ఐవై).. ‘యోగా మహోత్సవ్ – అంతర్జాతీయ యోగా దినోత్సవం – 2026కు 25 రోజుల కౌంట్‌డౌన్’ కార్యక్రమాన్ని మధ్యప్రదేశ్‌లోని ఛతర్‌పూర్ జిల్లా ఖజురహోలోని పశ్చిమ ఆలయ సమూహంలో రేపు నిర్వహించనున్నది.

ఈ కార్యక్రమానికి సన్నాహకంగా ఈ రోజు నిర్వహించిన విలేకరుల సమావేశంలో కేంద్ర ఆయుష్ శాఖ సహాయ (స్వతంత్ర హోదా), ఆరోగ్య - కుటుంబ సంక్షేమ శాఖ సహాయ మంత్రి శ్రీ ప్రతాపరావు జాదవ్ మాట్లాడారు. ఖజురహో ఎంపీ శ్రీ విష్ణుదత్త శర్మ, రాజ్‌నగర్ ఎమ్మెల్యే శ్రీ అరవింద్ పటేరియా కూడా విలేకరుల సమావేశంలో పాల్గొన్నారు.

12వ అంతర్జాతీయ యోగా దినోత్సవం కోసం దేశవ్యాప్త సన్నాహాల్లో భాగంగా ‘యోగా మహోత్సవ్ – 2026’ ఒక ముఖ్య ఘట్టంగా నిలుస్తుందని కేంద్ర మంత్రి శ్రీ ప్రతాపరావు జాదవ్ అన్నారు. దేశవ్యాప్తంగా యోగాను మరింత విస్తరించే దిశగా ప్రభుత్వ నిబద్ధతకు ఇది నిదర్శనమన్నారు. ప్రజల్లో అవగాహనను పెంచడంతోపాటు ఈ ఏడాది అంతర్జాతీయ యోగా దినోత్సవంలో ప్రజల భాగస్వామ్యాన్ని మరింత పెంచే దిశగా.. 100 ప్రాంతాల్లోని 100 సంస్థలతో సమన్వయంతో ఒక వంద రోజుల దేశవ్యాప్త కౌంట్‌డౌన్ కార్యక్రమాన్ని ఆయుష్ మంత్రిత్వ శాఖ నిర్వహిస్తోందని ఆయన తెలిపారు.

ప్రధానమంత్రి శ్రీ నరేంద్ర మోదీ చొరవతో 2014లో ఐక్యరాజ్య సమితి అంతర్జాతీయ యోగా దినోత్సవాన్ని గుర్తించిన అనంతరం.. భారత సాంస్కృతిక, ఆధ్యాత్మిక వారసత్వంలో అంతర్భాగమైన యోగా - సంపూర్ణ ఆరోగ్యాన్నీ, శ్రేయస్సునూ అందించే అంతర్జాతీయ ఉద్యమంగా మారిందని మంత్రి వ్యాఖ్యానించారు. అలాగే ‘365 రోజులూ యోగా’ కార్యక్రమం కింద ఆయుష్, గృహనిర్మాణ మంత్రిత్వ శాఖల సహకారంతో.. జూన్ 21 వరకు 100 రోజుల ఉచిత యోగా శిక్షణ కార్యక్రమాన్ని ఎండీఎన్ఐవై నిర్వహిస్తోందని, ఇప్పటికే రెండు లక్షల మందికి పైగా ‘యోగా మిత్ర’లుగా నమోదు చేసుకున్నారని ఆయన తెలిపారు.

ఈ కార్యక్రమ ప్రాధాన్యాన్ని వివరిస్తూ.. ‘‘భారత ప్రాచీన వైజ్ఞానిక సంప్రదాయం అందించిన అమూల్యమైన వరం యోగా. సమతౌల్య, సంపూర్ణ, ఆరోగ్యకరమైన జీవనశైలీ మార్గాన్ని ఇది ప్రపంచానికి చూపింది. జీవనశైలి సంబంధిత సమస్యలు పెరుగుతున్న ఈ తరుణంలో.. ఒక ప్రభావవంతమైన, శాస్త్రీయంగా నిరూపితమైన పరిష్కార మార్గంగా యోగా నిలుస్తోంది. సుసంపన్నమైన భారత సాంస్కృతిక వారసత్వానికి ఒక సజీవ తార్కాణం ఖజురహో. ఈ చరిత్రాత్మక ప్రదేశంలో 25 రోజుల యోగా ఉత్సవాన్ని నిర్వహించడమన్నది.. భారతీయ వైజ్ఞానిక వారసత్వమూ, ఆధునిక ఆరోగ్య విధానాల మధ్య సామరస్యాన్ని అద్భుతంగా ప్రతిబింబిస్తుంది. యోగా పట్ల ప్రపంచవ్యాప్తంగా ఆదరణను మరింత పెంచడంలోనూ, దానిని మరింతగా ప్రజల్లోకి తీసుకెళ్లడంలోనూ ఈ ఉత్సవం కీలక పాత్ర పోషిస్తుందని నేను దృఢంగా విశ్వసిస్తున్నాను’’ అని కేంద్ర మంత్రి శ్రీ ప్రతాపరావు జాదవ్ పేర్కొన్నారు.

యోగా మహోత్సవ్: అంతర్జాతీయ యోగా దినోత్సవం 2026కు 25 రోజుల కౌంట్‌డౌన్

దేశవ్యాప్తంగా యోగా ప్రదర్శనలు, అవగాహన సదస్సులు, సామాజిక కార్యక్రమాల ద్వారా ప్రజల్లో చైతన్యాన్ని పెంపొందించడానికి, వారి భాగస్వామ్యాన్ని ప్రోత్సహించడానికి, దాన్ని మరింతగా ప్రజల్లోకి తీసుకెళ్లడానికి ఒక ముఖ్యమైన కార్యక్రమంగా.. అంతర్జాతీయ యోగా దినోత్సవం నేపథ్యంలో ఏటా ఈ 25 రోజుల కౌంట్‌డౌన్‌ కార్యక్రమాన్ని నిర్వహిస్తారు.

ఉదయం ఆరు గంటలకు ఈ కార్యక్రమం ప్రారంభమవుతుంది. దేశవ్యాప్తంగా ఉన్న ఔత్సాహిక యోగసాధకులు, విద్యార్థులు, అధికారులు, ఆరోగ్యాభిలాషులు పాల్గొని.. అంతా కలిసి దైనందిన యోగా కార్యక్రమంలో పాల్గొంటారు.

కేంద్ర మంత్రి శ్రీ ప్రతాపరావు జాదవ్, మధ్యప్రదేశ్ ఆయుష్ శాఖ సహాయ మంత్రి (స్వతంత్ర హోదా) శ్రీ ఇందర్ సింగ్ పర్మార్ ఈ కార్యక్రమానికి హాజరవుతారు. ఆయుష్ మంత్రిత్వ శాఖ సంయుక్త కార్యదర్శి శ్రీమతి మోనాలిసా దాష్, మొరార్జీ దేశాయ్ జాతీయ యోగా సంస్థ డైరెక్టర్ ప్రొఫెసర్ (డాక్టర్) కాశీనాథ్ సమగండి, మంత్రిత్వ శాఖకు చెందిన సీనియర్ అధికారులు, యోగా నిపుణులు, ఆయుష్ వ్యవస్థలు, ఆధునిక వైద్య ప్రతినిధులు, దేశంలోని వివిధ ప్రాంతాలకు చెందిన యోగాభ్యాసకులు కూడా ఈ కార్యక్రమంలో పాల్గొంటారు.

ఈ కార్యక్రమంలో పాల్గొనేవారికి ‘ఆయుష్ ఆహారా’న్ని కూడా పంపిణీ చేస్తారు.

అత్యద్భుతమైన ఆలయ వాస్తుశిల్పం, ప్రసన్నమైన పరిసర వాతావరణంతో ప్రపంచవ్యాప్త ఖ్యాతి గడించిన ఖజురహో.. యోగా మహోత్సవ్ 2026కు అత్యంత సముచితమైన వేదిక. భారత ప్రాచీన సంప్రదాయాలు, సంపూర్ణ ఆరోగ్యం నడుమ అనుసంధానాన్ని ఈ కార్యక్రమం బలంగా చాటుతుంది. అలాగే 2026 అంతర్జాతీయ యోగా దినోత్సవం దిశగా దేశవ్యాప్తంగా మరింత ఉత్తేజాన్ని నింపుతుంది.

***