ಕೇಂದ್ರ ವಸತಿ ಮತ್ತು ನಗರ ವ್ಯವಹಾರಗಳ ಸಚಿವರಾದ ಶ್ರೀ ಮನೋಹರ್ ಲಾಲ್ ಅವರು ಇಂದು ನವದೆಹಲಿಯಲ್ಲಿ "ನಗರ ಸವಾಲು ನಿಧಿ (ಯುಸಿಎಫ್)" ಇದರ ಕಾರ್ಯಾಚರಣಾ ಶಿಷ್ಟಾಚಾರಗಳ ಮಾರ್ಗಸೂಚಿಗಳನ್ನು ಕ್ರೆಡಿಟ್ ಮರುಪಾವತಿ ಗ್ಯಾರಂಟಿ ಉಪ-ಯೋಜನೆ (ಸಿಆರ್‌ಜಿಎಸ್‌ಎಸ್) ಜೊತೆಗೆ ಬಿಡುಗಡೆ ಮಾಡಿದ್ದಾರೆ, ಇದು ದೇಶದಲ್ಲಿ ನಗರ ಮೂಲಸೌಕರ್ಯ ಹಣಕಾಸು ಪರಿವರ್ತಿಸುವ ಮಹತ್ವದ ಹೆಜ್ಜೆಯಾಗಿದೆ.

ಮಧ್ಯಪ್ರದೇಶ, ಗುಜರಾತ್ ಮತ್ತು ಒಡಿಶಾ ಸೇರಿದಂತೆ ವಿವಿಧ ರಾಜ್ಯಗಳ ಪ್ರತಿನಿಧಿಗಳು ಈ ಕಾರ್ಯಕ್ರಮದಲ್ಲಿ ಭಾಗವಹಿಸಿದ್ದರು. ಮಧ್ಯಪ್ರದೇಶದ ಮುಖ್ಯಮಂತ್ರಿ ಶ್ರೀ ಮೋಹನ್ ಯಾದವ್ ಮತ್ತು ಒಡಿಶಾದ ಮುಖ್ಯಮಂತ್ರಿ ಶ್ರೀ ಮೋಹನ್ ಚರಣ್ ಮಾಝಿ ಅವರು ವಿಡಿಯೋ ಸಮಾವೇಶಗಳ ಮೂಲಕ ಸಭೆಯನ್ನುದ್ದೇಶಿಸಿ ಮಾತನಾಡಿದರು.

ಸಭೆಯನ್ನುದ್ದೇಶಿಸಿ ಮಾತನಾಡಿದ ಕೇಂದ್ರ ಸಚಿವರಾದ ಶ್ರೀ ಮನೋಹರ್ ಲಾಲ್ ಅವರು, ನಗರಾಭಿವೃದ್ಧಿಗೆ ಭಾರತದ ವಿಧಾನದಲ್ಲಿ "ನಗರ ಸವಾಲು ನಿಧಿ (ಅರ್ಬನ್ ಚಾಲೆಂಜ್ ಫಂಡ್ - ಯುಸಿಎಫ್)" ಒಂದು ಮಾದರಿ ಬದಲಾವಣೆಯನ್ನು ಪ್ರತಿನಿಧಿಸುತ್ತದೆ ಎಂದು ಹೇಳಿದರು. ಈ ನಿಧಿಯು ಕೇವಲ ಅನುದಾನಗಳನ್ನು ಒದಗಿಸುವುದಲ್ಲ, ಬದಲಾಗಿ ಗಮನಾರ್ಹವಾಗಿ ದೊಡ್ಡ ಹೂಡಿಕೆಗಳನ್ನು ವೇಗವರ್ಧಿಸಲು ಮತ್ತು ನಗರಗಳನ್ನು ಆರ್ಥಿಕವಾಗಿ ಬಲಿಷ್ಠಗೊಳಿಸಲು ಮತ್ತು ಹೂಡಿಕೆಗೆ ಸಿದ್ಧವಾಗಿಸಲು ಸಾರ್ವಜನಿಕ ನಿಧಿಯನ್ನು ಬಳಸಿಕೊಳ್ಳುವ ಬಗ್ಗೆ ಎಂದು ಅವರು ಒತ್ತಿ ಹೇಳಿದರು.

ಭಾರತದ ನಗರಗಳು ಆರ್ಥಿಕ ಬೆಳವಣಿಗೆ, ನಾವೀನ್ಯತೆ ಮತ್ತು ಉದ್ಯೋಗ ಸೃಷ್ಟಿಯ ಯಂತ್ರಗಳಾಗಿ ಹೊರಹೊಮ್ಮುತ್ತಿವೆ ಎಂದು ಸಚಿವರು ವಿವರಿಸಿದರು. 2047 ರಲ್ಲಿ ವಿಕಸಿತ ಭಾರತ ಪರಿಕಲ್ಪನೆಯ ದೃಷ್ಟಿಕೋನವನ್ನು ಸಾಧಿಸುವುದು ನಗರಗಳನ್ನು ಎಷ್ಟು ಪರಿಣಾಮಕಾರಿಯಾಗಿ ಯೋಜಿಸಲಾಗಿದೆ, ಹಣಕಾಸು ಒದಗಿಸಲಾಗಿದೆ ಮತ್ತು ಆಡಳಿತ ಮಾಡಲಾಗುತ್ತದೆ ಎಂಬುದರ ಮೇಲೆ ಅವಲಂಬಿತವಾಗಿರುತ್ತದೆ. ಅಮೃತ್, ಸ್ವಚ್ಛ ಭಾರತ್ ಮಿಷನ್ ಮತ್ತು ಸ್ಮಾರ್ಟ್ ಸಿಟೀಸ್ ಮಿಷನ್‌ ನಂತಹ ಉಪಕ್ರಮಗಳು ನಗರ ಮೂಲಸೌಕರ್ಯವನ್ನು ಬಲಪಡಿಸಿವೆ, ಆದರೆ ಮುಂದಿನ ಹಂತದಲ್ಲಿ ನಗರಗಳು ಇನ್ನೂ ಹೂಡಿಕೆಗೆ ಸಿದ್ಧವಾಗಬೇಕು ಮತ್ತು ಆರ್ಥಿಕವಾಗಿ ಇನ್ನೂ ಸುಸ್ಥಿರವಾಗಬೇಕು ಎಂದು ಅವರು ಹೇಳಿದರು.

₹1 ಲಕ್ಷ ಕೋಟಿ ಒಟ್ಟು ಕೇಂದ್ರ ನೆರವಿನೊಂದಿಗೆ  "ನಗರ ಸವಾಲು ನಿಧಿ (ಅರ್ಬನ್ ಚಾಲೆಂಜ್ ಫಂಡ್ - ಯುಸಿಎಫ್)" ಅನ್ನು ಮಾರುಕಟ್ಟೆ ಆಧಾರಿತ ಹಣಕಾಸಿನ ಮೂಲಕ ಸುಮಾರು ನಾಲ್ಕು ಪಟ್ಟು ಹೂಡಿಕೆಯನ್ನು ಸಜ್ಜುಗೊಳಿಸಲು ವೇಗವರ್ಧಕ ಸಾಧನವಾಗಿ ವಿನ್ಯಾಸಗೊಳಿಸಲಾಗಿದೆ ಎಂದು ಸಚಿವರು  ಹೇಳಿದರು.  ಕೇಂದ್ರದ ಸಹಾಯವನ್ನು ಯೋಜನಾ ವೆಚ್ಚದ 25% ಗೆ ಸೀಮಿತಗೊಳಿಸಲಾಗುವುದು, ಆದರೆ ಕನಿಷ್ಠ 50% ಹಣವನ್ನು ಪುರಸಭೆಯ ಬಾಂಡ್‌ಗಳು, ಬ್ಯಾಂಕ್ ಸಾಲಗಳು ಮತ್ತು ಸಾರ್ವಜನಿಕ-ಖಾಸಗಿ ಸಹಭಾಗಿತ್ವದ ಮೂಲಕ ಸಂಗ್ರಹಿಸಲಾಗುವುದು ಎಂದು ಅವರು ಹೇಳಿದರು, ಇದರಿಂದಾಗಿ ಆರ್ಥಿಕ ಶಿಸ್ತು ಮತ್ತು ಖಾಸಗಿ ಭಾಗವಹಿಸುವಿಕೆಯನ್ನು ಉತ್ತೇಜಿಸಲಾಗುತ್ತದೆ.

ಒಟ್ಟು ವೆಚ್ಚದಲ್ಲಿ, ₹90,000 ಕೋಟಿ ಯೋಜನೆಗಳಿಗೆ, ₹5,000 ಕೋಟಿ ಯೋಜನಾ ಸಿದ್ಧತೆ ಮತ್ತು ಸಾಮರ್ಥ್ಯ ವೃದ್ಧಿಗೆ ಮತ್ತು ₹5,000 ಕೋಟಿ ಸಾಲ ಮರುಪಾವತಿ ಖಾತರಿ ಉಪ-ಯೋಜನೆಗೆ ಮೀಸಲಿಡಲಾಗಿದೆ ಎಂದು ಸಚಿವರು ಮಾಹಿತಿ ನೀಡಿದರು. ಸಿ.ಆರ್.ಜಿ.ಎಸ್.ಎಸ್. ವಿಶೇಷವಾಗಿ ಶ್ರೇಣಿ-II ಮತ್ತು ಶ್ರೇಣಿ-III ನಗರಗಳು ಮತ್ತು ಗುಡ್ಡಗಾಡು ಮತ್ತು ಈಶಾನ್ಯ ಪ್ರದೇಶಗಳ ನಗರಗಳು ಸೇರಿದಂತೆ ಸಣ್ಣ ನಗರಗಳಿಗೆ ಸಾಲ ಖಾತರಿಗಳ ಮೂಲಕ ಮಾರುಕಟ್ಟೆ ಆಧಾರಿತ ಹಣಕಾಸು ಪಡೆಯಲು ಅನುವು ಮಾಡಿಕೊಡುತ್ತದೆ. 

ಹಳೆಯ ನಗರ ಪ್ರದೇಶಗಳು ಮತ್ತು ಮಾರುಕಟ್ಟೆಗಳ ಪುನರಾಭಿವೃದ್ಧಿ, ನಗರ ಚಲನಶೀಲತೆ ಮತ್ತು ಕೊನೆಯ ಮೈಲಿ ಸಂಪರ್ಕ, ಮೋಟಾರೀಕೃತವಲ್ಲದ ಸಾರಿಗೆ, ನೀರು ಮತ್ತು ನೈರ್ಮಲ್ಯ ಮೂಲಸೌಕರ್ಯ ಮತ್ತು ಹವಾಮಾನ-ಸ್ಥಿತಿಸ್ಥಾಪಕ ನಗರ ಅಭಿವೃದ್ಧಿಯಂತಹ ಪ್ರಮುಖ ವಲಯಗಳಲ್ಲಿ ಪರಿವರ್ತನಾ ಯೋಜನೆಗಳನ್ನು ನಿಧಿ ಬೆಂಬಲಿಸುತ್ತದೆ ಎಂದು ಕೇಂದ್ರ ಸಚಿವ ಶ್ರೀ ಮನೋಹರ್ ಲಾಲ್ ಅವರು ಒತ್ತಿ ಹೇಳಿದರು.  ದೀರ್ಘಾವಧಿಯ ಆರ್ಥಿಕ ಮತ್ತು ಸಾಮಾಜಿಕ ಪ್ರಯೋಜನಗಳನ್ನು ನೀಡಬಲ್ಲ ಸ್ಕೇಲೆಬಲ್, ಪರಿಣಾಮಕಾರಿ ಮತ್ತು ಬ್ಯಾಂಕಬಲ್ ಯೋಜನೆಗಳ ಮೇಲೆ ಗಮನ ಕೇಂದ್ರೀಕರಿಸಲಾಗುವುದು ಎಂದು ಅವರು ತಿಳಿಸಿದರು.

ನಗರ ಸ್ಥಳೀಯ ಸಂಸ್ಥೆಗಳ (ಯುಎಲ್‌ಬಿ) ಪಾತ್ರವನ್ನು ಎತ್ತಿ ತೋರಿಸಿದ ಸಚಿವರು, ನಗರಗಳು ತಮ್ಮ ಆರ್ಥಿಕ ಸಾಮರ್ಥ್ಯವನ್ನು ಬಲಪಡಿಸಲು, ಸುಧಾರಣೆಗಳನ್ನು ಅಳವಡಿಸಿಕೊಳ್ಳಲು ಮತ್ತು ಮಾರುಕಟ್ಟೆ ಆಧಾರಿತ ಹಣಕಾಸು ಕಾರ್ಯವಿಧಾನಗಳಲ್ಲಿ ಸಕ್ರಿಯವಾಗಿ ಭಾಗವಹಿಸಲು ಪ್ರೋತ್ಸಾಹಿಸಲಾಗುವುದು ಎಂದು ಹೇಳಿದರು. ಅರ್ಬನ್ ಚಾಲೆಂಜ್ ಫಂಡ್ ಅನ್ನು ಕೇವಲ ಒಂದು ಯೋಜನೆಯಾಗಿ ನೋಡದೆ ಜಾಗತಿಕವಾಗಿ ಸ್ಪರ್ಧಾತ್ಮಕ, ಸ್ಥಿತಿಸ್ಥಾಪಕ ಮತ್ತು ಹೂಡಿಕೆಗೆ ಸಿದ್ಧವಾಗಿರುವ ನಗರಗಳನ್ನು ನಿರ್ಮಿಸುವ ಅವಕಾಶವಾಗಿ ನೋಡಬೇಕೆಂದು ಅವರು ರಾಜ್ಯಗಳು ಮತ್ತು ಯು.ಎಲ್‌.ಬಿ.ಗಳನ್ನು ಒತ್ತಾಯಿಸಿದರು.

ವಸತಿ ಮತ್ತು ನಗರ ವ್ಯವಹಾರಗಳ ಸಚಿವಾಲಯದ ಕಾರ್ಯದರ್ಶಿ ಶ್ರೀ ಶ್ರೀನಿವಾಸ್ ಕಟಿಕಿಥಲ ಅವರು ತಮ್ಮ ಹೇಳಿಕೆಗಳಲ್ಲಿ, ಭಾರತದ ನಗರೀಕರಣವು ನಿರ್ಣಾಯಕ ಹಂತವನ್ನು ಪ್ರವೇಶಿಸುತ್ತಿದೆ ಎಂದು ಹೇಳಿದ್ದಾರೆ. ಅರ್ಬನ್ ಚಾಲೆಂಜ್ ಫಂಡ್ ನಗರ ಮೂಲಸೌಕರ್ಯ ಅಭಿವೃದ್ಧಿಗಾಗಿ ಮಾರುಕಟ್ಟೆ-ಸಂಬಂಧಿತ, ಸುಧಾರಣೆ-ಚಾಲಿತ ಮತ್ತು ಫಲಿತಾಂಶ-ಆಧಾರಿತ ಚೌಕಟ್ಟನ್ನು ಪರಿಚಯಿಸುತ್ತದೆ ಎಂದು ಹೇಳಿದರು.

ಯೋಜನೆಯ ಬ್ಯಾಂಕ್ ವ್ಯವಹಾರಕ್ಕೆ ಹೊಂದಿರುವ (ಬ್ಯಾಂಕಬಿಲಿಟಿ) ಮತ್ತು ಹಣಕಾಸಿನ ಶಿಸ್ತಿನ ಮೇಲೆ ಬಲವಾದ ಒತ್ತು ನೀಡುವಾಗ, ನಿಧಿಯು ಮೂಲಸೌಕರ್ಯ ಸೃಷ್ಟಿಯನ್ನು ಆರ್ಥಿಕ ಸುಸ್ಥಿರತೆ ಮತ್ತು ಸಾಂಸ್ಥಿಕ ಬಲವರ್ಧನೆಯೊಂದಿಗೆ ಜೋಡಿಸುತ್ತದೆ ಎಂದು ಅವರು ಹೇಳಿದರು 

ಅರ್ಬನ್ ಚಾಲೆಂಜ್ ಫಂಡ್‌ ನ ಯಶಸ್ಸು ಕೇಂದ್ರ, ರಾಜ್ಯಗಳು ಮತ್ತು ನಗರ ಸ್ಥಳೀಯ ಸಂಸ್ಥೆಗಳ ನಡುವಿನ ನಿರಂತರ ಸಹಯೋಗದ ಜೊತೆಗೆ ಸುಧಾರಣೆಗಳ ಪರಿಣಾಮಕಾರಿ ಅನುಷ್ಠಾನ ಮತ್ತು ಸಾಮರ್ಥ್ಯ ನಿರ್ಮಾಣ ಉಪಕ್ರಮಗಳ ಮೇಲೆ ಅವಲಂಬಿತವಾಗಿರುತ್ತದೆ ಎಂದು ಅವರು ಗಮನಿಸಿದರು.

ಯುಸಿಎಫ್ ಪರಿಣಾಮಕಾರಿ ಅನುಷ್ಠಾನಕ್ಕೆ ಅನುಕೂಲವಾಗುವಂತೆ ನಗರಗಳನ್ನು ಹಣಕಾಸು ಸಂಸ್ಥೆಗಳು, ಬ್ಯಾಂಕುಗಳು ಮತ್ತು ಕ್ರೆಡಿಟ್ ರೇಟಿಂಗ್ ಏಜೆನ್ಸಿಗಳೊಂದಿಗೆ ಸಂಪರ್ಕಿಸುವ ಇ-ಡೈರೆಕ್ಟರಿಯನ್ನು ಸಹ ಈ ಸಂದರ್ಭದಲ್ಲಿ ಪ್ರಾರಂಭಿಸಲಾಯಿತು.

ವಸತಿ ಮತ್ತು ನಗರ ವ್ಯವಹಾರಗಳ ಸಚಿವಾಲಯ ಮತ್ತು ಎಲ್ಲಾ ರಾಜ್ಯಗಳ ನಡುವೆ ತಿಳುವಳಿಕೆ ಒಪ್ಪಂದಕ್ಕೆ (ಎಂಒಯು) ಡಿಜಿಟಲ್ ಸಹಿ ಹಾಕಲಾಯಿತು, ಇದು ಅರ್ಬನ್ ಚಾಲೆಂಜ್ ಫಂಡ್‌ನ ಪರಿಣಾಮಕಾರಿ ಅನುಷ್ಠಾನಕ್ಕೆ ಸಹಯೋಗದ ಬದ್ಧತೆಯನ್ನು ಪುನರುಚ್ಚರಿಸಿತು.

ಇದರ ಜೊತೆಗೆ, ಶೈಕ್ಷಣಿಕ ಮತ್ತು ಸಂಶೋಧನಾ ಸಂಸ್ಥೆಗಳು ಮತ್ತು ಸಾಮರ್ಥ್ಯ ನಿರ್ಮಾಣ ಕೇಂದ್ರಗಳು, ಬ್ಯಾಂಕ್‌ಗಳು, ಎನ್‌ಬಿಎಫ್‌ಸಿಗಳು, ಅಂತರರಾಷ್ಟ್ರೀಯ ಹಣಕಾಸು ಸಂಸ್ಥೆಗಳು, ಕ್ರೆಡಿಟ್ ರೇಟಿಂಗ್ ಏಜೆನ್ಸಿಗಳು ಮತ್ತು ಮರ್ಚೆಂಟ್ ಬ್ಯಾಂಕರ್‌ಗಳು ಸೇರಿದಂತೆ ಹಣಕಾಸು ಸಂಸ್ಥೆಗಳು, ಹಾಗೆಯೇ ಖಾಸಗಿ ವಲಯದ ಸಂಸ್ಥೆಗಳು ಸೇರಿದಂತೆ ಪ್ರಮುಖ ಪಾಲುದಾರರೊಂದಿಗೆ ಉದ್ದೇಶ ಪತ್ರಗಳನ್ನು (ಎಲ್‌ಒಐ) ಡಿಜಿಟಲ್ ರೂಪದಲ್ಲಿ ಸಹಿ ಮಾಡಲಾಯಿತು, ಇದು ಹಣಕಾಸು, ಸಾಮರ್ಥ್ಯ ವೃದ್ಧಿ ಮತ್ತು ನಗರ ಪರಿವರ್ತನೆ ಯೋಜನೆಗಳ ಕಾರ್ಯಗತಗೊಳಿಸುವಿಕೆಗಾಗಿ ಸಮಗ್ರ ಪರಿಸರ ವ್ಯವಸ್ಥೆಯನ್ನು ಬೆಳೆಸುವತ್ತ ಮಹತ್ವದ ಹೆಜ್ಜೆಯಾಗಿದೆ.

ನಗರ ಸವಾಲು ನಿಧಿಯನ್ನು ಹಣಕಾಸು ವರ್ಷ 2025–26 ರಿಂದ ಹಣಕಾಸು ವರ್ಷ 2030–31 ರವರೆಗೆ ಜಾರಿಗೆ ತರಲಾಗುವುದು, ಇದು ನಗರಗಳನ್ನು ಹೊಸ ಬೆಳವಣಿಗೆಯ ಕೇಂದ್ರಗಳಾಗಿ ಮತ್ತು ಭಾರತದ ನಗರ ಭವಿಷ್ಯದ ಚಾಲಕರನ್ನಾಗಿ ಪರಿವರ್ತಿಸುವ ಗುರಿಯನ್ನು ಹೊಂದಿದೆ.

*****