ঙসি প্রধান মন্ত্রী শ্রী নরেন্দ্র মোদী হগতা ভারতমচাশিংনা তরাম্না ওকপগী থৌরম অমা শরুক য়াখ্রে। মহাক থুংলবগা, লৈবাক অদুদা লৈরিবা ভারতমচাশিং অমসুং নেদরলেন্দসতা লৈবা ভারতকী মরুপশিংনা তরাম্না ওকখি।

থৌরম অদুদা মীয়ামদা ৱা ঙাংবদা, প্রধান মন্ত্রীনা হায়খি থৱায় য়াওনা অমসুং ফজনা তরাম্না ওকপা অসিগীদমক থাগৎপা ফোঙদোকচরি। দচ খুন্নাইদা অফবা থবকশিং পাংথোকপা অমসুং ভারত অমসুং নেদরলেন্দসকী মরক্ত মরুপ-মপাংগী অহিংবা থোঙ অমা ওইরিবা লৈবাক অসিদা ভারতমচাশিং থাগৎপা ফোঙদোকচরি। সুরিনামি-হিন্দস্তানি ফুরুপকা ভারতা পুৱারিগী ওইরবা মরীশিং লৈনবা অদুম প্রধান মন্ত্রীনা নিংশিংখি অমসুং মীরোল কয়া মখোয়গী ইনাকখুল্লবা নাৎ অমসুং চৎনবীশিং ঙাক-শেন্নবা অমসুং হরাওবা ফোঙদোক্নবা মখোয়না পায়খৎলিবা থবকশিং শিংথাখি। প্রধান মন্ত্রীনা হায়খি তেক্নোলোজি সেক্তরদা মশিং য়াম্লবা ভারতমচাশিং লৈরি অমসুং দচ য়ুনিতর্সিতিশিংদা, মরুওইনা ইন্নোবেসনগী হিরমশিংদা ভারতকী মহৈরোয়শিং মশিং হেনগৎলক্লি, মসিনা হৌজিক লৈবাক অনিগী মরক্ত লৈনরিবা মরীশিং মপাঙ্গল কনখৎহল্লে। মরুওইনা ক্রিকেত অমসুং হোক্কি য়াওনা শান্নবগী লমদা লৈনরিবা মরীশিং অসিনা লৈবাক অনিগী মরক্ত মীগা-মীগা লৈনবা মরীশিংদা অনৌবা মাইওন অমা পীরি।

প্রধান মন্ত্রীনা হায়খি মদুদি তেক্নোলোজি অমসুং ইন্নোবেসন্না মরুওইবা হিরমশিং ওইদুনা নেদরলেন্দসগা লৈনবা লৈবাক অনিগী মরী য়াংনা পাকথোক-চাউথোরক্লি। লৈবাক অনিগী মরক্ত অফবা অমসুং চাউখৎলক্লিবা ললোন-ইতিক অমসুং শেন-থুমগী মরী লৈনরি, য়ুরোপতা ভারতনা খ্বাইদগী য়াম্না পোৎ-চৈ থাদোকপা লৈবাকশিংগী মনুংদা নেদরলেন্দস অমনি অমসুং লৈবাক অসিগী খ্বাইদগী মরুওইবা শেন-থুমগী থাদবগী মরুপনি। ইন্দিয়া-ই.য়ু ফ্রি ত্রেদ এগ্রিমেন্তনা মখা তানা লৈবাক অনিমক্ত অনৌবা খুদোংচাবশিং পীগনি।

প্রধান মন্ত্রীনা হায়খি মদুদি ২০৪৭ দা চাউখৎলবা লৈবাক অমা ওইনবা পান্দমগা লোয়ননা ভারত্ত চাউখৎ-থৌরাং কয়া পায়খৎলি অমসুং খুমাঙচাউশিল্লি। ইনফ্রাষ্ট্রকচর, মেনফেকচরিং, মৈখু থাংদবা ইনর্জি অমসুং দিজিতেলগী থবককশিং শীনবা থুংনা পাক-চাউনা অমসুং খোঙজেল য়াংনা ভারত্ত অওনবা কয়া পুরক্লি। মালেমগী চাউখৎপা অমসুং নুংঙাই-য়াইফবদা মতেং পাংবগা লোয়ননা ভারতনা থাজবগা লোয়না মসিগী তুংগী ফিবম শেম্লি।

প্রধান মন্ত্রীনা হায়খি মপান লৈবাকশিংদা লৈরিবা ভারতমচা খুদিংমক্কী তুংদা ভারত সরকার চেৎনা লেপ্লি অমসুং মখোয়গী য়াইফনবা থবকশিং পায়খৎলি। নেদরলেন্দসদা লৈবদা মখোয়না খঙবা লৌশিং শীজিন্নদুনা বিকসিত ভারতকী খোঙচত্ত মখোয়না থৱায় য়াওনা মতেং পাংগদবনি।

সুরিনামি-হিন্দুস্তানি ফুরুপকী মীওই ২০০,০০০ য়াওনা, য়ুরোপতা ভারত্তগী হৌখিবা মীওই মশিং খ্বাইদগী য়াম্না লৈবা লৈবাক নেদরলেন্দসনা ওইরি। হিরম অসিগী মতাংদা, প্রধান মন্ত্রীনা হায়খি মদুদি সুরিনামি-হিন্দুস্তানি ফুরুপকী মীওইশিংদা ৪শুবা মীরোলদগী ৬শুবা মীরোল ফাওবদা ও.সি.আইগী খুদোংচাবা পীরে। প্রধান মন্ত্রীগী মপুংফাবা ৱারোল মফম অসিদা ফংগনি [Link]।

***