প্রধানমন্ত্রীগী লোইশঙ
প্রধান মন্ত্রী শ্রী নরেন্দ্র মোদীনা দিল্লী-দেহরাদুন ইকোনোমিক কোরিদোর শঙ্গাখ্রে
ঙসি শঙ্গারিবা দিল্লী-দেহরাদুন ইকোনোমিক কোরিদোর অসি মালেমগী থাক্কী ইনফ্রাস্ত্রকচর প্রোজেক্ত অমনি মসিনা কন্নেক্তিবিতী হেন্না চেৎশিলহল্লগনি, ইকোনোমী অমসুং তুরিজম হেনগৎহল্লগনি: পি.এম.
উত্তরাখন্দ শেমখিবা চহি ২৫ মপুং ফারকপগা লোয়ননা হৌজিক ২৬শুবা চহিদা চংশিল্লি; ঙসি দিল্লী-দেহরাদুন এক্সপ্রেসৱে শঙ্গাবগা লোয়ননা অতোপ্পা মরুওইবা মাইলস্তোন অমা হাপ্লে: পি.এম.
দেহরাদুন-দিল্লী ইকোনোমিক কোরিদোরনা লমদম পুম্বদা অহোংবা পুরক্কনি: পি.এম.
কোরিদোর অসিনা মতম কনবা ঙমগনি, চৎথোক-চৎশিন তৌবদা শেল চংবা হন্থহনগনি অমসুং থুগৎহল্লগনি, পেত্রোল অমসুং দিজলদা মীয়াম্না হন্থনা চাদিং তৌরগনি, অমসুং গারী ভরাশিং অমসুং ফ্রেতকী মমল হন্থরগনি; মসিনা থবক ফংহনবদা মতেং ওইগনি: পি.এম.
ঐখোয়গী চীংশিং, উমংগী লমশিং, দেবভুমিগী হেরিতেজ অসি য়াম্না শেংলবা মফমশিংনি; অসিগুম্বা মফমশিং অসি লুনান্না থম্বা হায়য়া অসি ঐখোয়গী থৌদাংনি: পি.এম.
হায়রিবা মফমশিং অসিদা প্লাস্তিক বোতলশিং, অমোৎ-অকৈ পৈশিন্দুনা লৈবা অসিনা দেবভুমিগী অশেংবা মগুন অদু শোকহল্লি; দেবভুমিগী মফমশিং অসি, ঐখোয়গী লাই খুরুমফমশিং অসি ঐখোয়না শেংদোকপা অমসুং ফজনা থম্বা অসি য়াম্না মরু ওই: পি.এম.
থাগৎখিবা:
14 APR 2026 4:10PM by PIB Imphal
প্রধান মন্ত্রী শ্রী নরেন্দ্র মোদীনা ঙসি দিল্লী-দেহরাদুন ইকোনোমিক কোরিদোর শঙ্গাখ্রে, মসি উত্তরাখন্দ অমসুং ঙমখৈগী লমদম অসিগী চাউখৎ-থৌরাংগী মরুওইবা তাঙ্কক অমনি। দেহরাদুনদা পাংথোকপা থৌরম অমদা ৱা ঙাংলদুনা, প্রধান মন্ত্রীনা লৈবাক অসিগী মীয়ামদা বাইশাখি, বোহগ বিহু অমসুং পুথন্দুগী য়াইফ-পাউজেল পীখি, শঙ্গাবগী থৌরম অসি ভারত শিনবা থুংনা পাংথোক্লিবা হরাও-কুহ্মৈগী মতমগা পুন্না তারি হায়না মহাক্না ফোংদোকখি।
দেবভুমিগী অশেংবা লমদম অসিদা ইকায় খুম্নবা উৎলদুনা, প্রধান মন্ত্রীনা হায়খি মদুদি য়ামুনোত্রি, গঙ্গোত্রি, কেদরনাথ অমসুং বাদ্রীনাথ কোনশিনশিল্লিবা চার ধাম য়াত্রা লাক্কদৌরিবা নুমিৎ খরনি অসিদা হৌরগনি, লৈবাক শিনবা থুংনা মীওই লাখ কয়ানা অচেৎপা ভক্তিগা লোয়ননা ঙাইরিবা মীকুপ অমনি। মহাক্না পঞ্চ বদ্রি, পঞ্চ কেদার, পঞ্চ প্রয়াগ অমসুং লমদম অসিগী ইকাই খুম্নরবা লাইশিং, মা সঙ্কৎলা অমসুং মা দাত কালী য়াওনা মখোয়গী লাইশঙদা থৌরম অদুগী মমাংদা চৎখি। প্রধান মন্ত্রীনা হায়খি, "মমা দাত কালীগী য়াইফ-মঙ্গোলনা অসিগুম্বা চাউরবা প্রোজেক্ত অমা লোইশিনবদা অচৌবা শক্তি অমা ওইখি।"
দা. বি.আর. অম্বেদকরগী মপোক কুমওন্দা, প্রধান মন্ত্রীনা বাবা সাহেবতা লৈবাক পুম্বগী মায়কৈদগী ইকায় খুম্নবা উৎখি। লাইরবশিং অমসুং শোত্থরবশিংগীদমক অচুম্বা ৱায়েল পীনবা অম্বেদকরনা পুন্সি চুপ্পা হোৎনখিবা অদু পল্লদুনা মহাক্না হায়খি মদুদি হৌখিবা চহি তরা অসিদা সরকারগী পোলিসীশিংনা সংবিধানগী মগুনশিং ঙাক্নবা হোৎনখি। "উত্তরাখন্দনা য়ুনিফোর্ম সিবিল কোদকী সংবিধানগী অপাম্বা অসি মাংলোমদা পুখৎতুনা লৈবাক পুম্বদা লম্বী তাক্লে," হায়না পি.এম. মোদীনা ফোংদোকখি।
উত্তরাখন্দনা রাজ্য অমা ওইরকপগী চহি ২৬শুবা চহিদা চংশিল্লক্লিবা অসিগী মতাংদা পল্লদুনা, প্রধান মন্ত্রীনা চহিচা অসিগী অহুমশুবা দিকেদ অসি উত্তরাখন্দগী দিকেদ ওইগনি হায়না মহাক্না মমাংদা ফোংদোকখিবা অদু নীংশিংখি। হৌজিক লৈরিবা সরকার অসিগী পোলিসীশিং অমসুং মীয়াম্না কন্না হোৎনবনা নহা ওইরিবা রাজ্য অসিনা মাগী চাউখৎ থৌরাংদা অনৌবা দাইমেন্সনশিং হাপচিল্লি হায়না মহাক্না ফোংদোকখি। শ্রী মোদীনা হায়খি মদুদি “এক্সপ্রেসৱে অসিনা উত্তরাখন্দগী চাউখৎ-থৌরাংদা অনৌবা ইনোৎ পীরগনি”।
প্রধান মন্ত্রীনা হায়খি মদুদি লৈবাক অমগী তুংলমচৎ অসি মাগী লম্বীশিং, হাইৱেজশিং, এক্সপ্রেসৱেজশিং, এয়রৱেজশিং, রেলৱেজশিং অমসুং ৱাতরৱেজশিংদা ইরি। লৈবাক অসিদা ইনফ্রাস্ত্রকচর দিবেলপমেন্তকী মমাংদা অমুক্তা ওইখিদ্রিবা খোঙজেল অদু পল্লদুনা মহাক্না হায়খি মদুদি ২০১৪গী মমাংদা ইনফ্রাস্ত্রকচরদা চংবা শেনফম অসি চহি অমদা লুপা করোর লাখ ২গী মখাদা লৈরম্বগা লোয়ননা হৌজিক্তি মসি শরুক তরুক হেনগৎলদুনা চহিগী ওইনা লুপা করোর লাখ ১২ হেনখ্রে। শ্রী মোদীনা হায়খি, "উত্তরাখন্দ খক্তদা লুপা করোর লাখ ২.২৫ হেনবগী ইনফ্রাস্ত্রকচর প্রোজেক্তশিং হৌজিক পায়খৎলি।"
দিল্লী-নোংচুপ থংবা য়ু.পি.-উত্তরাখন্দ লমদমদা হৌজিত্তি ওইরক্লিবা চাউখৎ-থৌরাংশিংগী মতাংদা পল্লদুনা প্রধান মন্ত্রীনা অতেনবা মতমগী মনুংদা দিল্লী মেত্রো পাকথোক চাউথোকহনবা, মীরুত্তা মেত্রো সর্বিসশিং হৌদোকপা, দিল্লী-মীরুত নমো ভারত রেল হৌদোকপা, নোইদা ইন্তর্নেস্নেল এয়রপোর্ত অমসুং এম.আর.ও. ফেসিলিতী হৌদোকখিবা অদু পনখি। শ্রী মোদীনা হায়খি, "লৈবাক শিনবা থুংনা ইনফ্রাস্ত্রকচর শেমগৎপগী পাক চাউবগী চাং অদু খল্লু, হায়রিবা অপীকপা মফম অসিদা থোক্লিবা অসি মদুগী শরুক খরা খক্তনি।"
দিল্লী-দেহরাদুন ইকোনোমিক কোরিদোরগী অহোংবা পুরকপা কান্নবশিংগী মতাংদা পল্লদুনা, প্রধান মন্ত্রীনা প্রোজেক্ত অসিনা লমদম অসিদা পীরিবা মল্তি-দাইমেন্সনেল ইম্পেক্তকী মতাংদা পনখি। এক্সপ্রেসৱে অসিনা চৎথোক-চৎশিন তৌবদা চংগদবা মতম অমসুং শেল য়াম্না হন্থহল্লগনি হায়না মহাক্না ফোংদোকখি। মসিনা ফ্যুল য়াম্না কনবা ঙমগনি অমসুং ফ্রেত চার্জ হন্থহল্লগনি। মসি শেমগৎপদা হান্নদগী লুপা করোর ১২,০০০ থাদদুনা প্রোজেক্ত অসিনা থবক ফংহন্নবগী অচৌবা ইঞ্জিন ওইদুনা মসিনা ইঞ্জিনীয়র, শিন্মী অমসুং ত্রান্সপোর্ত ৱার্কর লিশিং কয়াগী হিংনবগী লম্বী ফংহল্লগনি। প্রধান মন্ত্রী মোদীনা মরুওইনা ফোংদোকখি মদুদি লৌমীশিং অমসুং শা-ষন য়োক্লিবশিংসু মখোয়গী পোত্থোকশিং অসি অচৌবা কৈথেলশিংদা হেন্না থুনা য়ৌহন্দুনা কান্নবা ফংলগনি। মহাক্না হায়খি মদুদি গাজিয়াবাদ, বাঘপৎ, বরৌত, শামলি অমসুং সাহরানপুর ফাওদুনা চৎলিবা কোরিদোর অসিনা উত্তর প্রদেশকী শহরশিং অসিসু নৌনা হিংগৎহন্নবা শেম-শারি। শ্রী মোদীনা হায়খি, "মসি লম্বী অমা খক্তা নত্তে, মসিনা লমদম অসিদা ললোন-ইতিক, ইন্দস্ত্রী, গুদাম অমসুং লোজিস্তিক্সকী অনৌবা লম্বীশিং হাংদোক্লি।"
অনৌবা এক্সপ্রেসৱে অসিগী তুরিজমগী ওইথোকপা য়াবশিং অদু পল্লদুনা, প্রধান মন্ত্রীনা হায়খি মদুদি দেহরাদুন, হরিদ্বার, ঋষিকেশ, মুসোরী অমসুং চারধাম সর্কিৎ অসি হেন্না লায়না চৎপা ঙম্লগনি। মহাক্না মখা তাখি মদুদি উত্তরাখন্দ অসি ৱিন্তর তুরিজম, ৱিন্দর স্পোর্তস অমসুং দেস্তিনেসন ৱেদিংশিংগী মরুওইবা মফম অমা ওইরক্লি। উত্তরাখন্দগী শেন্মিৎলোনগীদমক্তা চহি চুপ্পগী ওইবা তুরিজমগী মরুওইবা অদু পল্লদুনা মহাক্না হায়খি মদুদি ৱিন্তর পিলগ্রিমেজশিংনা অদি কৈলাশ অমসুং ওম পার্বতকীদমক লাকপদা চাউনা হেনগৎলকপা উবা ফংখি, চহি ২০২৫দা ৩৬,০০০দা হেনগৎখি অদুগা ৱিন্তর চার ধাম য়াত্রানা ২০২৪দা শরুক য়াখিবা ৮০,০০০দগী ২০২৫দা লাখ ১.৫ হেনগৎখ্রে। শ্রী মোদীনা হায়খি, "তুরিজম চাউখৎলকপা মতমদা, মীপুম খুদিংমক কান্নবা ফংই, হোতেলশিং, ধাবাশিং, তেক্সীশিং, হোম স্তেশিং, অপুনবা লোকেল ইকোনোমীদা খুমাং চাউশিল্লি।"
মহৌশা অমসুং চৎনবীগা লোয়ননা খুমাং চাউশিল্লকপদা সরকারনা অচেৎপা মীৎয়েং থম্লি হায়না পল্লদুনা প্রধান মন্ত্রীনা এক্সপ্রেসৱেগী শরুক অমা ওইনা কিলোমীতর ১২ রোম শাংবা এলিভেতেদ ৱাইল্দলাইফ কোরিদোর অমা শাখিবগী মতাংদা পনখি। দেবভুমিগী চীং অমসুং উমংশিংদা লাকপা তুরিস্তশিং অমসুং তীর্থ য়াত্রীশিংদা মহাক্না হায়খি মদুদি মসিগী অশেংবা মফমশিং অসি লুনান্না থম্নবা অমসুং প্লাস্তিক্কী অমোৎ-অকাই লৈহন্দনবা হোৎনগদবনি। “ইনফ্রাস্ত্রকচরনা মীয়ামদা মতেং পাংলি, লম্লক্কী শা-উচেক অমসুং লমদম অসিগী মহৌশাগী হেরিতেজসু ঙাক-শেন্দুনা থম্নবা ঐখোয়না হোৎনরি”, হায়না শ্রী মোদীনা ফোংদোকখি।
মথং চহিদা হরিদ্ৱারদা পাংথোক্কদৌরিবা কুম্ভ মেলাগী মতাংদা প্রধান মন্ত্রীনা স্তেকহোল্দর পুম্নমক্তা থৌরম অসি পাকচাউবা, ঈশ্বরগী ওইবা অমসুং লুনানবা থৌরম অমা ওইনা পাংথোক্নবা হায়খি। মহাক্না ভারতকী নাৎকী ওইবা ৱাখল্লোনগী হিংলিবা খুদম অমা ওইরিবা নন্দা দেবী রজত য়াত্রাগী মতাংদসু পনখি। মসিদা দেবী নন্দাবু মচানুপী অমা ওইনা ইকায় খুম্নবা উৎলি অমসুং মপুং ফানা ইকায় খুম্নবগা লোয়ননা বিদাই পীরি, মসিদা নুপীশিংনা চাউনা শরুক য়াবা অসিনা মসিবু হেন্না ৱাহন্থোক লৈহল্লি। শ্রী মোদীনা হায়খি, "রজত য়াত্রা অসি থাজবগী খোঙচৎ খক্তা নত্তে, মসি ঐখোয়গী হিংলিবা নাৎকী ওইবা হেরিতেজকী খুদম অমনি।"
নুপীশিংদা শক্তি পীবগী মতাংদা প্রধান মন্ত্রীনা হায়খি মদুদি সরকার অসিনা নুপীশিংগী সেফতী, সেক্যুরিতী অমসুং রাজনিতীগী থৌদাং লৌবদা অচেৎপা থাজবা থম্লি। মহাক্না নীংশিংখি মদুদি চহি তরাগী খুজিং মরিগী মতুংদা, লোক সভা অমসুং রাজ্যগী এসেমব্লীশিংদা নুপীশিংগীদমক চাদা ৩৩গী রিজার্বেসনগী গরেন্তি পীদুনা পার্লিয়ামেন্তনা নরী শক্তি বন্দন অধিনিয়ম পাস তৌখি। মহাক্না হায়খি মদুদি হায়রিবা ৱাফম অসি খুমাং চাউশিলহন্নবা এপ্রিল ১৬তগী পার্লিয়ামেন্ততা অখন্নবা খন্ন-নৈনবগী থৌরম অমা পাংথোক্কনি। দেবভুমিগী লৈহাওদগী রাজনিতী দল পুম্নমক্তা আপিল তৌদুনা মহাক্না মখোয়বু ২০২৯গী জেনরেল ইলেক্সনদগী আইন অসি চৎনবা হৌনবগীদমক এমেন্দমেন্ত অসিবু শৌগৎপীনবা হায়খি। "মসি লৈবাক অসিগী ইচে-ইচল অমসুং ইচানুপী খুদিংমক্কী অপাম্বনি, অমসুং ঐখোয়না মসি অমত্তা ওইনা মপুং ফাহনগদবনি" হায়না শ্রী মোদীনা ফোংদোকখি।
উত্তরাখন্দগী চাউথোকচনীংঙাই ওইরিবা লান্মীগী চৎনবীদা গার্হি কেন্তনমেন্তকী পুৱারী ওইরবা মফমদগী ইকায় খুম্নবা উৎলদুনা, প্রধান মন্ত্রীনা ১৯৬২গী লান্দা রাইফলমেন জসৱান্ত সিংহ রাৱতকুম্বা অথৌবশিংগী থৌনা অদু নীংশিংখি। মহাক্না হান্নগী লান্মীশিংগী য়াইফনবা লৌখৎলিবা খোঙথাং কয়াগী মতাংদা পনখি। মসিগী মনুংদা ৱান রেঙ্ক ৱান পেন্সনগী মখাদা লুপা করোর লাখ ১.২৫গী শেনফম পীবা, ভেতরনশিংগী হকশেলগী স্কিমগী বজেৎ চাদা ৩৬ হেনগৎহনবা, চহি ৭০গী মথক্তা লৈবা হান্নগী লান্মীশিংগীদমক্তা হিদাক-লাংথকশিং য়ুমদা থিনবা, অঙাংশিংগী এজুকেসন গ্রান্ত শরুক অনি হেনগৎহনবা অমসুং নুপীমচাশিংগী লুহোংবগী মতেং লুপা ৫০,০০০দগী লুপা লাখ ১দা হেনগৎহনবা য়াওরি। শ্রী মোদীনা হায়খি, "আর্মদ ফোর্সশিংবু মপাঙ্গল কনখৎহনবা অমসুং ঐখোয়গী জৱানশিংগী ইমুং-মনুংশিংবু ইকায় খুম্নবা অসি সরকার অসিগীদমক্তা নেগোসিএৎ তৌবা য়াদ্রবা মরুওইবা অমনি।"
মহাক্কী ৱারোল লোইশিল্লদুনা, প্রধান মন্ত্রীনা হায়খি মদুদি ভিক্সিত ভারতকী মঙলান অসি চাউখৎপা, মহৌশা অমসুং কলচরবু চপ মান্ননা য়াওহনগদবনি। এক্সপ্রেসৱে অসি শঙ্গাবগীদমক মহাক্না দিল্লী, উত্তর প্রদেশ, উত্তরাখন্দ অমসুং লৈবাক পুম্বগী মীয়ামদা নুংঙাইবা ফোংদোকখি। শ্রী মোদীনা হায়খি, "হীরম খুদিংমক্তা লৈবাকনীংবা, ভক্তি অমসুং চাউখৎ-থৌরাং অসি অমত্তা ওইনা পুনশিনবা অসিনা ঐখোয়না তশেংনা চাউখৎলবা ভারত অমা শেমগৎপা ঙমহনগনি।"
***
(রিলিজ আই.দি.: 2251941)
ভিজিতর কাউন্তর : 10