ભારતના રાષ્ટ્રપતિ શ્રીમતી દ્રૌપદી મુર્મુએ આજે (20 એપ્રિલ 2026) રાષ્ટ્રપતિ ભવનમાં કોરિયા પ્રજાસત્તાકના રાષ્ટ્રપતિ, મહામહિમ લી જે-મ્યુંગનું સ્વાગત કર્યું. રાષ્ટ્રપતિ શ્રીમતી દ્રૌપદી મુર્મુએ તેમના સન્માનમાં ભોજન સમારંભનું પણ આયોજન કર્યું હતું.

ભારતની પોતાની પ્રથમ મુલાકાતે આવેલા રાષ્ટ્રપતિ મ્યુંગનું સ્વાગત કરતા, રાષ્ટ્રપતિ શ્રીમતી દ્રૌપદી મુર્મુએ ભારત-કોરિયા દ્વિપક્ષીય સંબંધોને મજબૂત કરવા, ખાસ કરીને 'કોરિયા-ભારત સંસદીય મૈત્રી જૂથ'ના અધ્યક્ષ તરીકેના તેમના મહત્વપૂર્ણ યોગદાનની પ્રશંસા કરી. તેમણે કહ્યું કે રાષ્ટ્રપતિ તરીકે તેમના કાર્યકાળના પ્રથમ વર્ષની અંદર જ આ મુલાકાત, આપણા સંબંધોને આપવામાં આવતા તેમના મહત્વને દર્શાવે છે.

રાષ્ટ્રપતિએ કહ્યું કે ભારત અને કોરિયા બંને જીવંત લોકશાહી છે જે સમાન મૂલ્યો ધરાવે છે. તેમને એ જાણીને આનંદ થયો કે ભારતની સંસદમાં તાજેતરમાં 'ભારત-કોરિયા સંસદીય મૈત્રી જૂથ'ની રચના કરવામાં આવી છે. તેમણે કહ્યું કે આનાથી ભારતીય સંસદ અને કોરિયન નેશનલ એસેમ્બલી વચ્ચે સંવાદ અને આદાનપ્રદાનને પ્રોત્સાહન મળશે. આનાથી પરસ્પર સમજ અને વિશ્વાસ વધુ મજબૂત થશે.

રાષ્ટ્રપતિને એ જાણીને આનંદ થયો કે બંને પક્ષોએ જહાજ નિર્માણ, બંદર વિકાસ, ડિજિટલ સહયોગ, લઘુ અને મધ્યમ ઉદ્યોગો, સ્ટીલ, શિક્ષણ, સંશોધન, સંસ્કૃતિ અને લોકો વચ્ચેના સંપર્ક સહિત અનેક ક્ષેત્રોમાં દ્વિપક્ષીય સહયોગ માટે મહત્વાકાંક્ષી કાર્યક્રમો નક્કી કર્યા છે. તેમણે એ પણ જણાવ્યું કે બંને પક્ષોએ 'વ્યાપક આર્થિક ભાગીદારી સમજૂતી' (CEPA) પર વાટાઘાટો ફરી શરૂ કરવા માટે સંયુક્ત ઘોષણા સ્વીકારી છે. તેમણે કહ્યું કે ભારત પરસ્પર ફાયદાકારક વ્યાપાર સંબંધોને આગળ વધારવા અને AI, સેમિકન્ડક્ટર, ઇલેક્ટ્રોનિક્સ, સ્વચ્છ ઊર્જા, સેવાઓ અને પ્રવાસન જેવા ક્ષેત્રોમાં કોરિયા સાથે સહયોગ મજબૂત કરવા માટે તત્પર છે.

રાષ્ટ્રપતિએ કહ્યું કે ભારત પાસે કૌશલ્ય, ગતિ અને વ્યાપક સંભાવનાઓ છે, જ્યારે કોરિયા પાસે હાઈ-ટેક મેન્યુફેક્ચરિંગમાં નિપુણતા છે. આપણી શક્તિઓને જોડીને, આપણે આપણા યુવાનો માટે અસંખ્ય તકો સર્જિત કરી શકીએ છીએ.

રાષ્ટ્રપતિએ કહ્યું કે ભારત અને કોરિયાએ માનવતા માટે ટકાઉ ભવિષ્ય સુનિશ્ચિત કરવા માટે હરિત અને સ્વચ્છ ઊર્જાની સાથે જ અન્ય આબોહવા ટેકનોલોજીના ક્ષેત્રમાં સહયોગની તકો શોધવી જોઈએ.

બંને નેતાઓ એ વાત પર સહમત થયા હતા કે ભારત અને કોરિયા વચ્ચેના ગાઢ સહયોગથી આપણા લોકોને અપાર લાભ મળી શકે છે અને બંને એકબીજા પાસેથી ઘણું શીખી શકે છે. પર્યાવરણ, નવાચાર, શિક્ષણ, કૌશલ્ય વિકાસ અને ટેકનોલોજી જેવા ક્ષેત્રોમાં સાથે મળીને કામ કરવાથી આપણા લોકો લાભાન્વિત થઈ શકે છે.

રાષ્ટ્રપતિના સંબોધન માટે કૃપા કરીને અહીં ક્લિક કરો-

SM/BS/GP

સોશિયલ મીડિયા પર અમને ફોલો કરો :  @PIBAhmedabad    /pibahmedabad1964    /pibahmedabad  pibahmedabad1964[at]gmail[dot]com