پنچایتی راج کی وزارت 4 اور 5 مئی 2026 کو نئی دہلی کے ڈاکٹر امبیڈکر بین الاقوامی مرکز میں ’’پنچایتی ترقیاتی منصوبوں (پی ڈی پی) کی تیاری‘‘ کے موضوع پر دو روزہ قومی ورکشاپ کا انعقاد کرے گی۔ ورکشاپ کا افتتاح وزارتِ پنچایتی راج کے سکریٹری جناب وویک بھردواج اور وزارتِ جل شکتی میں پینے کے پانی و صفائی کے محکمہ کے سکریٹری جناب اشوک کے کے مینا کی موجودگی میں ہوگا، جو کلیدی خطابات بھی پیش کریں گے۔

افتتاحی اجلاس کے دوران ’’پیپلز پلان مہم‘‘ کے تحت پنچایت ترقیاتی منصوبہ (2026–27) کی تیاری سے متعلق کتابچہ، معیاری گرام پنچایت ترقیاتی منصوبہ (جی پی ڈی پی) کتابچہ اور جدید طرز پر تیار کردہ ’’ای۔گرام سوراج‘‘ منصوبہ بندی پورٹل کا بھی اجرا کیا جائے گا۔ اس موقع پر موضوعاتی پنچایتی ترقیاتی منصوبوں کے بدلتے کردار، سولہویں مالیاتی کمیشن کے گرانٹس کے خاکے اور دیگر اہم موضوعات پر تبادلۂ خیال کیا جائے گا۔

اس ورکشاپ میں حکومتِ ہند کے اعلیٰ افسران، ریاستوں اور مرکز کے زیر انتظام علاقوں کے نمائندے اور پنچایتی راج سے وابستہ اہم فریقین شریک ہوں گے۔ پروگرام میں تکنیکی اجلاسوں اور عملی گروہی مشقوں کا انعقاد بھی کیا جائے گا، جن کے دوران ریاستی اور مرکز کے زیر انتظام علاقوں کی ٹیمیں جدید پورٹل پر دس موضوعاتی شعبوں کے تحت نمونہ جاتی منصوبے تیار کریں گی۔ ان شعبوں میں روزگار، صحت، اطفال دوست حکمرانی، پانی کی کفالت، صفائی، بنیادی ڈھانچہ، سماجی انصاف، اچھی حکمرانی، خواتین کو بااختیار بنانا، پی ای ایس اے اور جنگلاتی حقوق کے قانون پر عمل درآمد شامل ہیں۔

اس دو روزہ ورکشاپ کا مقصد نچلی سطح پر اعداد و شمار پر مبنی اور عوامی شمولیت والی منصوبہ بندی کو مضبوط بنانا ہے، تاکہ سال 2026–27 کے پنچایتی ترقیاتی منصوبے سولہویں مالیاتی کمیشن کی شرائط کے مطابق ہوں اور دیہی آبادی کے لیے قابلِ پیمائش نتائج فراہم کرسکیں۔ یہ اقدام ’’ترقی یافتہ بھارت‘‘ کے بنیادی ستون کے طور پر ’’ترقی یافتہ پنچایت‘‘ کے ویژن کو آگے بڑھانے میں معاون ثابت ہوگا۔

******

ش ح۔ ش ا ر۔ ول

Uno-6582

(ریلیز آئی ڈی: 2257620) وزیٹر کاؤنٹر : 11