تجارت و صنعت کے وزیرمملکت ، جناب جتن پرساد نے لوک سبھا میں جن وشواس (دفعات میں ترمیم) بل، 2026 پیش کیا، جسے اس سے قبل مرکزی کابینہ کی منظوری حاصل ہو چکی تھی۔

یہ بل حکومت کی اُن کوششوں میں ایک اہم سنگِ میل کی حیثیت رکھتا ہے جن کا مقصد کاروبار کرنے میں آسانی اور عوامی زندگی میں سہولت کو فروغ دینا ہے، جبکہ اعتماد اور متناسب ضابطہ بندی پر مبنی حکمرانی کے نظام کو بھی مضبوط بنانا ہے۔

 

بل میں تجویز  پیش کی گئی ہے:

• 23 وزارتوں کے زیر انتظام 79 مرکزی قوانین کی 784 دفعات میں ترمیم
• کاروبار کرنے میں آسانی کو فروغ دینے کے لیے 717 دفعات کو غیر مجرمانہ قرار دیا گیا
• زندگی گزارنے میں آسانی کے لیے 67 دفعات میں ترمیم

 

بل میں 1000 سے زیادہ جرائم کو معقول بنانے ، فرسودہ اور غیرمستعمل دفعات کو ہٹانے اور اس طرح مجموعی انضباطی  ماحول کو بہتر بنانے کی کوشش کی گئی ہے ۔

اس بل میں معمولی ، تکنیکی ، یا طریقہ کار کی خلاف ورزیوں کے لیے مجرمانہ سزاؤں سے سول اور انتظامی نفاذ کے طریقہ کار میں تبدیلی کا تصور کیا گیا ہے ۔ اہم اقدامات میں شامل ہیں:

• قید کی دفعات کو مالیاتی جرمانے یا وارننگ  سے تبدیل کرنا
• پہلی بار کی خلاف ورزیوں کے لیے انتباہات سمیت درجہ بند نفاذ کے طریقہ کار
• جرم کی نوعیت کے تناسب سے جرمانے اور سزاؤں کو معقول بنانا

 

موثر اور مقررہ وقت پر نفاذ کو یقینی بنانے کے لیے ، بل میں درج ذیل چیزیں فراہم کی گئی ہیں:

 

• عدالتی  افسران کی تقرری
• اپیلٹ اتھارٹیز کا قیام

ان اقدامات کا مقصد مقدمات کے تیزی سے نمٹارے کو آسان بنانا اور عدالتوں پر قانونی چارہ جوئی کے بوجھ کو کم کرنا ہے ، جبکہ قدرتی انصاف کے اصولوں کی پاسداری کو یقینی بنانا ہے ۔

بل میں 67 ترامیم بھی تجویز کی گئی ہیں:

 

• نئی دہلی میونسپل کونسل ایکٹ ، 1994
• موٹر وہیکل ایکٹ ، 1988

 

ان ترامیم کا مقصد بلدیاتی ٹیکس اور گاڑیوں سے متعلق ضوابط جیسے شعبوں میں طریقۂ کار کو آسان بنانا اور شہریوں کے لیے سہولت میں اضافہ کرنا ہے۔

 

مشاورتی طریقۂ کار

مجوزہ اصلاحات، ایک جامع مشاورتی عمل کی بنیاد پر تیار کی گئی ہیں، جس میں بین وزارتی کمیٹیوں کے اجلاس نیتی آیوگ کے تحت اعلیٰ سطحی کمیٹیوں کے اجلاس، صنعتی انجمنوں اور سول سوسائٹی تنظیموں کے ساتھ تبادلۂ خیال شامل رہا۔

مزید برآں، جن وشواس (ترمیمی) بل، 2025 سے متعلق سلیکٹ کمیٹی نے بھی ایک جامع مشاورتی عمل اختیار کیا، جس میں کمیٹی اراکین، متعلقہ وزارتوں، بیرونی فریقین اور موضوعی ماہرین کے ساتھ 49 اجلاس منعقد کیے گئے۔

 

اعتماد پر مبنی حکمرانی

یہ بل حکومت کے اُس عزم کی عکاسی کرتا ہے جس کا مقصد اعتماد پر مبنی قانونی اور تعمیلی ماحول کو فروغ دینا ہے، جہاں شہریوں اور کاروباری اداروں کو معمولی خلاف ورزیوں پر فوجداری سزاؤں کا سامنا نہ کرنا پڑے۔فوجداری ذمہ داریوں کا بوجھ کم کرنے اور ضابطہ جاتی عمل کو آسان بنانے کے ذریعے، توقع ہے کہ یہ بل تعمیل میں بہتری، سرمایہ کاری کے فروغ اور معاشی ترقی کو مضبوط بنانے میں مددگار ثابت ہوگا۔

موجودہ بل، معمولی جرائم کو غیر فوجداری بنانے کی اصلاحاتی مہم کا تسلسل ہے۔ اس اقدام کا آغاز جن وشواس ایکٹ  2023 سے ہوا تھا، جس کے تحت 19 وزارتوں اور محکموں کے زیر انتظام 42 مرکزی قوانین کی 183 دفعات کو غیر فوجداری بنایا گیا تھا۔اسی سلسلے کو جاری رکھتے ہوئے، جن وشواس (دفعات میں ترمیم) بل، 2025 کو 18 اگست 2025 کو لوک سبھا میں پیش کیا گیا۔ اس بل میں 10 وزارتوں اور محکموں کے زیر انتظام 16 مرکزی قوانین کی 355 دفعات میں ترامیم تجویز کی گئی تھیں اور اسے بعد ازاں ایک سلیکٹ کمیٹی کے حوالے کر دیا گیا تھا۔

سلیکٹ کمیٹی، جس کی سربراہی تیجسوی سوریا  نے کی، نے 49 اجلاس منعقد کیے اور 13 مارچ 2026 کو اپنی رپورٹ لوک سبھا میں پیش کی۔ کمیٹی نے تفصیلی مشاورت کی اور زیرِ غور دفعات کے علاوہ انہی قوانین کی مزید دفعات کا بھی جائزہ لیا، جبکہ مزید 62 مرکزی قوانین میں غیر فوجداری اصلاحات کی سفارش کی۔

اس کے بعد جن وشواس (دفعات میں ترمیم) بل، 2025 واپس لے لیا گیا اور آج جن وشواس (دفعات میں ترمیم) بل، 2026 لوک سبھا میں پیش کیا گیا۔

نتیجہ

جن وشواس (دفعات میں ترمیم) بل، 2026 بھارت کے ضابطہ جاتی نظام کو جدید بنانے اور اسے متناسب اور خطرے کی بنیاد پر قائم عالمی اصولوں سے ہم آہنگ کرنے کی جانب ایک اہم قدم ہے۔ توقع کی جا رہی ہے کہ یہ بل ملک میں کاروبار کرنے میں آسانی اور شہری زندگی میں سہولت کو نمایاں طور پر بہتر بنانے میں اہم کردار ادا کرے گا۔

 

************

 ش ح –ع  ح -م ر

UR. No. 6763

(रिलीज़ आईडी: 2258780) आगंतुक पटल : 19