اقلیتی امور کے مرکزی وزیر جناب کرن رجیجو نے تمام عازمین حج کو اپنی نیک خواہشات پیش کیں اور ایک ہموار ، محفوظ اور پرسکون حج کے تجربے کو یقینی بنانے کے حکومت کے عزم کا اعادہ کیا۔ اقلیتی امور کی وزارت کے سکریٹری ڈاکٹر شری وتس کرشنا نے آج صبح 9:45 بجے، حج 2026 کے لیے دہلی سے مدینہ جانے والی عازمین حج کی پہلی پرواز کو جھنڈی دکھا کر رخصت کیا۔ روانگی کے مقام پر عازمین سے خطاب کرتے ہوئے، انہوں نے ایک آسان، محفوظ اور روحانی طور پر مکمل سفر کے لیے تہہ دل سے نیک خواہشات پیش کیں۔

ڈاکٹر کرشنا نے عازمینِ حج کو یقین دلایا کہ حکومتِ ہند ان کے آرام اور فلاح و بہبود کو پورے حج کے دوران یقینی بنانے کے لیے مکمل طور پر پُرعزم ہے۔ انہوں نے بتایا کہ طبی امداد اور لاجسٹک معاونت سمیت جامع انتظامات، بھارت کا قونصل خانہ، جدہ اور سعودی حکام کے ساتھ قریبی رابطہ و تعاون کے تحت کیے گئے ہیں تاکہ حج کا سفر نہایت ہموار اور سہل بنایا جا سکے۔

عازمینِ حج سے گفتگو کرتے ہوئے سیکرٹری نے حج کے عمل کو مزید جامع، شفاف اور مؤثر بنانے کے لیے حکومت کی مسلسل کوششوں کو اجاگر کیا۔ انہوں نے زور دیا کہ مسلسل اصلاحات جیسے درخواست کے پورے عمل کی مکمل ڈیجیٹلائزیشن، انتخاب کے مرحلے میں بڑھتی ہوئی شفافیت اور روانگی کے مقامات پر بہتر سہولیات نے ملک بھر کے عازمینِ حج کے لیے رسائی کو نمایاں طور پر بہتر بنایا ہے۔

روانہ ہونے والے عازمین حج نے حکومت کے اقدامات اور انتظامات کو سراہا۔ مضبوط انفراسٹرکچر، تکنالوجی پر مبنی اقدامات اور جاری اصلاحات کے ساتھ، حج 2026 ہندوستانی عازمین کے لیے حج کے مجموعی تجربے کو مزید بہتر بنانے کے لیے تیار ہے۔

مرکزی وزیر جناب کرن رجیجو نے حج کے مقدس سفر پر جانے والے تمام 1,75,025 عازمین کے تئیں اپنی دلی خواہشات کا اظہار کیا اور ایک ہموار، محفوظ اور آرام دہ حج کے تجربے کو یقینی بنانے کے لیے حکومت کے عزم کا اعادہ کیا۔ انہوں نے اس بات پر روشنی ڈالی کہ وزارت نے اس سال حجاج کے لیے خدمات کے معیار کو مزید بہتر بنانے کے لیے متعدد نئے اقدامات کیے ہیں۔
 

******

(ش ح –ا ب ن)

Uno-5999