آخری میل تک رسائی اور غریب و محروم علاقوں کی خدمت کے لیے ہندوستانی ریلوے پردھان منتری گتی شکتی نیشنل ماسٹر پلان کے تحت ایک انقلابی توسیعی مہم پر عمل پیرا ہے۔ جامع ترقی اور قومی یکجہتی پر خصوصی توجہ کے ساتھ مالی سال 2025-26 میں نئی لائنوں، ڈبلنگ، ملٹی ٹریکنگ اور دیگر کاموں پر مشتمل 100 ریلوے منصوبوں کی منظوری دی گئی ہے۔

یہ غیر معمولی پیش رفت اس بات کی عکاسی کرتی ہے کہ ہندوستانی ریلوے بہتر رابطہ کاری کے ذریعے ملک کی تنوع بھری اکائیوں کو جوڑنے کے لیے پُرعزم ہے، اور ساتھ ہی ایک اعلیٰ صلاحیت اور مستقبل کے تقاضوں سے ہم آہنگ ریلوے نیٹ ورک کی بنیاد بھی رکھ رہی ہے۔

ان منصوبوں کے تحت مجموعی طور پر 1.53 لاکھ کروڑ روپے کی سرمایہ کاری مختص کی گئی ہے، جو 6,000 کلومیٹر سے زائد ریلوے نیٹ ورک پر محیط ہے۔ یہ ریلوے توسیع کے میدان میں ایک تاریخی سنگِ میل ہے۔ مالی سال 2024-25 کے مقابلے میں—جب 72,869 کروڑ روپے مالیت کے 64 منصوبے منظور ہوئے تھے جو 2,800 کلومیٹر سے زائد پر محیط تھے—منصوبوں کی منظوری میں 56 فیصد اضافہ، روٹ کوریج میں 114 فیصد سے زائد اضافہ اور مالی وابستگی میں 110 فیصد سے زیادہ کا نمایاں اضافہ ہوا ہے۔

ان 100 منظور شدہ منصوبوں میں نئی لائنیں، ڈبلنگ اور ملٹی ٹریکنگ کے کام شامل ہیں، اس کے ساتھ بائی پاس لائنیں، فلائی اوورز اور کورڈ لائنیں بھی شامل ہیں۔ ان منصوبوں کا مقصد مصروف روٹس پر بھیڑ کم کرنا، وقت کی پابندی بہتر بنانا، مسافروں کے تجربے کو بہتر کرنا اور محروم علاقوں تک رابطہ بڑھانا ہے۔ ان اقدامات سے آپریشنل کارکردگی میں نمایاں بہتری اور سفر کے وقت میں کمی متوقع ہے۔

یہ منصوبے تقریباً تمام بڑی ریاستوں میں پھیلے ہوئے ہیں، جس سے ریلوے نیٹ ورک کی متوازن اور جامع توسیع یقینی بنائی جا رہی ہے۔ مہاراشٹر (17 منصوبے)، بہار (11)، جھارکھنڈ (10) اور مدھیہ پردیش (9) اہم ریاستوں کے طور پر سامنے آئے ہیں، کیونکہ یہ مال بردار کوریڈورز، صنعتی رابطہ اور مسافروں کی طلب کے لحاظ سے کلیدی اہمیت رکھتے ہیں۔ ان علاقوں میں سرمایہ کاری کی یہ سطح مسافروں اور مال برداری دونوں خدمات کو نمایاں طور پر بہتر بنائے گی۔

مہاراشٹر، بہار، جھارکھنڈ اور مدھیہ پردیش میں منصوبوں کی زیادہ تعداد فریٹ کوریڈورز کو مضبوط کرے گی، صنعتی روابط کو فروغ دے گی اور مسافروں کی نقل و حرکت کو بہتر بنائے گی۔ یہ ریاستیں ہندوستان کے نقل و حرکت نیٹ ورک کی ریڑھ کی ہڈی ہیں، اور یہاں بہتر رابطہ پورے ملک کی معیشت پر مثبت اثر ڈالے گا۔

پردھان منتری گتی شکتی نیشنل ماسٹر پلان کے تحت یہ منصوبے محض بنیادی ڈھانچے تک محدود نہیں بلکہ سماجی تبدیلی کو بھی فروغ دیتے ہیں۔ خاص طور پر قبائلی اور دور دراز علاقوں میں ریلوے رابطہ بڑھانے پر توجہ دی گئی ہے۔ چھتیس گڑھ میں روگھاٹ–جگدل پور لائن اور جھارکھنڈ و اوڈیشہ میں مختلف کوریڈورز جیسے منصوبے عوام کو مارکیٹ، صحت، تعلیم اور روزگار کے مواقع تک رسائی فراہم کریں گے اور محروم طبقات کو قومی ترقی کے دھارے میں شامل کریں گے۔

مالی نقطۂ نظر سے یہ توسیع بڑے پیمانے پر تبدیلی لانے والی سرمایہ کاری کی عکاسی کرتی ہے۔ 1000 کروڑ روپے سے زائد کے 35 سے زیادہ منصوبے کوریڈور سطح کی ترقی کی بنیاد بن رہے ہیں۔ اہم منصوبوں میں کاسارا–منماڈ تیسری و چوتھی لائن (131 کلومیٹر) تقریباً 10,150 کروڑ روپے، کھارسیا–نیا رائے پور–پرمالکاسا پانچویں و چھٹی لائن (278 کلومیٹر) 8,740 کروڑ روپے سے زائد، اٹارسی–ناگپور چوتھی لائن (297 کلومیٹر) 5,450 کروڑ روپے سے زائد اور سکندرآباد (سنت نگر)–واڈی تیسری و چوتھی لائن (173 کلومیٹر) 5,000 کروڑ روپے سے زائد شامل ہیں۔ یہ منصوبے مجموعی طور پر 28,000 کروڑ روپے سے زیادہ کی سرمایہ کاری پر مشتمل ہیں، جو مصروف مرکزی روٹس کو مضبوط بنانے پر زور کو ظاہر کرتے ہیں۔

یہ منصوبے مشن 3000 ایم ٹی کے تحت کارگو صلاحیت بڑھانے کے لیے ترتیب دیے گئے ہیں۔ توانائی کوریڈورز کو خاص اہمیت دی گئی ہے تاکہ کوئلے اور معدنیات کی تیز تر نقل و حرکت ممکن ہو اور توانائی کی سلامتی مضبوط ہو۔ ہائی ڈینسٹی نیٹ ورک منصوبے اہم روٹس پر بھیڑ کم کریں گے جبکہ ریل ساگر کوریڈور بندرگاہی رابطے اور ساحلی تجارت کو فروغ دے گا۔ یہ تمام اقدامات مجموعی نیٹ ورک کی کارکردگی اور لاجسٹک نظام کو بہتر بنائیں گے۔

یہ بڑی سرمایہ کاری روزگار کے وسیع مواقع پیدا کرے گی، اسٹیل اور سیمنٹ جیسے بنیادی شعبوں میں طلب بڑھائے گی اور ملک بھر میں لاجسٹک لاگت کم کرے گی۔ جیسے جیسے یہ منصوبے آگے بڑھیں گے، ریلوے کی صلاحیت میں اضافہ ہوگا، خدمات میں بہتری آئے گی اور یہ ہندوستان کی معاشی ترقی کے لیے ایک مضبوط محرک ثابت ہوں گے۔ یہ محض تدریجی پیش رفت نہیں بلکہ ہندوستان اپنی آئندہ معاشی جست کے لیے بنیاد رکھ رہا ہے۔

************

ش ح ۔   م  د ۔  م  ص

(U :5741  )