ભારત-ન્યુઝીલેન્ડ મુક્ત વ્યાપાર કરાર (FTA) પર હસ્તાક્ષર કરવાની પૂર્વસંધ્યાએ, કેન્દ્રીય વાણિજ્ય અને ઉદ્યોગ મંત્રી શ્રી પીયૂષ ગોયલ અને ન્યુઝીલેન્ડના વેપાર અને રોકાણ મંત્રી શ્રી ટોડ મેકક્લેએ આગ્રામાં ઉદ્યોગ જોડાણ કાર્યક્રમમાં ભાગ લીધો હતો. મત્સ્યઉદ્યોગ, પશુપાલન અને ડેરી ઉદ્યોગના રાજ્ય મંત્રી શ્રી એસ.પી. બઘેલે પણ આ સંવાદમાં ભાગ લીધો હતો. આ વાતચીતમાં લેધર અને ફૂટવેર, આયુષ, મેડિકલ ડિવાઇસ, લાઇટ એન્જિનિયરિંગ, સ્પોર્ટ્સ ગુડ્સ સેક્ટર અને લઘુ ઉદ્યોગ ભારતી, ઉત્તર પ્રદેશના અગ્રણી ઉદ્યોગ પ્રતિનિધિઓ એકઠા થયા હતા. ઉદ્યોગોએ તેમના મંતવ્યો રજૂ કર્યા હતા જે ભારતની લેધર મેન્યુફેક્ચરિંગ કુશળતા, ફાર્મા ઉદ્યોગ, મેડિકલ ડિવાઇસ ઉદ્યોગ અને એન્જિનિયરિંગ ઉત્પાદનોની ઊંડાઈ અને વિવિધતાને પ્રતિબિંબિત કરે છે.

સર્વસમાવેશક, ભવિષ્યલક્ષી અને ભારતની રાષ્ટ્રીય પ્રાથમિકતાઓમાં દ્રઢપણે મૂળ ધરાવતી વેપાર ભાગીદારી બાંધવાના પ્રધાનમંત્રી શ્રી નરેન્દ્ર મોદીના વિઝનને અનુરૂપ, બંને મંત્રીઓએ ભારપૂર્વક જણાવ્યું હતું કે ભારત-ન્યુઝીલેન્ડ FTA એ માત્ર ટેરિફ કરાર કરતાં ઘણું વધારે છે. તે બજારની પહોંચ, કૃષિ ઉત્પાદકતા, રોકાણ, પ્રતિભા ગતિશીલતા, રમતગમત, પ્રવાસન અને લોકો વચ્ચેના સંબંધોમાં સહયોગને આવરી લેતું એક વ્યાપક માળખું છે, જે બંને દેશોના ઉત્પાદકો, ખેડૂતો, MSMEs, મહિલા સાહસિકો, વિદ્યાર્થીઓ અને કુશળ વ્યાવસાયિકોને લાભ પહોંચાડવા માટે રચાયેલ છે.

આગ્રા, જે ભારતના લેધર ફૂટવેર ઉત્પાદનમાં આશરે 75 ટકા હિસ્સો ધરાવે છે, તે તેના લેધર ફૂટવેર માટે જીઓગ્રાફિકલ ઇન્ડિકેશન (GI) ટેગ ધરાવે છે અને વન ડિસ્ટ્રિક્ટ વન પ્રોડક્ટ (ODOP) યોજના હેઠળ ફ્લેગશિપ પ્રોડક્ટ છે. FTA દ્વારા અમલીકરણના દિવસથી જ ભારતની 100 ટકા નિકાસ પરની ડ્યુટી નાબૂદ થવા સાથે અને લેધર તથા ફૂટવેર પરના ટેરિફ 5 ટકાથી ઘટાડીને શૂન્ય કરવા સાથે, ભારતીય નિકાસકારો નિર્ણાયક સ્પર્ધાત્મક લાભ મેળવવા માટે તૈયાર છે. ઉદ્યોગના પ્રતિનિધિઓએ માસ પ્રોડક્શન (જથ્થાબંધ ઉત્પાદન) થી ઉચ્ચ મૂલ્યવૃદ્ધિ ધરાવતા ઉત્પાદન તરફના વ્યૂહાત્મક પરિવર્તનને કારણે 2030 સુધીમાં આ ક્ષેત્ર 50 અબજ યુએસ ડોલર સુધી વધવાની સંભાવના પર ભાર મૂક્યો હતો. ન્યુઝીલેન્ડના સમૃદ્ધ કાચા ચામડાના સંસાધનો અને ભારતની ઉત્પાદન ક્ષમતાઓ એક મજબૂત પૂરકતા પ્રદાન કરે છે જેને બંને પક્ષોએ ઉપયોગમાં લેવા માટે આતુરતા દર્શાવી હતી. આ પ્રસંગે, બંને મંત્રીઓએ ઉદ્યોગના પ્રતિનિધિઓ સાથે આગ્રાને વૈશ્વિક સોર્સિંગ ડેસ્ટિનેશન, રોજગારનું એન્જિન અને વિશ્વ મંચ પર નિકાસ પાવરહાઉસ તરીકે સ્થાપિત કરવા વિશે વાત કરી હતી.

આ સંવાદમાં ફાર્માસ્યુટિકલ અને મેડિકલ ડિવાઇસ સેક્ટરનો પણ સમાવેશ કરવામાં આવ્યો હતો. ઉદ્યોગના પ્રતિનિધિઓએ FTA ની ઝડપી નિયમનકારી પહોંચ માટેની જોગવાઈઓને આવકારી હતી, જેમાં સમકક્ષ આંતરરાષ્ટ્રીય નિયામકોના GMP અને GCP નિરીક્ષણ અહેવાલોની સ્વીકૃતિનો સમાવેશ થાય છે, જે પાલનનો બોજ ઘટાડશે અને ભારતીય ઉત્પાદકો માટે ઉત્પાદન મંજૂરીઓને ઝડપી બનાવશે. તેઓએ FTA માં આરોગ્ય અને પરંપરાગત દવાઓ પર સમર્પિત પ્રકરણના સમાવેશને આવકાર્યો હતો, જે આયુષને માન્યતા આપતો બંને દેશો માટે પ્રથમ કિસ્સો છે.

શ્રી પીયૂષ ગોયલે શિક્ષણ અને પ્રતિભા ગતિશીલતામાં આ કરાર દ્વારા ઉભી થતી મહત્વની તકો વિશે પણ વાત કરી હતી. મંત્રીએ ઉદ્યોગો અને હિતધારકોને આ જોગવાઈઓનો સક્રિયપણે લાભ લેવા વિનંતી કરી હતી, ભારતીય વિદ્યાર્થીઓ અને વ્યાવસાયિકોને FTA દ્વારા ખુલતા નવા માર્ગો શોધવા માટે પ્રોત્સાહિત કર્યા હતા અને સૌને આ કરારને બંને રાષ્ટ્રો વચ્ચે ઊંડી, લોક-કેન્દ્રીત ભાગીદારીના પ્રવેશદ્વાર તરીકે જોવા હાકલ કરી હતી.

મેદનીને સંબોધતા શ્રી ગોયલે FTA ને દરવાજા અને મન બંને ખોલનારા ગણાવ્યા હતા અને ઉદ્યોગોને સામાન્યથી આગળ વિચારવા અને ફાર્મા, આયુષ, શિક્ષણ, રમતગમત, પ્રવાસન અને રોકાણ સહિતના તમામ ક્ષેત્રોમાં કરારના સંપૂર્ણ વ્યાપનો લાભ લેવા અનુરોધ કર્યો હતો. તેમણે ઉદ્યોગ સંસ્થાઓને વિનંતી કરી કે તેના લાભો દરેક MSME અને નાના સાહસ સુધી પહોંચે તેવું સુનિશ્ચિત કરે. શ્રી ટોડ મેકક્લેએ પુનરોચ્ચાર કર્યો હતો કે ભારત ન્યુઝીલેન્ડ માટે વ્યૂહાત્મક પ્રાથમિકતા છે અને આને ન્યુઝીલેન્ડે પૂર્ણ કરેલ સર્વોચ્ચ ગુણવત્તાવાળો FTA ગણાવ્યો હતો. તેમણે બંને પક્ષોના વ્યવસાયોને સક્રિયપણે સંયુક્ત સાહસો (joint ventures) આગળ વધારવા માટે પ્રોત્સાહિત કર્યા અને ભારતની વધતી અર્થવ્યવસ્થામાં ન્યુઝીલેન્ડના વ્યવસાયો જોઈ રહ્યા છે તેવી નોંધપાત્ર રોકાણની તકો પર પ્રકાશ પાડ્યો હતો.

આગ્રામાં ઉદ્યોગ જોડાણ કાર્યક્રમ નવી દિલ્હીમાં ભારત-ન્યુઝીલેન્ડ FTA પરના સીમાચિહ્નરૂપ હસ્તાક્ષર સાથે જોડાયેલ ઉચ્ચ સ્તરીય શ્રેણીબદ્ધ સંવાદોનો એક ભાગ છે, જે 16 માર્ચ 2025 ના રોજ લોન્ચ થયાના વિક્રમી નવ મહિનામાં પૂર્ણ થયો છે, જે દ્વિપક્ષીય આર્થિક સંબંધોમાં નવા પ્રકરણની શરૂઆત કરે છે.

SM/IJ/JD

(રીલીઝ આઈડી: 2255746) મુલાકાતી સંખ્યા : 13