યુવા બાબતો અને રમત મંત્રાલય
માનનીય કેન્દ્રીય યુવા બાબતો અને રમતગમત મંત્રી ડૉ. મનસુખ માંડવિયાએ ભારતના રમતગમત ક્ષેત્રના ભવિષ્ય માટે એકીકૃત, ખેલાડી-કેન્દ્રી વિઝન તૈયાર કરવા માટે ‘શ્રીનગર ખેલ સંકલ્પ’ લોન્ચ કર્યો
શ્રીનગર ખેલ સંકલ્પ ખેલાડી-કેન્દ્રી અને સહયોગી રમતગમત ઇકોસિસ્ટમ માટે એકીકૃત પ્રતિબદ્ધતાની પુષ્ટિ કરે છે
શ્રીનગરમાં રાજ્યો અને કેન્દ્રશાસિત પ્રદેશોના યુવા બાબતો અને રમતગમત મંત્રીઓની ચિંતન શિબિરના બીજા દિવસે રમતગમત શાસન સુધારા, મેન્યુફેક્ચરિંગ ઇકોસિસ્ટમ અને યુવા જોડાણ પર ધ્યાન કેન્દ્રિત કરવામાં આવ્યું
શ્રીનગર ખેલ સંકલ્પ એ ભારતની રમતગમત ઇકોસિસ્ટમને મજબૂત કરવા માટે રાજ્યો, કેન્દ્રશાસિત પ્રદેશો અને કેન્દ્રના એકીકૃત સંકલ્પને ચિહ્નિત કરે છે
ચિંતન શિબિરના સમાપન સત્રોમાં સ્પોર્ટ્સ ગવર્નન્સ, મેન્યુફેક્ચરિંગ અને યુવા ભાગીદારી કેન્દ્રસ્થાને રહ્યા
પોસ્ટેડ ઓન:
26 APR 2026 4:59PM by PIB Ahmedabad
શ્રીનગરમાં ત્રણ દિવસીય ચિંતન શિબિરના અંતિમ દિવસે, ડૉ. મનસુખ માંડવિયાએ રાજ્યના રમતગમત મંત્રીઓ અને રમતગમત ક્ષેત્રના અગ્રણી દિગ્ગજો સાથે ‘શ્રીનગર ખેલ સંકલ્પ’ દસ્તાવેજ બહાર પાડ્યો હતો.
આ દસ્તાવેજ સહકારી સંઘવાદ (cooperative federalism) દ્વારા રમતગમતની સંસ્કૃતિને મજબૂત કરવા માટેના સામૂહિક રાષ્ટ્રીય વિઝનની રૂપરેખા આપે છે, જેમાં ખેલાડી કેન્દ્રી વિકાસ, રમતગમત ઇન્ફ્રાસ્ટ્રક્ચરનું વિસ્તરણ, પ્રતિભા ઓળખ, પ્રાદેશિક સ્પોર્ટ્સ ક્લસ્ટરોનો વિકાસ અને એકતા, યુવા સશક્તિકરણ, આરોગ્ય, પ્રવાસન અને આર્થિક વૃદ્ધિ માટે રમતગમતનો લાભ લેવા પર ધ્યાન કેન્દ્રિત કરવામાં આવ્યું છે. તે મોટી વૈશ્વિક રમતગમત સ્પર્ધાઓની યજમાની કરવાની ભારતની આકાંક્ષાની પણ પુષ્ટિ કરે છે.
શ્રીનગર ખેલ સંકલ્પ રમતગમતને રાષ્ટ્ર નિર્માણના કેન્દ્રમાં રાખવા માટે કેન્દ્ર, રાજ્યો અને કેન્દ્રશાસિત પ્રદેશોના એકીકૃત સંકલ્પને પ્રતિબિંબિત કરે છે, જે સામાજિક સંવાદિતા કેળવવા, સમુદાયોને મજબૂત કરવા અને સ્વસ્થ, વધુ સશક્ત પેઢીના નિર્માણમાં તેની ભૂમિકાને સ્વીકારે છે. તે સહયોગી અને ખેલાડી-કેન્દ્રી અભિગમ પર ભાર મૂકે છે, જ્યાં સરકારો અને રમતગમત સંસ્થાઓ સુમેળમાં કામ કરે છે, દેશભરના એથ્લેટ્સ માટે સીમલેસ અને સહાયક ઇકોસિસ્ટમ બનાવવા માટે પ્રયત્નો અને સંસાધનોનું સંરેખણ કરે છે.
આ સંકલ્પ આગળ ભારતની વિવિધતાને શક્તિ તરીકે ઉપયોગમાં લેવાના મહત્વની રૂપરેખા આપે છે, જે રાજ્યોને ઇન્ફ્રાસ્ટ્રક્ચર વિકસાવવા, પ્રતિભા ઓળખવા અને તેમના અનન્ય ભૌગોલિક, સાંસ્કૃતિક અને પ્રાદેશિક સંદર્ભોમાં મૂળ ધરાવતી રમતગમત ઇકોસિસ્ટમ બનાવવા માટે પ્રોત્સાહિત કરે છે. તે રમતગમતને સામાજિક-આર્થિક વિકાસના ચાલક તરીકે પણ સ્થાપિત કરે છે, જે પ્રવાસનને વેગ આપવા, રોજગારી પેદા કરવા, સ્થાનિક ઉદ્યોગોને પ્રોત્સાહન આપવા અને ઓલિમ્પિક અને વર્લ્ડ કપ સહિતની મુખ્ય વૈશ્વિક રમતગમત ઇવેન્ટ્સની યજમાની કરવા તરફ ભારતની મહત્વાકાંક્ષાને સક્ષમ બનાવવાની તેની ક્ષમતાને પ્રકાશિત કરે છે.
ચિંતન શિબિરના અંતિમ દિવસની શરૂઆત ફિટ ઇન્ડિયા “સન્ડેઝ ઓન સાયકલ” (Sundays on Cycle) સાયકલોથોન સાથે થઈ હતી, જેનું નેતૃત્વ માનનીય કેન્દ્રીય મંત્રી ડૉ. મનસુખ માંડવિયા અને રાજ્ય મંત્રી શ્રીમતી રક્ષા ખડસેએ કર્યું હતું, જે ફિટનેસ, શિસ્ત અને સામૂહિક ભાગીદારીનો સંદેશ આપે છે.
ત્યારબાદ સ્પોર્ટ્સ ગવર્નન્સ, સ્પોર્ટ્સ ગુડ્સ મેન્યુફેક્ચરિંગ અને 'માય ભારત' (MY Bharat) દ્વારા યુવા જોડાણ પર કેન્દ્રિત સત્રો યોજાયા હતા, જેમાં સંસ્થાકીય માળખાને મજબૂત કરવા, હિતધારકો વચ્ચે પારદર્શિતા અને સંકલન વધારવા અને રમતગમત વહીવટને વ્યાવસાયિક બનાવવા પર ભાર મૂકવામાં આવ્યો હતો. વિચાર-વિમર્શ દરમિયાન ક્લસ્ટર-આધારિત વિકાસ, નવીનતા અને સ્થાનિક ઉદ્યોગ માટે સમર્થન દ્વારા ભારતને સ્પોર્ટ્સ સામાનના ઉત્પાદન માટે વૈશ્વિક હબ તરીકે સ્થાપિત કરવાની જરૂરિયાત પર પણ પ્રકાશ પાડવામાં આવ્યો હતો, જ્યારે યુવા ભાગીદારી અને નેતૃત્વ માટે સંરચિત પ્લેટફોર્મ બનાવવાના મહત્વની રૂપરેખા આપવામાં આવી હતી.
સમાપન દિવસના વિચાર-વિમર્શમાં કેન્દ્ર, રાજ્યો અને તમામ હિતધારકોને સંલગ્ન એકીકૃત અને સંકલિત અભિગમના મહત્વનો પુનરોચ્ચાર કરવામાં આવ્યો હતો, જેમાં ચિંતન શિબિર ભારતમાં મજબૂત, સર્વસમાવેશક અને ભવિષ્ય માટે તૈયાર યુવા અને રમતગમત ઇકોસિસ્ટમના નિર્માણ માટે સંવાદ, સંરેખણ અને સામૂહિક કાર્યવાહી માટેના મુખ્ય પ્લેટફોર્મ તરીકે સેવા આપે છે.
SM/DK/JD
(રીલીઝ આઈડી: 2255704)
મુલાકાતી સંખ્યા : 16