ભારતના ઉપરાષ્ટ્રપતિ, શ્રી સી. પી. રાધાકૃષ્ણને આજે કર્ણાટકના બિદર જિલ્લાના ભાલ્કીમાં શ્રી ચન્નાબાસાવશ્રમ ખાતે હિરેમઠ સંસ્થાના પૂજ્ય ડૉ. બસવલિંગ પટ્ટદેવરુ મહાસ્વામીજીની 75મી જન્મજયંતિ નિમિત્તે અમૃત મહોત્સવની ઉજવણીનું ઉદ્ઘાટન કર્યું હતું.

સભાને સંબોધતા ઉપરાષ્ટ્રપતિએ શિક્ષણ, સુધારા અને આધ્યાત્મિક વિચારધારાના ઐતિહાસિક કેન્દ્ર એવા બિદરના આધ્યાત્મિક રીતે સમૃદ્ધ ક્ષેત્રમાં હાજર રહેવા બદલ આનંદ વ્યક્ત કર્યો હતો. બસવન્નાના વારસાનો ઉલ્લેખ કરતા, તેમણે સમાનતાને પ્રોત્સાહન આપવા અને સામાજિક ભેદભાવનો વિરોધ કરવાના તેમના અગ્રેસર પ્રયાસો પર પ્રકાશ પાડ્યો હતો. તેમણે નોંધ્યું હતું કે વિશ્વના પ્રથમ આધ્યાત્મિક મંચ તરીકે ગણાતા 'અનુભવ મંટપ'ના આદર્શો પેઢીઓને પ્રેરણા આપતા રહે છે.

પૂજ્ય ડૉ. બસવલિંગ પટ્ટદેવરુ મહાસ્વામીજીના યોગદાન પર પ્રકાશ પાડતા ઉપરાષ્ટ્રપતિએ તેમને કરુણા અને સેવાના સાચા સ્વરૂપ તરીકે વર્ણવ્યા હતા. તેમણે 500 થી વધુ અનાથ અને તરછોડાયેલા બાળકોને આશ્રય, શિક્ષણ અને ગરિમા પૂરી પાડવા અને 20,000 થી વધુ વિદ્યાર્થીઓની સેવા કરતી 60 થી વધુ સંસ્થાઓના વિશાળ શૈક્ષણિક નેટવર્કનું નિર્માણ કરવાના તેમના પ્રયાસોની પ્રશંસા કરી હતી.

પ્રધાનમંત્રી શ્રી નરેન્દ્ર મોદી દ્વારા વ્યક્ત કરાયેલ "વિકાસ ભી, વિરાસત ભી" ના વિઝનનો ઉલ્લેખ કરતા ઉપરાષ્ટ્રપતિએ ભારપૂર્વક જણાવ્યું હતું કે ભારતનો વિકાસ તેના સમૃદ્ધ સાંસ્કૃતિક અને આધ્યાત્મિક વારસાની સાથે સાથે થવો જોઈએ. તેમણે અવલોકન કર્યું કે ભારત આજે તકનીકી રીતે અદ્યતન, આર્થિક રીતે મજબૂત અને વૈશ્વિક સ્તરે પ્રભાવશાળી તરીકે ઉભરી રહ્યું છે, જ્યારે તે તેની સંસ્કૃતિના મૂલ્યોમાં ઊંડે સુધી જોડાયેલું છે.

ઉપરાષ્ટ્રપતિએ નોંધ્યું હતું કે વારસાના સંરક્ષણ, પરંપરાગત પદ્ધતિઓ, યોગ અને સાંસ્કૃતિક વિરાસત પર ફરીથી ભાર મૂકવાથી નાગરિકોમાં ગૌરવની ભાવના કેળવાઈ છે અને સંસ્કૃતિ પ્રત્યેનો આત્મવિશ્વાસ મજબૂત થયો છે. તેમણે ઉમેર્યું હતું કે આવા પ્રયાસો માત્ર ઈમારતોને સાચવવા માટે જ નથી, પરંતુ આત્મવિશ્વાસ પુનઃસ્થાપિત કરવા અને લોકોને ભારતના શાશ્વત મૂલ્યો અને પરંપરાઓ સાથે ફરીથી જોડવા માટે છે.

ઉપરાષ્ટ્રપતિએ મહિલા સશક્તિકરણના મહત્વ પર પણ ભાર મૂક્યો અને જણાવ્યું કે "નારી શક્તિ" રાષ્ટ્ર નિર્માણના કેન્દ્રમાં છે. તેમણે અવલોકન કર્યું કે મહિલાઓ નેતૃત્વની ભૂમિકામાં સહાનુભૂતિ અને કરુણા લાવે છે અને જ્યારે મહિલાઓ આગળ વધે છે, ત્યારે પરિવારો સમૃદ્ધ થાય છે, સમુદાયો વધુ મજબૂત બને છે તેમજ રાષ્ટ્ર પ્રગતિ કરે છે.

આ પ્રસંગે ઉપરાષ્ટ્રપતિએ લોકોને પૂજ્ય સ્વામીજીના જીવન અને ઉપદેશો તથા બસવન્નાના દર્શનમાંથી પ્રેરણા લેવા અને સમાનતા, કરુણા અને ધર્મમાં જોડાયેલા સમાજના નિર્માણ માટે કામ કરવા આહવાન કર્યું હતું.

કાર્યક્રમ દરમિયાન 'કલ્યાણ કારુણ્ય' (અભિનંદન ગ્રંથ) નામનું પુસ્તક અને 'બસવ કિરણ' નામનું ફોટો આલ્બમનું વિમોચન કરવામાં આવ્યું. ઉપરાષ્ટ્રપતિએ ચન્નાબાસવ પટ્ટદેવરુની સમાધિની પણ મુલાકાત લીધી હતી અને પ્રાર્થના કરી હતી.

આ પ્રસંગે કર્ણાટકના રાજ્યપાલ શ્રી થાવરચંદ ગેહલોત; રાજ્યસભામાં વિરોધ પક્ષના નેતા શ્રી મલ્લિકાર્જુન ખડગે; કર્ણાટક સરકારના વન, ઇકોલોજી અને પર્યાવરણ મંત્રી શ્રી ઈશ્વર ખંડરે; કર્ણાટક સરકારના મ્યુનિસિપલ એડમિનિસ્ટ્રેશન મંત્રી શ્રી રહીમ ખાન; અને અન્ય કેટલાક મહાનુભાવો, આધ્યાત્મિક નેતાઓ અને જાહેર પ્રતિનિધિઓ ઉપસ્થિત રહ્યા હતા.

SM/BS/JD