ইকায় খুম্নরবা সভাপতি জী,

সভা অসিগী মহুৎ শিন্দুনা অমসুং ঐহাক্কী মায়কৈদগী, ঐহাক্না শ্রীমান হরিবংশ জীবু য়াম্না নুংঙাইবা ফোঙদোকচরি অমসুং য়াইফ-পাউজেল পীজরি। রাজ্য সভা উপসভাপতি ওইনা থংন-থংননা অহুম্লকশুবা ওইনা খল্লকপা অসি সভা অসিনা অদোমগী মথক্তা থম্লিবা অচেৎপা থাজবা অদুগী খুদম্নি অমসুং হৌখিবা মতমদা অদোমগী মফমদগী সভা অসিনা ফংখিবা কান্নবা, পুম্নমকপু অমত্তা ওইনা পুন্না চৎমিন্ননবা অদোমনা হোৎনখিবা অদু হৌজিক্তি সভা অসিনা সীল অমা নমখ্রে অমসুং মসি অদোমগী খঙ-হৈবববু ইকায় খুম্নবনি, অদোমগী থবক তৌবগী মওংবু ইকায় খুম্নবনি অমসুং মসি মীয়াম পুম্নমক্না য়ানবা ৱাফমসু ওইরি। ঐখোয় পুম্নমক্না হরিবংশ জীগী লুচিং মখাদা সভা অসিগী শক্তি হেন্না মতিং লৈহনবা উখ্রে অমসুং ঐহাক্না হায়বা ঙম্মি মদুদি সভা অসিগী থবক-থৌরমশিং চলাইবতা নত্তনা, মহাক্কী পুন্সিগী হৌখিবা মতমগী খঙ-হৈবশিং অদুসু সভা অসিবু হেন্না মতিং লৈহনবদা নিংথিনা শীজিন্নৈ। মহাক্কী খঙ-হৈবা অসিনা সভা চলাইবগী থৌরম অমসুং সভা অসিগী অকোয়বগী ফীভম অসিবু হেন্না মপুং ফাহল্লে। উপসভাপতি জীগী অনৌবা মতম অসি অসিগুম্বা ৱাখল্লোন, খল চানবা অমসুং কৎথোকপগা লোয়ননা মাংলোমদা চঙশিনগনি অমসুং ঐখোয় পুম্নমক্না হোৎনবদগী সভা অসিগী মীংচৎ অনৌবা থাক অমদা য়ৌগনি হায়না ঐহাক্না থাজৈ‍।‍

ইকায় খুম্নরবা সভাপতি জী,

হরিবংশ জী উত্তর প্রদেশকী খুঙ্গং অমদা পোকখি অমসুং মহাক্কী মহৌশাগী ওইবা খুঙ্গংগী লমদমদগী মহাক্না মহৈরোয় ওইরিঙৈ মতমদগী হৌনা মহাক্কী খুঙ্গং চাওখৎনবা করিগুম্বা খরা হোৎনদুনা লাকখি। মহাক্কী লাইরিক-লাইশু কাশীদা তম্লকখি অমসুং হৌখিবা মতমদা মসিগী মতাংদা ঐহাক্না ফনা য়াম্না ফোঙদোকখ্রে, মরম অদুনা ঐহাক্না হৌজিক্তি মদু অমুক হন্না হায়জররোই। ঙসি ঐহাক্না ৱাফম অমা শোইদনা থমজগে, ঙসি অসি এপ্রিল ১৭নি অমসুং এপ্রিল ১৭, ১৯২৭ অসি ঐখোয়গী হান্নগী প্রধান মন্ত্রী চন্দ্র শেখর জীগী মপোক নুমিৎসুনি অমসুং মসিগী অখন্নবা ৱাফম অসিদি ঙসি এপ্রিল ১৭ তা অদোম্না অহুম্লকশুবা ওইনা থৌদাং অসি লৌবা লাক্লিবা অসি চন্দ্র শেখর জীগী মপোক নুমিত্তা ওইরি অমসুং চন্দ্র শেখর জীগা অদোমগা লৈনবা অচেৎপা মরী, মহাক্কী মথক্তা লৈবা নুংশিবা অমসুং মহাক্কী অপুনবা থবক-থৌরমশিংদা অদোম মহাক্কী খোঙবু অমা ওইনা লৈখিবা অসি য়াম্না চাউবা পাম্বৈ অমনি। অদোম্না চন্দ্র শেখর জীগী পুন্সিগী মতাংদা লাইরিকশিং ইখ্রে অমসুং চন্দ্র শেখর জীগী অচৌবা পুন্সি ৱারী অদু অনৌবা মীরোলশিংদা য়ৌহনবগী চাউরবা থবক অমসু অদোম্না পাঙথোকখ্রে, মরম অদুনা চন্দ্র শেখর জীগী মপোক নুমিত্তা অদোমগী অহুম্লকশুবা থৌদাং অসি হৌবা অসি অদোমগীদমক য়াম্না অখন্নবা মতম অমা ওইরি। হরিবংশ জীগী মীয়ামগী পুন্সি অসি পার্লিয়ামেন্তকী থবকশিংনা লোইবা নত্তে। পাউমী অমা ওইবগী মহাক্কী অৱাংবা থাক্কী থৌদাংশিং অসি ঙসি ফাওবা মীয়ামগী ফীদম অমা ওইনা নীংশিংনরি। মহাক্কী পুন্সিগী অয়াম্বা মতম পাউমী ওইখি, অদুবু পাউমীগী শিনফম অসিদসু মহাক্না অৱাংবা থাক্কী থৌদাংশিংবু মহৌশাদগী তঙাইফদবা অমনি হায়না লৌখি। ঐখোয় পুম্নমক্না খঙই, মহাক্কী খুৎইদা শাফু লৈ, অদুবু মহাক্কী ৱাঙাং অমসুং লমচৎ-শাজৎতি ফীদম ওইবা মওংদা চীং লেম্বা অমসুং নীংথিবা ওই, মসি মহাক্কী অখন্নবা মগুন অমনি অমসুং ঐহাক্না গুজরাততা লৈরিঙৈদসু মহাক্কী খুৎইশিং অদু পাবগী হৈনবী লৈখি অমসুং ঐহাক্না উখি মদুদি মহাক্না মহাক্কী ৱাখল্লোন অদু য়াম্না চেৎনা থম্লম্মি অমসুং মদুদা মহাক্না নীংথিনা থিজিন্দুনা অমসুং নৈনদুনা থবক তৌবগী মহৈ অদু উবা ফংলম্মি। পাউমীগী শিনফমদসু খুন্নাইগী কাচিন কোয়া য়ৌনবা মহাক্না লেপ্তনা হোৎনখি অমসুং মায় পাকপা হোৎনজমন অমসু ওইখি, অমসুং ঐখোয়না উবা ফংলি, সভা অসিদসু পোলিসী ওইগেরা নত্রগা প্রোসেস ওইগেরা, মসিগী মফমশিংদা মহাক্কী ৱাখল্লোনগী মমি অদু ঐখোয়না উবা ফংলি অমসুং মসি ঐখোয় পুম্নমক্কী ওইনা নুংঙাইবা ৱাফম অমনি। মহাক অসি খুন্নাইগী অশেংবা ফীভমশিংগা নক্না মরী লৈনদুনা থবক তৌবা মীওই অমা ওইদুনা লাকখি। ঐহাক্না হায়জনিংই, লোক সভা ওইগেরা নত্রগা রাজ্য সভা ওইগেরা, অনৌবা এম.পি. লাকপা মীওইশিংনা হরিবংশ জীগী মফমদগী য়াম্না তম্বা য়াই, মহাক্কা ৱারী শাদুনা য়াম্না খঙবা য়াই, মরমদি মহাক পাউমী ওইরিঙৈদা ‘ঐখোয়গী এম.পি. অসি করম্বা মওংদা ওইগদবগে’ হায়বা কলম অমা ইরম্মি, মতম অমদা মহাকসু মফম অসিদা ফমলখিগনি হায়বা মহাক্না মতমদুদা খঙলম্লোই‍। অদুবু মহাক্না ইরম্মি অমসুং মহাক্কী ৱাফমশিং অদু য়াম্না পাক চাউনা কোনশিল্লম্মি‍। সভা অসিগী মীংচৎ অমসুং শরুক য়াম্লবা মেম্বরশিংগী থৌদাং, হৌজিক্তি মহাক্কী লমচৎ-শাজৎ অমসুং ৱাখল্লোনশিং অদুসু মহাক্না নীংথিনা থিজিনখ্রে অমসুং মসিগী ৱাফমশিং অসি সভা অসিগী মরুপশিংনা মহাক্কা লোয়ননা ফমিন্নদুনা মমুৎ তানা খঙহৌবা অমসুং তম্বা য়াই। পুং কায়দনা থবক তৌবা, লমচৎ নাইবা পুন্সি অমসুং মহাক্কী থৌদাংশিংগী মতাংদা লুম্না লৌবা অসি অদোমগী অখন্নবা মগুন অমনি অমসুং মসিগী মরম্না ময়াম পুম্নমক্না য়ানবা মীওই অমা ওইরিবনি‍। মহাক রাজ্য সভাগী মেম্বর ওইরকপদগী ঐখোয়না উখ্রে, মহাক মতম পুম্নমক সভা অসিদা লৈ। সভাপতি জী লৈতেবা মতমদা সভা অসি চলাইবগী থবক তৌবতা নত্তনা, অতোপ্পা মতমদসু মসিদা কমিতীগী মীওই অমা হেক্তা ফম্লবসু মহাক মতম পুম্নমক সভা অসিদা লৈ। ৱাফম পুম্নমক তায়, মতম অদুদা সভা অসি চলাইরিবা মীওই অদু উবদা মহাক্কী থৌদাং অদুগী মতাংদা মহাক্কী লৈরিবা ফিরেপ অদু উবা ফংই অমসুং মসি ঐখোয় পুম্নমক্কী ওইনা তম্বা য়াবা ৱাফম অমনি অমসুং মহাক্না মসিগীদমক মহাক্কী মতম পুম্নমক কৎথোকখি।

ইকায় খুম্নরবা সভাপতি জী,

উপসভাপতি অমা ওইনা সভা অসিবু করম্না চলাইগদগে, সভা অসিদা মেম্বর অমা ওইনা করি মতেং পাংগদগে, মসিগী মতাংদা ঐখোয়না মহৌশানা অফবা মওংদা খন্ন-নৈনদুনা লাক্লি। অদুবু সভা অসিগী মপানদা, মীয়ামগী মরক্তা মহাক্না মহাক্কী গনতন্ত্রগী অমসুং খুন্নাইগী থৌদাংশিং অদু করম্না পাঙথোকপগে হায়বসিনি মীয়ামগী পুন্সিদা লৈরিবা মীওইশিংগী ওইনা অশেংবদা মীৎয়েৎ চঙনিংঙাই ওইবা হিরম অমা ওইরিবা অমসুং ঐখোয়না মসি খঙগদবনি। ঐহাক্কী খঙজগী মতুং ইন্না মহাক্কী থবক অসি থাগৎনিংঙাই ওইবতা নত্তনা মসি অতোপ্পনা তুং ইননিংঙাইসু ওই। ঐখোয়গী লৈবাক অসি নহারোলশিংগী লৈবাক অমনি অমসুং হরিবংশ জীনা মহাক্কী মতম অয়াম্বা নহারোলশিংগী মরক্তা লৈবদা হেন্না পামজৈ। নহারোলশিংগী মরক্তা লেপ্তনা লুম্না লৌবা হিরমশিংগী মতাংদা খঙহন্নবা অমসুং মীয়ামদা মহৈ-মশিং পীবগী থবক অসি লেপ্তনা চত্থনবা মহাক্না লেপ্তনা হোৎনদুনা লাক্লি, মরম অদুনা মহাক্না লৈবাক শিনবা থুংনা কোইচেন চৎলি। মীদিয়াগী মীৎয়েঙদা কুইনা লৈবা মহাক্না পামজদে, অদুম ওইনমক মহাক্কী কোইচেন চেনবা অমসুং থৌরমশিংগী মশিংদি লেপ্তনা চত্থরি। ২০১৮ দা, মহাক্না রাজ্য সভাগী উপসভাপতিগী থৌদাং লৌবা হৌরকপদগী ঐহাক্না খঙজবা ফাওবদা, কলেজ অমসুং য়ুনিভর্সিতীশিংদা থৌরম ৩৫০ পাঙথোকখ্রে। মসি য়াম্না চাউবা থবক অমনি। লৈবাক অসিগী য়ুনিভর্সিতী অমসুং কলেজশিংদা থৌরম ৩৫০ হেন্না পাঙথোকপা, চৎপা, নহারোলশিংগা লোয়ননা ফমমিন্নবা, ৱারী শানবা অমসুং মসিগীদমক হীরমশিং শেম-শাবা হায়বসি তশেংবনা অচৌবা থৌদাং অমা ওইনা পাঙথোকখিবনি অমসুং নহারোলশিংগা মরী লৈনবগী পান্দম অদু অদোম্না মিৎকুপ অমা ফাওবা মাঙহনখিদে। অমসুং বিকসিত ভারতকী মঙলান অসি নহারোলশিংগীদমক করিগী ওইগদবগে হায়বা মরম অসি মহৈরোয়শিংগী ৱাখল্লোনগা চুনবা মওংদা মহাক্না তাকপীরি। মহৈরোয়শিংদা, অনৌবা মীরোলশিংদা মশানা মশাদা থাজবা করম্না থমগদগে অমসুং অৱা-মৈশাশিংদগী করম্না মতম পুম্নমক লাপ্না লৈগদগে হায়বা হীরম পুম্নমক অসিগী মতাংদা মহাক্না খন্ন-নৈনৈ। মহাক্না পুন্সি ৱারীগী ওইবা খুদম খরগা লোয়ননা ৱারী শাই মদুদি ঐখোয়না চাউখৎপগী লম্বীদা করম্বা মরমশিংনা থুনা মাঙলোমদা চঙবা ঙমখিদ্রিবনো, অমসুং হৌজিক্তি করি খুদোংচাবা লাক্লে, ৱাফম পুম্নমক অসি খঙহন্দুনা লৈবাক অসিনা অসিগুম্বা চাউরবা খোঙথাং অমা করম্না চঙশিনবা ঙমগনি হায়বগী থাজবা পীবগী থবক মহাক্না তৌই। হৌজিক মতমসিদা লৈবাক অসিদা লিতরেচর ফেস্তিবেলগী চাউরবা খোঙথাং অমা চত্থরি অমসুং হৌজিক্তি মসি তিয়র-2, তিয়র-3 সহরশিং ফাওবা য়ৌখ্রে। লিতরেচর ফেস্তিবেলশিং অসিদসু হরিবংশ জী অয়াম্বা ওইনা চৎলি অমসুং খুন্নাই অদুগী, কাঙলুপ অদুগী মীওইশিংবু মহাক্কী ৱাখল্লোনশিংনা ইথিল পী অমসুং পুক্নিং থৌগৎপীরি।

ইকায় খুম্নরবা সভাপতি জী,

ঐহাক্না মহাক্কী পুন্সিগী থৌদোক অমা তাখি, মদুদি ঐহাক্না খঙজরিবা অসি চুম্লমদবসু য়াই। ঐহাক্না তখি মদুদি ১৯৯৪ দা হরিবংশ জী অহানবা ওইনা মপান লৈবাক্কী খোঙচৎ অমা চৎখি অমসুং মহাক অমেরিকাদা চৎখি। অমেরিকাদা চৎপা মতমদা, মহাক্কী থৌরম পুম্নমক্কী মথক্তা মহাক্কী মফমদা অতোপ্পা কদায়দা চৎনিংবগে নত্রগা করি তৌনিংবগে হায়না হংখি। মদুদা মহাক্না হায়খি মসি চাওখৎলবা লৈবাক অমনি, মরম অদুনা ঐহাক্না মসিগী য়ুনিভর্সিতীশিং অদু উনিংই অমসুং খঙনিংই, অমসুং মফম অদুগী করম্বা মখলগী মহৈ-মশিং অমসুং চৎনবীনা মরম ওইরগা লৈবাক অসি অসিগুম্না মাঙলোমদা চঙখিবনো হায়বসিনি। মহাক্না মহাক্কী লেপ্পা থৌরমশিংগী মপানদা মহাক্কী অহানবা অমেরিকাগী খোঙচত্তা খ্বায়দগী অয়াম্বা মতম য়ুনিভর্সিতীশিংদা কৎথোকখি অমসুং মদুদা থিজিন-হুমজিনবগী থবক তৌখি। হায়বদি, মহাক্কী পুক্নিংদা লৈরিবা মঙলান অসিদি, করিগুম্বা চাওখৎলবা লৈবাক্কী য়ুনিভর্সিতীশিংদগী চাওখৎপগী মচাকশিং লাক্লবদি, ভারতকী য়ুনিভর্সিতীশিংদসু অসিগুম্না ওইগদবনি, মরমদি বিকসিত ভারতকী মঙলান অসি মফম অদুদগী হৌবা ঙমগদবনি হায়না খনখি‍।

ইকায় খুম্নরবা সভাপতি জী,

এম.পি. শিংনা MPLAD ফন্দগী মতাংদা য়াম্না খন্ন-নৈনৈ অমসুং মসি এম.পি.শিংগী মরক্তা মরুওইবা হিরম অমসু ওইদুনা লাক্লি, অমসুং অমরোমদা MPLAD ফন্দ অসি চাউনা লৈরি অমসুং অতোপ্পা নাকল অমদনা MLA ফন্দনা হেন্না চাউরে হায়না খন্ন-নৈনবসু য়াওরি‍। অদুবু এম.পি. ফন্দ অসি করম্না শীজিন্নগদগে, MPLAD ফন্দগী মতাংদা লৈরিবা হরিবংশ জীগী ৱাখল্লোনশিং অদুদি ঐহাক ইশামকসু তাখ্রে, ঐহাক মসিদগী ইথিল ফংজৈ, অদুবু ঐখোয়গীসু করিগুম্বা অৱাবা খরা লৈরে। মহাক্কী পামজরিবা অদু মপুং ফাহনবা ঐখোয়না ঙমখিদ্রে, মরমদি অসিগুম্বা হিরমশিংদা পুম্নমকপু অমত্তা ওইনা পুন্না চৎমিন্নবা হায়বসি খরা ৱায়। অদুম ওইনমক মহাক্না মশাগী থৌদাং অদু করম্না পাঙথোকখিবগে, ঐহাক্না খঙই মদুদি মহাক্না MPLAD ফন্দ অসি মহাক্কী ৱাখল্লোনশিং অদু মনুং হুৎনা মপুং ফাহন্নবগীদমক শীজিন্নখি, মসিদা মহৈ-মশিংগী লম অমসুং নহা মীরোলনা মরুওইবা শরুক ওইখি, মহাক্না MPLAD ফন্দ শীজিন্নবগী মতাংদা অশেংবা খুদম অমা উৎখ্রে। মহাক্না য়ুনিভর্সিতী অমসুং মহৈ-শঙশিংদা অসিগুম্বা থিজিন-হুমজিনবগী সেন্তরশিং শেমগৎখি অমসুং মসিগী শাফু অসি কুইনা লৈহৌগদবনি অমসুং মদুসু প্রোজেক্ত ওরিএন্তেদ ওইবা, খুদোংংচাদবশিং কোকহন্ববু মরুওইবা পান্দম ওইনা থমখি। মহৌশাগী ওইনা মাঙলক্লিবা ভারতকী লোলশিং অসি ঙাকশেন্নবগীদমক মহাক্না IIT পাত্নাদা থিজিন-হুমজিনবগী সেন্তর অমগীদমক MPLAD ফন্দ শীজিন্নখি, মরম অদুনা থবক অদু মফম অদুদা লেপ্তনা চত্থরি। মহাক্না অতোপ্পা থবক অমসু তৌখি, মদুদি বিহারগী মফম খরদা নোংম-নোংমগী ওইনা অকিবা য়ুহা হাবগী থৌদোকশিং থোক্লি, নেপালদা অকনবা য়ুহা অমা হারবসু মফম অদুদা শাফু পীরি। থবক অসি মীৎয়েৎ চঙলদুনা মহাক্না MPLAD ফন্দদগী ‘সেন্তর ফোর আর্থক্বেক ইঞ্জিনিয়রিং’ ওইনা থিজিন-হুমজিনবগী সেন্তর অমা হাংদোকহনখি। হায়বদি থিজিনবা, নৈনবা অমসুং মসিদা লেপ্তনা থবক তৌবা। ঐখোয়না খঙই মদুদি ঐহাক্না হায়খিবগুম্না, জয় প্রকাশ জীগী খুঙ্গং সিতাব দিয়ারাদা হরিবংশ জী লৈ অমসুং মফম অদুদা গঙ্গা অমসুং ঘাঘরা হায়বা তুরেল অনিগী মরক্তা লৈবা খুঙ্গং অমনি, মরম অদুনা মতম পুম্নমক ঈশিংনা মরম ওইরগা লৈপাক নিংখায়বগী অৱাবা অদু খুঙ্গং অদুনা খঙলি অমসুং তুরেলগী লম্বীসু ওন্থোক-ওনশিন তৌবনা অমাঙ-অতা য়াম্না থোকই। মসি মিৎয়েৎ চঙলদুনা মহাক্না MPLAD ফন্দদগী মসিগী সাইন্তিফিক ওইবা থিজিন-হুমজিন্নবগীদমক পাত্নাগী আর্যভট্ট নোলেজ য়ুনিভর্সিতীদা তুরেলগী মরমদা থিজিনবগী সেন্তর অমা হাংদোকহনখি। পাত্নাগী চন্দ্রগুপ্ত মেনেজমেন্ত ইন্সতিত্যুত্তা মহাক্না বিজনেস ইনক্যুবেশন এন্দ ইনোভেশন সেন্তর অমা শেমগৎলি। AI গী অসিগুম্বা মতমসিদা মগধ য়ুনিভর্সিতীদা আর্তিফিসিএল ইন্তেলিজেন্স সেন্তর অমা শেমখ্রে। হায়বদি MPLAD ফন্দ অসি লম্বী অমদা করম্না থবক তৌবা য়াই হায়বগী খুদম অমা অদোম্না উৎখ্রে।

ইকায় খুম্নরবা সভাপতি জী,

ঐখোয় পুম্নমক্না খঙই মদুদি মীওইবনা মখোয়গী খুঙ্গং থাদোক্তুনা অতোপ্পা সহর অমদা চৎপা মতমদা, পুন্সিদা খুঙ্গংগা লৈনবা মরী অদু তপ্না তপ্না মুত্থৎলকই। হরিবংশ জীগী পুন্সিদি ঙসি ফাওবা খুঙ্গংগা মরী লৈনদুনা লৈরি, মহাক্কী মশাগী খুঙ্গংগা মরী লৈনদুনা লৈরি। মহাক্না মফম অদুগী অৱা-নুংঙাই পুম্নমক্তা শরুক য়াদুনা মহাক্না করি মতেং পাংবা য়াবগে হায়বদু পাংদুনা লাক্লি।

ইকায় খুম্নরবা সভাপতি জী,

ঐখোয়না হৌজিক ফম্লিবা পার্লিয়ামেন্তকী অনৌবা শঙলেন অসি শাবগী থবক চত্থরিঙৈ মতমদা, ঐহাক্না মহাক্কা লোয়ননা নক্না থবক তৌবগী খুদোংচাবা অমা ফংখি। অমসুং ঐহাক্না খঙখি মদুদি ঐহাক্কী পুক্নিংদা লাকপা ৱাখল্লোনশিং অদু ঐহাক্না হরিবংশ জীদ হায়রগা, ঐখোয়না অসিগুম্না তৌরবদি করম ওইগনি হায়না হংবা মতমদা, মহাক্না নুমীৎ নিনিগী মনুংদা মদু নীংথিনা লোইশিন্দুনা পুরক্লম্মি; মফমশিংগী মিং থোনবা ওইগেরা, সভা অসিগী শকলোন করম্না শেমগদগে হায়ববু ওইগেরা, হায়বদি সভা অসি শেমগৎপদা, মসিগী আর্ত গেলরীশিংদা, তোঙান-তোঙানবা থোঙশিংগী মিং থোনবদা মহাক্কী চাউরবা মতেঙ য়াওখি; হায়বদি মওং পুম্নমক্তা ঐহাক্কী মরুপ অমা ওইনা ঐখোয় অনিমক্না থবক তৌখিবা অদু অমসুং অসিগুম্বা থবক তৌবগী খঙ-হৈবা অদু ঐহাক্কী ওইনা য়াম্না নুংঙাইবা অমা ওইখি।

ইকায় খুম্নরবা সভাপতি জী,

হরিবংশ জীনা সভা অসি চলাইবগী হৈথোই-শিংথোইবা অদুদি ঐখোয়না নীংথিনা উখ্রে, অদুবু মহাক্না লৈবাক অসিগী রাজ্যশিংগী লেজিস্লেতিব এসেমব্লীশিং, লেজিস্লেতিব কাউন্সিলশিং অমসুং মফম অদুগী প্রিসাইদিং ওফিসারশিংদসু করম্না মতেঙ পাংগদগে, মখোয়গী মথৌ তাবা ত্রেনিংগী থবকশিং করম্না পাঙথোকগদগে হায়বদুদা য়াম্না মতম পীবিখি অমসুং মখোয়গীদমক লেপ্তনা মতম পীবিখি। কমনৱেল্থ পার্লিয়ামেন্তরী এসোসিয়েসন্দসু মহাক্না ভারতকী গনতন্ত্রগী মওং-মতৌগী মমি তাহনবদা য়াম্না চাউবা থৌদাং অমা লৌখ্রে। ঐহাক্না মপুং ফানা থাজৈ মদুদি ২১শুবা চহিচাগী অনিশুবা ক্বার্তর অসিদা সভা অসিনা য়াম্না মতেঙ পাংগদবনি। লৈবাক অসিবু চাওখৎপগী লম্বীদা পুখৎনবদা, চাওখৎপগী পান্দমশিং ফংনবদা, সভা অসিনা থবক য়াম্না তৌরক্কনি হায়না ঐহাক্না থাজৈ অমসুং মসিগী মরম্না প্রিসাইদিং ওফিসার পুম্নমক্কী থৌদাং অসি য়াম্না চাউই। ঐখোয় পুম্নমক্না অচৌবা থাজবগা লোয়ননা হায়বা ঙম্মি মদুদি মরুপ পুম্নমক্না অদোম্না পাম্লিবা অদু মপুং ফাহনবদা মতেঙ পাংগনি অমসুং অদোমগী থবক লায়থোকহন্নবা হোৎনগনি মদুনা অদোম্না হেন্না অফবা মহৈ পুরকপা ঙমগনি অমসুং পুম্নমক্না মসি তৌগনি হায়না ঐহাক্না থাজৈ অমসুং ঐহাক্না হান্নসু হায়খিবগুম্না পুম্নমক অসি হরিগী থৌজাওদগীনি অমসুং হরি অসি মফম অসিগীসুনি, হরি অসি মফম অদুগীসুনি অমসুং হরি অসি মফম অসিদসু ফমগনি। মরম অদুনা হরিগী থৌজাল অসি লেপ্তনা লৈবা ওইরসনু। অসিগুম্বা থাজবা অমগা লোয়ননা অদোমগী মফমদা ঐহাক্না য়াইফ-পাউজেল পীজরি।

হন্না হন্না থাগৎচরি‍।

***