وزیرِ مملکت برائے دفاع سنجے سیٹھ نے 08 مئی 2026 کو بھارتی فوج کی جنوبی کمان کے تحت واقع ترواننت پورم فوجی چھاؤنی کا دورہ کیا اور آپریشنل تیاریوں نیز جاری ترقیاتی منصوبوں کا جائزہ لیا۔

دورے کے دوران وزیرِ مملکت برائے دفاع نے فوجی جوانوں سے ملاقات کی اور فوجی چھاؤنی میں نافذ کی جانے والی آپریشنل تیاریوں اور فلاحی اقدامات کا براہِ راست جائزہ لیا۔ انہیں جنگی تیاریوں کو بہتر بنانے اور ادارہ جاتی صلاحیتوں کو مضبوط کرنے کے مقصد سے جاری اہم آپریشنل، انتظامی اور بنیادی ڈھانچے سے متعلق اقدامات کے بارے میں تفصیلی بریفنگ دی گئی۔

سنجے سیٹھ نے فوجی چھاؤنی میں خدمات انجام دینے والے تمام افسران اور جوانوں کی پیشہ ورانہ صلاحیت، فرض شناسی اور غیر متزلزل عزم و وابستگی کی ستائش کی۔ انہوں نے اس فوجی تشکیل کو سراہا کہ اس نے ایک جانب آپریشنل تیاری کے اعلیٰ معیار کو برقرار رکھا، جبکہ دوسری جانب مسلح افواج کے اہلکاروں اور ان کے اہلِ خانہ کی فلاح و بہبود کو بھی یقینی بنایا۔

وزیرِ مملکت برائے دفاع نے اس عزم کا اعادہ کیا کہ حکومت جدید کاری، بنیادی ڈھانچے کی ترقی اور مسلح افواج کے اہلکاروں کے لیے مسلسل فلاحی اقدامات کے ذریعے دفاعی صلاحیتوں کو مضبوط بنانے پر بدستور توجہ مرکوز رکھے گی، تاکہ مستقبل کے تقاضوں سے ہم آہنگ اور جدید ٹیکنالوجی سے لیس بھارتی فوج کی تعمیر کے قومی ویژن کو عملی شکل دی جا سکے۔

******

ش ح۔ ش ا ر۔ ول

Uno-6838