સંરક્ષણ સંશોધન અને વિકાસ સંગઠન (DRDO) અને ભારતીય નૌકાદળે ઓડિશામાં બંગાળની ખાડીના કિનારે નૌકાદળના હેલિકોપ્ટર પ્લેટફોર્મ પરથી નેવલ એન્ટી-શિપ મિસાઇલ-શોર્ટ રેન્જ (NASM-SR) નું પ્રથમ સામૂહિક પરીક્ષણ (Maiden Salvo Launch) સફળતાપૂર્વક હાથ ધર્યું છે. આ પરીક્ષણ દરમિયાન, એક જ હેલિકોપ્ટર પરથી એક પછી એક એમ બે મિસાઇલો છોડવામાં આવી હતી, જે અદ્યતન એર-લોન્ચ એન્ટી-શિપ મિસાઇલ સિસ્ટમનું પ્રથમ સામૂહિક પરીક્ષણ છે.

ઇન્ટિગ્રેટેડ ટેસ્ટ રેન્જ (ITR), ચાંદીપુર દ્વારા તૈનાત કરવામાં આવેલા રડાર, ઇલેક્ટ્રો-ઓપ્ટિકલ સિસ્ટમ અને ટેલિમેટ્રી જેવા વિવિધ રેન્જ ટ્રેકિંગ સાધનો દ્વારા મેળવેલા ડેટા મુજબ પરીક્ષણના તમામ ઉદ્દેશ્યો સંપૂર્ણપણે પૂર્ણ થયા હતા. સામૂહિક પરીક્ષણ ક્ષમતા સાબિત કરવાની સાથે, મિસાઇલોએ 'વોટરલાઇન હિટ' (Waterline hit) ક્ષમતાનું પણ પ્રદર્શન કર્યું હતું. આ પરીક્ષણ લોન્ચિંગના સાક્ષી તરીકે DRDO ના વરિષ્ઠ વૈજ્ઞાનિકો, ભારતીય નૌકાદળ અને ભારતીય વાયુસેનાના વપરાશકર્તા પ્રતિનિધિઓ અને ડેવલપમેન્ટ-કમ-પ્રોડક્શન પાર્ટનર્સ (DcPP) ઉપસ્થિત રહ્યા હતા.

NASM-SR મિસાઇલ સોલિડ પ્રોપલ્શન બૂસ્ટર અને લોંગ-બર્ન સસ્ટેનરનો ઉપયોગ કરે છે. સીકર (Seeker), ઇન્ટિગ્રેટેડ એવિઓનિક્સ મોડ્યુલ, ફાઇબર-ઓપ્ટિક ગાયરોસ્કોપ-આધારિત ઇનર્શિયલ નેવિગેશન સિસ્ટમ અને રેડિયો-અલ્ટિમીટરનો ઉપયોગ કરીને અદ્યતન નેવિગેશન અને ગાઇડન્સ સાથે અદ્યતન કંટ્રોલ અને ગાઇડન્સ અલ્ગોરિધમ, હાઇ-બેન્ડવિડ્થ ટુ-વે ડેટા લિંક અને જેટ-વેન કંટ્રોલ જેવા તમામ જટિલ સબસિસ્ટમ્સ DRDO ની વિવિધ પ્રયોગશાળાઓ અને ભારતીય ઉદ્યોગો દ્વારા સ્વદેશી રીતે વિકસાવવામાં આવ્યા છે.

આ મિસાઇલ સિસ્ટમ હૈદરાબાદ સ્થિત રિસર્ચ સેન્ટર ઇમારત (RCI) દ્વારા અન્ય DRDO પ્રયોગશાળાઓ જેવી કે ડિફેન્સ રિસર્ચ એન્ડ ડેવલપમેન્ટ લેબોરેટરી, હૈદરાબાદ; હાઇ એનર્જી મટિરિયલ્સ રિસર્ચ લેબોરેટરી, પુણે; ટર્મિનલ બેલિસ્ટિક્સ રિસર્ચ લેબોરેટરી, ચંદીગઢ અને ITR ચાંદીપુરના સહયોગથી વિકસાવવામાં આવી છે. આ મિસાઇલોનું હાલમાં અન્ય ભારતીય ઉદ્યોગો અને સ્ટાર્ટ-અપ્સની મદદથી DcPP દ્વારા ઉત્પાદન કરવામાં આવી રહ્યું છે.

રક્ષા મંત્રી શ્રી રાજનાથ સિંહે સફળ પ્રથમ સામૂહિક પરીક્ષણ માટે DRDO, ભારતીય નૌકાદળ, ભારતીય વાયુસેના અને DcPP ભાગીદારો સહિતના ઉદ્યોગોને અભિનંદન પાઠવ્યા છે. તેમણે કહ્યું કે, આ મિસાઇલના વિકાસથી સંરક્ષણ દળોની ક્ષમતાઓમાં ઘણો વધારો થશે.

સંરક્ષણ આરએન્ડડી (R&D) વિભાગના સચિવ અને DRDO ના અધ્યક્ષ ડૉ. સમીર વી. કામતે સફળ સામૂહિક પરીક્ષણ સાથે જોડાયેલી ટીમોને અભિનંદન પાઠવ્યા હતા.

SM/NP/JD

(રીલીઝ આઈડી: 2256778) મુલાકાતી સંખ્યા : 12