એટીએફ (ATF - એવિએશન ટર્બાઇન ફ્યુઅલ)ના ભાવમાં તીવ્ર વધારાને કારણે એરલાઇન્સ દ્વારા સામનો કરવામાં આવી રહેલી નાણાકીય કટોકટી, હવાઈ ક્ષેત્ર બંધ થવા અને કામગીરીમાં ઘટાડો થવાને કારણે, ખાસ કરીને આંતરરાષ્ટ્રીય રૂટો પર જેના કારણે વિમાનોનો ઓછો ઉપયોગ અને પ્રવાહિતાની મર્યાદાઓ (લિક્વિડિટી કન્સ્ટ્રેઇન્ટ્સ) સર્જાઈ છે, તેને ધ્યાનમાં રાખીને પ્રધાનમંત્રી શ્રી નરેન્દ્ર મોદીની અધ્યક્ષતામાં કેન્દ્રીય કેબિનેટે ભારતીય એરલાઇન્સને લક્ષિત ક્રેડિટ સપોર્ટ પૂરો પાડવા માટે ECLGS 5.0 યોજનાને મંજૂરી આપી છે.

આ યોજનાનો ઉદ્દેશ્ય એમએસએમઈ (MSMEs) માટે 100% અને નોન-એમએસએમઈ તેમજ એરલાઇન ક્ષેત્ર માટે 90% ક્રેડિટ ગેરંટી કવરેજ નેશનલ ક્રેડિટ ગેરંટી ટ્રસ્ટી કંપની લિમિટેડ (NCGTC) દ્વારા મેમ્બર લેન્ડિંગ ઇન્સ્ટિટ્યુશન્સ (MLIs) ને આપવાનો છે. આ ગેરંટી પશ્ચિમ એશિયાની વર્તમાન સ્થિતિની પૃષ્ઠભૂમિમાં લાયક ઋણધારકોને ટૂંકા ગાળાની પ્રવાહિતાની અસમાનતાઓને દૂર કરવા માટે આપવામાં આવેલી વધારાની ક્રેડિટ સુવિધા હેઠળ ડિફોલ્ટ થયેલી રકમ સામે આપવામાં આવશે.

ઉડ્ડયન ક્ષેત્ર (એવિએશન સેક્ટર) માટે, આ યોજના હેઠળ ખાસ કરીને એરલાઇન્સ માટે ₹5,000 કરોડ અલગ રાખવામાં આવ્યા છે. આ યોજના હેઠળ ધિરાણ લેનાર દીઠ મહત્તમ ₹1,000 કરોડની લોન મર્યાદા સાથે માળખાકીય નાણાકીય રાહત પૂરી પાડવામાં આવે છે, અને ઋણધારક દ્વારા સમાન ઇક્વિટી ઇન્ફ્યુઝન ને આધીન વધારાના ₹500 કરોડ પૂરા પાડવામાં આવશે. આ લોનની મુદત 7 વર્ષ સુધીની રહેશે, જેમાં ચુકવણી પર 2 વર્ષનો મોરેટોરિયમ (સ્થગિતતા ગાળો) સામેલ છે, જેનાથી ટૂંકા ગાળાના પ્રવાહિતાના દબાણને હળવું કરી શકાશે.

ECLGS 5.0 ની રજૂઆતનો ઉદ્દેશ્ય વર્તમાન પડકારજનક સમયગાળા દરમિયાન એમએસએમઈ (MSMEs) અને એરલાઇન્સને વધારાનો ક્રેડિટ સપોર્ટ પૂરો પાડવાનો છે. લોનની લાંબી 7 વર્ષની મુદતની સાથે વ્યાજના 50% સુધીના હિસ્સાને ફંડેડ ઇન્ટરેસ્ટ ટર્મ લોન (FITL) માં રૂપાંતરિત કરવાના વિકલ્પથી તાત્કાલિક ચુકવણીના દબાણને હળવું કરવામાં આવશે અને કેશ ફ્લો (રોકડ પ્રવાહ) તેમજ પ્રવાહિતામાં સુધારો થશે તેવી અપેક્ષા છે.

આ જાહેરાત અંગે માનનીય મંત્રી રામ મોહન નાયડુએ જણાવ્યું હતું કે, "માનનીય પ્રધાનમંત્રી નરેન્દ્ર મોદીજીના નિર્ણાયક નેતૃત્વ હેઠળ, ભારતની ઉડ્ડયન વિકાસગાથા આજે વૈશ્વિક સ્તરે સુધારા, સ્થિતિસ્થાપકતા અને પુનરુત્થાનના પાયા પર બનેલી એક સફળતાની વાર્તા તરીકે અલગ તરી આવે છે. અને વર્તમાન અણધારી અને અભૂતપૂર્વ પરિસ્થિતિમાં, જ્યારે વિશ્વભરની એરલાઇન્સ કામગીરી ચલાવવામાં સંઘર્ષ કરી રહી છે, ત્યારે ભારતીય એરલાઇન્સ સ્થિર રહી છે, જેને સમયસરના પગલાં જેવા કે વૈશ્વિક ઉછાળા વચ્ચે એટીએફ (ATF) ના ભાવ મર્યાદિત કરવા, એરપોર્ટ પર ઉતરાણ અને પાર્કિંગ શુલ્કમાં ઘટાડો વગેરે દ્વારા ટેકો મળ્યો છે અને હવે સરકાર દ્વારા એક સાહસિક નિર્ણય લેવામાં આવ્યો છે. ઇમરજન્સી ક્રેડિટ લાઇન ગેરંટી સ્કીમ (ECLGS) 5.0 ને મંજૂરી આપીને, એરલાઇન્સ ટૂંકા ગાળાના પ્રવાહિતાના પડકારોનો સામનો કરવા અને વૈશ્વિક અવરોધો વચ્ચે અવિરત કામગીરી જાળવી રાખવા માટે સક્ષમ બનશે. તે નોકરીઓનું રક્ષણ કરવા, કનેક્ટિવિટી જાળવી રાખવા અને સમગ્ર ઉડ્ડયન ઇકોસિસ્ટમમાં સ્થિતિસ્થાપકતા સુનિશ્ચિત કરવા માટે મજબૂત નાણાકીય પીઠબળ પૂરું પાડશે, તેમજ એમએસએમઈ (MSMEs) ને પણ સપોર્ટ કરશે."

આ યોજના ચોથા ક્વાર્ટર નાણાકીય વર્ષ 26 (Q4 FY 26) દરમિયાન ઉપયોગમાં લેવાયેલી પીક વર્કિંગ કેપિટલના 20% સુધીની વધારાની ક્રેડિટ પ્રદાન કરશે, જેની મર્યાદા રૂ. 100 કરોડ રહેશે. એરલાઇન્સ માટે ચોક્કસ શરતો સંતોષવાને આધીન ઋણધારક દીઠ મહત્તમ રૂ. 1,500 કરોડની મર્યાદામાં 100% સુધી ક્રેડિટ આપવામાં આવશે. ગેરંટી કવરનો મહત્તમ સમયગાળો લોનની મુદત સાથે સહ-સમાપ્ત (કો-ટર્મિનસ) થશે. આ યોજના NCGTC દ્વારા આ માર્ગદર્શિકા બહાર પાડ્યાની તારીખથી 31.03.2027 સુધીના સમયગાળા દરમિયાન મંજૂર કરાયેલી તમામ લોન પર લાગુ થશે.

આ યોજના એવિએશન ટર્બાઇન ફ્યુઅલ (ATF) ના વધતા ભાવ, વિનિમય દરની અસ્થિરતા (એક્સચેન્જ રેટ વોલેટિલિટી) અને ઓપરેશનલ અવરોધોની અસરોને ઘટાડવામાં પણ મદદ કરશે, જે એરલાઇન્સના નાણાકીય સ્વાસ્થ્યને અસર કરવાનું ચાલુ જાળવી રાખે છે. સાર્વભૌમ ગેરંટી (સોવરેન ગેરંટી) દ્વારા સમર્થિત ક્રેડિટની ઉપલબ્ધતા સુનિશ્ચિત કરીને, તે ધિરાણકર્તાઓનો આત્મવિશ્વાસ વધારશે, આ ક્ષેત્રમાં ક્રેડિટ પ્રવાહમાં સુધારો કરશે અને ઓપરેશનલ સ્થિરતાને ટેકો આપશે. આનાથી રોજગારી ટકાવી રાખવા, આ ક્ષેત્રની ક્ષમતા જાળવવા અને મુસાફરો પર વધેલા ખર્ચના બોજને ઘટાડવામાં મદદ મળવાની અપેક્ષા છે, જેનાથી ભારતના ઉડ્ડયન ક્ષેત્રના સતત વિકાસ અને સ્થિતિસ્થાપકતાને ટેકો મળશે.

SM/DK/JD

 

(રીલીઝ આઈડી: 2258493) મુલાકાતી સંખ્યા : 15