حکومت نے ملک کے اسٹارٹ اپ ایکو سسٹم کے لیے وینچر اور گروتھ کیپٹل کو متحرک کرنے کے مقصد سے 10,000 کروڑ روپے کے کل فنڈ کے ساتھ اسٹارٹ اپ انڈیا فنڈ آف فنڈز 2.0 کو نوٹیفائی کیا ہے۔

یہ فنڈ اسٹارٹ اپس کے لیے فنڈ آف فنڈز 1.0 کی کامیاب کارکردگی پر مبنی ہے، جسے 2016 میں اسٹارٹ اپ انڈیا ایکشن پلان کے تحت شروع کیا گیا تھا تاکہ فنڈنگ کی کمی کو دور کیا جا سکے اور گھریلو سرمایہ کو فروغ دیا جا سکے۔

اسٹارٹ اپ انڈیا فنڈ آف فنڈز 2.0 کے تحت 16ویں اور 17ویں مالیاتی کمیشن کے ادوار میں اہل متبادل سرمایہ کاری فنڈز میں سرمایہ کاری کے لیے مجموعی طور پر 10,000 کروڑ روپے مختص کیے جائیں گے۔

اس کے تحت سرمایہ کاری ان متبادل سرمایہ کاری فنڈز پر مرکوز ہوگی جو ترجیحی شعبوں کی حمایت کرتے ہیں، جن میں ڈیپ ٹیک اسٹارٹ اپس، ابتدائی ترقی کے مرحلے کے اسٹارٹ اپس (جنہیں چھوٹے متبادل سرمایہ کاری فنڈز کی حمایت حاصل ہو)، ٹیکنالوجی پر مبنی اور اختراعی مینوفیکچرنگ اسٹارٹ اپس، اور مختلف شعبوں یا مراحل سے وابستہ اسٹارٹ اپس شامل ہیں۔

اسٹارٹ اپ انڈیا فنڈ آف فنڈز 2.0 میں متبادل سرمایہ کاری فنڈز کے انتخاب کے لیے ایک منظم طریقہ کار اختیار کیا جائے گا، جس میں اسٹارٹ اپ ایکو سسٹم کے تجربہ کار افراد پر مشتمل وینچر کیپیٹل انویسٹمنٹ کمیٹی کی جانب سے جانچ پڑتال شامل ہوگی۔ اس اسکیم میں مضبوط نگرانی اور جائزہ نظام بھی شامل ہیں، جبکہ ایک بااختیار کمیٹی بھی قائم کی جائے گی جو اسکیم کے نفاذ اور کارکردگی کی نگرانی کرے گی۔ اس کے علاوہ حکومت اور ادارہ جاتی سرمایہ کاروں کی جانب سے مشترکہ سرمایہ کاری کے لیے بھی مناسب گورننس اقدامات کے ساتھ دفعات شامل کی گئی ہیں۔

اسکیم کے آپریشنل رہنما خطوط اور وینچر کیپیٹل سرمایہ کاری کمیٹی کی تشکیل محکمہ برائے فروغ صنعت و داخلی تجارت کی جانب سے جاری کیے جائیں گے۔

اسٹارٹ اپ انڈیا فنڈ آف فنڈز 2.0 سے توقع ہے کہ یہ ہندوستان کی جدت پر مبنی ترقی کے ایجنڈے کو آگے بڑھانے میں اہم کردار ادا کرے گا۔ عالمی سطح پر مسابقتی ٹیکنالوجیوں، مصنوعات اور حل تیار کرنے والے اسٹارٹ اپس کی حمایت کے ذریعے یہ اسکیم معیشت کو مضبوط بنانے، مینوفیکچرنگ صلاحیتوں کو فروغ دینے، معیاری روزگار پیدا کرنے اور ہندوستان کو ایک عالمی جدت مرکز کے طور پر قائم کرنے میں معاون ہوگی۔

اسمال انڈسٹریز ڈیولپمنٹ بینک آف انڈیا اس اسکیم کو نافذ کرنے والی ایجنسی کے طور پر نوٹیفکیشن کی تاریخ سے اس کا آغاز کرے گا، جبکہ ایک اور مقامی نافذ کرنے والی ایجنسی کو بھی اس اسکیم کے نفاذ کے لیے منتخب کیا جائے گا۔

یہ فنڈ سیکیورٹیز اینڈ ایکسچینج بورڈ آف انڈیا کے ساتھ رجسٹرڈ متبادل سرمایہ کاری فنڈز کے سرمایہ میں حصہ ڈالے گا تاکہ وہ مرکزی حکومت کی جانب سے تسلیم شدہ اسٹارٹ اپس میں سرمایہ کاری کر سکیں۔

وِکست بھارت 2047 کے قومی وژن کے مطابق یہ فنڈ حکومت کے اس عزم کی عکاسی کرتا ہے کہ وہ کاروباری افراد کو بااختیار بنائے، جدت کو فروغ دے اور ہندوستان کے اسٹارٹ اپ ایکو سسٹم کی مکمل صلاحیت کو بروئے کار لائے۔

************

ش ح ۔   م  د ۔  م  ص

(U :  5800)