محنت اور روزگار کی وزارت نے تمام ریاستوں/مرکز کے زیر انتظام علاقوں اور اس سے منسلک تنظیموں کو ایڈوائزری جاری کی ہے ، جس میں ملک بھر میں بڑھتے ہوئے درجہ حرارت اور گرمی کی لہر کے حالات کے منفی اثرات سے کارکنوں اور مزدوروں کی حفاظت کے لیے فوری احتیاطی اور تخفیف کے اقدامات پر زور دیا گیا ہے ۔  

تمام ریاستوں اور مرکز کے زیر انتظام علاقوں کے چیف سکریٹریوں/منتظمین سے خطاب کرتے ہوئے ، وزارت نے کارکنوں ، خاص طور پر بیرونی اور محنت کش شعبوں میں ملازمت کرنے والوں کے تحفظ کے لیے ایک مربوط ، کثیر شعبہ جاتی اور کثیر جہتی نقطہ نظر کی ضرورت پر زور دیا ۔

ریاستوں اور مرکز کے زیر انتظام علاقوں کو ہدایت دی گئی ہے کہ وہ آجرین، مالکان، صنعتوں اور تعمیراتی کمپنیوں کو کارکنوں کی حفاظت کے اقدامات کی فوری عمل آوری کے لیے ضروری احکامات جاری کریں، جن میں شامل ہیں:

• مختلف شعبوں میں ملازمین/کارکنوں کے لیے کام کے اوقات کا دوبارہ تعین کرنے کی اجازت
• مناسب پینے کے پانی کی فراہمی کو یقینی بنانا اور آرام کے مقامات نیز کام کی جگہوں کو ٹھنڈا رکھنے کے انتظامات کرنا
• تعمیراتی کام سمیت اس طرح کی سہولیات کی ضرورت والے کام کے حالات کے لیے ہنگامی آئس پیک اور گرمی کی بیماری سے بچاؤ کے مواد کی فراہمی
• کارکنوں کی باقاعدگی سے صحت کی جانچ کو یقینی بنانے کے لیے محکمہ صحت کے ساتھ تال میل

فیکٹریوں اور کانوں کی انتظامیہ کو بھی ہدایت دی گئی ہے کہ وہ کارکنوں کو زیادہ لچک فراہم کریں، جس میں شدید گرمی کے دوران کام کی رفتار کم کرنا، جہاں مسلسل کام ناگزیر ہو وہاں دو افراد پر مشتمل ٹیمیں مقرر کرنا، آرام کے لیے جگہیں فراہم کرنا اور مناسب ہوا کی آمد و رفت اور ٹھنڈک کے انتظامات کو یقینی بنانا شامل ہے۔

خصوصی توجہ تعمیراتی مزدوروں، اینٹوں کے بھٹوں پر کام کرنے والے افراد، یومیہ اجرت پر کام کرنے والوں اور عارضی مزدوروں کے لیے تجویز کی گئی ہے۔ ریاستوں اور مرکز کے زیر انتظام علاقوں کو یہ بھی ترغیب دی گئی ہے کہ وہ لیبر چوکوں اور عوامی مقامات پر بیداری  مہمات چلائیں، اور ایسے پوسٹرز اور بینرز آویزاں کریں جن میں ہیٹ ویو سے حفاظت کے پیغامات اور ہنگامی رابطہ نمبرز درج ہوں۔

ڈائریکٹوریٹ جنرل آف ٹریننگ ، نیشنل بورڈ فار ورکرز ایجوکیشن (ڈی ٹی این بی ڈبلیو ای) کو مشورہ دیا گیا ہے کہ وہ گرمی کی لہر کے تخفیف اور انتظام پر بیداری اور تربیتی پروگرام منعقد کریں ، جس میں شامل ہیں:

• گرمی کی لہروں کی وجوہات اور اثرات
• کام کے محفوظ طریقے جیسے پانی کا استعمال ( ہائیڈریشن )اور آرام کے وقفے
• گرمی کے دباؤ کی علامات کی بروقت پہچان
• کام کی جگہ اور کمیونٹی کی سطح پر روک تھام کی حکمت عملی
• ہنگامی ردعمل اور ابتدائی طبی امداد کے اقدامات

ایمپلائز اسٹیٹ انشورنس کارپوریشن (ای ایس آئی سی) اور ڈائریکٹر جنرل آف لیبر ویلفیئر (ڈی جی ایل ڈبلیو) کے تحت ہسپتالوں اور ڈسپنسریوں سے کہا گیا ہے کہ وہ ہیٹ اسٹروک کے معاملات کے لیے مخصوص ہیلپ ڈیسک قائم کریں اور او آر ایس ، آئس پیک اور گرمی کی بیماری سے بچاؤ کے دیگر مواد کے مناسب اسٹاک کو یقینی بنائیں ۔

مزید برآں چیف لیبر کمشنر (سی ایل سی) اور ڈائریکٹوریٹ جنرل آف مائنز سیفٹی (ڈی جی ایم ایس) جیسی نافذ کرنے والی ایجنسیوں سے درخواست کی گئی ہے کہ وہ کام کرنے کے محفوظ حالات ، پینے کے پانی ، وینٹیلیشن ، کولنگ کی سہولیات اور کارکنوں کی وقتا فوقتا صحت کی جانچ سے متعلق قانونی دفعات کی تعمیل کی نگرانی کریں ۔

ایمپلائز پروویڈنٹ فنڈ آرگنائزیشن (ای پی ایف او) اور نیشنل کیریئر سروس (این سی ایس) کو بھی مشورہ دیا گیا کہ وہ کیمپوں اور آؤٹ ریچ سرگرمیوں کے دوران کولنگ اور وینٹیلیشن اور پینے کے پانی کی مناسب فراہمی کو یقینی بنائیں ۔

تمام تنظیموں سے یہ بھی درخواست کی گئی ہے کہ وہ مزید جائزے اور نگرانی کے لیے اس سلسلے میں کیے گئے اقدامات اور کی جانے والی سرگرمیوں کے بارے میں پندرہ دن میں صورتحال کی رپورٹ پیش کریں ۔

وزارت نے ایک بار پھر زور دیا کہ گرمیوں کے موسم میں کارکنوں کی صحت، حفاظت اور پیداواری صلاحیت کو یقینی بنانے کے لیے بروقت احتیاطی اقدامات اور قریبی نگرانی نہایت ضروری ہے۔

********

) ش ح ۔ ش آ۔م ر)

U.No. 6400