ہندوستان کی صاف نقل و حرکت کی منتقلی کو تیز کرنے کی سمت میں ایک اہم قدم اٹھاتے ہوئے، بھاری صنعتوں اور اسٹیل کے مرکزی وزیر ایچ ڈی کمارسوامی نے آج نئی دہلی میں ایک اعلیٰ سطحی اسٹیک ہولڈر مشاورت کی صدارت کی، تاکہ ملک بھر میں الیکٹرک بسوں اور الیکٹرک ٹرکوں کو وسیع پیمانے پر اپنانے اور ان کی تعیناتی کی حوصلہ افزائی کی جا سکے۔

اس میٹنگ میں ہندوستان بھر کے اہم اسٹیک ہولڈرز نے شرکت کی، جن میں فلیٹ آپریٹرز، ایگریگیٹرز، ٹرانسپورٹ لیڈرز، مالیاتی ادارے، لیزنگ کمپنیاں اور تیزی سے ترقی کرتے ہوئے الیکٹرک موبلٹی ایکو سسٹم سے وابستہ صنعتی نمائندے شامل تھے۔ یہ مشاورت آپریشنل حقائق کو سمجھنے، ای بسوں اور ای ٹرکوں کو تیزی سے اپنانے کی حوصلہ افزائی کرنے اور سرکاری و نجی اسٹیک ہولڈرز کے درمیان تعاون کو مستحکم بنانے کے مقصد سے منعقد کی گئی تھی۔

بھاری صنعتوں کی وزارت کے سینئر عہدیداران، جن میں سکریٹری جناب کامران رضوی اور ایڈیشنل سکریٹری ڈاکٹر حنیف قریشی شامل تھے، بھی اس موقع پر موجود تھے اور انہوں نے ہندوستان میں الیکٹرک ہیوی موبلٹی کے مستقبل کے روڈ میپ پر اسٹیک ہولڈرز کے ساتھ اپنی آرا کا تبادلہ کیا۔

اجتماع سے خطاب کرتے ہوئے، ایچ ڈی کمارسوامی نے اس بات پر زور دیا کہ الیکٹرک بسیں ہندوستان میں مسافروں کی نقل و حمل کی مستقبل کی ریڑھ کی ہڈی بننے کے لیے تیار ہیں، جبکہ الیکٹرک ٹرک پائیدار لاجسٹکس اور مال بردار نقل و حمل کے مستقبل کی تشکیل میں تبدیلی کا کردار ادا کریں گے۔

’’ہندوستان صاف ستھری اور مؤثر نقل و حمل کی طرف ایک فیصلہ کن تبدیلی کا مشاہدہ کر رہا ہے۔ ای بسیں مسافروں کی نقل و حرکت کا مستقبل ہیں، جبکہ ای ٹرک ہمارے ملک میں لاجسٹکس اور مال بردار نقل و حمل کے اگلے دور کی وضاحت کریں گے،‘‘ ایچ ڈی کمارسوامی نے کہا۔

باہمی تعاون پر مبنی پالیسی سازی کی اہمیت کو اجاگر کرتے ہوئے مرکزی وزیر نے کہا کہ حکومت آپریٹرز اور صنعت سے وابستہ اسٹیک ہولڈرز کے ساتھ مل کر کام کرنے کے لیے پُرعزم ہے، تاکہ یہ یقینی بنایا جا سکے کہ ہندوستان کی برقی نقل و حرکت کی جانب منتقلی عملی، جامع اور تجارتی طور پر پائیدار ہو۔

’’یہ مشاورت محض ایک پالیسی مباحثہ نہیں تھی۔ یہ آپریٹرز اور اسٹیک ہولڈرز سے براہِ راست سننے کا ایک اہم پلیٹ فارم تھا، جو پورے ہندوستان میں زمینی سطح پر ٹرانسپورٹ خدمات چلا رہے ہیں۔ ان کی آرا اور تجربات مستقبل کے روڈ میپ کی تشکیل میں نہایت قیمتی ہیں۔‘‘

مرکزی وزیر نے مزید زور دے کر کہا کہ یہ پہل پائیداری، آپریشنل کارکردگی اور ذمہ دارانہ حکمرانی سے متعلق وزیر اعظم نریندر مودی کے وژن سے قریبی ہم آہنگی رکھتی ہے۔

’’عزت مآب وزیر اعظم جناب نریندر مودی جی کی دور اندیش قیادت میں ہندوستان ایک ایسے مستقبل کی جانب بڑھ رہا ہے، جو پائیداری، اختراع اور مؤثر عوامی بنیادی ڈھانچے کو ترجیح دیتا ہے۔ ای بسوں اور ای ٹرکوں پر زور صرف ایک ماحولیاتی ضرورت نہیں، بلکہ نئے ہندوستان کے لیے ایک اقتصادی اور اسٹریٹجک ضرورت بھی ہے۔‘‘

میٹنگ کے دوران اسٹیک ہولڈرز نے الیکٹرک کمرشل گاڑیوں کے لیے مالیاتی سہولتوں تک رسائی، چارجنگ انفراسٹرکچر، بیڑے کی تعیناتی، آپریشنل عملداری اور طویل مدتی ماحولیاتی نظام کی معاونت سے متعلق تفصیلی فیڈ بیک، عملی تجربات، شعبہ جاتی خدشات اور تجاویز کا اشتراک کیا۔

شرکا نے وزارت کی فعال رسائی اور اس شعبے سے متعلق مسائل پر حکومت کے ساتھ براہِ راست رابطے کے موقع کا خیرمقدم کیا۔ گفتگو میں برقی نقل و حرکت کو اپنانے کے حوالے سے اعتماد کو مستحکم بنانے اور شہری، بین شہری اور مال بردار نقل و حمل کے نیٹ ورکس میں ای بسوں اور ای ٹرکوں کی بڑے پیمانے پر تعیناتی کے لیے مضبوط ماحولیاتی نظام کی تشکیل پر توجہ مرکوز کی گئی۔

اس مشاورت کو بھاری صنعتوں کی وزارت کی جانب سے ہندوستان کی پائیدار بھاری نقل و حرکت کی طرف منتقلی کو تیز کرنے کی سمت میں ایک اہم قدم قرار دیا جا رہا ہے، جبکہ ملک کے نقل و حمل اور لاجسٹکس کے شعبے میں تبدیلی کے اگلے مرحلے کی تشکیل میں صنعتی اسٹیک ہولڈرز کو فعال طور پر شامل کیا جا رہا ہے۔

***

UR-7333

(ش ح۔اس ک  )