ಫಿಟ್‌ನೆಸ್ ಮತ್ತು ಕ್ರೀಡೆಯ ಅತ್ಯಂತ ದೊಡ್ಡ ಸಾಂಕೇತಿಕ ರಾಷ್ಟ್ರಾದ್ಯಂತದ ಆಚರಣೆಗಳಲ್ಲಿ ಒಂದಾಗಿ, ಸೈಕಲ್ ಇಂಡಿಯಾದಲ್ಲಿ 'ಫಿಟ್ ಇಂಡಿಯಾ ಸಂಡೇಸ್'ನ ವಿಶೇಷ 75ನೇ ಆವೃತ್ತಿಯು, ಮೇ 24 ರಂದು ದೇಶಾದ್ಯಂತ 8,000ಕ್ಕೂ ಹೆಚ್ಚು ಸ್ಥಳಗಳಲ್ಲಿ ನಾಗರಿಕರನ್ನು ಒಗ್ಗೂಡಿಸಲಿದೆ. ಕಾಮನ್‌ವೆಲ್ತ್ ಗೇಮ್ಸ್ ದಿನವನ್ನು ಆಚರಿಸುವ ಈ ಆವೃತ್ತಿಯು, ಭಾರತದ ಕ್ರೀಡಾ ಭವಿಷ್ಯ ಮತ್ತು ಅಹಮದಾಬಾದ್‌ನಲ್ಲಿ ಮುಂಬರುವ 2030 ರ ಕಾಮನ್‌ವೆಲ್ತ್ ಗೇಮ್ಸ್‌ಗೆ ಸಲ್ಲಿಸುವ ಭವ್ಯ ಗೌರವದ ಸಂಕೇತವಾಗಿದೆ.

ಕೇಂದ್ರ ಯುವ ವ್ಯವಹಾರಗಳು ಮತ್ತು ಕ್ರೀಡೆ ಹಾಗೂ ಕಾರ್ಮಿಕ ಮತ್ತು ಉದ್ಯೋಗ ಸಚಿವರಾದ ಡಾ. ಮನ್ಸುಖ್ ಮಾಂಡವೀಯ ಅವರು 2030ರ ಐತಿಹಾಸಿಕ ಶತಮಾನೋತ್ಸವ ಕಾಮನ್‌ವೆಲ್ತ್ ಗೇಮ್ಸ್‌ನ ಆತಿಥೇಯ ನಗರವಾದ ಅಹಮದಾಬಾದ್‌ನ ಸಾಬರಮತಿ ರಿವರ್‌ಫ್ರಂಟ್‌ನಿಂದ ಈ ಆಚರಣೆಗಳ ನೇತೃತ್ವ ವಹಿಸಲಿದ್ದಾರೆ. ಗುಜರಾತ್ ಉಪಮುಖ್ಯಮಂತ್ರಿ ಶ್ರೀ ಹರ್ಷ್ ಸಾಂಘ್ವಿ ಅವರು ಅವರೊಂದಿಗೆ ಕೈಜೋಡಿಸಲಿದ್ದಾರೆ. “ಫಿಟ್ಟರ್ ಇಂಡಿಯಾಗಾಗಿ ಒಂದು ಹೊಸ ಐಕಾನ್ – ಪೆಡಲಿಂಗ್ ಟು 2030” (A New Icon for a Fitter India – Pedalling to 2030) ಎಂಬ ಘೋಷವಾಕ್ಯದೊಂದಿಗಿನ ಅಹಮದಾಬಾದ್ ಆವೃತ್ತಿಯು, ರಾಷ್ಟ್ರೀಯ ಏಕತೆ, ಕ್ರೀಡಾ ಸಂಸ್ಕೃತಿ ಮತ್ತು ಸಮುದಾಯದ ಸಹಭಾಗಿತ್ವದ ಅದ್ಭುತ ಪ್ರದರ್ಶನದಲ್ಲಿ ಸಾವಿರಾರು ಸೈಕಲ್ ಸವಾರರು, ಯುವ ಸ್ವಯಂಸೇವಕರು, ಕ್ರೀಡಾಪಟುಗಳು ಮತ್ತು ಫಿಟ್‌ನೆಸ್ ಪ್ರೇಮಿಗಳು ಒಟ್ಟಿಗೆ ಸೇರುವುದಕ್ಕೆ ಸಾಕ್ಷಿಯಾಗುವ ನಿರೀಕ್ಷೆಯಿದೆ.

“2030ರಲ್ಲಿ ಭಾರತವು ಕಾಮನ್‌ವೆಲ್ತ್ ಗೇಮ್ಸ್‌ನ 100ನೇ ಆವೃತ್ತಿಯನ್ನು ಆಯೋಜಿಸುತ್ತಿದೆ ಎಂಬ ಆಲೋಚನೆಯಿಂದ ಇಡೀ ದೇಶವೇ ಉತ್ಸಾಹಭರಿತವಾಗಿದೆ. ಮೇ 24 ರಂದು, ನಾವು ಕ್ರೀಡಾ ಪರಿಸರ ವ್ಯವಸ್ಥೆಯಲ್ಲಿರುವ ಪ್ರತಿಯೊಬ್ಬರನ್ನು — ಕ್ರೀಡಾ ಅಭಿಮಾನಿಗಳು, ಕ್ರೀಡಾಪಟುಗಳು, ತರಬೇತುದಾರರು ಮತ್ತು ಇಡೀ ಕ್ರೀಡಾ ವಲಯವನ್ನು — ಒಟ್ಟಿಗೆ ತರಲು ಅತ್ಯಂತ ದೊಡ್ಡ ರೀತಿಯಲ್ಲಿ ಇದನ್ನು ಆಚರಿಸಲಿದ್ದೇವೆ. ಇದು ಭಾರತವು ಸಿಡಬ್ಲ್ಯೂಜಿ (CWG) ಬಿಡ್ ಅನ್ನು ಗೆದ್ದಿರುವುದನ್ನು ಆಚರಿಸುವುದರ ಜೊತೆಗೆ ಅದಕ್ಕಾಗಿ ಸಿದ್ಧರಾಗುವುದಾಗಿದೆ” ಎಂದು ಡಾ. ಮಾಂಡವೀಯ ಹೇಳಿದರು. “ಇದು ಯುವಕರಲ್ಲಿ ಜಾಗೃತಿ ಮೂಡಿಸುವುದು ಮತ್ತು ಕ್ರೀಡಾ ಸಂಸ್ಕೃತಿಯನ್ನು ಬೆಳೆಸುವುದರ ಬಗ್ಗೆಯಾಗಿದೆ, ಆದ್ದರಿಂದ ಇದು ಹೆಚ್ಚಾಗಿ ಯುವ ಚಾಲಿತ ಆಚರಣೆಯಾಗಿರುತ್ತದೆ” ಎಂದ ಅವರು ಹೇಳಿದರು.

ಹಾಕಿ ಕ್ರೀಡೆಯ ತಾರೆಯರಾದ ರಜನಿ ಎತಿಮಾರ್ಪು, ಗುರ್ಜಿತ್ ಕೌರ್ ಮತ್ತು ಸೋನಿಕಾ ತಾಂಡಿ, ಶೂಟರ್‌ಗಳಾದ ಅಂಕುರ್ ಮಿತ್ತಲ್ ಮತ್ತು ಅಂಜುಮ್ ಮೌದ್ಗಿಲ್ ಹಾಗೂ ಬ್ಯಾಡ್ಮಿಂಟನ್ ಆಟಗಾರ್ತಿ ತೃಪ್ತಿ ಮುರ್ಗುಂಡೆ ಸೇರಿದಂತೆ, ಭಾರತದ ಪ್ರಮುಖ ಕಾಮನ್‌ವೆಲ್ತ್ ಮತ್ತು ಒಲಿಂಪಿಕ್ ಪದಕ ವಿಜೇತರೊಂದಿಗೆ, ನಟ ಆಯುಷ್ಮಾನ್ ಖುರಾನಾ ಅವರು, ಅಹಮದಾಬಾದ್ ಆಚರಣೆಗೆ ತಾರಾ ಮೆರುಗನ್ನು ನೀಡಲಿದ್ದಾರೆ. ಕೇಂದ್ರ ಸಚಿವರು, ರಾಜ್ಯ ಸಚಿವರು, ಸಂಸದರು ಮತ್ತು ಸಾರ್ವಜನಿಕ ಪ್ರತಿನಿಧಿಗಳು ಸಹ ತಮ್ಮ ತಮ್ಮ ಪ್ರದೇಶಗಳಲ್ಲಿನ ಕಾರ್ಯಕ್ರಮಗಳಲ್ಲಿ ಭಾಗವಹಿಸುವ ನಿರೀಕ್ಷೆಯಿದ್ದು, ಇದು 'ಕ್ರೀಡಾ ಜನ ಭಾಗೀದಾರಿ'ಯ ಮನೋಭಾವವನ್ನು ಮತ್ತಷ್ಟು ಬಲಪಡಿಸಲಿದೆ.

'ಸಂಡೇಸ್ ಆನ್ ಸೈಕಲ್' ಉಪಕ್ರಮದ ಸಮಾನಾರ್ಥಕವಾದ ಅಖಿಲ ಭಾರತ ವ್ಯಾಪ್ತಿಯನ್ನು ಎತ್ತಿಹಿಡಿಯುತ್ತಾ, ಪ್ರತಿಯೊಂದು ರಾಜ್ಯ ಮತ್ತು ಕೇಂದ್ರಾಡಳಿತ ಪ್ರದೇಶಗಳು ಕಾಮನ್‌ವೆಲ್ತ್ ಗೇಮ್ಸ್ ಆಧಾರಿತ 'ಸಂಡೇಸ್ ಆನ್ ಸೈಕಲ್' ಆಚರಣೆಗಳನ್ನು ಆಯೋಜಿಸಲಿವೆ. ಭಾರತೀಯ ಕ್ರೀಡಾ ಪ್ರಾಧಿಕಾರದ (SAI) ಪ್ರಾದೇಶಿಕ ಕೇಂದ್ರಗಳು, ರಾಷ್ಟ್ರೀಯ ಅತ್ಯುನ್ನತ ಕೇಂದ್ರಗಳು (NCOEs), ಖೇಲೋ ಇಂಡಿಯಾ ಕೇಂದ್ರಗಳು ಮತ್ತು ದೇಶದ ವಿವಿಧ ಸ್ಥಳಗಳು ಭಾರತದ ಕಾಮನ್‌ವೆಲ್ತ್ ಗೇಮ್ಸ್ ಪಯಣಕ್ಕೆ ಸಮರ್ಪಿತವಾದ ವಿಶೇಷ ಸೈಕಲ್ ಸವಾರಿ ಮತ್ತು ಚಟುವಟಿಕೆಗಳನ್ನು ಆಯೋಜಿಸಲಿವೆ. ಮಾಜಿ ಕಾಮನ್‌ವೆಲ್ತ್ ಗೇಮ್ಸ್ ಚಾಂಪಿಯನ್‌ಗಳು, ಒಲಿಂಪಿಯನ್‌ಗಳು ಮತ್ತು ಗಣ್ಯ ಕ್ರೀಡಾಪಟುಗಳು ತಮ್ಮ ತಮ್ಮ ನಗರಗಳಲ್ಲಿ ನಾಗರಿಕರೊಂದಿಗೆ ಸೇರಿಕೊಳ್ಳಲಿದ್ದಾರೆ, ಇದು ಸಾಂಕೇತಿಕವಾಗಿ ಸಿಡಬ್ಲ್ಯೂಜಿ (CWG) ಮನೋಭಾವವನ್ನು ಕ್ರೀಡಾಂಗಣಗಳಿಂದ ರಸ್ತೆಗಳಿಗೆ ಮತ್ತು ಗಣ್ಯ ಕ್ರೀಡೆಯಿಂದ ತಳಮಟ್ಟಕ್ಕೆ ಕೊಂಡೊಯ್ಯಲಿದೆ.

ಗೌರವಾನ್ವಿತ ಕೇಂದ್ರ ಯುವ ವ್ಯವಹಾರಗಳು ಮತ್ತು ಕ್ರೀಡಾ ರಾಜ್ಯ ಸಚಿವರಾದ ಶ್ರೀಮತಿ ರಕ್ಷಾ ನಿಖಿಲ್ ಖಡ್ಸೆ ಅವರು ಗುವಾಹಟಿಯಲ್ಲಿ ನಡೆಯಲಿರುವ ಆಚರಣೆಗಳನ್ನು ಅಲಂಕರಿಸಲಿದ್ದಾರೆ, ಮಾಜಿ ಕುಸ್ತಿಪಟು ಬಬಿತಾ ಫೋಗಟ್ ಅವರು ಧರ್ಮಶಾಲಾದಲ್ಲಿ ಉಪಸ್ಥಿತರಿರಲಿದ್ದಾರೆ, ಹಾಗೂ 'ಚಕ್ ದೇ! ಇಂಡಿಯಾ' ಚಲನಚಿತ್ರಕ್ಕೆ ಪ್ರೇರಣೆಯಾಗಿದ್ದವರಲ್ಲಿ ಒಬ್ಬರಾದ ಮಾಜಿ ಹಾಕಿ ಆಟಗಾರ್ತಿ ಸಬಾ ಅಂಜುಮ್ ಅವರು ಮುಂಬೈನಲ್ಲಿ ಉಪಸ್ಥಿತರಿರಲಿದ್ದಾರೆ.

ಈ 75ನೇ ಆವೃತ್ತಿಯನ್ನು ಕೇವಲ ಸೈಕಲ್ ಚಾಲನೆಯಾಗಿ ಮಾತ್ರವಲ್ಲದೆ, ಜಾಗತಿಕ ಕ್ರೀಡಾ ಶಕ್ತಿಯಾಗಿ ಭಾರತದ ಉದಯವನ್ನು ಪ್ರದರ್ಶಿಸುವ ರಾಷ್ಟ್ರಾದ್ಯಂತದ ಕ್ರೀಡಾ ಆಚರಣೆಯಾಗಿ ರೂಪಿಸಲಾಗುತ್ತಿದೆ. ಖೇಲೋ ಇಂಡಿಯಾ ಮಿಷನ್ ಅಡಿಯಲ್ಲಿನ ಮೈಲಿಗಲ್ಲುಗಳು, ಭಾರತದ ವಿಸ್ತರಿಸುತ್ತಿರುವ ಕ್ರೀಡಾ ಮೂಲಸೌಕರ್ಯ ಮತ್ತು ದೇಶದ ಬೆಳೆಯುತ್ತಿರುವ ಕ್ರೀಡಾ ಸಾಮಗ್ರಿಗಳ ಉತ್ಪಾದನಾ ಪರಿಸರ ವ್ಯವಸ್ಥೆ ಸೇರಿದಂತೆ ಕಳೆದ 12 ವರ್ಷಗಳಲ್ಲಿ ಭಾರತದ ಕ್ರೀಡಾ ಸಾಧನೆಗಳನ್ನು ಎತ್ತಿ ತೋರಿಸುವ ವಿಶೇಷ ಕಾಮನ್‌ವೆಲ್ತ್ ಗೇಮ್ಸ್ ಆಧಾರಿತ ಪ್ರದರ್ಶನವನ್ನು ಅಹಮದಾಬಾದ್ ಹಾಗೂ ಎಲ್ಲಾ ಎಸ್‌ಎಐ (SAI) ಪ್ರಾದೇಶಿಕ ಕೇಂದ್ರಗಳಲ್ಲಿ ಉದ್ಘಾಟಿಸಲಾಗುವುದು.

ಈ ಉಪಕ್ರಮವು 2030ರ ಕಾಮನ್‌ವೆಲ್ತ್ ಗೇಮ್ಸ್‌ನ ಆತಿಥ್ಯದ ಕ್ರೀಡಾಕೂಟದಲ್ಲಿ ಸಾರ್ವಜನಿಕರ ತೊಡಗಿಸಿಕೊಳ್ಳುವಿಕೆಯನ್ನು ಹೆಚ್ಚಿಸುವ ಗುರಿಯನ್ನು ಹೊಂದಿದೆ ಮತ್ತು ಅದೇ ಸಮಯದಲ್ಲಿ ದೇಶದ ದೀರ್ಘಕಾಲೀನ ಒಲಿಂಪಿಕ್ ಮಹತ್ವಾಕಾಂಕ್ಷೆಗಳ ಕಡೆಗೆ ಆ  ವೇಗವನ್ನು ಪಡೆದುಕೊಳ್ಳುತ್ತದೆ. ದೇಶಾದ್ಯಂತ, 'ಮೈ ಭಾರತ್' (MY Bharat) ವೇದಿಕೆಯ ಮೂಲಕ ಆಯೋಜಿಸಲಾದ ರಸಪ್ರಶ್ನೆ ಸ್ಪರ್ಧೆಗಳು, ರೀಲ್ಸ್ ಮಾಡುವ ಸ್ಪರ್ಧೆಗಳು ಮತ್ತು ಪಂಜು (torch) ವಿನ್ಯಾಸದ ಸವಾಲುಗಳಲ್ಲಿ ಈಗಾಗಲೇ ಒಂದು ಲಕ್ಷಕ್ಕೂ ಹೆಚ್ಚು ಯುವಕರು ಭಾಗವಹಿಸಿದ್ದು, ಇದು ಭಾರತದ ಕ್ರೀಡಾ ಭವಿಷ್ಯದ ಬಗ್ಗೆ ಯುವಕರಲ್ಲಿ ಬೆಳೆಯುತ್ತಿರುವ ಉತ್ಸಾಹವನ್ನು ಪ್ರತಿಬಿಂಬಿಸುತ್ತದೆ.

ಪ್ರಧಾನಮಂತ್ರಿ ಶ್ರೀ ನರೇಂದ್ರ ಮೋದಿ ಅವರು ಕಲ್ಪಿಸಿದ ಫಿಟ್ ಇಂಡಿಯಾ ಆಂದೋಲನದ ಅಡಿಯಲ್ಲಿ, 17 ಡಿಸೆಂಬರ್ 2024 ರಂದು ಪ್ರಾರಂಭವಾದ 'ಫಿಟ್ ಇಂಡಿಯಾ ಸಂಡೇಸ್ ಆನ್ ಸೈಕಲ್', ದೇಶದ ಅತಿ ದೊಡ್ಡ ಸಮುದಾಯ ಚಾಲಿತ ಫಿಟ್‌ನೆಸ್ ಆಂದೋಲನಗಳಲ್ಲಿ ಒಂದಾಗಿ ಹಾಗೂ ವೇಗವಾಗಿ ವಿಕಸನಗೊಂಡಿದೆ. ಇದುವರೆಗೆ ನಡೆದಿರುವ 74 ಆವೃತ್ತಿಗಳಲ್ಲಿ, ಈ ಉಪಕ್ರಮವು 3.07 ಲಕ್ಷಕ್ಕೂ ಹೆಚ್ಚು ಸ್ಥಳಗಳನ್ನು ತಲುಪಿದೆ, 50 ಲಕ್ಷಕ್ಕೂ ಹೆಚ್ಚು ಸೈಕಲ್ ಸವಾರರನ್ನು ತೊಡಗಿಸಿಕೊಂಡಿದೆ ಮತ್ತು ತಳಮಟ್ಟದ ಚಟುವಟಿಕೆಗಳು, ಡಿಜಿಟಲ್ ಭಾಗವಹಿಸುವಿಕೆ ಹಾಗೂ ಸಮುದಾಯ ತಲುಪುವಿಕೆಯ ಮೂಲಕ 7 ಕೋಟಿಗೂ ಹೆಚ್ಚು ಭಾರತೀಯರನ್ನು ಸಂಪರ್ಕಿಸಿದೆ.

ಈ ಅಭಿಯಾನವು ಯೋಗ, ಜುಂಬಾ, ಹಗ್ಗ ಜಿಗಿತ (rope skipping), ಮನರಂಜನಾ ಕ್ರೀಡೆಗಳು ಮತ್ತು ಸ್ವಾಸ್ಥ್ಯ ಚಟುವಟಿಕೆಗಳನ್ನು ಒಳಗೊಳ್ಳುವ ಮೂಲಕ ನಿರಂತರವಾಗಿ ಸೈಕಲ್ ಚಾಲನೆಯ ಆಚೆಗೂ ವಿಸ್ತರಿಸಿದೆ, ಇದು ಎಲ್ಲಾ ವಯೋಮಾನದ ಜನರಿಗೆ ಫಿಟ್‌ನೆಸ್ ಅನ್ನು ಸುಲಭವಾಗಿ ಲಭ್ಯವಾಗುವಂತೆ, ಆಕರ್ಷಕವಾಗಿ ಮತ್ತು ಒಳಗೊಳ್ಳುವಂತೆ ಮಾಡಿದೆ. ಗೌರವಾನ್ವಿತ ಪ್ರಧಾನಮಂತ್ರಿ ಶ್ರೀ ನರೇಂದ್ರ ಮೋದಿ ಅವರು ತಮ್ಮ 'ಮನ್ ಕಿ ಬಾತ್' ಕಾರ್ಯಕ್ರಮದಲ್ಲಿ ಈ ಉಪಕ್ರಮವನ್ನು ಪದೇ ಪದೇ ಪ್ರಸ್ತಾಪಿಸಿದ್ದು, ಆರೋಗ್ಯಕರ ಮತ್ತು ಸದೃಢ ಭಾರತದ ಅಡಿಗಲ್ಲಾಗಿ "ಫಿಟ್‌ನೆಸ್ ಕಾ ಡೋಸ್, ಆಧಾ ಘಂಟಾ ರೋಜ್" (Fitness ka Dose, Aadha Ghanta Roz) ಎಂಬ ಸಂದೇಶವನ್ನು ಒತ್ತಿಹೇಳಿದ್ದಾರೆ.

 
*****