জয় সোমনাথ!

জয় সোমনাথ!

হর হর মহাদেব!

গুজরাতকি মুখ্য মন্ত্রী শ্রী ভুপেন্দ্র ভাই পতেল, উপ মুখ্য মন্ত্রী ভাই হর্স সংঘৱীজি, গুজরাত সরকারগী মন্ত্রীশিং, সংসদকি মেম্বরশিং অমসুং লেজিস্লেচরশিং, ইকায় খুম্নজরবা মীথুংলেন পুম্নমক, ইচিল-ইনাও অমসুং ইচল-ইচেশিং, ঙসিদি প্রভাশ পতনগী শেংলবা লম অসি ইস্বরগী মঙালনা থল্লবা মফম অমা ওইরে। মহাদেবগী মীৎয়েং অসি, ফজবা অসি, পৃথীবি অমসুং অতিয়াদগী লৈরাংশিং চাইথরক্তুনা, লৈঙাং মচুগী ফিরালশিংগী মঙাল, কলা, ইশৈ-নোংমাই, অমসুং নাৎকি অঙকপা প্রজেন্তেসনশিং, বেদগী ইশৈশিং তাবা, সেন্ত্রেল সেক্তরদা শিব পঞ্চক্সরিগী লেপ্পা লৈতনা থিবা, অমসুং মসি পুম্নমক অসিগা লোয়ননা শমুদ্রগী ইশিংগী খোঞ্জেল অসিগুম্না ফাওহল্লি। শোল্লসি সোমনাথ! সোমনাথনা ঙান্থোইরে!

মরুপশিং,

ঙসি ঐখোয়না ভগৱান মহাদেবগী মীতম কত্থোকপগী চহি ৭৫ শুরকপগী থৌরম পাঙথোক্লি, মহাক্কী অপাম্বনা মতম মশা মথন্তা মশক তাকচবা, লোম্বা নাইদবা, মতম মশামক্কী মশক তাকপা। তাইবংপাল অসিনা শেম্লকখিবা মীওই অদু মসিদা অদুম্মক তিনখিগনি:

“য়াতো জয়তে পালয়াতে য়েনা বিস্বম, তামিসম ভাজে লিয়েত য়াত্রা বিস্বম।”

ঙসি ঐখোয়না মহাক্কী শেংলবা মফম অদু অমুক হন্না শেমগৎপগী থৌরম পাঙথোক্লি। পোইজন থকখি অমসুং নিলকন্থ ওইরকখিবা অদু—মহাক্কী ঙাকশেলদা, ঙসি সোমনাথ অমৃত মহোত্সব অসি পাঙথোক্লি। মসি পুম্নমক অসি ভগৱান সদাশিবগী অঙকপনা থল্লবা লিলাখক্তননি।

মরুপশিং,

সোমনাথ দাদাগী কত্থোক্লবা খুরুমজবা অমা ওইনা ঐহাক্না মফম অসিদা মশিং থিঙমদ্রবা লাক্তুনা মহাক্কী মমাঙদা কয়া কুইনা খুরুমজখি । অদুবু ঙসি মফম অসিদা লাকপা মতমদা মতমগী খোঙচৎ অসিনা ঐঙোন্দা অখন্নবা অমসুং নুংঙাইরবা ৱাখল্লোন অমা পিরম্মি। থা খরগী মমাঙদা ঐখোয়না সোমনাথ স্বাভিমান পারবা পাংথোকপা মতমদা ঐহাক মফম অসিদা লাকখি। মসিগী অহানবা মাংহন তাকহনখিবা চহি লিশিং অমা শুরবা মতুংদসু ঐখোয়না সোমনাথকি অশিবা হকচাংগী চাওথোকচবা অদু নিংশিংলি, অমসুং ঙসি ঐখোয়না মোদরন ফোরম অসি কত্থোকখিবা চহি ৭৫ শুরে। ঐখোয় শুপ্নতগী থৌরম অনিদা শরুক য়ারিবখক্তনি; ভগৱান শিবনা ঐখোয়দা চহি লিশিং কয়াগী শিবা নাইদবা খোঙচৎ অমা থেংনবগী খুদোংচাবা পিবিরে ।

মরুপশিং,

চহি ৭৫গী মমাঙদা, ঙসিগী নুমীৎ অসিদা সোমনাথ লাইশঙ অমুক হন্না শেমজিনবা অসি অচম্বা থৌদোক অমা ওইখিদে। করিগুম্বা ১৯৪৭তা ভারতনা নীংতম্বা ফংলম্লবদি ১৯৫১দা সোমনাথকি কত্থোকপনা ভারতকি নীংতম্বগী ৱাখল পোকহনখিবা অদু লাওথোকখি। নীংতম্বগী মতমদা সরদার ভল্লভভাই পতেলনা নিংথৌপানবা রাজ্য ৫০০ হেন্না অমত্তা ওইনা পুনশিন্দুনা ভারত অমগী অনৌবা মওং অদু শেমখি। মসিগা লোয়ননা সোমনাথপু অমুক হন্না শেমগৎপগী খু্থাংদা মহাক্না মালেমদা হায়খি মদুদি ভারত অসি শুপ্নতগী ফ্রী ওইরকপা নত্তে- ভারতসু মশাগী অরিবা মশক অদু অমুক হন্না লৌশিনবগী লম্বিরোম চঙশিল্লকখি।

মরুপশিং,

মরম অদুনা থৌরম অসিদা ঐহাক্না চহি ৭৫গী মীৎয়েং খক্তমক উবা ফংলিবনি। মফম অসিদা ঐহাক্না সোমনাথনা মশক তাকখিবা মাংহন তাকহনবগী মরক্তা শৃস্তিগী ৱারেপ অদু উবা ফংলি। মফম অসিদা প্রভাশ পতন্না হঞ্জিন হঞ্জিন হিংদুনা লাক্লিবা অচুম্বগী মায় পাকপা অদু ঐনা উবা ফংলি। মফম অসিদা ঐহাক্না মালেম অসিদা মীওইবা জাতি পুম্নমক্কী য়াইফনবা তাকপিরম্বা চহি লিশিং কয়াগী স্পিরিচুয়েল কন্সিয়সনেস উবা ফংলি। মফম অসিদা ঐহাক্না উবা ফংলি মদুদি চহি লিশিং কয়া লান্না হোৎনরবসু মুত্থৎপা নত্রগা মায়থিবা পিবা ঙমদবা ভারতকি অদুগুম্লবা অশিবা থৱাই অদু। অদুগা ঐহাক্না উবা ফংলি মদুদি মসিগী সোমনাথ অমৃত মহোত্সব অসি হৌখিবা মতমগী থৌরম খক্তা নত্তনা; মসি ভারতকি মথংগী চহি লিশিং কয়াগী ইনশপিরেসনগী অচৌবা কুম্মৈ অমসুনি। থৌরম অসিদা লৈবাক অসিগী নাগরিক পুম্নমকপু অমদি সোমনাথ দাদাগী ভক্ত লাখ কয়াবু থম্মোয় শেঙনা নুংঙাইবা ফোঙদোকচরি।

মরুপশিং,

ঙসিসু অতোপ্পা মরম অমগীদমক অখন্নবা ওইরি। ঙসিগী নুমীৎ অসিদা, ১৯৯৮গী মে ১১দা ভারতনা পোখরন্দা ন্যুক্লিয়র তেস্ত তৌখি। মে ১১দা লৈবাক অসিনা অহানবা ন্যুক্লিয়র তেস্ত অহুম পাংথোকখি। ঐখোয়গী সাইন্সিস্তশিংনা মালেমগী মমাঙদা ভারতকি পাঙ্গল অমসুং তৌবা ঙম্বশিং উৎখি, অমসুং মসিনা মালেমগী ওইনা নোংলৈ-নুংশিৎ অমা ওইহনখি। মালেম অসিনা অশাওবা পোকহন্দুনা রিএক্ত তৌখি- ভারতনা মতৌ করম্না ন্যুক্লিয়র তেস্তশিং পাঙথোক্নবা থৌনা লৈগনি? মালেমগী মফম কয়াদগী শক্তি লৈরবা লৈবাকশিংনা ভারত্তা প্রেসর পিনবা মাঙদা লাকখি। তোঙান তোঙানবা সেঙ্কশনশিং থমখি । শেন-থুমগী তংদু লৈতাবা পুরক্নবা লম্বিশিং থিংজিনখি। অসিগুম্বা প্রেসর অসিগী মখাদা কনাগুম্বা অমবু শোকহনবা য়াই। অদুবু ঐখোয় তোঙান তোঙানবা লৈমায়দগী শেম্বনি। মে ১১গী মতুংদা মালেম অসিনা ঐখোয়গী মায়োক্তা লান্থেংনখি। সাইন্সিস্তশিংনা মে ১১দা মখোয়গী থবক পাঙথোকখ্রে, অদুবু মে ১৩দা অতোপ্পা ন্যুক্লিয়র তেস্ত অনি পাংথোকখি, মসিনা মালেমদা ভারতকি রাজনিতিগী ওইবা অপাম্বা অসি তশেঙনা কয়া য়াম্না ৱারেপ লৌবগে হায়বদু উৎখি। মালেমগী প্রেসর লৈরবসু, অতলজিগী লুচিং মখাদা বি.জে.পি.গী সরকারনা ঐখোয়গীদমক্তদি জাতি অসি অহানবা ওইরি হায়বা উৎখি। মালেমদা লৈরিবা শক্তি অমত্তনা ভারতপু কুপশিনবা নত্রগা ফোর্স তৌদুনা মখা চত্থবা ঙমখিদে।

মরুপশিং,

পোখ্রান ন্যুক্লিয়র তেস্তশিং অসি “ওপরেসন শক্তি” হায়না মমিং থোনখি। মরমদি শিবগা লোয়ননা শক্তিবু খুরুমজবা অসি মতম পুম্নমক্তা ঐখোয়গী চৎনবিগী শরুক অমা ওইদুনা লাক্লি। অর্ধনারিস্বর শিব মশামক শক্তি খক্তনা মপূঙ ফাবা ওইরকই। অদোম্না নিংশিংবিরমগনি মদুদি ভারতকি চন্দ্রয়ান মীশন মায় পাকপা মতমদা ঐখোয়না চন্দ্রদা রোভরগী লেন্দিং সাইত অদু “শিব শক্তি পোইন্ত” হায়না মমিং থোনখি। ঐখোয়গী থাজবদা চন্দ্র অসি শিবগা মরি লৈনৈ, অমসুং শিব অসি শক্তিগা মরি লৈনৈ। মসিগী জ্যোতির্লিং অসি মশামক সোমনাথ কৌবা অসি কয়াদা অঙকপনো—শোমা, চন্দ্রগা মরি লৈনৈ।

মরুপশিং,

ঐখোয়না শিব অমসুং শক্তিবু খুরুমজবগী ৱাখল্লোন অসি হৌজিক্তি জাতি অসিগী সাইন্তিফিক প্রোগ্রেশকিদমকতসু ইনশপিরেসন অমা ওইরে। থৌরম অসিদা ভগৱান সোমনাথকি শেংলবা খোঙউপ্তগী ঐহাক্না নাগরিক পুম্নমকপু ওপরেসন শক্তিগী চহি শুরকপদা খুরুমজরি ।

মরুপশিং,

হৌখিবা মতমদা ঐহাক্না মফম অসিদা লাকপা মতমদা ঐহাক্না হায়বিরম্মি: “শোম” হায়বদি অমৃত অমসুং অশিবা হায়বশিবু মশাগী মমিংদা পুদুনা চৎলিবা পোৎশক অমনা মতৌ করম্না কৈদৌঙৈদসু মাংহনবা ঙমগনি? পুৱারিগী মতম পুম্নমক্তা লাইশঙ অসিনা লান্দাবা কয়া মায়োক্নখি। মাহমুদা গাজনি অমসুং অলাওদ্দিন খিলজিগুম্বা লান্মিশিংনা সোমনাথকি অথোইবা অদু মুত্থৎনবা হোৎনখি। মখোয়না সোমনাথপু সুপ্নতগী ফিজিকেল স্তরকচর অমখক্তমক ওইনা লৌখি অমসুং হঞ্জিন হঞ্জিন এতেক তৌখি। হঞ্জিন হঞ্জিন লাইশঙ অসি মাংহন তাকহনখি-অদুগা মতম খুদিংদা অমুক হন্না হিংগৎলকখি। মসিবু মাংহন তাকহন্নবা হোৎনখিবশিং অদুনা ঐখোয়গী শিভিলাইজেশনগী ৱাখল্লোনগী পাঙ্গল অদু খঙবা ঙমখিদে। ঐখোয়না হকচাংগী হকচাং অসি শিব য়াবা ওইনা লৌই অদুবু মনুংদা লৈরিবা থৱাই অসিদি শিব য়াদবনি হায়সি ঐখোয়না খঙই। অমসুং শিব অসি মশা মথন্তা মালেমগী ওইবা থৱাইনি। মরম অদুনা শিব অসি তোঙান তোঙানবা মতমদা তোঙান তোঙানবা মীওইশিংগী ৱারেপ লৌবদা মশক তাকখি। ভোজা, ভিমদেব I, কুমারপালা, মহিপালা I, অমসুং রাও খাঙ্গরগুম্বা নিংথৌশিংনা হঞ্জিন হঞ্জিন সোমনাথ লাইশঙ অমুক হন্না শাখি। লাকুলিশ অমসুং শোম শর্মাগুম্বা অথোইবা ৱাখল খনবশিংনা প্রভাশ পতনগী পারী-পুরী ঙাক্তুনা থমখি অমসুং মসিবু শৈবি ফিলোজোফি অমসুং স্পিরিচুয়েল প্রেক্তিসকি অচৌবা সেন্তর অমা ওইহনখি। ভাবা বৃহস্পতি, পসুপতা আচার্য়শিং, অমসুং পন্দিৎ কয়ানা তীর্থ চৎপগী থৱায়-মীরেগী ওইবা চৎনবিশিংবু হিংহন্দুনা থমখি। বিশালদেবা অমসুং ত্রিপুরান্তকাগুম্বা পর্সোনেলিতিশিংনা লমদম অসিগী ইন্তেলেকচুএল কন্সিয়সনেস ঙাকথোকখি।

মরুপশিং,

বির হমিরজি গোহিল, বির ভেগাদজি ভিল, পুন্যস্লোক অহিল্যাবাই হোলকার, বরোদগী গায়েকৱাদশিং, জম শাহেব মহারাজ দিগ্বিজয় সিংহ জি-অসুক য়াম্লবা অথোইবা মীওই কয়ানা সোমনাথকি সেবাদা পুম্নমকপু কত্থোকখি। ঙসি ঐহাক্না সরদার ভল্লভভাই পতেল, দাক্তার রাজেন্দ্র প্রসাদ, শ্রী কে.এম.মুনসী, অমসুং খঙনরবা অমসুং খঙনদবা অথোইবা থৱাই পুম্নমক্কী মমাঙদা ইকায় খুম্ননা খুরুমজরি। মখোয়গী নিংশিংবা অসিনা ঐখোয়গী কলচরেল পারী-পুরী অসি ঙাক্তুনা থম্নবা অমসুং মাংলোমদা পুখৎপদা নত্তনা মসিগী থৌদাং অসি তুংগী মীরোলশিংদা য়ৌহনবদসু ইথিল পিরি।

মরুপশিং,

ঐখোয়গী কলচরেল সাইতশিং অসি চহি লিশিং কয়াদগী ভারতকি মশক ওইদুনা লাক্লি। ঐখোয়না অসিগুম্বা ইনাক খুল্লবা লিগেসি অসি মথং মনা থংথনরকখি, অদুবু য়াম্না নুংঙাইতবা ৱাফম অমনা চহি তরাগী খুজিং কয়াদগী ঐখোয়না মসিগী মরুওইবা অদু খঙবা ঙমখিদে। মালেম শিনবা থুংনা মপান লৈবাক্কী লান্মিশিংনা জাতিগী মশক তাকপগা মরি লৈনবা মফমশিং মাংহন তাকহনখিবা খুদম কয়া লৈরি। অদুবু জাতিশিং অদুগী মী তাঞ্জা ফংলবা মতমদা মখোয়না অমুক হন্না খুদমশিং অদু অমুক হন্না শেমগৎনবা অমসুং ইকায়খুম্নবা উৎনবা পুন্না লাকখি। অদুবু ঐখোয়গী লৈবাক অসিদা জাতিগী চাওথোকচনিংঙাই ওইবা ৱাফমশিং ফাওবা রাজনিতিগী হীরম ওইরকখি। সোমনাথ মশামক মসিগী খ্বাইদগী চাওবা খুদমনি। নীংতম্লবা মতুংদা অহানবা থৌদাংশিংগী মনুংদা অমদি সোমনাথ লাইশঙ অমুক হন্না শেমজিনবা অসি ওইগদবনি। মরম অসিনা সরদার ভল্লভভাই পতেল অমসুং দাক্তার রাজেন্দ্র প্রসাদনা মসিগীদমক্তা অচেৎপা হোৎনবা কয়া পায়খৎখি। অদুবু মখোয়না নেহরু জিদগী কয়া য়াম্না ওপোজিসন থেংনখিবগে হায়বদু ঐখোয় পূম্নমক্না খঙই। ঙসি ঐহাক্না অকুপ্পা মরোলদা চৎলোইদবনি অদুবু মসি সরদার পতেলগী ৱারেপ অদুনি মদুদি মায়োক্তা পুম্নমক লৈরবসু মহাক্না লেপ্পা লৈতনা হোৎনখিদে। সোমনাথ লাইশঙ অমুক হন্না শাগৎখি, অমসুং লৈবাক অসিনা চহি লিশিং কয়াগী ইকায় খুম্নবা অদু মুত্থৎখি।

মরুপশিং,

নুংঙাইতবা ৱাফম অমনা ঙসি ফাওবা লৈবাক অসিদা জাতিগী চাওথোকচবদগী হেন্না ইপিশমেন্ত অসি হেন্না মরু ওইবা ফোর্সশিং লৈরি। মসি ঐখোয়না রাম মন্দির শাবগী মতমদসু উখি, মদুদা ওপোজিসন লৈরম্বা মতম অদুদা। অসিগুম্বা ৱাখল্লোনশিং অসিদগী ঐখোয়না চেকশিন্না লৈগদবনি। ঐখোয়না অসিগুম্বা অপিকপা রাজনিতি অসিদগী লাপনা চৎকদবনি। চাওখৎপা অমসুং পারী-পুরী অসি পুন্না লৌশিন্দুনা ঐখোয়না প্রোগ্রেশ তৌগদবনি।

মরুপশিং,

হৌখিবা চহি খরসিদা সোমনাথ ত্রস্তকি চেয়রমেন ওইনা সোমনাথ দাদাগী সেবা তৌবগী খুদোংচাবা ফংজরে। লাইশঙ অসিগী অমসুং লমদম অসিগী চাওখৎ-থৌরাংগীদমক পায়খৎলিবা পুৱারি ওইরবা থবক অসি ঙসি ঐখোয় পূম্নমক্না উবা ফংলি। মতম অদুমকতদা মসিগী সর্ভিস অসিনা ঐহাকপুসু লনাই ওইনা কান্নবা ফংহল্লে। লৈবাক শিনবা থুংনা শেংলবা তীর্থ চৎপগী মফমশিং শেমগৎনবা ঐনা হৌজিক ফংলিবা খুদোংচাবা অসি মশা মথন্তা ভগৱান সোমনাথকি থৌজালনি।

মরুপশিং,

ঙসি চহি লিশিং কয়াগী মতুংদা কাশি বিস্বনাথ ধামদা অচৌবা চাওখৎপা অমা উবা ফংলে। ঙসি উজ্জৈন্দা ঐখোয়না অথোইবা মহাকল মহালোক অসি উবা ফংলি। কেদারনাথ ধামসু অমুক হন্না শেমজিনখ্রে। ঐহাক্না মমাঙদা হায়খিবগুম্না অয়োধ্যাদা চহি ৫০০ ঙাইদুনা লৈরম্বা অদু অরোয়বদা লোয়শিনখ্রে, অমসুং রাম লল্লানা হৌজিক মফম অদুগী অচৌবা লাইশঙ অমদা লৈরি।

মরুপশিং,

অসিগুম্বা শেংলবা তীর্থ চৎপগী মফমশিং, মোনাস্ত্রীশিং, লাইশঙশিং, অমসুং স্পিরিচুয়েল রিজনশিং মশিং থিঙমদ্রবা মফম কয়া লৈরি, মদুগী মশক অদু ঐখোয়না মতম অমদা পুরানশিংদা খক্তমক তাখি, অদুবু ঙসিদি ঐখোয়না অদুগুম্বা ইনাক খুল্লবা চৎনবি অদু ঐখোয়গী মীৎনা উবা হৌরে। অমসুং মসি পুম্নমক অসি চহি ১০–১২ খক্তগী মনুংদা থোকখিবনি।

মরুপশিং,

ঐখোয়গী কলচরেল সেন্তরশিংদা মীৎয়েং চংদবা অসিনা ভারতকি চাওখৎপদা অচৌবা অথিংবা অমা ওইরম্মি। ঐখোয়গী তীর্থ চৎপগী মফমশিং অসি ভারতকি স্পিরিচুএল অমসুং সোসিয়েল ওরদরগী সেন্তরশিং খক্তা নত্তনা ইকোনোমিক প্রোগ্রেশকি হৌরকফমসু ওইরি। ঙসিদি চার ধাম হায়ৱে প্রোজেক্ত, গোবিন্দঘাত্তগী হেমকুন্দ সাহিবা ফাওবগী রোপৱে, করতরপুর কোরিদোর, বুদ্ধিস্ত সরক্যুৎ শেমগৎপগুম্বা প্রোজেক্তাশিং অসিনা তীর্থ চৎপগী লমদমশিংদা শেনমীৎলোনগী থবক থৌরমশিং হেনগৎহল্লে। সোমনাথ কমপ্লেক্স মশামক মসিগী অচেৎপা খুদম অমনি। ইমুং লিশিং কয়া ঙসি সোমনাথতেম্পল ত্রস্তকা মরি লৈনরি। লমদম অসিগা হিংনবগী লম্বি লিশিং কয়া শম্নরি। ভারত অমসুং মালেমগী মফম কয়াদগী মফম অসিদা লাকপা মীওইশিংসু গুজরাতকি অতোপ্পা মফমশিংদসু চৎলি। মসিনা রাজ্য অমসুং লৈবাক্কীদমক প্রোগ্রেশকি অনৌবা থোঙ হাংদোক্লি।

মরুপশিং,

ঐখোয়গী থাজবনা মতৌ করম্না হিংগদগে হায়বদুসু তাকপিরি। ঐখোয়না থাজৈ মদুদি:

“সরবম খালবিদম ব্রহ্মা।”

অর্থদি, শৃস্তি অমসুং মহৌশা মশামক্কী কম্পোনেন্ত খুদিংমক অঙকপগী মশক তাকপনি। মরম অদুনা ঐখোয়গী থাজবা অসি তুরেলশিংদা, উপালশিংদা লৈরি। ঐখোয়না উমংশিংবু ইকায় খুম্ননা য়েংই। ঐখোয়না তুরেলশিংদসু শেংলবা মওং মতৌ উবা ফংই। অদুগা ঙসি মালেম অসিনা মহৌশাগী পুনশি মহিংদা হঞ্জিল্লকপা মতমদা ঐখোয়সু ঐখোয়গী পাঙ্গল অসি খঙগদবনি। ঐখোয়গী তীর্থ চৎপগী মফমশিং অমসুং লাইশঙশিং চাওখৎহনবগা লোয়ননা ঐখোয়না মখোয়গী ইকায় খুম্নবা ঙাক্তুনা থম্নবা ৱাখল চেৎনা লৈগদবনি। ঐখোয়না মহৌশা অমসুং অকোয়বগী ফিভম ঙাক-শেনবা পুনশি মহিং অমা লৌখৎকদবনি। মসিগা লোয়ননা ঐখোয়গী শেংলবা মফমশিং অসি মালেম পুম্বগী খুদম ওইনা শেমগৎকদবনি। ঐখোয়না রিজোলুশনশিং অসি ঐখোয়গী থাজবগা শম্নহনগদবনি অমসুং মদুগী মতুং ইন্না হিংগদবনি।

মরুপশিং,

অনৌবা মীরোলশিংনা মখোয়গী পুৱারিদা, মখোয়গী থাজবা অমসুং মখোয়গী কলচরেল ভেল্যুশিংগা শম্নরকপা মতমদা জাতি অসিগী মশানা মশাবু থাজবা হেনগৎলকই। ঙসি ভারতনা মাংলোমদা চঙশিল্লিবা থাজবা অসি কলচরেল কন্তিন্যুতি অসিগা য়াম্না নক্না মরি লৈনৈ। মোদর্নিতি অমসুং পারী-পুরী অসি ভারত্তা ওপোজিসন নত্তে; মখোয়না পুন্না চৎমিন্নৈ অমসুং অমনা অমবু মপাঙ্গল কনখৎহল্লি। সোমনাথনা ঐখোয়দা নিংশিংহল্লি মদুদি জাতি অমনা মশাগী মরুগা শম্নদুনা লৈরবখক্তদা মতম শাংনা মপাঙ্গল কল্লি – মদু চপ মান্নবা থাজবা অমসুং ভক্তিগা লোয়ননা তুংগী মীরোলশিংদা মশাগী পারী-পুরী অদু য়ৌহনবা মতমদা। চহি ৭৫গী মমাঙদা অমুক হন্না শেমজিন শাজিনখিবা সোমনাথ লাইশঙগী কত্থোকপা পাঙথোকখিবা মতমদা ভারতনা ৱাখল লৌশিংগী অনৌবা খোঙচৎ অমা হৌদোকখি। ঙসি চহি ৭৫গী মতুংদা চপ মান্নবা খোঙচৎ অদু য়াম্না পাক চাওরবা মওংদা ঐখোয়গী মাঙদা লেপ্লি। ঐখোয়না মসিবু হেন্না ৱাংবা থাক্তা পুখৎকদবনি। ঐখোয়গী ৱারেপশিং মপূঙ ফাহনবদা সোমনাথ দাদাগী থৌজাল মতম পুম্নমক্তা ঐখোয়গা লোয়ননা লৈমিন্নসি। অমুক হন্না ঐনা নাগরিক পুম্নমকপু, পারী-পুরীদা থাজবা থম্বা মীপুম খুদিংমকপু, অমসুং অদোম পুম্নমকপু থৌরম অসিদা থম্মোয় শেঙনা নুংঙাইবা ফোঙদোকচরি।

ঐগা লোয়ননা হায়মিন্নসি—

জয় সোমনাথ!

জয় সোমনাথ!

হর হর মহাদেব!

***